Hitu o te mahana Te Faataa-ê-raa, e te Tiàmäraa
Hitu o te mahana :
-Te tumu parau : Te Faataa-ê-raa, e te Tiàmäraa
-Te pehepehe : Faataa-ê-raa
FAATAA-Ê-RAA
E riàrià änei te ânävai i te pape i parauhia ai to na
Te puta nei te ata o te taata i nià i te repo.
E aha to reira. No te märamarama i parauhia ai to te ata.
Areà te taata ata òre, aore ä ia i hitihia e te märamarama,
E tei mataù i to na iho ata, a tae hoì e.
E aha i mania ai te niho o te taata àmu,
Inaha te mäa tei òre ä i tänuhia
Aore o na e monamona, aore hoì e àvaàva.
Ta te fenua e faatupu ra, ta te mahana ia e täpara,
Areà te àmu i te mäa tumu òre, a tae hoì e.
Eiaha e mataù i te faataa-ê-raa.
No te mea i faaruè i te tumu
I tupu mai ai te haari âpï.
No te mea i faaruè i te rima metua,
I päpü ai te tuuraa âvae o te tama.
No te tamahine i faaruè i te fare metua,
I haapeu ai òe i te parauraa e, e vahine ta òe.
No te tamaiti i faaätea i nä metua,
I tänehia ai ta òe e terä pötii.
No te taa-ê-raa i te püfenua, i pü mai ai te tama.
Te mea peàpeà no te metua, eere te taa-ê-raa i te tama,
Te òreraa rä te tama e ìte faahou i te èà o te fare metua.
Ia òre te haari ia hotu mai i te haari, a tae hoì e ;
Ia òre te pape o te ànavai ia hoì faahou i te puna
Ia òre te Mäòhi ia ìte i te tumu o to na parau, a tae hoì e.
-Te taiòraa : Tenete 12, 1-5 ; Etoto 3, 7-10
-Te manaò tauturu : Te faataa-ê-raa, mai te tiàmäraa e te poritita, tahi atoà ia parau i faareruhia te manaò o te taata i teie nei mahana. Te auraa, e tämä atoà ia te manaò taata ia tiàmä, ia hoì faahou mai te hau i roto i to na âau. I haapäpü mai na tätou e, te tiàmäraa, e hinaaro ia no te Atua ; e te poritita hoì, e hinaaro atoà no te Atua. E tano ai tätou e ui atoà i teie nei e, te faataaê- raa, e hinaaro atoà änei no te Atua. Ia parau mai te Atua e : No reira e faaruè ai te taata i ta na metua täne e ta na metua vahine, a àti atu ai i ta na vahine, e e riro hoì räua ei hoê (Tenete 2, 24) ; e parau teie no te faataaêraa te tamarii i te metua e i te fare metua, eiaha no te haafaufaa òre i te metua e te fare metua, te mea noa rä ia e ìte ai te tamarii i te auraa o to na parau ei täne e ei vahine, aore ra te mea noa ia e ìte ai te tamarii i te auraa o to räua parau ei metua. Te auraa, te faataa-ê-raa, e hinaaro no te Atua ; e te faataa-ê-raa te tamarii i te metua, e tupuraa ia no te hinaaro o te Atua. Terä hoì faaueraa ta te Tumu Nui ia Aperäma e : E haere ê mai òe i to fenua na, e to fëtii, e te ùtuafare o to metua na, i te fenua na ù e faaìte atu ia òe na (Tenete 12, 1), e parau atoà teie no te faataaêraa ; òia hoì, e hinaaro no te Atua. Te vähi taa ê i ô nei, eere noa i te faataa-ê-raa i te metua e te fare metua, e faataa ê roa rä i te âià tupuna, no te haere i te tahi fenua ê atu. E no te mea te Atua iho teie e ani nei ia Aperäma, eere ia no haafaufaa òre i te âià tupuna, eere atoà no te faaòhipa rahi ia Aperäma e to na ùtuafare, no te mea rä e ôpuaraa ora ta te Tumu Nui e nä roto atu ia Aperäma i te tupu. Te auraa, te faaìte noa ra te Atua i to na tiàmäraa i te mäìtiraa i te taata o ta na i hinaaro, e te vai täatoà noa ra te tiàmäraa o Aperäma i te färii e te òreraa e färii i te tiàmäraa o te Atua. Te taime rä o Aperäma e färii ai i te faataaêraa, teie te faufaa ta na e fänaò atu : E faariro hoì au ia òe ei nünaa rahi ; e e haamaitaì au ia òe, e faarahi atu vau i to òe iòa, e e riro òe ei maitaì (Tenete 12, 2). Te märamarama noa ra ia tätou e, te faataa-ê-raa i roto i ta te Tumu Nui faanahoraa, eita e faatupu mai i te ahoaho, te peàpeà, e te ère ; e matara rä te ùputa no te hau, te maitaì, e te òaòa. I roto i te puta Etoto, ta te Atua ia ôpuaraa faaora no te faatiàmä ia tiàmä te nünaa Ìteraèra. Tei raro aè te nünaa Ìteraèra i te faatîtîraa a te hau Aifiti ; aita atu e räveà no te faatiàmä ia na maori rä, te faataa-ê-raa, oia te täpüraa i te täamuraa e te fenua Aifiti, no te tähiti i te tahi fenua ê atu. Te auraa ia no terä reo to te Atua e nä ô ra e : I haere mai nei au i raro nei e faaora ia rätou i te rima o to Aifiti ; e e arataì ê mai hoì ia rätou i taua fenua ra, i te hoê fenua maitaì (Etoto 3, 8). No reira, te märamarama noa ra tätou e, te faataa-ê-raa, e ôpuaraa faaora na te Tumu Nui i te nünaa Ìteraèra. Te haamanaò rii noa ra paha tätou i te parau no Terehëamanu, te ià nui ta te Tumu Nui i faatere mai i hiti nià, riro faahou mai ai ei fenua, oia o Maiào, o Mooreà, o Tetiàroa, o Mehetià, e te enua ta tätou e parau nei i teie mahana o Tahiti. Te auraa, te Etoto no te nünaa Ìteraèra, o Terehëamanu ia no te nünaa Mäòhi. No reira, eiaha ia e mataù faahou i te faataa-ê-raa no te mea, e hinaaro te reira no te Tumu Nui. I mua hoì i te mau faatîtîraa rau ta te nünaa Mäòhi e faaruru noa nei i teie mahana, i te tanoraa mau ra, ua tae ia tätou i te tau no te tähiti faahou, oia te tau no te faataa ê faahouraa. Mauruüru.
-Pure : Haamaitaì mätou ia òe e te Atua Nui Tumu Tahi i te mea, te haamanaò mai nei òe ia mätou e, te faataa-ê-raa, ta òe ia ôpuaraa faaora i te nünaa Mäòhi e faaruru noa nei i te mau faatîtîraa rau i teie mahana ; tahi hoì te reira huru tupuraa no ta òe faatiàmäraa ia tiàmä te nünaa Mäòhi. Te faahaèhaa atu nei mätou i mua i to òe here rahi e ta òe faaherehere rahi ia mätou, o mätou i mataù noa na e i haamataù noahia na i te parau no te faataaêraa. E te ani atu nei mätou ia òe, ia arataì faahou òe i to mätou nünaa iti i te tähiti faahouraa i roto i te tau no te Hinapaarae. A tuu mai i ta òe faatereraa tiàmä i te feiä e faatere nei i to mätou fenua iti, ia TIÀ MÄ te faatereraa, e TIÀMÄ atoà te nünaa Mäòhi. Amene.