Ruta èv. 14,25-33

Tāpati 4 no Tetepa 2016.

ÔROÀ

Faaruè

Taiòraa

Ruta èv.14, 25-33

Te peeraa ia Ietu

(Mät 10,37-38)

25 E tiàâ rahi tei pee haere mai ia na, e ua färiu mai ra o ia, ua parau mai ra ia rätou 26 O te taata e haere mai ia ù nei, e aore i haapae i ta na metua täne e te metua vahine e te vahine iho, e te tamarii, e te mau taeaè, e te mau tuahine, e ia na atoà iho, e òre roa o ia e tià i te pipi na ù. 27 E o të òre e hopoi i to na iho tätauro a pee mai ai ia ù, e òre ia e tià i te pipi na ù. 28 O vai ia taata io òutou nei ia ôpua i te fare e faatià, e òre e mata na i te pärahi i raro, a taiò ai i te taoà e oti ai, i te navaìraa ta na taoà. 29 O të haamau hoì o ia i te niu, e aore aè ra i oti ia na, o te nä ô hoì te feiä atoà i hiò ra i te tähitohitoraa ia na 30 I tämata iho nei teie nei taata i te faatià i te fare, e aore aè nei i oti ia na 31 E o vai hoì ia arii ia haere e àro atu i te tahi arii, e òre e mata na i te pärahi i raro, a feruri mäite ai i te tiàraa ia na e o na tau taata hoê àhuru i te tautani, ia haafärerei atu i te tahi e haere mai e àro ia na ra, mä to na atoà ra taata e piti àhuru i te tautani. 32 E e òre e tià ra, e vaiiho ätea i te tahi a tono atu ai o ia i te veà e ani i te hau. 33 Oia atoà hoì òutou, o tei òre i faaruè i te mau mea atoà na na ra, e òre atoà o ia e riro ei pipi na ù.

Manaò

Te Taramo 90 no teie mahana e haafatatahia nei tätou i pïhaì iho i te pure, e pure teie tei faaìte te mauiui, e te hepohepo. I te mea i tupu na te tahi faanahoraa tei tuu i te nünaa o te Atua i roto i te peàpeà i to rätou tiàturiraa ua faaruèhia rätou, ia faaroo tätou te ìrava 13 E färiu mai ia mätou e te Fatu, a hea ra ia, A faite mai òe i to mau tävini nei, e te ìrava 15 A faaòaòa mai ia mätou e ia fäito i te mau mahana i àti ai mätou ra, e te mau mätahiti i faaòromaì ai mätou i te ìno ra. Te pure nei teie mau taata paieti, ia arohahia mai e ia haamaitaìhia rätou. E pure teie e faaitoito ra i te taata ia ìte i te märamarama mure òre, teie faatupuhia e te Atua. E pure teie a te taata o te Atua ra, a Möte, E te Fatu, o òe to mätou haapüraa, i tërä uì, i tërä uì. Te faaìte i te faufaa o te Atua, te fenua, e te taata, i te mea Aore te mau mouà nei i fänau, e aore hoì te fenua e te ao atoà nei i hämanihia e òe ra, te vai ra òe, te Atua, mai tahito mai ä ia a muri noa atu. O te taata nei rä, te faariro faahou nei òe ei repo, te parau ra hoì òe, A hoì, e te tamarii a te taata na. Ia òe rä hoì, hoê tautani noa atu i te mätahiti e au i te mahana hoê i mahemo ra, e mai te äraraa hoê i te ruì ra. Te riro nei rätou ia òe mai te riro pape puè ra, e mai te vareà taòto ra rätou. I te poìpoì ra, mai te àihere e tupu ra rätou, o tei ôteu e tei tupu i te poìpoì ra, e ua ahiahi anaè ra, ua täpuhia e ua ôriorio atu ra. Oia teie, ua pau mätou i to òe ra riri, e ua riàrià mätou i ta òe ra mäinaina. Ua tuu òe i ta mätou hara i mua ia òe, e ta mätou hapa moè i roto i te märamarama o to mata ra. Ua mou aè nei to mätou mau mahana i to òe ra riri, ua pau to mätou mau mätahiti mai te manaò âau e pee ra. To mätou puè mahana i te oraraa nei, e hitu ia àhuru i te mätahiti, e ia tae i te vaù i te àhuru i te mätahiti i te ètaèta, e riro rä taua ètaèta ra ei rohirohi e ei taiäraa. E òre hoì e mähia motu ê atu ra, maùe atu ra mätou. O vai rä tei haapaò i te püai o to òe ra riri, E ta òe ra täiroiro, mai te mataù e au ia òe ra. E haapii mai ia mätou i te taiò i to mätou puè mahana, ia riro to mätou âau i te haapaò maitaì. E färiu mai ia mätou e te Fatu a hea ra ia A faite mai òe i to mau tävini nei. A haamauruüru vave mai òe ia mätou i to òe ra aroha, ia reàreà mätou e ia òaòa i to mätou nei puè mahana toe. A faaòaòa mai ia mätou e ia fäito i te mau mahana i àti ai mätou ra, e te mau mätahiti i faaòromaì ai mätou i te ìno ra. A faaìte mai i ta òe ra òhipa i to mau tävini nei, e to òe ra hanahana i ta rätou ra tamarii. Ia vai mai ä te here o to mätou nei Atua, o te Fatu, i nià ia mätou nei, e te òhipa a to mätou nei rima, e haamau òe, oia ia, o te òhipa a to mätou rima i rave ta òe e haapäpü.

Te manaò e vai nei e ao to tei faaroo i te Paari, ao hoì to te feiä e haapaò mai i te parau a te Atua. E ia faaroo i te aò ia paari, eiaha roa e òhipa ê i te reira. E ao to te taata e faaroo i te mau hinaaro o te Atua, o tei ara mäite i te mau mahana atoà i te mau ùputa no te ora, o tei tiaì mäite. E ìteä hoì ia na ra, te ìte i te èà e ora ai, e herehia mai hoì o ia e te Fatu. O tei hara ra, ua hämani ìno ia i to na iho värua e tei òvere i te hinaaro o te Atua, ua hinaaro ia i te pohe.

No te aroha rä i parau mäite ai tätou i te taata paari ia Ietu Metia ia òre to tätou âau ia täpeàhia i te âuri fifi o te hara nei. Te parau mäite noa mai ra te reo o te fenua Mäòhi, taù tamaiti, i taù i fänau i taù täpeàraa nei, i te tävini faufaa òre i mütaa iho ra, i teie nei rä e faufaa rahi tei ìte. Ia faahoì tätou i ta te Atua i te Atua ra. E ia färii tätou ma te âau mau. Hinaarohia èi mono i te poihereraa i te mau faaueraa i te mau päpüraa i te Èvaneria. Ia riro ei hämani maitaì no te hinaaro mau, eiaha no te tahi mea ê. No te mea i te Metia e hau atu tätou i te tävini, ei taeaè here ra tätou, i te Fatu nei, e te tino atoà nei hoì.

Te ìrava 33 no ta tätou taiòraa, Oia atoà hoì òutou, o tei òre i faaruè i te mau mea atoà na na ra, e òre atoà o ia e riro ei pipi na ù. Ei haapäpüraa i te parau tei here i te hara, tei òre i faaruè.

E parau päpü teie, i te taiòraa ihoä i teie ìrava, òre noa atu ai tätou i änihia mai, ua ineine ê na ta tätou pähonoraa no Ietu teie parau. Mai te tahi metua tei hinaaro i te faahitimahuta i ta na mau tamarii i te parauraa atu ia rätou e, e taoà huna ta na i faaineine na rätou, mai te tiàturi e, e haamata te tamarii i te ui maere, e tämata i te tamaì, e täparu mai hoì ia na e faaìte, e inaha te tià mai nei te tahi, i te parauraa mai e ua ìte au e aha. I reira noa, mutu roa te òaòa o te metua, e te fäufaa òre ta na mau ìmiraa rii ia tupu te ànaanaea e te hitahita i roto i te tamarii. Ua ìte maitaì tätou e, te mäa tei faahinaarohia, tei ìmihia te räveà ia roaa, e tei rohirohihia, e hau aè to na âminamina i te mäa i horoà-noa-hia mai, tei òre päha i hinaarohia. No tätou nei, e tämata tätou i te tomo i roto i te värua o te parau a Ietu e nä ô noa mai ra, A faaruè, no te mea aita e taata ta tätou e ìte ra, e aita hoì e iòa i höroàhia mai ei faaòhieraa ia tätou i te ìteraa i taua taata ra, e haamata ihoä ia tätou i te uiui i nià i te fäufaa e te huru taa ê o teie taata. Ia parau mai o Ietu e, ia òre Faaruè ua ìte atoà ia tätou e, e parau teie no te tävini o te Atua, te auraa, no na noa ihoä to na parau. No reira, te parau ta tätou e faaitoito atu i te haamataratara, mai te ìte maitaì e, te mau mea fäufaa òre atoà, aita ra te reira i höroàhia i te mata i te hiò, ua höroàhia rä i te âau. E aha te mea fäufaa òre te haereraa i mua, e aore te haereraa i muri, eiaha te ôtoheraa, te haereraa ra i te vähi tei reira to òe parau, te vähi no reira mai òe, ua ìte atoà ia tätou e, ia parau mai o Ietu e, Oia atoà hoì òutou, o tei òre i faaruè i te mau mea atoà na na ra, e òre atoà o ia e riro ei pipi na ù. Aita tätou e änihia mai ra e tütonu noa i mua, aita hoì tätou i ìte i te mea e hiò, e ia mäoro te hiò-noa-raa i te tahi vähi, e riro te mata i te mohimohi, e te òre e päpü faahou te mea e faaruè. Ia faaruè i te tahi mea, eiaha ia moèhia e, o òe terä e faaruè ra, e i roto i te reira faaruèraa, te ìte rii noa atoà ra òe ia òe, to òe mau vähi paruparu, te ärea e vai ra i roto ia òe e te mea ta òe e faaruè ra, e täuturu te reira ia òe i te faaruèraa i te mea e hinaarohia ra ia òe ia faaruè. Mai te fefe tei haamanaò mai i te âfaro, te teiaha tei haamanaò mai i te mämä, eiaha mai te mea e, e ìno anaè to tätou parau, no te pinepine rä tätou i te haapae i ta te Atua, no te rave mai i ta tätou, ua ìte atoà ia tätou e, te mau mea atoà ta tätou i faariro ei mea fäufaa, e riro e, mea taa ê ta te Atua e tiaì mai ra ia tätou ia rave. Te fifi te reira e pinepine i te tupu ia òre te taata ia faaea noa i nià i te mea i änihia ia na, e ia faahaere i ta na hiòraa, to na manaò i mua, aore ra ia faariro i te mea ta na e faaruè ra ei faatanoraa ia na. Eiaha atoà rä tätou e manaò e, ua täôtià tätou i te hoìraa i muri ta tätou i parau mai na i nià i te mau vähi paruparu atoà ta tätou e àtuàtu noa nei, ua riro rä teie manaò mai te tahi faaitoitoraa i te taata ia tiàturi ia na iho, ia au i te manaò e, te rave nei ihoä päha o ia i te ìno, ua ìte atoà rä o ia i te mea maitaì. No reira, i roto i te mau òhipa atoà tei änihia i te taata e rave, o na ihoä päha to na fifi mätamua roa, o na atoà rä to na täuturu maitaì aè. Mea maitaì te taata ia faaea rii i te faanaìnaì noa ia na, ia haamätau atoà i te uruaì i nià ia na iho, ia tiàturi hoì ia na iho. Inaha te fenua, te ùputa ia o te raì, oia te vähi te taata e märamarama ai i te parau o te Atua, e fenua hoì te taata, e riro te tiàturiraa ia na iho e i te fenua, i te täuturu ia na i te ìteraa i te auraa o teie äniraa a Ietu ia tätou i teie mahana, Oia atoà hoì òutou, o tei òre i faaruè i te mau mea atoà na na ra, e òre atoà o ia e riro ei pipi na ù.

Maitaì tätou i teie mahana.

Teraì òr Faatura.