Mareto 1,14-20

Tapati 22 no Tenuare 2012

Parau tumu Mareto 1:14-20

 Irava 20vh                              PEE ATU RA RAUA IA NA.

 Ei manao matamua.

  I roto i na Evaneria e maha nei,Mataio,Mareto,Ruta,Ioane,ta Mareto te puta poto äè.Tei àmui te mau manao,te ohipa a Ietu no te tavini na roto i te ora,te pohe,e te tiàfaahouraa.Ietu no Natareta, o ia tei  haere i roto i tera vahi,e i tera vahi,no te faaora i te mai,e te feia tei fati i raro äè i te faatîtîraa a te tiàporo,e tei pihai-iho te Atua ia Ietu ia au i te mau ohipa ta na e rave ra.Oia hoi IA IETU NO NATARETA O TEI FAATAHINUHIA MAI E TE ATUA I TE VARUA MAITAI E TE MANA RA,O TE HAMANI MAITAI HAERE RA,O TE FAAORARAA I TE FEIA ÄTOA I NENEIHIA E TE TIAPORO RA TEI IA NA RA HOI TE ATUA.(OHIPA 10:38).

                        O Mareto e taata äro piti o ia,no te mea,o Ioane to na ioa Hepera,e o Mareto tei ioa Roma ia.Oia teie ta te mau epitetore e faaite nei o Ioane-Mareto,o te tamaiti teie i te pae faaroo a Petero.Aita o Mareto i riro ei pîpî na te Fatu,eita o ia i te hoê ite mata,e ite faaroo ra.E rave ohipa o ia na Pauro i roto i te mau tere mitionare i Roma e i Atia iti.Ua faaroo pinepine oia ia Petero to na metua i te faaroo,i te faatiàraa i te huru o te Metia i roto i te ohiparaa i te hanahana o te Atua.Eita o Mareto e tià e pîpî na te Fatu,i te mea e taata àpi roa o ia,i te ô no Tetemane i te taime a tapeàhia ai o Ietu e te mau faaehau Roma,tei reira ätoà o Mareto,o ia tei haruhia te àhu pü horo taha noa atu ra o ia.(Mareto 14:51-52).Teie noa to Mareto ite ua oti ätu ai,e ite tamarii teie,te toeà o to na ite ra mea haapiihia ia o ia e Petero.O te huru ra teie no te hoê tavini papu no te Atua,e te itoito.I parau ai o Amota perofeta i te pene 2 i te irava 16,E O TEI ITOITO I ROTO I TE FEIA PUAI RA,E MAUE TAHA NOA IA IA TAE I TAUA MAHANA RA,TE NA REIRA MAI RA O IEHOVA.

                                   Ei manao tatara.

                        Te ohipa ra e tupu ra i roto i ta tatou taioraa no teie hora paieti,te maùêraa ia teie mau pîpî matamua i te reo titau o Ietu.PEE  ATU RA RAUA  IA NA.Te haamata nei te Fatu ra o Ietu i te poro haere i te parau faaàpi i te oaoa o te Atua.Ua oti te tau no te tiairaa,ua oti te tau no te hioraa i te fetià ànaàna o te poipoi,e ua oti ätoà i te hio-noa-raa i te arenio a te Atua,i te mea te patireia o te Atua teie e fatata mai nei.E patireia tei pii i te mau taata ätoà ia tatarahapa i te peeraa i te reo o Ietu.Te feia tei titauhia ia pee i te Metia,te änihia nei ia e hio tutonu i te Atua,ma te tiaturi papu.Te patireia o te hau o te Atua tei roto ia i te ààu taata e to na oraraa vaamataeinaa,ia maramaramahia teie  tuàtiraa i roto ia Ietu e te taata faaroo.O Ietu iho taua patireia ra tei tae mai na,e tei hoi faahou i te Metua ra ma te ämo i te hopoià a to te ao nei i nià i ta na tapano,e hoi faahoi mai ra O ia no tatou.I te mea e ua tae i te tau no te patireia o te Atua,ua tae ätoà ia i te tau no te faaiteraa i te parau no te mau mea ätoà i parauhia i roto i te Faufaa Tahito o tei tiaituru-noa-hia na,oia hoi te parau no to te Atua faatereraa i teie nei ao.E ere teie i te parau àpi i roto i te vaha o te mau perofeta e tae noa ätu i te mau tavini o te Atua.

                        I te hiti roto no te fenua ra o Tarirea to Ietu tiaororaa i te parau oaoa no te Patireia o te Atua i te feia ätoà tei tatarahapa.E parau maitai tei faatupu i te oaoa i roto i te feia tei faaroo i teie mau reo,e tei farii.O Timona,e ô Aneterea tei farii i teie titauraa a te Fatu,A PEE MAI IA U E FAARIRO VAU IA O RUA EI RAVAAI TAATA.I teie reo no Ietu,aita teie na taata i tuatapapa i te manao,ma te faaau i te parau no te ohipa,e ua pee raua i teie titauraa.Oia ätoà ia o Iatopo e ô Ioane tei nià i te poti te ène ra i te upeà i tae ätu ai te parau titau,ua vaiiho i ta raua ohipa,to raua na metua e taë noa ätu i na tavini tarahuhia,pee ätu ra rauä ia Ietu.Hoê ä manao to ratou e maha nei hoê ä opuaraa e pee i te Fatu.Aita roä te hoê reo no roto mai ia ratou tei haaparuparu i teie titauraa a te Fatu.Ia hio maitai änaè tatou e mea oioi teie mau taata ravaai i te faaroo  i te parau a Ietu.Ua faaruè na taata matamua i ta raua ùpeà e ua pee raua ia Ietu.E i te piti o na taata,ua faaruè i to raua poti,to raua na metua ia Tepetaio e na tavini i tarahuhia i nià i te poti.

                        Teie  mau taata ravaai too maha,o Timona,oAnatereà,o Iatopo,e ô Ioane,e fatu ohipa ratou,o ratou iho to ratou raatira,e aita te tahi e tià e haere mai e  faatere ia ratou.Ua faaruè ratou i te ohipa i herehia e ratou i te mau mahana ätoà,o ta ratou i matau maitai.To ratou àravihi i te hio i te mau faanahoraa o te reva,tera matai ra tera ia te ïà,tera avaè ra tera ia te ïà,tera opape ra tera ia te mauraa ïà e te moana o to ratou ia ùtuafare i te mau mahana ätoà.Te vaiiho nei ratou i to ratou toroà,no te rave i te hoê toroa àpi tei ore i matauhia e ratou.Eiaha no te mea,aita teie ohipa e tere nei,eita roa ia.No te mea ra  te ite nei ratou i roto ia Ietu te hoê faufaa e tià ia ravehia,i teie reo to te Fatu e a tatarahapa,te taata te rave i teie ohipa,eita te ïà,te ïà aita ta na tatarahaparaa.Te taata ra oia ia, te parau ia ta Ietu e hinaaro nei e haapapu na roto i tera manao ravaai taata.

                        Te manao ätoà ia o te Atua i nià ia Ieremia i te pene 16 i te irava 16, te nao ra,INAHA, E TONO  VAU I TE VEA E TII I TE FEIA RAVAAI E RAVE RAHI,TE NA REIRA MAIRA O IEHOVA,NA RATOU E RAVAAI TE TAATA.No reira i tupu ätoà ai te titauraa a Ietu i nià i te feia ravaai.

                        PEE ÄTU RATOU IA NA.

                        Te faaruè nei teie feia ravaai i te vahi ohipa i matauhia e ratou,e te pee nei i te Metia,eiaha i nià i te moana,i nià ra i te fenua nei,eiaha ra i roto i te mau nana ïà,i roto ra i te mau tamarii a te Atua.Eiaha no te tautai i te ïà ia paia te utuafare e te nunaa,ia tautai ra i te taata ia tatarahapa.Te pee nei ratou i te Metia ei faaiteraa i to ratou manao tiàturi i te parau tatarahapa no teie Patireia e fatata mai nei ia ratou.E tià ia tatou ia parau e,te riro nei teie mau pîpî,mai te nunaa no Nineve ra te huru,tei farii i te haapaeraa maa i tiaorohia ia ratou e Iona,ia tatarahapa ia ore ia taahia-tumu-hia to ratou fenua e te Atua.E ua tupu te tatarahapa no te nunaa o Nineve e ua tiaturi i te here faaoreraa hara a te Atua.Faataui atu ra te Atua i teie opuaraa Na na, ei opuaraa no te aroha tupu ätu ra te oaoa i roto i teie nunaa.O ta Ietu ätoà e hinaaro nei i ta na mau pîpî,ia riro ei feia tamau i te imi i te parau no te tatarahapa,e ia  tatarahapa te mau taata e naeàhia nei i te parau àro no te Evaneria.Ua faataui te Atua i ta na opuaraa i nià ia Nineve,ua faataui ätoà na taata ravaai e maha i ta ratou opuaraa no te tautai i te ïà,e teie nei e ravaai ratou i te taata  ia tatarahapa.I pee ai ratou i te reo titau no te Metia,i te mea ua tatarahapa ätoà ratou.Oia ätoà te mau taata tei faaroo i te reo titau o te Fatu ia pee ia na,ma te faaohipa i ta na tareni,taata tataitahi te haapao i ta na tareni.O ta te Apotetoro ra ia o Pauro e faaite nei i to Torinetia hoê i te pene 7 i te irava 25 e faaea i te irava 31,mai te mea e paretenia ra,ia itoito ia i te peeraa i te Metia,te feia taàtihia ra,ia puai ätu i te here i to na hoa haaipoipo,ei ia rahi ätu ä i te imiraa raveà no te hau,mai te mea te oaoa ra,ia tapeà noa ia i to na huru taata oaoa,no te taviniraa i te Atua.

                        Te titau ätoà nei te Metia ia tatou ia pee Ia na,no te aha ?

                        No te mea,      1) mau Tamarii tatou no roto i te Patireia o te Atua.

                                               2) Mau Tamarii tatou no te opu o te tatarahapa.

                        E ta tatou raveà te ravaai taata ia.

                        Te nao ra te parau paari ra e,te tarava ra te äau taata ta na tautai.

                                                                                                                      ia ora na .