Ruta èv. 7,7-11

Tāpati 5 no Tiunu 2016.

ÔROÀ

Ev. Ruta 7, 11-17

Te faaora-faahou-raa-hia te tamaiti a te vahine ìvi no Naina

11 E ao aè ra, haere atu ra ò ia i roto i te hoê ôire o Naina te iòa, e te mau pipi atoà na na i te haereraa e te taata atoà e rave rahi. 12 E fätata mai ra ia na te ùputa o taua ôire ra, ìnaha, e taata pohe, të hopoihia mai ra i räpaeàu, e tamaiti fänautahi na to na metua vahine e ìvi hoì ò ia. E e rave rahi atoà to taua ôire ra i reira. 13 E ìte atu ra te Fatu i te metua vahine, aroha atu ra ia na, e ua parau atu ra: «Eiaha e òto. 14 Ua haafätata atu ra ò ia, rave atu ra i te ìri hopoi ra faaea noa iho ra te feiä i hopoi, nä ô atu ra: «E teie nei taata âpï, a tià, te parau atu nei au ia òe 15 Ua tià mai ra taua taata i pohe ra i nià, e ua parau mai ra, ua tuu atu ra Ietu ia na i te metua vahine ra. 16 Roohia paatoà iho ra rätou i te mataù, e haamaitaì atu ra i te Atua, nä ô aè ra: «E perofeta rahi teie i tupu iho nei i roto ia tätou nei, e ua hiò aroha mai te Atua i to na taata 17 Parare roa atu ra taua roo no na ra e àti noa aè ra Iutea, e te mau fenua atoà i reira iho.

Manaò

Te faaìte nei te Èvaneria a Ruta ia Ietu mai te tahi Faaora tei fafauhia ia Ìteraèra e mai te Faaora o teie nei ao. Te haapäpü nei o Ruta e o Ietu tei piihia e te Värua o te Fatu no te «hopoi te Parau Maitaì i te feiä veve, e teie Èvaneria, ua î ia i te manaò täuturu i te feiä atoà i roto i te mau fifi huru rau atoà. Te täpaò no te òaòa tei ìte-tämau-hia i roto i te Èvaneria a Ruta, i roto ihoä rä i te mau pene mätamua tei poro i te haereà mai o Ietu, e tei ìte-atoà-hia i te pae hopeà no teie Èvaneria, i te taime i reva ai Ietu i nià i te raì. Te àai no te tupuraa e te parareraa no te faaroo maru-metia i muri aè i to Ietu revaraa, ua faahiti-atoà-hia teie parau e teie ä taata päpaì i te Puta Òhipa.

E piti tau tuhaa rarahi (pene 1-2 e te pene 9-19) tei höroà mai i te tahi mau parau o tei ìte-noa-hia i roto i teie Èvaneria, mai te àai no te himene a te mau merahi e te tere färerei o te mau tiaì mämoe i te fänauraa o Ietu, te tamaiti ra o Ietu i roto i te Hiero, te parapore no te taata Tämäria hämani maitaì e tae noa atu i te parapore no te tamaiti tei moè. I roto i te täatoà o te Èvaneria, ua haamauhia ia te manaò tumu i nià i te tumu parau o te pure, te parau no te Värua Moà, te tiàraa o te vahine i roto i te täviniraa a Ietu, e te parau no ta te Atua faaòreraa hara.

Te mau tumu parau

Ômuaraa 1.1-4

Te fänauraa e te vai-tamarii-raa o Ioane päpetito e o Ietu: 1.5–2.52

Te täviniraa a Ioane päpetito: 3.1-20.

Te päpetitoraa e te tämataraahia o Ietu: 3.21–4.13

Te täviniraa a Ietu i Tarirea: 414–9.50

Mai Tarirea e haere tià atu i Ierutarëma: 9.2–23.56

Te hepetoma hopeà i Ierutarëma e i pïhaì iho i te mau ôire täpiri: 19.28–23.56

Te tiàfaahouraa, te mau färaa, e te revaraa o te Fatu i nià i te raì: 24.1-53.

Taiòraa

E òto rahi no teie metua vahine ìvi i ta na tämaïti fänau tahi tei pohe, ua piri te mau ùputa atoà i mua ia na, te toe te faaìteraa ia i to na mauiui maha òre. Tei nià teie àti pohe i te èà no te vahi tänuraa, te tupu nei te färereiraa ia Ietu e te ta na mau pipi, i teie àti ìte atu ra te Fatu i te metua vahine, aroha atu ra ia na, e ua parau atu ra, Eiaha e òto. Haafätata atu ra ò ia, rave atu ra i te ìri hopoi ra faaea noa iho ra te feiä i hopoi, nä ô atu ra, E teie nei taata âpï, a tià, te parau atu nei au ia òe, àita i mari rau ua tià mai ra taua taata i pohe ra i ua parau mai ra, ua tuu atu ra Ietu ia na i te metua vahine ra. Ua tupu te mataù o te mau taata i teie òhipa maere, no teie òhipa mähanahana ua haamaitaì rätou i te Atua, nä ô aè ra, E perofeta rahi teie i tupu iho nei i roto ia tätou nei, ua ìte aroha mai te Atua i to na taata. Parare atu ra taua roo no na ra e àti noa aè ra Iutea, e te mau fenua atoà i reira iho.

Parau

E tià ia parauhia e piti tumu parau puai e vai ra i roto i te taiòraa i te päpaìraa a Ruta, 1) Eiaha e òto, te 2) E teie nei taata âpï, a tià. Te faaìte nei o Ietu na roto i teie òhipa ta na e faatupu nei, i te hanahana o te Atua, i te mea te pohe, èita tei ia na te parau hopeà o te taata tei Tumu ra o te Ora, te Atua te Metua here o Ietu e no te mau taata atoà. E tïtauraa te reira ia noaa te Aroha i te taata, e hinaaro te reira no te Atua, aita anaè e aroha i rotopü te taata e te taata, te faaìte noa ra te reira e aita ä to te Atua parau i tae atu ra e i äahia atu ra i roto i te reira taata. Areà te taata e faatupu i te hau, ua riro ia èi tamarii nä te Atua. To na ìteraa te tahi mai ia na ra te huru e taua huru ra no te Atua ia. Eere änei te huru oraraa teie ta te Atua e hinaaro nei ia noaa i te taata, ia tupu te mea ta te Atua e hinaaro nei, ia heeuri i roto i te àau o te taata atoà te aroha, ia òaòa ò ia i te parahiraa i nià teie fenua ta te Atua i püpü mai ia na. Nä roto i te tupuraa te aroha o te Atua, o to te taata ia färiiraa ia pärahi fätata mai te Atua, ia riro tätou èi mau taata no te Atua e èi Atua ò ia no tätou. Färii atoà tätou e nä na e horoi i to tätou roi mata e faaora i to tätou atoà ra mau àti, e nä te Atua e faaâpï te mau mea atoà i roto ia tätou. Ia fäì tätou e, o te Atua te Fatu o te Aroha, te haapäpü ra ia tätou e o te Atua te haamataraa e te faahopeàraa, e tei ia na anaè te parau e tupu mau ai te maitaì o te taata i te fenua nei. Òia mau, e parau päpü teie, no te Atua i aroha ai te aroha. E ôpuaraa no to na hinaaro i ìtehia ai e i vai mai ai te aroha, o ta na i faatupu nä roto i ta na parau mana. No reira, te ìte ra tätou e, aita to te aroha e parau i räpae aè i te Atua. Ahiri aita te Atua i ôpua, àhiri aita ò ia i hinaaro, e àhiri aita ò ia i parau, aita atoà ia to te aroha e parau. E täamuraa päpü to te aroha i te Atua. Ia faahitihia te parau o te aroha, e faahoì ihoä te reira ia tätou i nià i te parau o te Atua. Mai te peu, o te Atua te fatu o te aroha, to na hinaaro tumu maoti, ia vai noa to na Aroha i nià i te taata e a muri noa atu. Ia faaroo tätou i te parau no te ìvi no Tarepeta i te faaìteraa a Te mau Arii 1 i te pene 17 i te mau ìrava 17 e tae i te 24, teie taua parau ra ìrava ua roohia te tamaiti a taua vahine ra, te vahine ùtuafare, i te pohe i te maì e maì rahi to na, aita atu ra e aho i toe i roto ia na. Ua parau mai ra o ia ia Èria, E aha ta ù ia òe, e te taata no te Atua na, I haere mai änei òe e faaìte i ta ù nei hara, e ia pohe hoì ta ù tamaiti, Ua parau atu ra o ia ia na, Hö mai na i to tamaiti. Ua rave mai ra o ia tei nià ia na te vairaa, ua hopoi atu ra ia na i te piha i nià ra, i pärahihia e ana iho, ua tuu iho ra ia na i nià i to na iho ra roì. Ua pii i te Fatu, nä ô atu ra, E ta ù Atua, e te Fatu e, ua hopoi mai hoì òe i te ìno i te vahine ìvi ta ù e pärahi nei i pohe ai ta na tamaiti. Ua tïtoo aè ra o ia i nià iho i taua tamaiti ra, e a toru taime, ua pii atu ra i te Fatu, nä ô atu ra, E ta ù Atua, e te Fatu e, teie tä ù parau ia òe, e faahoì mai òe i te värua o teie nei tamaiti, e ua hoì mai ra te värua o taua tamaiti ra ia na, e ora iho ra o ia. Ua hopoi mai ra i raro mai nià mai i taua piha ra, e i roto i te fare, e ua hopoi atu ra i te metua vahine ra e ua nä ô atu ra Èria, Ìnaha, ua ora to tamaiti. Ua parau mai ra taua vahine ra ia Èria, O te mea teie i ìte ai au e, e taata òe no te Atua, e tei roto te parau mau a te Fatu i to vaha. E parau puai roa teie no tätou no teie mahana i te faauiuiraa ia tätou e, i te parau no te pororaa èvaneria i Mäòhi Nui nei i te mau vahi tei reira te taata i te nohoraa. No te mea ua àuahaatihia tätou i te mau faanahoraa tei haaparuparu i te tupuraa te mau hinaaro o te Atua. Ua riro Mäòhi Nui i roto i te mau ôpape, tei faatea ia na i te tumu no to na iho fenua i reira te aa te mauraa, to na fenua ra te Aroha e te here o te Atua . Ia taiò tätou i te parau o teie na vahine ìvi, no ta raua tämaïti i faahoìhia te värua i roto i te tino, hoê e perofeta, hoê o Ietu hoê òhipa e faaora i te aroha e te here o te Atua. No te teimaha o teie òhipa mea tià ia taiòhia teie Taramo 30, E Taramo, e himene no te haoraa fare o Tävita. E haamaitaì au ia òe, e te Fatu, ua faatià hoì òe ia ù i nià, e aita òe i vaiiho noa atu i taù mau ènemi ia òaòa noa na ia ù. E te Fatu, e taù Atua, i tiàoro noa na vau ia òe, e ua faaora òe ia ù Ua faahoì mai òe, e te Fatu i ta ù värua mai häte mai ä, e ua faaora òe ia ù ia òre au ia tae i raro i te âpoo ra. E himene i te Fatu, e te feiä moà e, e ârue i to na maitaì, ei manaòraa. Mai te àmoraa mata nei to na riri i te poto, âreà to na hereraa mai, e tià ia i te vairaa e mure noa atu te aho. Ia täpae noa mai te òto i te ahiahi e riro rä i te òaòa ia poìpoì. Taua maitaìraa no ù ra, ua parau ä hoì au e òre roa vau nei e âueue. No to hereraa mai, e te Fatu, i haamau päpü ai òe i to ù mouà. Ua huna iho ra òe i to mata, mäheahea aè ra vau. Ua pure iho ra vau ia òe, e te Fatu, i reira e ua faaìte atu ra vau i ta ù äniraa i te Fatu. E aha te faufaa ia rave-pohe-roa-hia vau, e ia hopoi-roa-hia vau i raro i te âpoo. E haamaitaì änei te repo ia òe, e faaìte änei ia i te parau-mau na òe ra. E faaroo mai, e te Fatu, e aroha mai òe ia ù e te Fatu, ei täuturu òe ia ù. Ua faariro òe i te òto no ù ra ei òaòa,

e na òe i tätara i te àhu òto no ù ra, e ua faaàhu mai òe ia ù i te àhu òaòa. E teie nei, e haamaitaì au ia òe mä ta ù hinuhinu, e òre roa vau e mämü. E te Fatu, e taù Atua, e haamaitaì ä vau ia òe e a muri noa atu.

Ia ora na.

Teraì òr.