Ruta èv. 20, 27-38
Tāpati 6 no Novema 2016.
Ôroà
Ora
Ruta èv. 20, 27-38
Te tahi uiraa no te tiàfaahouraa
Mät 22.23-33; Mär 12.18-27
27 Ua haere mai ra te tahi pae i te mau tätutea ra, o tei parau e, aore e tiàfaahouraa, e ua ui mai ra ia na, 28 nä ô mai ra, E te Òrometua e i päpaì mai Möte i te parau ia mätou, e ia pohe te tuaana o te hoê taata aore e tamarii, te ora ra te vahine, e faaipoipo te teina i taua vahine ra, e haafänautama i te tamarii na ta na tuaana. 29 Toohitu puè tamarii tamaroa i te hoê fëtii, faaipoipo iho ra te mätahiapo i te vahine, e pohe atu ra, aore e tamarii. 30 Ua faaipoipo iho ra te toopiti i taua vahine ra, e pohe atoà atu ra mä te tamarii òre. 31 Ua faaipoipo iho ra hoì te tootoru i taua vahine rä ; e i nä reira atoà hoì rätou toohitu, e hope atoà atu ra i te pohe mä te tamarii òre ä. 32 E te hopeà iho ra, pohe atoà atu ra taua vahine ra. 33 E i teie nei, ia tae i te tiàfaahouraa ra, e riro o ia ei vahine na vai i taua toohitu ra. E vahine hoì o ia na rätou atoà toohitu 34 Ua nä ô atu ra Ietu i te parauraa atu ia rätou, Te faaipoipo nei to teie nei ao, e te höroàhia nei e faaipoipo, 35 âreà te feiä e manaòhia e au ia rätou taua ao a muri nei, e të tià faahou mai te pohe mai, e òre ia rätou e faaipoipo, e òre hoì e höroàhia e faaipoipo. 36 E òre hoì rätou e pohe faahou, mai te mau merahi ra hoì rätou, e tamarii na te Atua, e tamarii no te tiàfaahouraa. 37 I te parau ra e, e faatià-faahou-hia te feiä i pohe, ua faaìte atoà mai hoì Möte ia na i parau i te Fatu i fä mai i roto i te pü àihere ra, O te Atua o Âperahäma, e te Atua no Ìtaata, e te Atua no Iatöpa. 38 Eere hoì o ia i te Atua no tei pohe, no tei ora rä, te ora anaè ra hoì rätou ia na.
Manaò
Mau taeaè, mau tuahine, mau tamarii, te nünaa ora a te Atua Nui Tumu Tahi, Na vai e faaìte te hape, na vai e faatano, e reni tano tei ärataì i te mau faufaa ora a te Atua nui Tumu Tahi. I faaroo mai ai tei tià ra, i haapaò mai ai ia tätou e tiàoro nei. Mai roto atu i te mau vaha haavare òre a tuuhia mai ai te parau ia tätou nei, i te hiò a te Atua Nui Tumu Tahi i te mea tià. Te tämatahia nei to tätou âau, ua hiòhia mai tätou i te ruì, ua tämatahia tätou, e aita e parau ìno i ìteähia, eiaha to tätou vaha ia hapa. I ta mätou nei parauraa, no te parau a to vaha, i ara ai mätou i to mätou haereraa ia vai tämau mätou i te reni no te tano. Te ìte nei ra mätou i te tauturu i to mätou haereà e te mau èà, ia òre ia pähee to mätou tau puè âvae. Te itoito nei ra mätou i te tiàoro, te faaroo mai nei òe ia mätou, e te Atua Nui Tumu Tahi, te färiu mai nei to tarià ia mätou, e haapaò mai i ta mätou parau ia ora o Mäòhi Nui. To aroha hämani maitaì i maerehia ra, e tei faaora i te feiä i tiàturi e tei tià mai i nià, e faaìte i to hanahana. Tiaì mai ia mätou mai te òriò mata, e to pütarià e paruru ia mätou i raro aè i to marumaru ra. Ia noaa i te feiä paieti òre, e tei hämani ìno ra i te tätarahapa. E mau parau teòteò ra tei faaroohia i to rätou vaha, te reni o te teòteò ra o te teitei faufaa òre ia. Te mau èà tià, i haapunihia ia faatanohia ia ìteähia e te mata tei toro i raro i te fenua. E ènemi rahi e àua haaàti nei ia mätou ia paruparu mätou. Te ìte ôrama nei ra mätou ua tià, Ia ora mätou i te taata ìno, i te rima no òe ra e ora ai mätou, i te reira nänaì taata ia tïtauhia ia ìte i te tätarahapa, e mau taata atoà no te ao nei te vai atoà nei i Mäòhi Nui nei. E tei faaîhia i te mau maitaì rau ua tae roa taua mau taoà moè ra i roto i to mätou ôpü, e te rahi o ta mätou mau tamarii, Te ìte nei to mätou mau mata mä te parau-tià, e ia ara mätou e ia mauruüru ä mätou i to mätou auraa atu e te Atua Nui Tumu Tahi.
Te vai nei i roto i te faaäuraa mätamua i te faaìteraa a te puta Tāniera i te pene 3, ìrava 1 e tae i te 33 te parau no Nëpütäneta faatiàraa i te hoê tii àuro ma te faaue i te nünaa e haamori, e toru àhuru metera i te teitei, e toru metera i te âano ua haaputuputu te mau faatere o te nünaa, e te mau mataèinaa i te haamoàraa ma te âpeehia e te mau mauhaa ùpaùpa i reira e haamori ai i teie tii àuro i faatiàhia. Ia òre ia tïpapa e haamori, e tïtirihia i roto i te umu auahi ura ra. Toofanu puè taata tiàturi Atua tei òre i àueue o Tätaräta, Mëteta, Àpete-Neto aore rätou i haamori, ua ruuruuhia rätou e hurihia i roto i te umu auahi ura ra, te arii ra te ìte nei i nä taata toomaha mä te täpeà òre, i te haere-noa-raa no roto i te auahi e aore roa e maì e te huru o te toomaha ra mai te Tamaiti ia a te Atua ra. Te reo o Nëpütäneta e Tätaräta, e Mëteta, e Àpete-Neto, e tävini o te Atua teitei, e haere mai i räpae, e haere mai i ô nei. Aore roa hoì te hoê iò rouru o to rätou upoo i àma, aore hoì to rätou àhu i huru ê, aore hoì i mau mai te hauà auahi i nià ia rätou. Ia haamaitaìhia te Atua no Tätaräta, no Mëteta, no Àpete-Neto, o tei tono mai i ta na mërahi e ua faaora i to na puè tävini i tiàturi ia na ra, e ua faaòre te arii i ta na ra parau, e ua höroà noa mai i to rätou tino ia òre rätou ia haamori, ia òre ia tävini atu i te tahi atua ê, mäori rä o to rätou iho ra Atua. E täpaò püai mau teie e te rahi e tià ia i te vairaa, e to na hau i terä uì, i terä uì. No te mea, i te tahi pae, e hauà pohe ia e tae noa atu i te pohe, âreà i te tahi pae, e hauà ora ia e tae noa atu i te ora. E o vai hoì të au i teie nei parau. Eere hoì no te mau taata e ânoì i te parau a te Atua, e te parau a te Metia, no ô mai ra i te Atua ra, mä te haavare òre, e i mua hoì i te aro o te Atua Nui Tumu Tahi. Te huru mau ra o te mau tävini no te Faaäuraa Âpï, e tütava ma te faahanahana tämau i te maitaì. i päpaìhia i roto i te âau, ua ìteä e ua taiòhia. Ua faaìte-päpü-hia hoì e, o te èpitetore ia a te Metia, i òhipahia. Aita rä i päpaìhia i te ìnita, na te Värua rä o te Atua ora eiaha i nià i te papa ôfaì, ei nià rä i te papa taata ra, i te âau. O te huru ia o te manaò i te Atua i te Metia ra. Eere rä mai te mea e e au ia manaò, e tià te hoê mea iti no ô mai rä i te Atua ra te tià.
Te tahi ia uiraa no te tiàfaahouraa, i faaroohia e tätou i te täiòraahia, i te päpaìraa a Ruta èv. Te pene 20, i te mau ìrava 27 e tae i te 38 e uiraa na te mau tätutea i te parau no te tiàfaahouraa, ma te faaòhipa i te parau päpaìhia e Möte, hitu puè tamarii tamaroa i te fëtii hoê, tei faaipoipo i te vahine hoê, e pohe iho rätou e te vahine. Ia tae i te tiàfaahouraa, e riro o ia ei vahine na vai i taua toohitu ra. Te parau nei o Ietu te faaipoipo nei to teie nei ao, e te höroàhia nei e faaipoipo âreà te feiä e manaòhia e au ia rätou taua ao a muri nei, e të tià faahou mai te pohe mai, e òre ia rätou e faaipoipo, e òre hoì e höroàhia e faaipoipo. E òre hoì rätou e pohe faahou, mai te mau merahi ra hoì rätou, e tamarii na te Atua, e tamarii no te tiàfaahouraa. I te parau ra, e faatià faahouhia te feiä i pohe, ua faaìte atoà mai hoì Möte ia na i parau i te Fatu i fä mai i roto i te pü àihere ra O te Atua o Âperahäma, e te Atua no Ìtaata, e te Atua no Iatöpa. 38 Eere hoì o ia i te Atua no tei pohe, no tei ora rä, te ora anaè ra hoì rätou ia na.
Te vähi ta tätou e täpeà mai i roto i teie rahiraa manaò teie ia, te ora, te tumu ia o te faaroo, te faaroo o te nünaa e türuì ia òre o ia ia òhu i roto i te ôpape o te mau faahemaraa o teie tau. I tano ai rä e türuì i nià i te ora, no te mea ia ua nä reira te Fatu i to na faaâpïraa i te faaäuraa i ravehia e te Atua Metua i roto ia na e te taata. No reira, eita te ora e haavare, eita te ora e faaruè i te taata, no te mea te rohi noa nei te ora ia tupu te ôpuaraa faaora a te Atua te fenua. Tei tiàturi i te ora e horoà ora na te Atua, e ora to na i te Atua ra, tei òre rä i tiàturi e tei haafaufaa òre i te ora, ua ère ia i te ora no ô mai i te Atua ra. E tano ai tätou e parau e, tei ìte i te ora, ua ìte ia i te Atua. E tano te ora e mauhia ra e te fenua ia faaäuhia i te tahi rima tei mahora noa no te taata tei tiàturi i taua ora ra, e piri rä te rima o te fenua i te taata tei òre to na âau i tiàturi i to na mau maitaì.
Ia ora o Mäòhi Nui.
Teraì òr. Faatura.