Ioane 3.14-21.

Täpati 11 no Mati 2018.

Haapaò

Taramo 137

1 I te hiti o te mau pape i Päpuronia ra to mätou pärahiraa i raro, e ua òto iho ra mätou i te manaòraa ia Tiona. 2 I nià i te mau ârope, i rotopü ra, te faauta-raa-hia ta mätou mau tïnura. 3 I reira te feiä i tïtï ai mätou ra i te faaueraa mai i te himene, e te feiä i riro mai ai mätou tei ani i te ârearea, nä ô mai ra. A himene mai na i te hoê himene no Tiona. 4 E aha mätou e tià ai ia himene i te himene a te Fatu i te fenua ê nei. 5 E Ierutarëma, ia moè òe ia ù ra, ia moè atoà i taù rima àtau nei to na toroà. 6 Ia piri taù arero i taù vaha nei,  ia òre au ia manaò ia òe, ia òre au ia faateitei ia Ierutarëma ei mea òaòa rahi na ù. 7 Haamanaò, e te Fatu, i te mau tamarii a Êtoma, o tei parau i te mahana a àti ai Ierutarëma. A täìhitumu na, täìhitumu na, ia ìhipapa hua ia. 8 E te tamahine a Päpuronia faaano fenua e, e ao to na to të tähoo atu ia òe, mai ta òe i rave mai ia mätou nei. 9 E ao to na to të rave i to mau àruàru rii, e ua täìri noa i nià i te mato ra.

2 Parareipomeno 36.14-23

14 Rahi atu ra hoì ta te feiä tahuà rarahi ra hara, e ta te taata atoà, i te mau parau faufau a te êtene; e ua haaviivii i te fare o te Fatu tei haamoàhia e ana i Ierutarëma. 15 Ua tono mai ra te Atua o to rätou mau metua o te Fatu i te veà, aita i tuutuu; no te mea te aroha ra o ia i to na mau taata, e to na iho ra pärahiraa. 16 Ua tahito ra rätou i te mau veà a te Atua, e ua vahavaha i ta na parau, e ua hämani ìno i te mau perofeta nä na e tupu roa aè ra te riri o te Fatu i to na taata, e aita roa aè ra e haapüraa. 17 I tuu mai ai o ia i te arii o te Tarataio, tei täpü noa i te mau taata âpï i te òè i roto i to rätou vähi moà, aore roa i aroha i te taata âpï, e te pötii rii âpï, i te taata paari, e tei piò i raro i te ruhiruhiä: tuu-atoà-hia atu ra i ta na rima. 18 E te mau mea atoà o te fare o te Atua, te mea rahi e te mea rii, e te mau taoà atoà no te fare o te Fatu, e te taoà a te arii, e to te hui raatira atoà, ua hopoi-atoà-hia e ana i Päpuronia. 19 Ua tütuì hoì rätou i te fare o te Atua i te auahi, e ua haapararï i te âua i Ierutarëma; ua tütuì hoì te fare o te hui arii i te auahi, e ua vävähi i te mau taoà maitataì atoà ra. 20 E te feiä i ora i te òè ra, ua hopoi o ia i te reira i Päpuronia; e riro atu ra ei tävini nö na e no ta na mau tamarii e tae roa aè ra i te hau i te pätireia ra i Peretia. 21 Ia tupu te parau a te Fatu i te vaha o Ieremia, ia noaa to taua fenua ra Täpati; te vai pau noa ra hoì, te haapaò ra ä ia i te täpati e hitu àhururaa i te mätahiti. 22 Tae aè ra i te mätahiti mätamua o te arii o Peretia ra o Turo, ia tupu te parau a te Fatu i te vaha o Ieremia i faaäraära atu ai te Fatu i te âau o te arii o Peretia o Turo, ia päpaì i te tahi ture päpaì, e ua faaìte haere e àti noa aè tö na fenua, nä ô atu ra, 23 Te nä ô mai ra te arii o Peretia o Turo, ua höroà mai te Atua no te raì o te Fatu i te mau pätireia atoà o te ao nei; e ua poroì mai ia ù e faatià i te tahi hiero nö na i Ierutarëma, i Iüta ra. O vai to òutou i to na atoà ra taata? Ei ia na to na ra Atua o te Fatu a haere ai o ia i nià ra.

Èfetia 2.4-10

4 O te Atua rä, no te aroha rahi to na, no te hinaaro rahi ta na i hinaaro mai ia tätou nei ra, 5 pohe noa ai ä tätou i te hara ra, faaora aè nei ia tätou mä te Metia atoà i ora òutou i te aroha mau, 6 e ua faatià ia tätou atoà i nià, e ua haapärahi ia tätou atoà i te ao i te Metia ra ia Ietu; 7 ei faaìteraa na na i te mau uì a muri atu, i te rahi hau ê atu o to na ra aroha mau, i ta na hämani-maitaì-raa ia tätou i te Metia ra ia Ietu. 8 I ora hoì òutou i te aroha mau i te faaroo. Eere hoì ia i to òutou iho, e mea horoàhia mai ia e te Atua. 9 Eere i to te òhipa, aita atu ra o te taata nei e teòteòraa. 10 O tätou hoì ta na òhipa i hämanihia i te Metia ra ia Ietu ei rave i te parau maitaì, o tei faaau-ätea-hia tätou e te Atua, e o ta tätou ia e haapaò.

Ioane 3.14-21

14 Mai ia Möte i faateitei i te ôfï i te mëtëpara ra, oia atoà te Tamaiti a te taata, e faateitei-atoà-hia ia, 15 ia òre ia pohe te faaroo ia na ra, ia roaa rä te ora-mure-òre.16 I aroha mai te Atua i to te ao, e ua tae roa i te horoà mai i ta na Tamaiti Fänautahi, ia òre ia pohe te faaroo ia na ra, ia roaa rä te ora-mure-òre. 17 Aore hoì te Atua i tono mai i ta na Tamaiti i te ao nei e faahapa mai i to te ao, ia ora rä to te ao ia na. 18 Tei faaroo ia na ra, e òre o ia e faahapahia tei òre i faaroo ra, ua faahapa-ê-hia na ia, o ia aore i faaroo i te iòa o te Tamaiti Fänautahi a te Atua ra. 19 Teie taua faahapa ra, o te märamarama ua tae mai i te ao nei, e hinaaro aè nei te taata i te pöuri, aore te märamarama, no te mea te ìno ra ta rätou parau. 20 O tei mau i te parau ìno ra, aore o ia i hinaaro i te märamarama, e òre hoì o ia e haere mai i te märamarama o te ìteä ta na parau. 21 O tei haapaò rä i te parau mau ra, e tae mai ia i te märamarama ia ìteä-maitaì-hia e, te au ra ta na parau i te Atua.

Manaò.

E parau päpü teie, i to tätou taiòraa i teie mau ìrava òre noa atu ai tätou i anihia mai, ua ineine ê na ta tätou i te pähonoraa no Ietu teie parau. No te mea te faahitimahuta mai nei te tuatua ia tätou ia päpü i to tätou tiàturiraa i mua i te mau manaò e faahitihia ra. Ia òre to tätou hiroà faaroo Mäòhi ia paremo i roto i mau haareru parau e haareru ra ia mohimohi te parau tià e te parau mau e haamäramarama ra tei täpoìhia e te pöuri. Ia paremo tätou i roto i te haavare, e ia riro tätou i roto i te haavare e tià faahou änei ia tätou ia himene, ia òri i Mäòhi Nui nei, e tià faahou änei ia tätou ia ârearea i o tätou nei. No tätou, e tämata tätou i te tomo i roto i te värua o te mau parau e faahitihia nei i roto i teie haapotoraa no na parau e maha nei.

-Taramo 137, 4 E aha mätou e tià ai ia himene i te himene a te Fatu i te fenua ê nei.

-2 Parareipomeno 36, 21 Ia tupu te parau a te Fatu i te vaha o Ieremia.

-Èfetia 2, 10 tätou i hämanihia ia Ietu te parau maitaì, i faaäuhia e te Atua, ia haapaò.

-Ioane 3, 21 tei haapaò i te parau mau, te märamarama ìteä-maitaì-hia, e parau na te Atua.

Mai ia tätou i parau noa ra e, haereraa i mua, èita e maoro roa e faaroohia e haere i muri, oia hoì e ôtohe, te ôtohe te haereraa ia i te vähi tei reira to tätou parau, te vähi no reira mai tätou, ma te ìte atoà ia tätou, i teie parau a  te Taramo 137, 4 E aha mätou e tià ai ia himene i te himene a te Fatu i te fenua ê nei. Ia tütonu maitaì tätou i teie parau e tïtauraa teie eiaha tätou ia riro èi taata ê ia ö tätou iho. Haere noa ai tätou i mua, aita tätou i ìte i te mea e parau, e ia maoro te parau-noa-raa i te tahi vähi, e riro te vaha i te paruru, e te òre e päpü faahou te mea e parau ra i reira e ö mai ai te haavare. Ia parau òe i te tahi mea, eiaha ia moèhia ia òe e, o òe terä e parau ra, e i roto i te reira parauraa, te ìte rii noa atoà ra òe ia òe, to òe mau vähi paruparu, te ärea e vai ra i roto ia òe e te mea ta òe e parau ra, e tauturu te reira ia òe i te ìteraa i te mea e hinaarohia ra ia òe ia parau no reira te Atua Nui Tumu Tahi i täpiri ai te tärià i pïhaì iho i te vaha. Mai te fefe tei haamanaò mai i te âfaro, te teiaha tei haamanaò mai i te mämä te vare tei haamanaò te haavare, eiaha mai te mea e, e ìno anaè to tätou parau, no te pinepine rä tätou i te haapae i ta te Atua, no te rave mai i ta tätou. Teie ia ta  te Parareipomeno 2 e faaìte ra i te pene 36 i te ìrava 21 Ia tupu te parau a te Fatu i te vaha o Ieremia, ua ìte atoà ia tätou e, te mau mea atoà ta tätou i faariro ei mea faufaa, e riro e, mea taa ê ta te Atua e tiaì mai ra ia tätou ia rave. Te fifi te reira e pinepine i te tupu ia òre te taata ia faaea noa i nià i te mea i anihia ia na, e ia faahaere i ta na parauraa, to na manaò i mua, aore ra ia faariro i te mea ta na e parau ra ei faatanoraa ia na. I  te mea te reo ta te Atua i horoà i roto i te nünaa Mäòhi e reo no te faatià i te parau, e parau faatiàma i roto i te ma ia marae te fenua te taura pito o te püfenua. Eiaha atoà rä tätou e manaò e, ua täôtià tätou i te parauraa i muri ta tätou i parau mai na i nià i te mau vähi paruparu atoà ta tätou e àtuàtu noa nei, ua riro rä teie manaò mai te tahi faaitoitoraa i te taata ia tiàturi ia na iho, ia au i te manaò e, te rave nei ihoä paha o ia i te ìno, ua ìte atoà rä o ia i te mea maitaì. No reira, i roto i te mau òhipa atoà tei anihia te taata e rave, o na ihoä paha to na fifi mätamua roa, o na atoà rä to na tauturu maitaì aè. Ta Pauro ia e faamanaò mai nei ia tätou, Èfetia pene 2, i te ìrava 10 tätou i hämanihia i te Metia ia Ietu te parau maitaì, i faaäuhia e te Atua, ia haapaò. I mua i teie faaìteraa mea maitaì te taata ia faaea rii i te faanaìnaì noa ia na, ia haamätau atoà i te uruaì i nià ia na iho, ia tiàturi hoì ia na iho. Inaha te parau maitaì, te ùputa te reira e matara ai te parau, oia te vähi te taata e märamarama ai i te parau o te Atua, e fenua hoì te taata, e riro te tiàturiraa ia na iho e i te fenua, i te tauturu ia na i te ìteraa i te auraa o teie aniraa e anihia nei. Te tumu o teie mau  parau ta tätou e täpeà mai ei haapotoraa i ta tätou tumu parau, no roto mai ia i ta Ietu parauraa i te päpaìraa a Ioane i te pene 3 i te ìrava 21 O tei haapaò rä i te parau mau ra, e tae mai ia i te märamarama ia ìteä-maitaì-hia e, te au ra ta na parau i te Atua. I te mau taime atoà, te tarià o te taata terä e anihia ra ia haapaò i te parau, e i roto hoì i te mea e parauhia ra e ìte ai te taata i te mea e hinaarohia ra ia na. Te faahiroàroà noa mai ra te reira ia tätou e, i roto i te faatupuraa i te hinaaro o te Atua, eita te hiò e tano ia faataa-ê-hia i te faaroo, oia te mea i parauhia. Hiò noa ai te mata, na te parau e arataì ra i te taata i te ìteraa i te mea ta te Atua e hinaaro ra ia ìte o ia. No te mea e Värua te Atua, te märamarama noa ra tätou e, eere te mata o te taata ta te Atua e tïtau ra, to na rä värua, e to na âau, ia òre te taata ia hämani i te tahi hohoà no te taata ê. Aita atu mea e anihia ra ia na maoti rä, ia vai iho ia na ia ärataìhia na e te parau, mai te ìte maitaì e, eere to na parau ta na e ìte atu, e riro rä te reira parau i te tauturu ia na i te haere-atoà-raa i te vähi ta te parau e arataì ra ia na, ta na parau na Atua Nui Tumu Tahi. Mai te peu te reo o te hoê nünaa, ta na ia huru faanahoraa i to na ao, ia faaroo tätou i teie taò haapaò, mai te mea ra ihoä ia e, eita tätou e ìmi i te auraa o te parau, na te parau noa e heheu mai ia na. Mai to tätou haìhaìraa e inaa nei, to tätou faaroo-noa-raa e to tätou faaòhipa-noa-raa i teie taò, aita atu ra e taata e uiui faahou te manaò i te ìteraa e, na na e mau nei teie taò, aore ra e mea tïpeehia mai. Èi manaò turu, teie ia parau, te parau a Turo a Raapoto te naò ra, e taoà ora te reo, te värua te reira o te hoê nünaa, te rämepa türama i te èà o te taata, tae atu ai o ia i roto i te ìte. (Puta A hiò a  faaroo 2014, àpi 12).

Teraì òr. Faatura.