Ruta èv. 16,1-13

Tāpati 18 no Tetepa 2016.

Te Hoo.

Ruta èv.16, 1-13.

Te parapore o te tïàau ra.

1 Ua parau atoà atu ra Ietu i ta na ra mau pipi E tïàau to te hoê taata taoà rahi ra, e i fäìhia mai o ia e ua pau ta na taoà i taua tïàau ra. 2 Ua parau atu ra o ia ia na, nä ô atu ra E aha teie roo ia òe ta ù e faaroo nei. A faaìte mai i te parau i to òe na toroà, a tirë roa òe i te tïàau. 3 Ua nä ô noa iho ra taua tïàau ra i roto ia na iho, E aha rä vau Te hopoi ê nei taù fatu i te toroà tïàau ia ù nei eita e tià ia ù ia faaàpu, e haamä hoì au ia ani haere. 4 E nä ô vau Ia färiihia mai au e rätou i roto i to rätou mau fare, ia faaèrehia vau i te toroà tïàau ra 5 Ua tii atu ra o ia i te mau àmutärahu atoà a taua fatu no na ra, ua ui atu ra o ia i te hoê E hia a taù fatu taoà ia òe aore i hoo na 6 Ua parau mai ra o ia Hoê hänere pato monoì. Ua parau atu ra taua tïàau ra ia na A rave i te pëpa na òe, a pärahi i raro i tënä na, a päpaì ai e, e pae àhuru. 7 Ua ui atu ra o ia i te tahi E hia a òe taoà aore i hoo na, Ua nä ô mai ra o ia Hoê hänere tora tïtona. Ua parau atu ra o ia ia na, A rave i te pëpa na òe, a päpaì ai e, e vaù àhuru. 8 Haamaitaì atu ra te fatu i te räveà a taua tïàau parau-tià òre ra, e paari rahi hoì to te tamarii o teie nei ao i ta rätou ra mau peu, i to te tamarii o te märamarama. 9 E teie nei, e parau atu vau ia òutou, e faatauà atu òutou i te tauà no òutou i te taoà haavare nei, e ia tuua-ê-hia òutou ra, ia färiihia òutou e rätou i roto i te fare tähuti òre ra. 10 O tei haapaò maitaì i te mea iti ra, ua haapaò maitaì atoà i te mea rahi; e o tei òre i haapaò i te mea iti ra, aore atoà ia i haapaò i te mea rahi. 11 E teie nei, aore òutou i haapaò i te taoà haavare ra, nä vai e tuu atu ia òutou i te taoà mau 12 E aore òutou i haapaò i te raveraa i ta vëtahi ê ra, nä vai e tuu atu ia òutou i te rave i ta òutou iho.13 Aore e tävini e tià ia faaroo atu i te fatu piti, e riro o ia i te òre i te au atu i te tahi, e te au atu i te tahi; e aore ia, e riro i te haapaò atu i te tahi e te faaruè täùe atu i te tahi. O òutou nei hoì e òre e tià ia faaroo i te Atua e te Mämona.

Manaò

Na te Taramo 113, e ärataì te haamoriraa i teie mahana èi faahanahanaraa na tätou i te Atua Nui Tumu Tahi. 1 E haamaitaì i te Fatu E haamaitaì, e te mau tävini o te Fatu, e haamaitaì i te iòa o te Fatu. 2 Ia haamaitaìhia te iòa o te Fatu, i teie nei e a muri noa atu. 3 Mai te hitiraa mai o te mahana e tae noa atu i to na maìriraa, ia haamaitaìhia te iòa o te Fatu 4 E teitei to te Fatu i to te mau fenua atoà. E ua hau to na hanahana i te teitei i to te mau raì atoà ra. 5 O vai tei au i to tätou Atua i te Fatu, o tei teitei e ua pärahi i te raì teitei 6 Te tuu haèhaa nei rä o ia i te hiòraa mai i raro i nià i te mau raì, e i nià atoà i te fenua. 7 Te faateitei nei o ia i tei haèhaa ra no raro mai i te repo ra, e ua faateitei i tei àti no raro i te tiriäpera ra, 8 i te faanohoraa o ia ia na i roto i te feiä rarahi ra, i roto i te feiä rarahi ra i to na iho ra pupu taata. 9 O tei haapärahi i te vahine fänautama òre i te ùtuafare ra, ei metua vahine òaòa i ta na ra mau tamarii. Hareruia.

Te parau e färereihia e tätou, teie i päpaìhia e Ruta èv. I te pene 16 i te mau ìrava 1 e tae i te 13 te parau nei o Ietu i ta na mau pipi e te mau Färitea, teie rä ia päpü maitaì no rätou atoà teie parau, e no tätou i teie mahana. Te parau no te hoê taata taoà rahi e to na tïàau, ua tae ra te tahi mau parau tei òre e au i nià i te tiàraa haapaò maitaì o te tïàau ua haapurahahia te faufaa a te fatu taiete. Te mauruüru òre o te fatu i te tïàau ua tiàvaruhia no te mau òhipa i tupu. Ua haava teie tïàau i roto ia na iho e, e òre tià ia na ia haere e faaàpu, e òre hoì e tià e haere e täparu i te moni mea haama, hoê noa òhipa o ta na i ìte te hoo toà.

Te òhipa ta na i faatupu te tïtauraa i te mau taata i tärahu, te vai ra hoê hänere pato monoì. Ua parau atu ra taua tïàau ra ia na a rave i te pëpa na òe, a pärahi i raro i tënä na, a päpaì ai, e pae àhuru. Nä ô mai ra te tahi hoê hänere tora tïtona. Ua parau atu ra o ia ia na, A rave i te pëpa na òe, a päpaì ai, e vaù àhuru. O teie te raveà i noaa i teie tïàau, e raveà tià òre no te faatupu i te täviri i te faufaa a to na fatu òhipa, no te mea te faufaa tumu èita te tïàau te fatu e rave òhipa noa o ia.

Ua haamaitaì te fatu òhipa i teie raveà piò a te tïàau, to na auraa hoê ä ta raua faanahoraa e faatopa te tärahu a te feiä hoo, ia tià i te feiä hoo ia hoo rahi.

Te vai nei te tahi parau a te perofeta Àmota i te pene 8 i te mau ìrava 4 e tae i te7 Te taehae o te feiä hoohoo te naò nei parauraa e, ìrava 4 E faaroo mai i teie, e te feiä i horomii noa i tei àti ra, i te faaòre i te taata rii i nià i te fenua nei, ìrava 5 i te nä-ô-raa e, Â hea ra e òre ai te märama âpï nei, ia hoo tätou i te mäa e te täpati, ia faaìteìte tätou i te tïtona, e te faaitiraa i te êfä, e te tëtera ia rahi, e te faahaparaa i te mau fäito i te haavare; ìrava 6 e te hooraa i tei àti ra i te ârio, e tei ère i nä tämaa e piti ra; e te hooraa i te tïtona i faaruèhia ra. Ìrava 7 Ua tapu te Fatu i te maitaì rahi o Iatöpa, E òre roa e moè ia ù ta rätou atoà ra mau parau.

O òutou nei hoì e òre e tià ia faaroo i te Atua e te Mämona. Teie te tahi parau faufaa ta Ietu e hinaaro nei e faahiti i ù nei, mauti ra ia te huru o te taata ta täìtahi, te haafaufaa nei O ia te huru o te taata, ia au i ta te Atua hämaniraa. Te hohoà o te taata no te Atua, e hohoà ia no te faatupu te aroha e te here, te huru o te taata no te Atua ia, e huru ia no te faatupu i te autaeaèraa, e te tiàmaraa o te taata, te aho o te taata, e aho ia no te Atua, no te faatupuraa, i te parau tià, te ìte, te märamarama e te vai atu ra. O te mea ia i òre i òhipahia e teie tïàau parau- tià- òre i te pae mätamua o te parapore, i te mau maitaì e vai ra i roto ia na, aita ia ò ia i rave i te reira. Ua rave ra ò ia i te hoê òhipa tei òre e au i to na fatu i tiàvaruhia ai ò ia. O te tià ra ia na ia rave mauti ra ia te piti ia o te huru ta na i òhipa.

Ia hiò ra tätou i roto atu i te tahi ìmiraa i te auraa, e faanaho ia tätou mai teie te huru, e taata teie e piti to na pae, mai te moni ra. Te tuhuà mätamua o to na huru o te haapaò òre ia, e te tahi pae, te täviri taata ia, e te parau nei te Fatu i teie huru taata, e paari rahi to te Mau tamarii o teie nei ao, e te märamarama. To na auraa ra, ua haapaò noa teie taata ia na iho ia maitaì ò ia i nià i te tua o to na fatu, eiaha ra to na fatu ia faufaahia ia na. E te vai atu ra te tahi atu mau tuatapaparaa no te auraa o teie taiòraa. Eiaha ra tätou ia manaò e, te haapii mai nei teie taiòraa i te täviri taata.

Te faaìte mai nei ra teie taiòraa ia tätou, ia ara i nià i te mau taoà haavare tei papahia i nià i te täviri taata, O te puai teie o Mämona, èita e haamä i te haere e täviri i to na fatu òhipa, e haamä ra i te haere e faaàpu, e te äni i te tauturu. Areà rä ta te Atua, te parauraa ia i te taata, ia ìmi i te taoà i roto i te fenua ma te hou i to raë. O Mämona e atua teie no te mau taoà piò, e te haavare tei faatupuhia e te taata o teie te vahi puai o teie parapore i to te fatu òhipa haamaitaìraa i teie raveà, te raveà hoo rahi e te topatari. Teie faanahoraa te tupu noa nei i teie mahana, te hoo rahi ia te oraraa, ua rahi roa te mau täpihooraa piò e te haavare, i teimaha ai te pute moni a te taata hoo.

Te Atua i faatupu, te mea o ta te Atua i tanu, e täpaò no tona here i te taata, na fea e tià ai i te taata ia parau e, mea ìno tera. Nafea e tià i te taata ia parau e, haapaòraa-òre roa tera, no te mea, e täpaò no te here o te Atua, I ô e matara ai tera manaò, tera hiò àtaraa, tera färii-òreraa te taata i te mea o ta te Atua iho i faatupu, ta te Atua i tanu, ma te òre atoà ra e haamoè e, te mau òhipa atoà ta te Atua i rave, ua hämani te Atua. Oia hoì, ua horoà mai te Atua i te haapäpüraa, mea maitaì. Teie Atua, e Atua ihoä ia ta te taata e haamori, ta na e tiàturi nei, eita e maraa ia na i te parau e, mea ìno.

Ua haapäpü roa te Atua, e mea maitaì, e te reira parauraa e mea maitaì, ua ìte te Atua, e ìte ia te taata i te maitaì, te maitaì o te Atua o ta te reira raau e faaìte ra. E ère te reira mea, no nià i te raau anaè, ia riro atoà ra te raau ei faaìte i te maitaì o te Atua. Aita paì te Atua e ani nei i te taata i te tahi òhipa tei òre òna i na mua i te rave. E Atua parau, e Atua rave atoà ia tupu te maitaì.

A faaroo mai na ra i teie parau i roto i te Timoteo 1 pene 2 i te mau ìrava 1 e tae i te 8 Haapiiraa no te pure, ìrava 1 E mata vau i te aò atu ia òe, e ei faaora, e te pure, e te ani, e te haamaitaì i te Atua i te taata atoà ne 2 i te hui-arii, e te feiä mana atoà ra, ia pärahi-haùti-òre-hia tätou mä te hau, mä te paieti, e te tura. 3 E mea maitaì hoì te reira, e te au, i te aro o to tätou Ora ra o te Atua; 4 o tei hinaaro i te taata atoà ia ora, e ia noaa te ìte i te parau mau. 5 Hoê hoì Atua, e hoê hoì ärai i röpü i te Atua e te taata, o te taata ra o Ietu Metia 6 o tei horoà ia na iho ei hoo i te taata atoà, ia faaìtehia i te tau au ra 7 i haapaòhia ai au nei ei aò, e ei âpotetoro e parau mau ta ù i te Metia ra, aore au i haavare, ei haapii i te Ètene i te faaroo e te parau mau. 8 E teie nei, te faaue atu nei au i te mau täne ra, ia pure i te mau vähi atoà ra, mä te hopoi i te rima viivii òre i nià, mä te riri òre, e te märô òre.

Ia ora na

Teraì òr. Faatura.