Mareto 13,24-32
Tapati 18-11-2012
Tiaòraa Mareto 13 : 24 - 32
Ei parau tumu Mareto 13 : 31 E mou te raì e te fenua,e òre roa râ ta ù parau e mou.
Ei haamatara.Te feia faaroo teie tätou i mua i te ùputa no teie parau
E aha te tahi faanahoraa e tià ia tätou ia òpua no te faahanahanaraa i teie huru matahiti ?
E aha te fä e tià ia tätou ia faanaho no teie huru matahiti ?
E aha te haapiiraa e tià e pii i te taata faaroo ia tae tätou i taua matahiti ra ?
E rave rahi mau manaònaòraa e vai nei,no te àtuàturaa i teie feia te riro ei nunaa no teie huru matahiti.Te Evaneria e vai-ora-noa nei rä,i te faaohiparaa a te Varua Maitai i roto i tera e tera taata faaroo.Teie ia reo ta te Ietu e parau nei e,
E mou te raì e te fenua,e òre roa ra ta ù parau e mou.
E reo poroì teie to te Metia i te mau pîpî,e i to te ao nei,ma te faataa i te mau òhipa e tupu i te mahana o te Atua.I taua mahana ra eita te raì e ite faahouhia,te mau tiàrama tei turama i te ao nei ua pohepohe ia ai- taè-atu ra ia e, ua vehi-faahou-hia to te ao nei i roto i te pouri,i te mea te mau òhipa mana atoà o te raì e ueuehia,i reira e itehia ai te Tamaiti a te taata,oia hoi te Tamaiti fanau tahi a te Atua i roto i to na hanahana,aita atu ia e mana tei hau atu,mauti ra te Parau Moà a te Atua,e mou hoi te raì e te fenua,àreà ra ta na Parau e òre roa ia.Oia hoi,na te parau a te Atua e faaàpi teie nei ao.
E na taua parau ra e haaputuputu i te feia tei maitihia no na àpoo mataì e maha o te ao nei.I reira mau e tià ai te parau no te àuhune,ua àuhune anei e aòre aita.Ia hiò maitai anaè tätou i teie mau faaararaa parau ta Ietu,te tuu nei O ia i te mau taata atoà i mua i te hohoà no te tau hopeà.I roto i teie mau parau te tohuhia nei ia te hoê faaàpiraa i te mau òhipa mana o te raì e te fenua,e taime faufaa ia teie no tei maitihia,ia tià atu i mua i te aro o te Atua,no te hoê ao àpi,hoê raì àpi,hoê fenua àpi,o ta Ietu ia faaitoitoraa i ta na Etaretia,e aha ra te taime e tupu ai ?
Aita ra te reira i haapaòhia ia ìte te taata,te mau merahi,o Ietu,o te Atua anaè ra tei ìte ia au te faaìteraa a te irara 32.
I faaìte ai te tuhaa matamua o ta tätou taiòraa,te irava 24 e tae i te irava 27,te haereraa mai te Tamaiti a te taata mai roto mai i to na hanahana no te haaputputu tei maìtihia.
Te piti o te tuhaa irava 28 e tae i te irava 32,te parapore no te tute,tei faaìte i te mau pîpî te hoê tiàturiraa papu no te rima faaora o te Atua tei rahu.
I faahiti ai o Ietu i teie reo i te irava 31 e mou te raì e te fenua;e òre roa râ ta ù parau e mou.No te turaì-faahou-raa i ta na Etaretia i roto i te itoitoraa no te tiàturiraa,i te hoê tau àpi ia ô i roto tei maìtihia,o vai tei maìtihia,no vai teie maìtiraa,e rave rahi ta te Metia i maìti e rave rahi atoà tei òtohe.I riro ai teie reo to Ietu,ei reo tei titau ma te faaite e,e,
A ara,e ia faaitoito.
No reira e te feia faaroo,te riro nei teie area taime ei mea faufaa roa e te faahiahia hoi,ia tuu atu tätou ia tätou iho i roto i te faaineineraa no teie tau, e no teie matahiti.E tau ia vai to te ao atoà nei e ia ìte papu e,te àpiti nei te Atua,i roto ia tätou ,i roto i to tätou oraraa,i roto i to tätou mau fifi,mau peàpeà e i roto i to tâtou tiàturiraa.Ta tätou ia e òaòa nei ua maìti te Atua ia tätou,no te àvari i teie matahiti ta na e faatorona nei.Oia mau,te haere mai nei O ia i roto i te mau taime manaò-òre-hia faaineine-òre-hia e tätou nei.E faaiteraa e eita ta na parau e mou e,e,
A ara ra,
E ia vai ara noa tätou no te horoà atu i to tätou mau tarià,to tätou mau ààu,ia faaroo atu tätou i to na reo iti haìhaì ia pii mai ia tätou nei,a faaitoito.E reo teie ta te papaì Evaneria e arataì nei ia tätou,mai te mea ra,te hinaaro nei oia e haapapu maitai i te faufaa no te parau no te araraa e te faaitoitoraa.Oia mau i mua i te mau òpape e rave rahi,tei huti,tei taviri i tera vahi e i tera vahi,ua titauhia tätou e te feia faaroo no teie matahiti,ia vai ara noa e ia faaitoito i te àroraa,i te mau òhipa tià òre,e haafifi nei i to oe oraraa,mai teie atu nei ia.
Inaha hoi,to tätou faaroo te turuhia nei ia e to tätou tiàturiraa i te haereraa mai,te Metia i roto i to na hanahana òtià òre,e tei riro ei faafaìteraa i mua i te aro o te mau taata e rave rahi i te hau te Atua.Teie ra i roto i teie araraa,ei faaitoitoraa,e rave rahi te ô atu i roto i te mau fanahoraa o teie nei ao tei paruparu i te araraa.No te aha ? no te mea aita e faaitoito ra i roto i te tiaitururaa,ua haapaò noa i te mau òhipa e purehu ai te faaroo.Te parau nei o Ietu ia tätou,aita atu e araraa ia rave,e aòre ra ia àhu,maori ra te araraa turuhia e te faaroo.
E faaitoito,
E reo teie tei turaì ia tätou e te feia faaroo ia tutava,ia vai noa i nià i tera faito maitai no te mea,te reira te utuà o te itoito.I roto i te ùtuafare rahi no te faaroo tei parauhia te Etaretia,teie ta na tuhaa o te poro haereraa i te taata i te parau a to na Fatu,e faaitoito.Teie ia te auraa tei hinaaro ia maitai,ia ora te mau mero no taua ùtuafare rahi ra.Mai te peu e aita o ia i haapapu i te hora e te mahana no to na hoiraa mai,eita e òre,te fafa mai ra o ia te huru no te itoito o te ààu o te taata tataìtahi no te hiò i te huru ineineraa.Eita atoà ia e òre e,tei te reira vahi atoà to te Fatu faahitiraa i tera reo iti e, E faaitoito,ia ite atoà tätou e,aita tera reo e parau noa ra i roto i te aore.Te vai atoà ra vetahi mau tapaò tei ìtehia i te mata e tei òre,ta te Fatu i faaite mai tei turaì i te taata i nià i tera manaò no te faaitoitoraa,oia hoì ia faaitoito tino e te varua atoà i roto i te araraa,ma te horoà atoà i te mau raveà e au.
E te feia faaroo e,tätou e te mau metua o te faaroo,
A hiòhiò na teie reo o te Fatu tei parau mai ia tätou i teie mahana, e mou te raì e te fenua, e òre roa ra ta ù parau e mou.e rave rahi te mataù nei i te hoperaa o teie ao,te haapapu mai nei ta tätou taiòraa ia tätou e,eita i te mea mataù e ara ra e faaitoito.I te mea ia tupu teie òhipa,e òaòa tätou,maite mea i teie taime, e i teie hora e tupu ai e ìte atu ia tätou ia Ietu ia haere mai,i reira tätou e parau ai ia Ietu e,mea taere tera e Ietu.Eita anei te reira i te parau òaòa,oia,teie ra te parau mai nei O ia ia tätou e E ara, e faaitoito,no te mea i te te matahiti o te taata faaroo, eita ta ù parau e mou,e vai ra e a muri noa atu amene.
ia ora na .
RURURAA OROMETUA TH II
PAROITA PUNAAUIA.
Faanahoraa o te taiòraa.
Mareto 13 : 24 - 32 Te mahana o te Atua.
Ei Haamataraa.
Te Evaneria i papaìhia e Mareto,te faahitihia nei ia te parau i tohuhia i roto i te puta Taniera.Te parau no te puta a te Atua,te huru no te faaroo i mua i te parau no te faaàpiraahia te tutia.O ta Mareto ia e faatià nei,e tupu teie òhipa na roto i te Metia.
Te tatuhaaraa.
1) ir. 24 E haapouri te fenua.
2) ir. 25 - 31 Te mau òhipa ia tupu.
3) ir. 32 Te Metua tei ìte te mahana e te hora.
Te huru,e te tupuraa o te taiòraa.
E faaararaa teie na Ietu i te òhipa e tupu ia hoì mai te Tamaiti a te taata.
I nià i te fenua. I roto i te raì.
E itehia te Tamaiti a te taata Te haere mai ra te Tamaiti a te taata.
E to no O ia i ta na mau merahi.
E haaputuputuhia tei maìtihia.
E itehia Ua fatata mai i te Tamaiti a te taata.
E maramaramahia Tei te ùputa O ia.
E faaìte atu vau ia outou E òre roa te hoê e ìte.
E mou te raì e te fenua E òre atoà te Tamaiti
E òre roa ra ta ù parau e mou O te Metua anaè ra.
Na teie mau parau e haapapu e,te faaara nei o Ietu i te òhipa ia tae i taua tau ra,o te Metua anaè te ìte,eiaha ra te tahi atu mau taata.Mai teie te huru ia hoì mai te Tamaiti a te taata.E haapiiraa teie e horoàhia nei e Ietu ia noaa i te taata,te ÌTE,e te MARAMARAMA.
Heheuraa.
ir.24 Ia tae ra i taua ànotau ra,
E rave rahi mau tatararaa no teie parau.
1) Aita e òre te faahiti nei O ia i te parau no te haruraahia o Ierutarema e te mau Etene.I taua mahana ra aita te raì e ìte faahouhia,no te mea ua ura te òire moà,ua pauma te au i nià.Mai te mea atu ra e,ua marua te mau fetià,te avaè,e te mahana.Tei roto ia te òire i te pouri.Te tumu i manaòhia ai,teie tatararaa,no te mea i te matahiti 70 i muri mai i te tiàfaahouraa o Ietu,ua haruhia o Ierutarema e te mau Etene,e ua tuìhia i te ahi.E ua papaì o Mareto i ta na Evaneria i te matahiti 55 e aòre ra i te 60 i muri aè i te tiàfaahouraa o te Metia.e tapaò faaìte ia ua ìte o Mareto i te tohuraahia e Ietu te parau no Ierutarema.Ia au i te mau irava 1 e tae i te irava 4,no teie pene 13.
2) E hohoà ia no te hopeàraa o teie nei ao.E te hoìraa mai te Tamaiti a te taata.E òre roa ia te mau tapaò ora o te raì e mau faahou i nià,e marua ia, mai te fetià,te mahana,te àvaè e pouri rahi te tupu i nià i te fenua.
ir 25 E te mau mea mana o te raì ra e ueuehia,
I roto i teie parau te tohuhia nei ia te hoê faaàpiraa i te mau mana o te raì e te fenua.I te mea ua tae i te tau no te faaàpiraa i te huru o teie nei ao.
ir 26 Ma te mana rahi e te hanahana,
E taime faufaa teie no te parau tohu a Ietu.To te ao ia tuuraahia i mua i te aro o te Atua.I reira te maìtiraa e tupu ai,o vai ra te ô i roto.
ir 27 Na àpoo mataì e maha,
Te vairaa ia o te mataì i roto i na poro e maha no te fenua.O tei haaputu i te hoê vahi no te fenua,no te feia tei maìtihia.
ir 28 e te 29 Te parapore ia o tute,e ta na faaiteraa.
ir 30vm ua fatata ia i reira tei te pae ùputa ia,ia ìte hoì outou.
Teie mau faaìteraa no te Tamaiti ia a te taata,i te taime O ia e hoi mai ai,e tei te pae ùputa O ia i te tiàraa.
ir 30vh E òre e mou teie nei uì e hope ai teie nei mau mea atoà i te tupu,
Oia hoì,eita teie nei uì e hope e ìte hoì rätou ia tupu te mau òhipa i Ierutarema.Ma te faaìte atoà i te mau parau no to na hoìraa mai,i roto i te mana.
ir 31 E mou te raì e te fenua,e òre roa ra ta ù parau e mou,
E haapapuraa teie no teie parau ta Ietu e,mea ora te Parau a te Atua.Tei rahu i te raì e i te fenua.ia òre te raì e te fenua e Rahu â te Atua i te hoê ao àpi,hoê raì àpi,hoê fenua àpi.(Apotarupo 21 / 1.)
ir 32 O te Metia anaè ra,
I roto i teie manaò no Ietu e itehia te auraroraa te Tamaiti i to na Metua.Eiaha na na e faatere i te òhipa a te Metua,na te Metua ra e faaue Ia na.
Ei tuatapaparaa.
Ia tae i taua tau ra i reira e itehia ai te Tamaiti a te taata ia pou mai na nià i te ata.E tupu te tauiraa i roto i te raì.Te mahana,te àvaè,te mau fetià,te mau àpoo mataì,te mau puai o te raì e te fenua ua hoê ia,no te faahanahana i taua tau ra.E te mau àrere a te Atua na rätou ia e ta hoê i te mau taata i maìtihia.
O vai ma ia,
O vai te fenua,
O vai te nunaa,
Te faaìte nei o Ietu i te mau tapaò e tupu ai taua mahana ra,te taime ra e tupu ai,aita O ia e faaite nei,i te mea O ia iho aita O ia i ìte.(ir32) E tiai ra i taua mahana ra e tupu ai,àhea ra........
No tätou ia tae i taua tau ra,e òaòaraa te reira,i te mea e ite tätou ia Ietu.
Terai Or.