Te Ture a te Atua (5)
TE TURE A TE ATUA (5)
E haamanaò i te mahana Täpati, ia haamaòhia ia.
Te täpati o te mahana ia i faaea ai te Atua i ta na mau òhipa atoà, e ua haamoà O ia i taua mahana ra. Ua faataa – ê te Atua i teie mahana i roto i na mahana atoà e hitu, ei mahana haamoriraa na te taata e ua faaea O ia i ta na òhipa i taua mahana ra.
Ia riro atoà te Täpati ei mahana faaeàraa òhipa atoà na te taata i roto i teie nei ao. Ia päpu ia tätou e, e ère roa atu te täpati i te Atua, e ère hoì te täpati te haamorihia, o te Atua ra. I roto i te nunaa Iteraèra o ta te Pipiria i faaìte mai ia tätou, mai te mea ra i te tahi taime ua hau aè to Iteraèra tiàturiraa i te tapati i te tiàturi i te Atua, hoê a huru e, o te täpati to rätou Atua.
Ia tae mai o Ietu i roto i teie nei ao, ua tamata O ia i te vavahi i taua tiàturiraa hape ra, na roto i to te mau pîpî hutihutiraa i te titona i te täpati, na roto atoà hoì i to Ietu faaoraraa i te maì i te täpati. Ua faahapa te mau Faritea ia Ietu, ua pahono atu ra o Ietu ia rätou, o te Tamaiti a te taata nei te Fatu i te täpati. I roto i te manaò no Ietu o ta tätou e hiò mai i teie taime, te ìte nei tätou i na manaò e piti nei.
1) Te täpati, ia àmu te taata i te maa.
2) Te täpati, ia faaorahia te mau taata tei topa i roto i te àti.
Ia hiò mai tätou i na manaò toopiti nei, teie ia te noaa mai, te täpati e tià ia ravehia te òhipa no te AROHA i to taata tupu.
Te täpati àti – Iuta, e mahana maa ia, ia faaäuhia i nià i ta tätou tarena. Te täpati Teretetiano ua haamauhia o ia i nià i te mahana i Tiàfaahou mai ai to tätou Fatu mai te pohe mai, oia hoì te mahana matamua o te hepetoma ia faaäuhia i nià i te tarena àti – Iuta o tei maìrihia to na iòa i teie mahana te täpati Teretetiano.
Mai te ture I e tae i te ture IV, e mau Ture te reira o tei parauhia ‘’ Te Ture no te Atua’’ oia hoì, o te mau òhipa ia o ta te taata e rave i nià i te Atua.
Àreà ra te Ture V, e tae i te Ture X, e mau Ture ia o tei faataahia no te taata, oia hoì, o te mau òhipa ia o ta te taata e rave i nià iho i te taata. No reira i parauhia ai teie haapotoraa no te Ture X. ‘’ hinaaro òe i to Atua ia Iehova ma to ààu atoà, e ma to varua atoà, e ma to manaò atoà, o te Ture matamua teie o tei hau i te rahi. E mai te reira atoà te piti, e aroha atu òe i to taata tupu mai ia òe iho na.’’
Terai or.