Te Ture a te Atua (3)

TE TURE A TE ATUA. ( 3 )

Ei tatararaa.

TURE 1 EIAHA ROA TO ÒE EI ATUA E ATU IA Ù NEI.

Ia au i te tatararaa a te pipiria, ua riro te Atua ei Tane, àreà te nunaa Iteraèra ra, e vahine ia na te Atua. Te Atua ua hinaaro O ia o oia anaè te Atua no Iteraèra, aita O ia i hinaaro ia haamori o Iteraèra i te tahi atu atua ê. aita atoà O ia i hinaaro e piti aè e aore ra, e toru aè Atua ta Iteraèra e haamori e tavini. Hoê noa aè ra ta na e haamori, maori o O na iho, te Atua tei arataì e tei faaora ia na mai Àifiti mai.

TURE 2 EIAHA ROA ÒE E HAMANI I TE ÌTORO TARAI NO ÒE.

Te òpani nei teie Ture piti i te mau faanahoraa i muri nei,

1) Te hamaniraa i te ìtoro tarai.

2) Te haamori i te ìtoro tarai.

I roto i te manaò matamua, te òpani ra te Atua i te hamaniraa ìtoro. Oia mau ia hamani anaè i te ìtoro i taua taime ra te rave ra te taata i te mau hohoà o ta te Atua iho hamani i roto i teie nei ao, no tera òhipa, te hohoà taata anei, animara, te mau tiàrama anei, e te vai atu ra...........

I te taime e nanaòhia ai teie mau hohoà i nià iho i te raau e aore ra i te òfaì, hoê a huru e, te faaìnohia ra te Atua, i te òhipa e ravehia nei. To na auraa ra te ravehia nei te tiàraa hamani hohoà o te Atua, no te tuu i nià i te mau natura i rahuhia.

Te tumu te Atua i òpani ai i te taata ia hamani i te ìtoro taraï, maori ra, ia òre te taata ia haamori i te ìtoro. Te haamoriraa i te ìtoro, e peu matarohia ia e te mau nunaa atoà i taua anotau ra. Aita te e hinaaro i te taata ia haamori o ia i te mea hamanihia e to na rima. I te taime te taata e rave ai teie huru faanahoraa, e na roto o ia i te o ta na hamani e ìte ai i te Atua. Taua taime ra te òhipa ta na i rave e òhipa pohe e te faufaa òre. Te ìtoro e atua pohe ia, mai ta te puta Taramo e faaìte nei, i te Taramo 115 i te mau ìrava 4 e tae i te 8, o ta rätou ra mau ìtoro àrio e te auro ra, e òhipa ia na te rima taata nei i rave. E vaha to rätou, eita e ra e parau, e mata to rätou, eita ra e hiò, e tarià to rätou eita ra e faaroo, e ihu to rätou, eita ra e hoì, e rima to rätou eita ra e rave, e àvae to rätou eita ra e haere, e òre roa hoì to rätou àrapoà e tià ia parau. Te feia i hamani ia rätou mai ia rätou, mai ia rätou atoà ra ia te huru, fëia atoà i tiàturi ia rätou.

O teie te taa – ê – raa e vai nei i roto i te Atua tei rahu i teie nei, e te atua hamanihia e te taata. Te Atua tei rahu i teie nei ao, te faaìte nei O ia i to na here e to na aroha i te mau taata atoà na roto i to na tuuraa i to na hohoà, to na huru i nià i te taata, e to na horoàraa i te aho i roto ia na. Na teie mau faufaa e faaìte ia tätou i te ora e vai nei i roto i te Atua. Àreà tei hamanihia e te taata aita ia e faaìte nei i to na aroha e to na here, eita atoà e horoà i te maa na te taata. O te Atua ra tei rahu te horoà nei ia i te maa na te taata, e te hinaaro mau o te Atua ia ora te taata, na roto i ta na òpuaraa.

Terai òr.