Mataio 5,1-12
PAROITA RAGNIROA
TH VI.
Taiòraa.
Mataio 5 : 1- 12. Te òaòa o te Fëia faaroo.
Te haapiiraa a Ietu.
Te faatupuraa i te hinaaro o te Atua.
Ei manaò mätamua.
Te faaìte nei na ìrava mätamua ia tätou i to Ietu haereraa i nià i te hoê mouà ma ta na atoà Mau pîpî, no te haapii i te fëia atoà i pee mai ia na, e ua maìrihia taua haapiiraa ra, i te aòraa na Ietu i nià i te mouà. Te òmua nei o Ietu i ta na haapiiraa na roto i te ìritiraa mai i te hoê parau òaòa, e teie taua parau òaòa ra, E Ao……… O vai ma ta na e parau nei e. E Ao to Òutou ? O te hoê ia mau taata ta tätou i ìte e, eita teie parau e tano no rätou, o ia hoì o te fëia veve ia, te fëia òto noa, te fëia tei aroha noa, te fëia tei faatupu i te hau, te feia ààu maru, te feia tei hamani - ìno- noa- hia, e tae noa atu i te fëia tei faaìnohia, e tei pari haavarehia.
I taua feia ra, na roto i ta Ietu hiòraa, no rätou mau te patireia o te ao. O vai ma taua mau taata ra ? è ère ia i te fëia moà e te hara òre, e fëia hara atoà hoì e te mau pîpî. Taua fëia ra, ua pupu ia, ia rätou i te Atua ra, tei auraro ia Ietu e o tei tiaì noa i te hoìraa mai o te Fatu ra o te Metia. Ua ìte päpü rätou e, i reira ra, e faa- òre- hia ai te òto, e horoàhia ia rätou te fenua na roto ia Ietu, faa- òre- hia hoì to rätou hiaairaa, e parauhia rätou i te mau tamarii na te Atua na roto ia Ietu no te mea ua riro rätou i teie nei ia Ietu.
No reira ia faaroohia te mau pärau ta Ietu i faahiti, ia ìte te taata atoà te patireia o te Atua o Ietu iho ia, e na roto ia na e mana ai te Atua i nià i te fenua nei. Te parau nei o Ietu e, E Ao to òutou, E aore e Ao to rätou, eiaha te fëia tei rave i te mau òhipa maitai na mua, to te fëia ra tei färii i ta na mau parau òaòa. E piti tuhaa i roto i teie nei aòraa na Ietu.
Ei tuatapaparaa.
1) Mai i te ìrava 3 e tae i te 6, ua faaìtehia i reira te maitai tei fafauhia i te fëia ààu haehaa, i te fëia tei òto, e i te fëia tei poia e tei poiha i te parau tià, oia hoì i te fëia tei toe te hoê mea ia rätou o tei vai noa i roto i te tiaìraa.
2) Mai te ìrava 7 e tae i te ir 10, te horoà atoà nei te faufaa no taua mau maitaì ra i te fëia tei ìte i te aroha ia vetahi ê, i te feia ààu mä, i te fëia tei faatupu i te parau hau, e i te fëia tei hamani- ìno- hia i te parau tià. Te faaìte nei te reira te tatuhaaraahia na tumu parau e vaù nei, tei haamanaò mai ia tätou e, teie nei Mau parau, e tano ia no te taata hoê, e i nià i te mau taata. E mea tià roa ra ia feruri àmuihia teie nei Mau parau, oia hoì na huru e vaù no te taata faaroo Mau, e na huru e vaù no te maitaì e noaa mai ia na.
3) Te ìrava 11 ia, o te 9 ia te parau ta Ietu e faahiti nei, ei hiò àmuiraa i te mau manaò atoà o ta na i pärau, ia noaa i te maitaì i te mau taata e faaroo nei, e tiàturi nei Ia na. Ma te haapäpü e, e ao to òutou ia faaìno mai, e ia hamani – ìno – mai, e ia pari haavare noa mai te taata ia òutou i te mau ìno atoà nei, no ù.
4) Te ìrava 12, e faaitoitoraa teie na Ietu i te fëia atoà tei faaroo i teie mau pärau, tei tapeà èi faufaa i roto i te àau, ua maitaì ia te reira taata i te aroha o te Atua. A òaòa, e ia òuàòuà noa i te òaòa, e utuà rahi hoì ta òutou i te ao rä i na reira hoì rätou i te hamani – ìno i te mau perofeta rä, o mua ia, ia òutou.
Èi tatararaa.
I muri aè i na parau e iva, te horoà faahou nei Ietu i te hoê parau âpï i ta na mau pîpî, E miti no te fenua e e maramarama no teie nei ao. Taua miti e taua maramarama ra, o te mau pîpî ia na Ietu, è ère ra o rätou anaè, o te feia atoà ra tei ìte e tei faaroo ia Ietu, o te mau ìte ia no Ietu no te mau ànotau atoà, tei haapiihia, tei tae te Evaneria a Ietu i roto i to rätou ààu, e tei fäì hua e, o Ietu Metia te Fatu e hanahana ai te Atua Metua. Ia riro taua mau ìte no Ietu i te fenua atoà i ta rätou mau parau maitaì e ia haamaitaìhia te Atua. Ua parau hoì Ietu e, O vau te maramarama no teie nei ao, e o te haere mai ia ù ra e òre e haere noa na te pouri, e maramarama ora ia to na (Ioane 8 : 12). O Ietu mau te maramarama, e ua riro te fëia faaroo èi mau hihi no taua maramarama ra, e o taua mau hihi ra ta Ietu e parau nei e eiaha ia tuuhia i raro aè i te färii, oia hoì eiaha ia hunahia, ia faaìtehia ra te reira e tià ai.
O ta Ietu ia e faaitoito mai nei ia tätou i teie täpati, E AO TO ÒUTOU, ia haapaò i teie mau hinaaro, tei riro èi reni ärataì i to tätou àau, ia tupu hau o te Atua, i ropu i ta na mau tamarii i te fenua nei.
Kura ora.
Teraì òr.