Ioane 15.9-17

Täpati 06 no Më 2018.

Ôroà

Taramo 98

E himene i te Fatu i te himene âpï, e mau mea taa ê hoì tei ravehia e ana, no to na iho rima àtau e to na rima moà, i riro mai ai te rë ia na. 2 Ua faaìte mai ra te Fatu i te ora na na, i mua i te mata o te mau êtene atoà ra, te faaìte-raa-hia te parau-tià na na ra. 3 To na aroha e ta na parau mau, ua manaòhia e ana i te ùtuafare o Ìteraèra. Ua ìte te mau hopeà atoà o te fenua i te ora a to tätou Atua. 4 Ia pïnaì te haamaitaì i te Fatu e àti noa aè te fenua, ia puroro te reo òaòa, ia ûmere mä te haamaitaì i te himene. 5 A himene i te Fatu mä te tïnura,  mä te tïnura e te reo haamaitaì atoà ra; 6 mä te mau pü e te òto o te tuferi, te harururaa i te haamaitaì i te arii ra, i te Fatu. 7 Ia haruru te tai e to na îraa, te ao atoà e to na ra mau taata. 8 Ia paìpaì te mau pape i to rätou rima, e ia ûmere tahi te mau mouà atoà, 9 i te aro o te Fatu, te haere mai ra hoì o ia e haavä i te fenua. E haavä o ia i to te ao mä te parau tià, e te mau taata mä te piò òre.

Òhipa 10.25-48

25 E tei te tomoraa atu Pëtero i roto ra, ua färerei mai ra Torenerio ia na, haamaìri iho ra i raro i ta na pae âvae, tähopu mai ra ia na. 26 Ua faatià atu ra rä Pëtero ia na, nä ô atu ra. A tià, e taata atoà hoì au nei. 27 Ua paraparau iho ra räua, e haere atu ra i roto, roohia atu ra ua putuputu te taata e rave rahi. 28 Ua parau atu ra o ia ia rätou Ua ìte hoì òutou e, e òre te taata âti-Iüta e âmui atu, e e òre hoì e tomo i te fare o te taata o te hoê fenua ê ra. Ua faaìte mai rä te Atua ia ù e, eiaha vau e parau i te taata e, e viivii e te mä òre hoì. 29 I haere mai ai au i te tïpapa-raa-hia aè nei, aore au i märô. E teie nei, e ui atu vau, no te aha i tïpapa aè ai òutou ia ù nei. 30 Ua parau mai ra Torenerio A ruì maha aè nei te haapae ra vau i te mäa e tae aè ra i teie nei hora. E i te iva o te hora i pure ai au i roto i taù fare, e inaha, ua tià noa mai ra te hoê taata i mua ia ù mä te àhu ànaana, 31 e ua nä ô mai ra E Torenerio, ua faaroohia ta òe pure, e ua manaòhia to òe hämani maitaì i mua i te aro o te Atua ra. 32 E teie nei, e faatono òe i te taata i Iöpa, e parau atu ia Timona e haere mai i ô nei o të parauhia ia Pëtero ra. E tià o ia i tähatai i te fare o Timona räpaau ìri ra i te taòtoraa, e ia tae mai o ia ra, na na ia e paraparau mai ia òe. 33 I reira ra to ù tonoraa atu i te veà ia òe, e maitaì atu ra o òe i haere mai nei. E teie nei, teie anaè mätou tei mua i te aro o te Atua, ia ìte mätou i te mau parau atoà a te Atua i poroì iho ia òe ra.

To Pëtero òreroraa i mua ia Torenerio mä

34 Ua parau atu ra te vaha o Pëtero Ua ìte mau atu ra vau e òre te Atua e haapaò i te huru o te taata. 35 O tei mataù rä ia na, e o tei rave i te parau tià i te mau fenua atoà ra, o të ìtehia mai ia e ana. 36 Ua ìte hoì òutou i te parau ta na i häpono mai i te tamarii a Ìteraèra ra, i te parau-haere-raa i te Parau Maitaì i te hau ra ia Ietu Metia (o te Fatu no te mau mea atoà ra). 37 O te parau i parauhia nä Tarirea mai ra e àti noa aè Iutea atoà ra, i muri aè i te päpetito i parau-haere-hia e Ioane ra 38 ia Ietu o Nätareta, o tei faatähinuhia mai e te Atua i te Värua Maitaì e te mana ra; o tei hämani maitaì haere ra, e te faaoraraa i te feiä atoà i neìneìhia e te tiàporo ra, tei ia na ra hoì te Atua. 39 O mätou nei hoì të ìte i te mau peu atoà ta na i rave i Ierutarëma ra, e te fenua atoà hoì o te âti-Iüta ra; e ua täparahi hoì rätou e faauta atu ra ia na i nià i te räau. 40 Oia hoì ta te Atua i faatià aè nei i nià i te ruì toru ra, e ua faaìte ia na i te vähi ätea ra; 41 eiaha rä i te taata atoà ra, i te feiä rä i haapaòhia e te Atua ei ìte ra, oia hoì mätou nei, o tei àmu atoà e tei inu hoì e o ia atoà, i muri aè i ta na tiàraa mai mai te pohe mai ra. 42 E ua poroì iho o ia ia mätou e, e parau haere mätou i te taata, e faaìte hua atu hoì e o ia tei haapaòhia e te Atua ei haavä i tei ora e tei pohe ra hoì. 43 Oia hoì ta te mau perofeta atoà i parau mai ra e, o të faaroo ia na ra, e matara ia ta rätou hara i to na ra iòa.

To te Ètene färiiraa i te Värua Maitaì

44 E te parau atu ra Pëtero i taua mau parau nei, ua maìri mai ra te Värua Maitaì i nià iho i taua feiä atoà i faaroo mai i taua parau ra. 45 E te feiä atoà o te peritome i faaroo ra, o tei haere atoà mai rätou o Pëtero ra, mäere atu ra rätou, i te mea i niniihia mai te Värua Maitaì horoà-noa-hia ra i nià atoà i te Ètene. 46 I faaroo atu ra hoì rätou ia rätou i te parauraa i te parau èê, e te haamaitaìraa i te Atua. Ua parau atu ra Pëtero ia rätou:

47 E tià änei i te taata ia faaòre i te pape ia òre ia päpetitohia teie nei feiä, o tei noaa hoì ia rätou te Värua Maitaì mai ia tätou atoà nei 48 Ua parau atu ra Pëtero ia rätou e päpetito mä te iòa o te Fatu ra. Ua täpeà mai ra rätou ia na ia pärahi o ia io rätou ra i e fanu puè mahana.

1 Ioane 4.7-10

E aroha te Atua

7 E aù mau here e, e aroha tätou ia tätou iho, no ô mai hoì te aroha i te Atua ra. E o tei aroha ra, ua haafänauhia ia e te Atua, e ua ìte hoì o ia i te Atua. 8 O tei òre i aroha ra, aore ia i ìte i te Atua e aroha hoì te Atua. 9 Ua ìteä to te Atua aroha ia tätou nei, o te Atua i tono mai i ta na Tamaiti fänautahi i te ao nei, ia ora tätou ia na. 10 O te aroha mau teie, eere rä e na tätou i aroha atu i te Atua, o ia rä tei aroha mai ia tätou nei, e ua tono mai i ta na Tamaiti ei täraèhara i ta tätou nei hara.

Ioane 15.9-17

9 Mai te Metua i here mai ia ù nei ra, ua here atoà atu hoì au ia òutou ia vai-here-hia atu ä òutou e au. 10 I haapaò òutou i ta ù ra parau, e vai-here-hia atu ä òutou e au; mai ia ù i haapaò i te parau a taù Metua ra, e te vai-here-hia nei ä vau e ana. 11 I parau atu vau ia òutou i teie nei mau parau, ia vai ä to ù òaòa ia òutou, e ia tià atoà hoì to òutou òaòaraa. 12 Teie ta ù parau, ia aroha òutou ia òutou iho, mai ia ù e aroha atu ia òutou na. 13 Ia horoà te taata i to na iho ora no to na ra mau tauà, aita roa e taata aroha ê atu i tei reira. 14 O òutou to ù tauà ia haapaò òutou i te mau parau atoà ta ù i parau atu ia òutou na. 15 Eita atu rä vau e parau atu ia òutou e e tävini; aore hoì te tävini i ìte i ta to na ra fatu e rave ra. Ua parau rä vau ia òutou e e tauà; ua faaìte atu hoì au ia òutou i te mau parau atoà ta ù i ìte i taù Metua ra. 16 Eere o òutou tei hinaaro mai ia ù, o vau rä tei hinaaro atu ia òutou, e ua haapaò ia òutou ia haere òutou e ia hotu i te huero, ei huero vaiiho taìàtä, ia horoà mai te Metua ia òutou i ta òutou e ani atu mä to ù nei iòa ia na ra. 17 Teie ta ù parau ia òutou, ia aroha òutou ia òutou iho.

Manaò.

E parau faahoì ta tätou e färerei nei i teie mahana mai teie ta te puta Taramo e faaìte nei, Ia pïnaì te haamaitaì i te Fatu, ia puroro te reo òaòa, ia ûmere i te himene. I te mea te reo o te rähu teie e hoì mai nei, E himene i te Fatu mä te tïnura, te ùkarere, te pahu, te toère, te hakete e te reo haamaitaì i te harururaa. Ia haruru te tai e to na î, te ao e to na mau taata, e te mau nünaa. Ia paìpaì te mau pape i to rätou rima, e ia ûmere te tahi pae mouà i te tahi pae, ia puhihau te mau âpoo mataì, ia töriri te ua i te aro o te Atua Nui Tumu Tahi, te haere mai ra hoì o ia e haavä i te fenua. E haavä o ia i to te ao mä te parau tià, e te mau taata, te mau nünaa mä te piò òre. E tano ai ia tätou i te parau e, tei haamätauhia i te maitaì, ua rave ia i te maitaì ta to na âau e àtuàtu noa ra, âreà te manaò i haamätauhia i te ìno, ua rave ia i te ìno ta to na âau e àtuàtu noa ra. E tano atoà rä i te parau e, te manaò të òre e au i te tahi parau, e òhie  i te haamoè te reira parau ia òre te taata ia haapeàpeàhia. I haamanaòhia ai i te taata, ua ìte te Atua i hämani ia na, ta na e rave nei, aita e au ra i ta na i ôpua no te taata. Ia pïnaì te reo i roto i te vao, te reo o to reira  taata te ra ta te rähu e faahoì mai ra ma te taui òre te parau. Ia ìte maitaì mai tätou e, aita te Atua i horoà i te mea ìno na te taata, aita hoì o ia i hämani i te taata no te faatupu i te ìno, e aha rä i maraa ai i te taata te parauraa i te mea maitaì e, mea ìno ; e te mea ìno ra, mea maitaì ia. Te òhipa ia e ìtehia ra i te türamaraa a na taiòraa e maha nei no teie mahana.

-Taramo 98, 4 Ia pïnaì te haamaitaì i te Fatu, ia puroro te reo òaòa, ia ûmere i te himene.

-Òhipa 10, 46 I faaroo rätou i te parauraa i te parau èê, e te haamaitaìraa i te Atua.

-I Ioane 4, 9 Ua ìteä to te Atua aroha ia tätou nei,

-Ioane 15, 16 ua haapaòhia ia hotu i te huero, ei huero vaiiho taìàtä,

I to tätou faarooraa i teie mau parau e piiraa âmui teie e tïtauhia ra, ia faaroo rä tätou i te reo o Ietu e parau ra e 16 ua haapaòhia ia hotu i te huero, ei huero vaiiho taìàtä. Uiui rii na tätou ia faaroo tätou i teie huru reo, e aha te vähi tätou e haamau i to tätou manaò, i nià änei i te huero, te vaiiho taìàtä, aore ra i te tahi vähi ê atu. Parau mau, te vai ra ihoä te parauraa e, àita e fifi e huero ihoä, e parau mau te taìàtä e parau mau òre i roto i te âau o te taata, mai te töpata ua i nià i te rau o te taro e òre mau. Eiaha rä ia moèhia ia tätou e, mai te peu te vai ra te parau, te vai atoà ra te auraa o te parau ; te auraa hoì o te parau, tei roto noa änei i te taò iho, aore ra tei te tahi vähi ê atu. Ia parau o Ietu mai teie te huru i te taata no te faamanaò ia i te taata e repo fenua o ia ia hotu te reo o te Atua Nui Tumu Tahi i te vahi i reira e fänau ai te aroha e te here. A faaroo faahou mai na teie mau reo to Ietu. Mai te Metua i here mai ia ù nei ra, ua here atoà atu hoì au ia òutou ia vai-here-hia atu ä òutou e au. Ia haapaò òutou i ta ù ra parau, e vai-here-hia atu ä òutou e au; mai ia ù i haapaò i te parau a taù Metua ra, e te vai-here-hia nei ä vau e ana. I parau atu vau ia òutou i teie nei mau parau, ia vai ä to ù òaòa ia òutou, e ia tià atoà hoì to òutou òaòaraa. Teie ta ù parau, ia aroha òutou ia òutou iho, mai ia ù e aroha atu ia òutou na. Ia horoà te taata i to na iho ora no to na ra mau tauà, aita roa e taata aroha ê atu i tei reira. O òutou to ù tauà ia haapaò òutou i te mau parau atoà ta ù i parau atu ia òutou na. Eita atu rä vau e parau atu ia òutou e e tävini; aore hoì te tävini i ìte i ta to na ra fatu e rave ra. Ua parau rä vau ia òutou e e tauà; ua faaìte atu hoì au ia òutou i te mau parau atoà ta ù i ìte i taù Metua ra. Eere o òutou tei hinaaro mai ia ù, o vau rä tei hinaaro atu ia òutou, e ua haapaò ia òutou ia haere òutou e ia hotu i te huero, ei huero vaiiho taìàtä, ia horoà mai te Metua ia òutou i ta òutou e ani atu mä to ù nei iòa ia na ra. Teie ta ù parau ia òutou, ia aroha òutou ia òutou iho. Ia haere tätou nä nià i te tahi èà mätau-òre-hia e tätou, no te tauturu ia tätou i te haere, te horoà mai te arataì i te tahi mau täpaò, ia ìte noa tätou e, aita tätou i ätea i te èà. Ua ìte maitaì rä tätou e, e tauturu noa teie, eita te èà e hope i nià i te täpaò. Mai te peu e èà poto, e iti ia te täpaò ; ia roa atu ä te èà, e rahi atoà ia te täpaò. I nià i te èà ta Ietu e ani ra ia tätou ia haapaò maitaì, e piti noa täpaò ta na i tuu mai ia hotu i huero maitaì, e ia fänau te fenua.

Teraì òr. Faatura.