Mataio 25,31-46

Mau taioraa.

Etetiera 34:11-24 Te nana a te Atua.

Te imiraa a te Atua tei moè.

Te maitiraa a te Atua.

Te tauturu a te Atua i to na nunaa.

Itaia 26:7-19 Te haereraa tià i mua i te Atua.

Te imiraa a te ààu.

Te hau a te Atua.

Te tiàfaahouraa.

I Torinetia 15:20-28 Te tiàfaahouraa o te Metia.

Te mana o te Atua.

Te hanahana o te Atua.

Mataio 25:31-46 Te faautuàraa o te maitai,e te ino.

Ia fariihia to na iho taeaè.

Te haavaraa hopeà.

Ei irava faitoitoraa.

Mataio 25:34vr A haere mai outou e te feia i faaorahia e tà ù Metua.

ir.37 E te Fatu i nafea matou i ite ai ia oe i te poiäraa,e ua faaàmu ia oe,e te poiharaa e ua faainu ätu ia oe.

Ei manao tatara.

Aita tatou i taë ätu ra i te hopeàraa o teie ao,tei te hopeàraa ra tatou no teie pene parau ta Mataio e faaite nei.I roto i na tuhaa e toru nei,e tià ia parauhia e mai te irava 1 e tae ite i te irava 13,te parapore ia no na paretenia tino àhuru,mai te iarava 14 e tae ite irava 30 te parapore ia no te mau tareni tei faaohipahia,e tei ore i faaohipahia.E mai te irava 31 e tae i te irava 46,te mana o te Metia ia tae i te haavaraa hopeà.E piti tau parapore to roto i teie pene parau hoê ia vai ära noa ia i te tiairaa no te hoiraa mai o te Metia,te piti e faarahi ä te Atua i ta na horoà o tei parahi noa i roto i te tiàturiraa.

Areà ra tatou parau no teie mahana eita ia i te parapore,e ohipa ra tei tupu i muri noa äè i te tiàfaahouraa o te tino,i te mea te tiàturi nei tatou i taua mahana ra,o ta te Atua i faata no te haava te feia parautià,e te feia parautià ore.Te faahita nei o Ietu i te ààu taata na roto i teie mau parau,no ta na mau faanahoraa e te tupuraa.Te paruru o te feia parautià,to ratou ia faaroo aueue ore,e te haapaoraa i te hoê taeaè iti haihai roa,oia hoi,o tei ore i tauàhia,tei faaruèhia mai te hoê ofai tiàva ra te huru.To te parautià ore ra aita ia to an e paruru,to na noa ia ààu ètaèta e te faaroo ore.E horoà faahou änei ra te Atua i te hoê manuiaraa ia ratou,ia tatarahapa? Ia au ra i ta tatou taioraa aita teie raveà e horoà faahouhia,to na auraa ra,eita i te taime haavaraa i reira e äni ai i te tatarahaparaa i mua i te Atua.I te taime ra no to tatou oraraa, i reira e tatarahapa ai, te parau ia e faahitihia nei i roto i te pure a te Fatu,E FAAORE MAI I TA MATOU HARA MAI IA MATOU I FAAORE TEI HARA IA MATOU NEI.

Tei reira te vahi maere no teie ohipa ta Ietu e faatià nei i te mau pîpî,te huru no te haavaraa,aita e paruru faahou to te taata ia taë i te taime e hoi mai ai te Metia.E faataa-roa-hia to te àtau e to te àui.E niuhia ia te haavaraa i nià i te faatupuraa ohipa.O tei faatupu i te maitai ma te oaoa,e faaroo ia ratou i te reo e,A HAERE MAI OUTOU,E TE FEIA,I FAAORAHIA E TA U METUA.

I te mea ua ravehia e outou i te mau ohipa haihai,e au no te hoê taata tupu o te itehia i te èreraa i te mau maitai o te tino.

I poia na hoi au,e ua horoà mai outou i te maa na ù.

I poiha na vau,e ua faainu mai outout ia ù.

E taata ê au,e ua ite mai outou ia ù.

I veve na vau,e ua faaahu mai outout ia ù.

I pohe na vau i te mai,e ua ütuütu mai outou i aù.

I roto vau i te fare tapeàraa,e ua haere mai outou ia ù ra.

Te haapapu nei Ietu i ù nei,te oraraa e au i te hoê taata teretetiano ia rave ma te ààu haapao maitai,e te haavare ore.E tapura teie,tei tupu i te mau mahana ätoà o to tatou oraraa nei,tei faariro i te mau taata faaroo ätoà ei tavini farii i te mea haihai äè ia tatou,eihea taime to tatou faatupuraa i teie tapura,eihea taime to tatou àperaa,eihea taime to tatou pipiriraa?

I parau ai o Ietu i teie parau e,O OUTOU I NA REIRA I TE HOÊ TAEAE ITI HAIHAI ROA I TA U MAU TAEAE NEI UA NA REIRA MAI IA OUTOU IA U.(IR 40 vh)E TE FATU I A NAFEA MATOU I ITE AI IA OE I TE POIARAA.Te faaite nei te feia parautià i ù nei, e ua ravehia e ratou te ohipa e au ia ratou ia rave,no te hoê mea iti roa äè ei faaiteraa i te tapao no te auraro i te mauiui o vetahi ê,ma te àmui i roto,e ma te pure.Te haamaheuhia nei ia,te oraraa o te hoê taata teretetiano i te mahana tatai tahi i te haamaitairaa a te Atua.Te huru no teie oraraa teretetiano ia aahia ia i roto i te Metia.Oia hoi,ia aahia i roto i te pohe,te tiàfaahouraa,e te hoiraa mai no te Tmaiti a te taata,e tiàraa hanahana teie no Ietu,no te faaite te mana faaoti i te ohipa,i te taime e hoi faahou mai ai O ia.Noa ätu te vai morohiraa no te Patireia o te Atua,te faahaamanao nei ra o Ietu i te taata teretetiano,ia faaineine e ia faaàpi i te mau ohipa,te huru ia taui,te mau parau ia tupu te mea tià,ia haaapaehia te mea tià ore,i te mea tei roto i te ohipa,te faaotiraa no te haavaraa a te Atua.

E äoraa teie ta Ietu e faatumu nei i nià i to na hanahana,no te haavaraa no te taime e hoi mai ai O ia.Te faaitoito nei o Ietu i te tià ore ia imi i te raveà ia mataù i te Atua i te mea aita e äniraa faahou no te faaô i roto i te pupu taata o te Atua,ia ore ua rave ia i te pohe mure ore.

Areà tei mataù i te Atua ra,o te taata ia tei ite e,e hara ta na i mua i te Atua.E piti èà teie ta te Fatu e iriti nei i roto i te oraraa nei,

1)Te èà no te aroha,tei faatupu ia i te fariiraa e te aupururaa i te hoê taeaè iti haihai roa,i roto i te mau taeaè nei,tei roto ia te aroha o te Fatu ia na te vairaa.Teie faahaparaa i te hoê taeaè iti haihai roa ra,e riro ätoà o ia i te faahapahia ia tae i te mahana o te Fatu.

2)Te èà ia no te faatupu i te ino,e te taua ore i te mea iti haihai roa i roto i te mau taeaè nei,(o te pohe ia.)O ta te Fatu ra e iriti nei na roto i teie äoraa,te toru ia o te èà.No vai ? e no te aha?

No vai ? No te feia tei parauhia e,a haere mai outou e te feia i faaorahia e ta ù Metua.

E no te aha?no te mea ia,aita ratou i haamauà i te hinu o te ramepa no te turama i te oru o te èà.No te mea ia,aita te tareni i vai faufaa ore noa,ua rahi ra no te faatupu i te toru o te èà o te ora.

Te toru o te èà,te manuiraa ia teie e horoà faahouhia nei i te taata teretetiano,no te faatupu i te titauraa a te Atua,e te faaàpi faahouraa i te parau no te èuhe.I te mea te haavaraa a te Atua,eita ia mea na roto i te hioraa a te taata,mea na roto ra i te faaturaraa i ta te Varua-Moà aratairaa,i pohe ai o Ietu no te hara a te taata nei,i tiàfaahou ai no te tiàmaraa o te faaroo.Eiaha ia mataùhia te haavaraa a te Atua,ia vai ra te manaonaoraa i roto ia tatou, i te faaotiraa e ravehia no tatou e te Atua.Ta te taioraa ia e faaite nei ia tatou i teie hora paieti.