Ev.Ruta 21,25-36
Mau taiòraa.
Ieremia 33, 14 – 16
Taramo 25
I Tetaronia 3, 12 – 4, 1 – 2
Ev. Ruta 21, 25 – 36
Èi hiòraa manaò
Ieremia 33, 14 – 16.
Te parau tià a te Atua
Te ohi parau tià
Te parau fafau a te Atua
Te hanahana o te parau tià.
Teie faaìteraa parau na Ieremia i te tamarii Iteraèra, e parau òaòa ia, no te tupuraa te hoê ohi parau tià no roto i te ùtuafare o Iuta. Te horoàhia nei teie iòa ‘’ O Iehova ta tätou Parau tià’’. E no roto mai i te huaai a Tavita taua ohi ra. Te tupu nei teie parau na roto i te Metia tei fafauhia. Te Fatu parau tià, tei haere mai, e ia ìte te nunaa i te òaòa, i roto i teie parau fafau. I te ora tei faatupuhia no na e te Atua. E tuàti ia teie parau fafau i nià i te tiàturiraa o te nunaa. Te parau tià ta te Metia e faatupu i roto i teie ao.
Taramo 25.
Te tiàturiraa o te taata faaroo.
Te maitaì o te Atua
Te èà tià a te Atua.
Te tano te mata i nià i te Atua.
E fäìraa hara teie ta Tavita e tuu nei i mua i te Atua, ma te faaìte i te puai no to na àau tatarahapa. O teie te raveà tei noaa ia Tavita, ia òre o ia ia vai noa i roto i te faanahoraa a te hara. I te mea te ìte nei o Tavita i to na ateäraa i te Atua, na roto i te òhipa tià òre ta na i rave i mua i te Atua. Ia i tano noa to na mata i nià i te Atua, tei ìte i te aroha i to na mau taata tupu i roto i te ahoaho.
O te tià e ui, e aha te Fäìraa hara, e te Fäìraa faaroo ?
Te fäìraa, te faaìteraa ia i te tahi mea no roto roa mai i te àau, i te ôpü o të hinaaro noa ra e manii mai i rapae. Ia parau hoì tätou e fäìraa hara, to te taata ia faaìteraa e aha ta na hara; òia hoì, te faaìteraa i te mau mea atoà o tei faaätea ia na i te Atua, ta na e onoono noa ra i te faaìte i te Atua e i te taata atoà hoì. Hoê ä arataìraa manaò e ia parau tätou e fäìraa faaroo. Te vähi taa ê noa, e parau huru haamä te faaìteraa i to òe iho vähi paruparu, e parau maitaì e te òaòa te faaìteraa i te mea ta te àau e tiàturi ra. Ua ìte atoà rä tätou, eita te fäìraa e tupu mai te peu aita te ture o te here e mauhia ra e te àau.
No reira, eiaha te fäìraa ia riro noa èi parauraa e èi faaìteraa manaò, ia riro rä ei tapura òhipa o të tià ia faatupu. E mea tano i te taata tätaì tahi ia haapaò i teie tuhaa no te mea, o na te mea ìte aè i të hea taime to na faaruèraa i te Atua e to na hamani ìnoraa i te tahi. Te ìte ra tätou e, e ère te fäìraa i te tahi pehe e titauhia ia tätou ia tämau àau e o ta tätou e faataì i te mau täpati atoà, o te òhipa mau rä te reira e rave.
O te òhipa ia ta Tavita i faanaho i roto i teie pure, te titauraa i te taata tä taìtahi i te fäì i ta rätou mau hara i mua i te Atua Parau tià.
I Tetaronia 3,12 – 4, 1 – 2.
Ia itoito te faaroo i te Metia
Te tiaìraa i te Metia
Te arataìraa e au i te Atua
Te pure ia hoê i roto i te Metia
Ir 12 – 13. Te pure nei o Pauro no te Ètäretia no Tetaronia, ia àmui faahou rätou no te haamori i te Metia E ia ìtehia te aroha o te Metia i roto ia rätou i te taime ò ia e hoì mai ai.
Ia vai itoito noa ia i roto i te tiaìraa, te piti no te haereraa mai no te Metia, no te arataì ia i te Ètäretia i roto i te ora mure òre. Te mahana o te Metia, te mahana ia i haere mai ai ò ia e ta na mau merahi.
Te pene 4, 1 – 2 te faaitoitoraa no te ora moà, e te aroha.
Te faaitoito mai nei o Pauro i te Ètäretia no Tetaronia, ia tiaì tämau mai te i te hoìraa mai te Fatu. Te aroha ta Pauro e faaìte nei, ia vai ia no te haereraa i te Atua ra i roto i te parau tià. Te manaò o Pauro ia tiaì tämau te Ètäretia i roto i te tiàturiraa e hoì mai te Fatu o Ietu Metia.
Ev. Ruta 21, 25 – 36.
Te raì tei ueuehia
E ara i te hoìraa mai te Tamaiti a te taata.
Te mau tapaò
Te mauhaa no te tiaì te pure.
Te fenua e te raì e mou
Ia tià te Ètäretia i mua i te aro o te Atua.
Èi faatuàtiraa.
Ieremia 33, 14 – 16
Taramo 25
I Tetaronia 3, 12
I Tetaronia 4, 1- 2
Ev. Ruta 21, 25 – 26
E tupu te hoê ohi no te parau tià tei fafauhia.
Faaitoito mai òe ia ù, ia ora vau ia òe, eiaha vau ia roohia e te haama, te tiàturi nei hoì au ia òe
Ia itoito ia i te pure i roto i te tiaìraa, no te hoê e te Metia.
E ia tià te Ètäretia i mua i te aro o te Tamaiti o ia e haere mai i rotopu i te taata.
Te poroì nei teie mau taiòraa, te vai nei te hoê tiaìraa, no te parau âpï òaòa. Ia tamau mai te ia te Ètäretia i te pure, e ia tiàturi i te oh âpï no te parau tià. O ia te Arii hanahana, o ta te taata e tià i mua i to na aro, no te parau tià e no te faahanahana.
Te taiòraa èvaneria a Ruta i te pene 21 i te mau ìrava 25 e tae i te 36, e ìtehia te tupuraa te tahi mau poroìraa e vai ra i roto ia Ieremia i te pene 33, i te ìrava 14 e tae i te 16. Te parau no te ohi parau tià, Te Taramo to te taata ia fäìraa i te hara e te faaroo i mua i te Atua, ia noaa te itoito i roto i te parau tià e horoàhia nei e te Atua. E i roto i te Tetaronia te titauraa ia, ia parahi tämu i roto i te pure. Àreà ra te taiòraa Èvaneria, te faaìte nei ia o Ietu i te mau òhipa e tupu, ia vai ara ra te taata i taua mahana ra. No te tià atu i mua i te Atua parau tià, mea tano ia, ia heheuhia, no te mea te vai te tahi tïtauraa ta Ietu e hinaaro nei e faaìte.
Ev. a Ruta.
Te tahi mau parau òmuaraa no teie puta, ua papaìhia ia i te matahiti 80 ? I muri mai te poheraa te Metia. Teie taiò matahiti èita ia i te mea päpü maitaì. Te mea faufaa ra, ua papaì o Ruta i te òhipa o ta na i faaroo, ta na i ìte i roto ia Ietu. Te tumu ra i hiòhia ai teie taiò matahiti, no te òhipa ia e tupu ra i roto i ta tätou taiòraa èvaneria i te pene 21, i te 25 e tae i te 36. No te mea te na ìrava e piti te 5 e te 6, te faaìte nei o Ietu e vavahihia te fare pure o Ierutarema, e te mau ìrava 20 e tae 24, te vavahiraahia ia te òire o Ierutarema. E ua tupu teie òhipa i te matahiti 70 i muri mai te poheraa te Metia. E i roto i te mau ìrava ta tätou e heheu nei i te mau ìrava 25 e tae i te 36. Te faaìte nei o Ietu i te mau parau no te raì e te fenua, e ueuehia te mau tiàrama o te raì, e tupu te hoê òhipa i nià i te fenua. E ia tià te taata i mua i te tamaiti a te taata. Ia hiò anaèhia, ua tupu teie mau òhipa i te taime i vavahihia ai o Ierutarema, ua rumaruma te raì, i te auahiahi. Aita te raì e ìte faahouhia. E te mau òhipa i tupu i nià i te fenua, ua vavahihia te òire o Ierutarema. I roto ra i ta tätou taiòraa, te faaìte nei ia o Ietu i te hoìraa mai te tamaiti a te taata, e ueue – atoà – hia te mau tiàrama, i reira e tupu ai te tiàraa no te Ètäretia i mua i te aro o te Atua.
Ta tuhaaraa.
Te vai nei e toru tuhaa.
- ìr . 25 – 27 Te haere mai ra te Tamaiti a te taata.
- Ir. 28 – 33 Te fatata mai ra te Patireia o te Atua.
- Ir. 34 – 36 Faaitoito i te araraa.
Te heheuraa.
Ietu
Te raì
Fenua
Taata
Ietu
E piri te mahana te maramarama e te mau fetia.
Ietu
E ueuehia
E ìtehia te Tamaiti a te taata
E àti rahi
E ahoaho
Tarapape te àau
E mataù
Te fatata mai ra.
Ietu
Ua fatata ia te ora.
Ietu
Ua fatata ia te Patireia o te Atua
E mou
Te tute e te mau raau atoà
E òteo, te fatata ra ia i te àuhune.
E òre te mau uì e mou e tupu
E MOU.
Ietu
Te parau ra èita
E ara ra i taua mahana ra
E PURE
E ia tià i mua i te aro o te Tamaiti a te taata. Ir 36vh.
Ei faaitoitoraa.
Ev. Ruta, 21 – 36.
Ìrava tumu, ìrava 36 vahi hopeà, E tià maite òutou i mua i te aro o te Tamaiti a te taata.
E hoa here mä, tatou e to te huifaaroo Maru - Metia, ia ora na te Aroha 0 te Atua. Ua täpaòhia teie tapati, ei mahana e ìriti ai tätou i te tau no te Tiaìraa i te haereà mai no te Tamaiti a te Atua. Oia mau, mai teie atu mahana e tae noa atu i te tapati hopeà hou i te ôroà Noera (haamanaòraa no te fänauraa no te Arii 0 te mau arii) ; e ora àmui ai tätou, èiaha noa i roto i te faaineineraa ia tätou, no teie nei ôroà fänauraa no te Tamaiti a te Atua, no te faaineine atoà ra ia tätou i roto i te tiaìraa i te haereà mai hanahana no te Faaora o teie nei ao, no te haamau i te Hau mure òre o to na Metua i nià i te tino no te fenua nei. O ta tätou ia e tiàturi nei, tätou e to te huifaaroo Maru - Metia, e o te titauraa atoà te reira a te Fatu ia tatou . e o Ta na e haamanaò mai nei na roto i ta tatou taiòraa no teie mahana o ta tätou i faaroo mai, e tei faaìte mai ia tätou e toru tau tuhaa.
A tahi : mai te ìrava 25-28 .
0 te mau täpaò maere e te huru ê 0 te tupu i roto i teie n ei ao, i roto i te mau mea atoà i rahuhia e te Atua. E ìtehia te piri i roto te mahana, i roto i te marama, e i roto i te mau Fetia. E o te mau fenua atoà i roto i te àti e te ahoaho. E haruru te miti e te àre . e i hoì te àau o te taata i te mataù i te ìteraa i teie mau mea atoà i te tupuraa. e e pau hoì te mau mea atoà o te rai i te ueuehia. E teie, mau täpaò taaê, te faaìte noa mai ra ia i to te ao nei e, te Fatata nei te haereà mai no te Tamaiti a te taata nei, i roto i to na mana e te hanahana rahi; o te faaìte mai ia tätou i te huru no to na tiàraa hui – arii ; e haere mai Ò ia no te haamau i To na Hau mure Ore. ,
Eita e òre, e hoa here mä, tätou i te huru ê e te mätaù atoà i teie huru faahitiraa parau o ta tätou e Faaroo nei mai roto mai i te vaha no Ietu, i mua i ta na mau pipi e te feia atoà o tei àmui mai i te Hiero i taua mahana ra.
la ìte atoà ra tätou e, ua riro teie mau parau, eiaha èi haaparuparuraa, ei Faaitoitoraa ra i ta na mau pipi i taua mahana ra, e ia tätou te huifaaroo no teie mahana, e no te mau tau atoà ; i te mea e, e haapäpüraa teie e, e hoì mai to tätou Fatu i te hoê mahana no te haamau i to na Hau. E ia tupu mau a ia teie mau tapaò taaê e te maere rahi, no te faaìte ia tätou e to te ao nei e, te haere mai nei te arii hanahana, te Fatu manahope, te Ora o teie nei ao. E ia tae mai te reira tau e te reira mahana, te titau nei te Fatu i to te huifaaroo ia òre ia pärahi noa i roto i te mataù e te peàpeà, ia nana ra to rätou mata i nià i te raì, e ia faateitei i to rätou upoo. òia , hoì, ia färiu to rätou mata, to rätou tiàturiraa e to rätou varua i t e Atua ra, te Tumu o te ora . no te mea te fatata mai ra to rätou ora, te fatata mai ra te taime e ìriti mai ai te Atua ia rätou mai roto mai i to rätou mataù, to rätou peàpeà e to rätou ahoaho, no te tuu ia rätou i roto i te ora na na. Aue ia parau i te òaòa, no te feiä atoà 0 tei tiàturi e tei faaroo i te Atua na roto i ta na Tamaiti ia Ietu –Metia , e parahi rätou i roto i te Ora o tei faataahia e te Atua no rätou. No tatou e hinaaro atoà nei i taua ora horoà noa ra, a färiu anaè i teie n e i ä, i to tatou Varua e to tatou àau i te Atua ra, a nana anaè i tätou mata i nià, a faateitei i to tätou upoo, te fatata mai nei hoì to tatou ora.
Te piti no te tuhaa i roto i ta tätou taiòraa, mai te ìrava 29 - 33, o te parapore no te tute e te mau raau atoà o ta Ietu e faatià nei. Èita e òre e e mea päpä atoà e te feiä faaapu, te feia tanu raau e te feia tei au i te natura, te feiä matamua roa o te maramarama i te auraa no teie nei parapore. Èita atoà e òre e ua faatià o Ietu i teie pärapore no te mea, te vai ra te feiä faaapu i roto i teie mau taata e faaroo mai ra ia na. E o rätou mau o te ìte e e aha mau na te mea e tupu mai i muri aè i te tau no te òteuraa o te mau raau. O to àuhune ia, e ia ìtehia te parau o te àuhune ra, e hiti atoà mai ia te parau no te òotiraa e te òaòa o te feiä òoti no te mea ua rahi t e àuhune, ua rahi te hotu. Te taata o tei hau roa atu i te òaòa o te taata faaapu ia, inaha ua hotu e ua àuhune te mea o ta na i tanu.
E te toru no te tuhaa no ta tätou nei taiòraa, mai te ìrava 34 -36, e tïtauraa ia na te Fatu i ta na mau pipi e ia tätou atoà e to te huifaaroo Maru - Metia, ia ara i mua i te mau tamataraa e te mau faahemaraa o teie nei ao. E i mua i te reira mau mea, te tïtau mai nei te Fatu ia tätou ia parahi tamau maite i roto i te pure , ia tuutuu òre tätou i te mau raveà atoà no te faatea e no te faataaê ia tätou i te mau ìno atoà o teie nei ao, a nehenehe atu ai ia tatou ia ora päpü i roto i ta tätou taviniraa i te Atua. E te tiàraa atu i mua i te aro no te Tamaiti a te taata nei o ta te Fatu e faahiti nei i te pae hopeà no ta tätou taiòraa, na te ìrava 36, te haapäpüraa ia no te ora e noaa i te feiä atoà i tiàturi e i faaroo i te Atua. No reira, tätou e to te huifaaroo Maru - Metia, i roto i teie tau no te "Tiaìraa no te haereà mai no te Tamaiti a te Atua", o ta tätou e ìriti nei i teie mahana, a faataaê anaè ia tätou i te mau tamataraa e te mau faahemaraa rau o teie nei ao . èiaha no te mea e ère tätou no teie nei ao, oia no teie nei ao tatou ; no te mea ra e ua titauhia tätou no te tavini i te Atua no te Ora e no te poro haere i te Parau Maitaì no to na Patireia, to na Hau o ta na e haamau i te ao nei. A rohi anaè tätou e a faaitoito, ia hanahana te iòa o to tätou Atua 0 ta te Tamaiti i faaìte i to te ao, na roto i to na riroraa mai èi taata e ua tiàhapa mai i o tätou nei ; e na roto i to na pohe e to na tiàfaahouraa o tei ìriti i to te ao atoà nei i te ùputa no te Ora Mure Òre
Ia ora na
Teraì