Mätaio 21,1-11

Täpati 9 no Eperera 2017.

TE MAU ÂMAA

ÔROÀ

Âueue

Taiòraa.

Mätaio 21,1-11

To te Metia tomoraa i roto ia Ierutarëma

(Mär 11.1-11; Rut 19.28-40; Ioa 12.12-16)

1 E fätata mai ra Ierutarëma ia rätou, ia tae rätou i Petefäte, i te mouà ra o Òriveta, ua tono aè ra Ietu i e toopiti puè pipi a ana ra, 2 nä ô atu ra E haere ôrua i tërä aè ra ôire iti i mua ia ôrua, e e ìte ôrua i te hoê âtini ufa, ua fëtiihia, e te fanauà i pïhaì iho; e tätara e pütö mai i ô nei ia ù nei. 3 E ia parau noa mai te tahi taata ia ôrua, e parau atu ôrua. Tei hinaarohia mai ra e te Fatu, e na na ia e tuu noa mai i reira ra. 4 Ia tupu te parau a te perofeta ra i nä-reira-hia ai, o tei nä ô mai ra e 5 A parau atu i te tamahine o Tiona: Inaha, te haere mai na to arii ia òe na mä te haèhaa, e mä te pärahi i nià i te âtini ufa, e te pinia, te fanauà o te âtini. 6 Haere atu ra nä pipi, nä reira atu ra mai ta Ietu i faaue mai ia räua ra, 7 pütö mai ra i te âtini e te fanauà atoà, tuu iho ra i to räua àhu i nià iho i taua nä âtini ra, e ua pärahi iho ra Ietu i nià iho. 8 Höhora iho ra te tiàa rahi i to rätou àhu i te èà tià; ôoti aè ra hoì te tahi pae i te âmaa räau, vauvau iho ra i nià i te èà tià. 9 Te pii noa mai ra te tïàa rahi i haere nä mua ra, e tei pee mai nä muri, nä ô mai ra Hötana i te Tamaiti a Tävita Ia haamaitaì o ia o tei haere mai mä te iòa o te Fatu Hötana i te raì teitei 10 E ia tomo o ia i Ierutarëma, âueue iho ra taua ôire atoà ra, e te taata atoà i te uiraa e O vai teie 11 Ua parau atu ra taua tïàa rahi ra O te Perofeta ra o Ietu, no Nätareta i Tarirea.

Manaò

Teie tapati e haamata ai te hepetoma moà, o ta tätou i faataa hoê taime i te mätahiti èi haamanaòraa i te mau òhipa i ravehia e Ietu i mua i te mau puai tei faatîtî i te taata e te nünaa na roto i te faarupehuraa i te mau hinaaro o te Atua Nui Tumu Tahi. Ietu i to na pae, e te aroha e te here o te Atua Nui Tumu Tahi no te mau taata atoà tei tiàturi i teie na parau e piti a faaroo mai na ra i teie himene i päpaìhia no te àiri i te mavaèvaèraa no te ao âpï i te faaìteraa a te Taramo 22, teie te haapotoraa.

2 E taù Atua, e taù Atua, e aha òe i faaruè mai ai ia ù. E te haapaò òre mai i to ù nei ûuru 3 E taù Atua, te tiàoro nei au i te ao, aita rä òe i parau mai e te ruì hoì, aita rä o ù e mäpuhiraa aho. 4 Òe rä Tei Moà ra, e tei pärahi i roto i te haamaitaìraa o Ìteraèra. 5 I tiàturi na to mätou hui-metua ia òe, ua tiàturi rätou, e ua faaorahia rätou e òe 6 ua tiàoro rätou ia òe, e ua faaorahia i tiàturi na ia òe, e aore i mäheahea.7 E toe rä vau nei, eere i te taata, e faaìnoraa na te taata, e ta te taata ia tähitohitoraa 8 Te feiä atoà e hiò mai ia ù nei, te àta tähitohito mai ra ia ù; ua fäita i te ùtu, e ua ueue rätou i te upoo. 9 Te na ô mai ra rätou Oia nei, te tiàturi nei ia i te Fatu, ia faaora o ia ia na tii mai o ia e haru ia na Inaha, e here hoì o ia na na. 10 Na òe au i rave mai mai roto i te ôpü, o to ù ia tiàturiraa, a òte ai i te ü o taù metua vahine ra.11 Ua tuuhia atu vau ia òe mai taù fänauraa mai ä o taù Atua hoì òe mai te ôpü mai ä o taù metua vahine. 12 Eiaha e faaätea ê atu ia ù, ia fätata mai te àti ra e aita atu e tauturu ia tauturu mai 13 E rave rahi te puaatoro e haaàti mai ia ù nei te mau puaatoro àito o Pätäna teie e haaàti mai ia ù nei. Ua pähono mai òe ia ù: 23 E faaìte au i to iòa i to ù ra mau taeaè ei rotopü i te âmuiraa ra e haamaitaì atu ai au ia òe. 25 aore hoì o ia i vahavaha, aore hoì i faaìno i te àti o te feiä i àti ra e aore hoì i huna i to na mata ia na, ia tiàoro rä o ia ra, ua faaroo mai ra o ia ia na 26 O òe ta ù e haamaitaì i roto i te âmuiraa rahi ra.30 E àmu te feiä taoà o te fenua nei, e e haamori e te feiä atoà e tae i raro i te repo, e piò ia i mua ia na, e e òre e tià i te hoê ia faaora ia na iho ra.

To tätou faarooraa i teie mau parau e tià ia parauhia ua päpaìhia te hohoà e te huru o te hoê tävini tei pärahi fatata noa i pïhaì iho i te mau hinaaro o te Atua Nui Tumu Tahi. I te mea e horoà te Fatu ia na i te arero o te feiä ìte, ma te haru mai te parau i te parau au i tei rohirohi ra. Te faaära nei o ia i tërä poìpoì, i te poìpoì, te faaära nei o ia i ta na tarià, ia haapaò o ia mai te taata e haapii ra. E haafätata te Fatu ra o te Fatu i ta na tarià, e aore hoì o ia e pätoì aore hoì o ia i ôraì tià i muri. Ia tuu noa atu o ia i ta na tua i te feiä i täìri mai e ta na päpärià i te feiä i huhuti i te ùmiùmi, aore hoì o ia i huna ê atu i te vahavaha e te tufatufa haere. E tauturu mai ä te Fatu ra o te Fatu ia na i òre ai o ia i haamä ai i haamau ai o ia i ta na mata mai te ôfaì ra ua ìte hoì o ia, e òre o ia e haamä.

O te huru ia o ia no te Atua, e aore o ia i parau e haru toroà ia fäito atoà o ia i te Atua. Haapae atu ra rä i to na iho, rave atu ra i to te tävini ra huru, i te fänauraa mai mä te huru o te taata nei. E no te mea o ia i ìteä mai te taata nei i te huru, ua faahaèhaa o ia ia na iho, i te haapaò-mäite-raa e tae noa atu ra i te pohe, i te pohe tätauro ra. I faateitei roa atu ai te Atua ia na, e ua horoà hoì i te iòa i hau ê roa i te mau iòa atoà nei no na ia tuu te mau turi atoà i raro, to te raì, to nià i te fenua e to raro aè i te fenua, i te iòa o Ietu ra e ia fäì te mau vaha atoà, e o Ietu Metia te Fatu, e hanahana atu te Atua Metua ra.

Te àvari ne tätou i teie hepetoma Moà na roto i te tapati no te mau âmaa to te Metia tomoraa i roto ia Ierutarëma ia au te päpaìraa a Mätaio i te pene 21 i te mau ìrava 1 e tae i te 11 I te mouà ra o Òriveta, ua tono aè ra Ietu i e toopiti puè pipi a ana ra, E haere ôrua i tërä aè ra ôire iti i mua ia ôrua, e e ìte ôrua i te hoê âtini ufa, ua fëtiihia, e te fanauà i pïhaì iho e tätara e pütö mai i ô nei ia ù nei. E parau atu i te taata e ui mai ia ôrua, te hinaarohia mai ra e te Fatu, a e na na ia e tuu noa mai i reira ra. Ia tupu te mau parau a te mau perofeta ra ìnaha, te haere mai na to arii ia òe na mä te haèhaa, e mä te pärahi i nià i te âtini ufa, e te pinia, te fanauà o te âtini. Pütö mai ra i te âtini e te fanauà atoà, tuu iho ra i to räua àhu i nià iho i taua nä âtini ra, e ua pärahi iho ra Ietu i nià iho. Höhora iho ra te tiàa rahi i to rätou àhu i te èà tià ôoti aè ra hoì te tahi pae i te âmaa räau, vauvau iho ra i nià i te èà tià. Te pii noa mai ra te tïàa rahi i haere nä mua ra, e tei pee mai nä muri, nä ô mai ra Hötana i te Tamaiti a Tävita Ia haamaitaì o ia o tei haere mai mä te iòa o te Fatu Hötana i te raì teitei E ia tomo o ia i Ierutarëma, âueue iho ra taua ôire atoà ra, e te taata atoà i te uiraa e O vai teie Ua parau atu ra taua tïàa rahi ra O te Perofeta ra o Ietu, no Nätareta i Tarirea.

Te mau taata i âpee ia Ietu, te ìte nei rätou e Tämaïti Tavita, to Ierutarëma e Perofeta ua âueue iho ra taua ôire. Te âueue nei te fenua te ìteraa e, ua rupehu te fëruriraa o te taata i te ìteraa ia Ietu, e haamänii faahouhia te toto i nià i te fenua i te òhipa a te taata na roto i te täparahi. Te toto no te Tämaïti a te Atua Nui Tumu Tahi, e toto e täma te fenua i haaviiviihia e tätou te taata.

Haamanaò na tätou i te ìno i ravehia e Taina, taa noa atu ai te hara täparahi taata, ua hara atoà o ia i te fenua ta na i haaviivii i te toto o to na taeaè, ua faariro o ia i te àpu färii ora ei àpu färii pohe ua hara atoà rä o ia i te Atua, te tumu o te ora, o ia i manaò e mai te Atua i horoà i te ora, e tano atoà o ia e täpeà i te ora. Te mea ia te Atua i faaère ai ia na i te ora no roto i te fenua, e no roto atu ia na. Te taura o te ora, te taura pito, oia te iho tumu e täamu i te taata i te fenua e te Atua, ua mutu i te hara i ravehia e Taina. Eita te ora o te taata e tano ia faataa-ê-hia i te Atua e te fenua. I räpae aè i te tumu o te ora, e aha te ora e noaa i te taata.

Eita e òre tätou i te parau e, aita e tüàtiraa e vai ra i roto i te hara i ravehia e Taina e ta te Atua faahaparaa i te taata i te òreraa e haapaò i ta na òhipa i rave, e te òreraa e hiò i tei ravehia e ta na rima. Nä ô ia tätou, te täparahiraa taata, e tae noa atu i te faaìnoraa i te fenua, te tahi atoà ia huru haafaufaa-òre-raa i te òhipa i ravehia e te Atua. E ia au hoì i te reo o Ietu, te ìno i ravehia i nià i te tahi taeaè, ua ravehia ia i nià ia na. Ia roohia te taata i te ìno, i roto i te rauraa o to na tupuraa e to na ûànaraa, e òhie roa o ia i te pari i te täuà òre e te haapaò òre o te Atua ia na. E tano paha tätou e haamanaò noa e Eere te Atua i te Atua no te taata pohe, no te taata ora rä ia au te faaìteraa a Mätaio i te pene 22 i te ìrava 32). Ia haapotohia, e nä ô ia tätou e, eere te Atua i te Atua no te pohe, no te ora rä, e aita te ôpuaraa faaora a te Atua i haamauhia i nià i te pohe. I roto i te tiàturiraa , ia roohia tätou i te fifi, te oè, ia ìno te fenua, no te mea ia ua atea tätou, e te räveà e hoì faahou mai ai te ora, ia tämähia ia te maraë, oia te taura pito e täamu i te fenua i te Atua. Ia mä te hara a te taata, e tuu faahou mai te Atua i te ora. I teie mahana, i roto i te fifi e färereihia nei e te ao täatoà nei, eere te Atua te hororaa matämau a te taata, eita e ö mai i te taata te manaò e, ua hara o ia i te Atua. Mai te peu e fifi, te vai ra te mau àivänaa na rätou e horoà mai i te mau tatararaa e te mau pähonoraa märamarama, e na rätou atoà hoì e faaìte mai i te mau räveà e au ia ravehia no te ärai i te fifi. No te Faaroo, te ìno ta te taata i faatupu, na na iho te reira e tatara te tatärahapa ia. Te nä ô ra te reo o te Fatu, Tei tuuhia atu te mea rahi, e mea rahi atoà të tïtauhia atu ; tei püpühia atu te mea rahi ra, e mea rahi atoà ia të anihia atu ia na Ruta èvaneria i te pene 12 i te ìrava 48. Mea maitaì tätou ia ara, o te rara atu to tätou faaroo e te faaruè atoà atu tätou i te rahu a te Atua i roto i te rima o te mau àivänaa. Haamanaò tätou e, ua püpü te Atua i ta na rahu i roto i te rima o te taata. Te nä ô ra te reo o te päpaì taramo Te tähoo mai nei rätou i te ìno i te maitaì no ù ra Taramo 35 i te ìrava12. Erä te taata e haamoè atu ra i to na hiroà i roto i te pöuri, èrä te rahu a te Atua e hoì faahou atu ra i to na huru hou te rahu. Aita atu e faaäraraa i te taata i teie mahana e to Mäòhi Nui, ia ìte faahou i te faaroo te âueue o te fenua e ia rave i te haapaeraa mäa, ia haamanaò faahou mai te Atua i ta na faufaa ora i horoà mai na tätou e te taata nei. Ia âueue te fenua i te ora a te Atua Nui Tumu Tahi.

Teraì òr Faatura.