II Tämuera 7, 1-16

(Mea tià ia täiòhia teie pene parau ma te ìrava 1 e tae i te 16, aita i täpeàhia mai te Ruta Ev. 1, 26-38)

II Tämuera 7,1-16

Te ôpua ra Tävita e faatià i te fare no te Atua, e ua tià taua ôpuaraa rä

1 E päpü atu ra to te arii pärahiraa i to na ra fare, e ua höroà mai te Fatu i te hau nö na i to na ra mau ènemi e àti noa aè, 2 ua parau atu ra te arii i te perofeta ra ia Nätana, a hiò na, te pärahi nei au i roto i te fare âreti, âreà te âfata o te Atua te pärahi nei ia i roto ìte päruru. 3 Ua parau atu ra Nätana i te arii, e haere e rave i ta òe e manaò na; tei ia òe hoì te Fatu.

Faatià

4 Ua tae mai ra rä te parau a te Fatu i taua ruì ra ia Nätana, nä ô mai ra, 5 A haere, a parau atu i ta ù tävini ra ia Tävita, te parau mai ra te Fatu, e faatià mai ä òe i te hoê fare no ù ei pärahiraa. 6 Aita hoì au i pärahi i te fare mai ia ù ä i arataì mai i te tamarii a Ìteraèra mai Àifiti mai ä, e tae roa aè nei i teie nei mahana, i hahaere noa na vau nä roto i te pühapa e nä roto i te tëtene. 7 I roto atoà i taua mau mea atoà ra, tä ù i hahaere noa, e te tamarii atoà o Ìteraèra, i parau änei hoì au i te mau haavä ia Ìteraèra tä ù i parau atu e tiaì i ta ù mau taata ra ia Ìteraèra, i nä ô atu änei hoì au e, e aha òutou i òre i faatià ai i te tahi fare âreti na ù.

Parau fäfau

8 E teie nei, e parau hua atu òe i ta ù tävini ia Tävita, te nä ô mai ra te Atua Täpäota o te Fatu, i rave mai au ia òe mai te fare mämoe mai ä, mai te pee haereà i te mau mämoe, ei tävana no nià iho i to ù nei mau taata ia Ìteraèra: 9 e ei pihaì-atoà-iho vau ia òe i to òe atoà ra mau haereà, e ua täpü-ê-hia e au to mau ènemi atoà. E nä ù hoì e faariro i to òe ra iòa ia rahi, mai te iòa atoà o te feiä rarahi i te ao nei. 10 E haapaò hoì au i te hoê vähi no to ù ra mau taata no Ìteraèra, e nä ù rätou e tanu i reira, e vai mau atu ä rätou i to rätou ra vähi mau, e eiaha roa ia haùti faahou; eiaha hoì te taata haùti ia haùti faahou atu ia rätou mai tei a mütaa iho ra; 11 mai ia ù ä i tuu i te mau haavä i nià iho i to ù ra mau taata ia Ìteraèra. E höroà hoì au ia òe ra ia pärahi noa òe, i to òe ra mau ènemi. Te faaìte atu nei hoì te Fatu ia òe, nä na e patu i to fare na. 12 Ia hope roa hoì to òe ra puè mahana, e ia taòto atoà òe to òe puè metua, e faatià ai au i to òe ra huaai i muri aè ia òe ra, no to òe iho na ôpü, e na ù e haamau i to na ra hau. 13 Na na e faatià i te hoê fare no to ù nei iòa, e nä ù e haamau i to na teröno i to na ra pätireia e a muri noa atu. 14 Ei metua vau nö na, e ei tämaïti ò ia nö ù. Ia rave ò ia i te hara ra, nä ù ò ia e aò atu i te papaì taata nei, mai tei täìrihia te tamarii a te taata nei: 15 âreà to ù nei aroha, e òre roa ia vau e ìriti ê atu i te reira ia na, mai ia ù i nä reira ia Taura i tä ù i tuu ê atu i mua ia òe ra. 16 E to òe na fare o to òe ra pätireia, e mau ia i mua ia òe ra, to òe ra teröno, e mau ia e a muri noa atu.

Tuatua

Te taiòraa i faaroohia e tätou Tämuera piti te mau ìrava 1 e tae i te 16, e parau ia no te upootiàraa te arii o Tavita i nià i te mau Firiteti i reira te òire o Ierütarema hoì faahouraa mai i roto i te faanahoraa o te nünaa o te Atua no te faatupu i te hau, e tae noa atu i te àfata faufaa tei roto te vairaa te mau faaueraa a te Atua, no te nünaa i tiàturi i teie mau parau. E faatupu te Atua i te hoê parau fäfau ia Tavita no te faatiàraa i te hoê fare haamoriraa ia ìte-tämau-hia i nià i te fenua i ta te Atua i Faatähinu e haamata teie parau i te ìrava 8 e tae i te ìrava 16. E faaäuraa âpï teie na te Atua i to na tävini arii ia Tavita, no te faatià i te fare èi vairaa i ta na àfata faufaa, tei vai noa na i roto i te päruru àhu.

Parau

Na teie parau e faafarerei ia tätou i roto i teie raveà haaparareraa, tei te ìrava piti ia no te puta a Tämuera 2, i te pene 2 ua parau atu ra te arii i te perofeta ra ia Nätana, a hiò na, te pärahi nei au i roto i te fare âreti, âreà te âfata o te Atua te pärahi nei ia i roto i te päruru.

I teie parau a te Arii i te perofeta Nätana tei ìte nei ò ia e fare to na i faatiàhia e Hirema arii no Turia i to na upootiàraa i mua i to na mau ènemi, e fare ùnaùna tei faatiàhia e te mau räau no te fenua Repanona, e tumu räau faahiahia mau teie, e tae roa mai i teie mahana, e täpaò teie no te fenua Repanona. Te Parau rä a te Atua tei roto noa ia i te âfata i te vairaa, te hoê vahi apiapi tei täpoìhia e te tähi àhu. Na teie âfata faufaa i ärataì noa na i te nünaa Ìteraèra mai Àifiti e tae noa atu i te mau vahi i faatîtîhia ai rätou, e te riroraa i te mau Firiteti. Ia tae ra i te tau no Tavita i hoì-faahou ai te âfata faufaa a te Atua i Ierütarema, o ta tätou ia i faaroo i teie hora paieti, II Tämuera 7,1-16

Manaò

Te pärahi nei au i roto i te fare âreti, âreà te âfata o te Atua te pärahi nei ia i roto i te päruru. E piti parau tumu teie e vai nei i roto i teie reo no Tavita, 1) Fare to te taata a 2) e âfata to te Atua.

A tähi, e fare to te taata,

Te fare e vahi te taata e noho ai, tei päruru ia na i te mau mea e àua haaàti i to na oraraa, e vahi e haamata ai i te parau no to na faaineineraa, ia noaa te ìte, te marämarama, te paari, i mua i te mau òhipa e tupu ai te maitaì. Vahi mätamua atoà te fare e haaputuputu ai na metua e te mau tämarii, te mau fëtii no te mau òhipa e au no te oraraa.

Te fare, te vai nei to na parau, to na faanahoraa, no te faatupu te hoêraa o te fëtii i te mau taime peàpeà, no te tämahanahana, te òaòa, no te farereiraa, te hau, no te faatura. Na teie mau tupuraa òhipa e faaìte i te faufaa o te fare.

I teie mau taime, tei roto ia te mau ùtuafare atoà i te faaineineraa i to rätou mau fare, no te haamanaòraa i te fänauraa o te Tämaïti Fänau Tahi a te Atua tei parau e Te Vai Nei Au O vau e Vai Nei, ua rau ia te purapura o te mau mori to rätou nehenehe, te maa, te ïnu, mau taoà horoà, mau mea faahiahia teie no te faaìte i to tätou òaòa, no te mea hoê taime i te mätahiti te mau ùtuafare atoà e òhipa âmui ai, no te faahanahana te ôroà Fänau no te Tämaïti a te Atua.

A piti, e âfata to te Atua,

Ò ia hoì, i vai noa na te mau faaueraa a te Atua i roto i te âfata, tei paruruhia e te hoê àhu, o ta na ia parau, i parau na ò ia ia Mote ia hämani i te hoê âfata èi vairaa i ta ù parau te òhipa ia i tupu, e tae roa i te tau o Tavita, i faahoìhia ai i Ierütarema, i muri aè i to te mau Firiteti fätiraa i mua i te puai o te nünaa faaterehia e Tavita.

Ia au i teie mau parau, e tià ia parauhia o Tavita te Arii mätamua i faatià i te hoê fare no te Atua, e vairaa i ta na mau Parau, na Toromona ra i faatae i nià i te hoê fäito faahiahia, e te mau faanahoraa nehenehe no te mau fenua atoà e haaàti nei i te òire no Ierütarema, e vahi haamoriraa na te nünaa àti-Iuta. E ua tae roa mai te reira faanahoraa i ö tätou nei.

I teie mau taime tei roto ia te mau paroita atoà i te faaineineraa i te mau fare pure, no teie ôroà haamanaòraa i te Fänauraa te Tämaïti a te Atua, te mau papa haamori, te mau taiòraa, te mau himene no te faaìte i te puai o te faaroo i roto i te Fare o te Atua.

Teie na parau e piti, e fare to te taata, e âfata to te Atua, te tïtau mai nei teie na parau i te taata faaroo ia ìte i te faufaa o te fare nohoraa, e te Fare o te Atua, èi vahi faatupuraa i te here e te Aroha. Èi faaotiraa à faaroo mai na òutou i teie parau.

To ù mahana fänauraa.

Mai ta òutou i ìte, te taiò mahana o to ù fänauraa te fätata mai ra ia. I te mau mätahiti atoà e faatupuhia te tahi òroà hanahana no ù, i teie ä mätahiti faahou e faahanahanahia teie òroà. I teie ä taiò mahana, e rave rahi ä mau taata e haere e hoohoo, hoo mai i te mau taoà horoà, e rave rahi mau faatiäniäniraa, i roto i te mau ratio, mau àfata teata, i roto i te mau fare toa, e te mau mätahiti atoà, e maraa noa ra te mau faanahoraa rau, ia fätata mai to ù mahana fänauraa

Mea faahiahia roa ia ìtehia e, hoê taime i te mätahiti, te tahi mau taata te manaò mai ra ia ù. Teie ra, te ìte nei au i te ômuaraa teie mau taata te marämarama nei, e te ìte nei rätou i te mau òhipa atoà ta ù i faafänaò ia rätou. Rahi noa atu ai te mau taime e maìri nei, rahi noa atoà te moèraa i te mau taata te tumu mau o teie òroà.

Te mau ùtuafare, te mau hoa te haaputuputu nei no te àrearea, te pure nei, te himene nei, teie rä aita rätou e ìte nei te värua o teie òroà. Te haamanaò nei au i te mätahiti i maìri aè nei, e àiraa maa rahi tei faanahohia no to ù mahana fänauraa. Te àiraa no te fare tämaaraa, ua î i te mau maa faahiahia, te mau maa hotu, mau faraoa monamona ua rau te huru. Te mau faaùnaùna, te mau mori purapura auë te nehenehe, te mau taoà horoà tei puòhu maitaìhia i te hoê faanahoraa taa ê.

Teie ra ua ìte òutou ? Aita vau i tïtauhia ?... ia au te faanahoraa o vau te manihini hanahana, ua moèhia vau ia rätou aita ta ù tïtauraa i faataehia mai.

E ìnaha hoì teie òroà hanahana no ù ia, ia tae mai ra taua mahana ra, ua vai-iho-hia vau i räpae, ua täpirihia mai te ùputa i mua i to ù mata…

E hinaaro rahi to ù i te âmui ia rätou no teie òroà. Aita atoà vau i maere mai te mau mätahiti atoà te piri nei te mau ùputa i mua i to ù aro. No te mea aita vau i tïtauhia, manaò aè ra vau e âmui au i teie òroà ma te maniania òre, e ma te ìte-òre-hia mai. Haere atu ra vau i roto i te hoê poro, ma te tütonu to ù mata i nià i te mau òhipa e tupu ra. Te inu nei rätou, te tahi pae ua taèro roa, te tahi pae te faatià ra i te mau parau àrearea, te àta ra i te mau huru parau atoà. O te hoê taime faahiahia mau.

No te tupu maitaìraa o te òroà, teie ia taata poria, menemene maitaì, i te ùmiùmi ùoùo tei tae mai, to na àhu roa i te ù ùra, ma te àta noa !oh !oh !oh parahi-iho ra i te vahi i faataahia no na, àua haaàti – iho ra te mau tamarii ia na ma te pii hua e, PAPA NOERA, PAPA NOERA, PAPA NOERA.

Mai te mea atu ra e no na teie òroà hanahana i faatupuhia.

Ia àhuru mä piti i te tuìraa pö, haamata iho ra te mau taata i te aroha ma te àpapa ia rätou te tahi i te tahi, haamahora iho ra vau i to ù na rima tiaì atu ra i te tahi ia haere mai e ìhi ia ù i roto ia na… ua ìte òutou aore roa te hoê taata i haere mai ia ù ra. E muri aè tupu atu ra te ôpereraa te mau taoà horoà. Tätara tätaì-tahi iho ra rätou te mau toà i faataahia na te reira e te reira. Ia matara te mau puòhu atoà i te tätarahia, hiò aè ra vau aita nei e puòhu e toe tei papaìhia to ù iòa i nià iho, aita roa hoê. Ia manaò òutou, no òutou te òroà i faatupuhia e aita òutou i haapaòhia e aha to òutou huru ? Ìte aè ra vau e, èita no ù teie àruì i faatupuhia, vaiiho aè ra vau teie òroà ma te hoì maniania òre noa.

I te mau mätahiti atoà te morohi noa atu ra te tumu mau o teie òroà. Te mea ta te mau taata e täpeà, ua inu, ua tämaa, ua àrearea, te mau taoà horoà, e aita roa e taata e manaò mau ia ù.

Te manaò nei au no te Noera no teie mätahiti, ia ìriti mai òutou i te ùputa o to òutou àau ia tomo atu i roto i to òutou oraraa. Te hinaaro nei au e haamanaò atu ia òutou ua hau i te 2 013 mätahiti i teie nei, i to ù haereraa mai i roto i teie nei ao, no te tumu hoê roa e horoà i to ù ora no òutou, e no te faahope roa i te faaora.

I teie mahana te hinaaro nei vau ia tiàturi mai òutou, ma to òutou àau atoà, e to òutou värua faaroo. No te mea hoì i te mau òroà tei tupu i te mau mätahiti i maìri aè nei e rave rahi òutou aita i tïtauhia. E teie nei e faatupu vau i ta ù iho òroà, te tiàturi nei au e rave rahi òutou e âmui mai ia ù.

Ia faufaahia teie tïtauraa, a ôpere atu te reira i te rahiraa o te mau taata atoà ta òutou i mätau.

A ìte mai te rahi o te puai o to ù Here ia òutou

Ietu.