Ioane 10, 27-30

Tapati 21 no Eperera 2013

Mau taioraa.

Taramo                100               Tei àrue i te Atua.

Ohipa                   13 : 14; 42 - 52 Te oaoa o te Etene

Apotarupo       7 : 9 - 17         Te haamoriraa i te Atua

 Ioane                    10 : 27 - 30           Te horoà a te Atua

Ei tuatapaparaa.

Taramo 100         Tei àrue i te Atua.

Te haamaitairaa ta te papai Taramo e faaite nei, te horoà nei ia i te hoê àmuiraa no te mau mea ora atoà ia himene i te mau maitai a te Atua. O vai ma teie e àmui nei i to ratou mau reo ? Mauti ra  ia te mau rahu a te Atua, e tae noa atu i te mau taata atoà tei tiàturi i ta na mau opuaraa. Te ravehia nei teie ohipa na roto i te, haruru o te fenua, te haamoriraa, te himeneraa, e te mau mamoe tei na roto i te mau ùputa o te hetere ia tomo, o ratou teie e parauhia nei no te àrue i te Atua.Teie mau haamaitairaa no te faaite ia i te aroha mure ore o te Atua i tera ui e i tera ui. Te huru teie no te hoê taata tei tiàturi i te Atua.

Ohipa 13 : 14; 42 - 52            Te oaoa o te mau Etene.

No te aha te mau Ati - Iuta i riri ai ? no te faufaa anei te parau a Pauro ? Te riri o te mau Ati - Iuta, i to ratou iteraa i te rahi o te ma taata e vai ra i roto i te Tunato no te faaroo, i te parau oaoa e faaitahia ra e Pauro e o Paranapa. Te iteraa ratou i te faufaa no te mau parau poroi, tei faaite i to na aano e te otià ore, rahi roa atu ra to ratou ririraa, haapurarahia iho ra te feia Ati - Iuta pure Atua.Rahi roa atu ra te mau Etene, e te feia pure Atua Ati - Iuta i te faarooraa ia Pauro e o Paranapa. Tiahihia atu ra e te feia mana no teie oire no Anetiohia i Pititia. Ia tae ratou i Itonio e oaoa i te rahi te itehia i te mau ohipa tei tupu no roto i to ratou îraa i te Varua Maitai. Ua tupu ia teie mau ohipa i roto i te tere mitionare matamua o Pauro.

 I muri aè i to te Varua Maitai titauraa ia Pauro e o Paranapa no te ohipa pororaa Evaneria, ua haere raua i Terutia no te rave i te pahi no te fano i Tupero (Ohipa 13 : 2 - 4).

Anetiohia : oire teie tei riro ei pu no te pororaa Evaneria ( Anetiohia i Turia).

Tarami : oire matamua teie ta raua i tapae i te fenua no Tupero, e ua amui atoà mai o Ioane - Mareto .

Pafo : Piti no te oire no te Fenua Tupero ta ratou i tapae.

Perete : Te toru ia o te oire ta ratou i tapae no te tuhaa fenua o Pamefuri.

Anetiohia i Pititia : Te maha ia o te oire ta raua i tapae, i reira o Ioane i te faaruèraa mai ia raua .

Itonio : Te pae teie o te oire ta raua i tapae.

Rutetera : Te ono ia o te oire .

Terepe  : Te hitu ia o te oire .

Ia tae raua i Terepe ua rave raua i te ohipa no te Evaneria, e ia oti ua hoi mai raua i Rutetera e i Itonio, e i Anetiohia i Pititia, e mai reira haere tià mai ra i Perete e i Ataria e, mai Ataria ua rave raua i te pahi no te fano i Anetiohia i Turia. ua tupu ia teie mau ohipa i te pae no te miti Metiterane. Te vahi te tià i roto i teie huru tuatapaparaa, no te faaite ia te tupuraa te parau no te Evaneria i teie mau pae, te tumu ia i horoàhia atu teie mau ioa fenua. Te itotito o te mau veà tono i te faaharururaa i te fenua i te haamaitai i te Atua, e ua tae roa i roto i te mau Etene.

Apotarupo  7 : 9 - 17 Te haamoriraa i te Atua

Te aratai nei teie tuhaa parau ia tatou i roto i te patirea o te Atua, tei faaitehia na e te Metia. I o nei te itehia nei te rauraa no te mau nunaa no na poro e maha o te ao nei. Te taatoàraa teie e tiaihia nei, te taatoàraa teie e fariihia nei, te taatoàraa aita roa te hoê e vaiihohia i rapae. E te feia e tià nei i mua i te terono o te Arenio tei tamahia to ratou àhu i te toto o te Metia, e tei teatea roa, e mau tavini ia tei haere atoà na nià i te èà, i haerehia e Ietu e tei mauuiuui i te parautià a te Atua.

Te faaite nei ta tatou parau i te huru no te mau tavini tei haamauiuihia, te horoàhia nei ra ia ratou te ora, te tiàmaraa, te faa-ore-raa i te poia, te poiha. E teie nei to ratou roimata na te Atua ia e horoi, i te mea tei roto ratou i te peho no te ora, te vahi o te Atua anaè te faatere.

Te itehia nei te tahi hihi no te ohipa veà tono i ravehia na e Pauro i te mau vahi i haerehia e ana i te ioa no te Parau maitai a te Atua i o te Etene.

Ioane 10 : 22 - 30 Te horoà a te Atua.

E haamata teie tuatapaparaa i te irava 22, eiaha ei faahaparaa i ta te tarena faanahoraa, no te faao mai ra i te tahi tuhaa e hinaarohia ra e faaite.

Ua tupu teie parau i roto i te oroà àvariraa no te fare pure e te vahi vairaa tutia, tei faatupuhia e te tahua ra o Iuta a Makapaio, E haamanaoraa i te ohipa tià ore i ravehia i teie vahi, tei oti ra i te haamaitaihia. Teie oroà e tupu ia oia i te pae hopeà no te matahiti i te manhana no Titemai te taio mahana no te 25 e tae i mahana matamua no Tenuare, oia hoi e vaù mahana te maoro. Teie taio mahana i te pae fenua Paretetina ma, e mahana vero ia e te toètoè, te tumu ia te taata i àmui ai, i raro aè i te taupee no te fare o Toromona. I reira te tupuraa teie parau ta tatou e hio nei. Ua àua haaàtihia o Ietu e te Ati - Iuta, no te tahi parau ta ratou i feruri noa ra no te faaite atu ia Ietu, ia au i teie manao e o te Metia oe a faaite hua mai oe. Te hinaaro tumu o teie mau Ati - Iuta ia faaite papu o Ietu e, e O ia te Metia e tiaihia ra. Eita ra o Ietu e faaite noa atu i te reira, eita atoà o Ietu e haamaha i to ratou hinaaro no te ite oia mau anei te Metia. O te ohipa ia e tupu nei i roto i te taioraa.

Te irava 22,          Te oroà àvariraa i Ierutarema.

Te irava 23 - 26    Te àparauraa a Ietu e te Mau Ati - Iuta o vai te Metia.

Te irava 27 - 29    Te faaroo e te horoà a te tiai mamoe.

Te irava 30 Te      Metua e te Tamaiti hoê ia.

Ei hioraa àmui no na taioraa e maha.

Te tahi manao  e tià ia hiohia ia au i te faaiteraa a na taioraa e maha nei, to te taata paieti ia horoàraa i ta na faanahoraa no te haamaitai i te Atua. Te haafaufaa nei o ia i te huru o te Atua, i te titauraa a to na faaroo, ia ore ta na haamoriraa ia atea i te mau ohipa e faatupuhia nei e te opuaraa no o mai i te Atua ra. Ia faaroo tatou i teie reo e faahitihia nei e te taata

Täramo,  IA HARURU TE FENUA I TE HAAMAITAI IA IEHIOVA, to na auraraa, eiaha te taata noa te rave i teie òhipa te mau rahu atoà ra a te Atua te tià e rave, e aore ra te mau taata atoà tei ite i to ratou atearaa i te Atua e tei tatarahapa. E teie HARURU, e tià ia parauhia ua tae roa i roto i te mau fenua i faaitehia aè nei e te mau veà tono i te Parau Maitai  a te Atua, e to te mau ETENE ite atoà - raa e te hinaaro atoà mai ra te Atua ia ratou. E ua tae atoà te HARURU o teie parau i roto i te Patireia o te Atua, i te haamoriraa a te feia paieti i mua i te Arenio. E to ratou oto na te Atua e tamahanahana, ma te horoi i to ratou roimata. Teie mau manao no faaite ia, teie reo to Ietu e vai ra i roto i te Ioane i te pene 10 i te irava 30, O VAU E TE METUA HOË IA. O te tahi auraa teie no te mau parau tatou i faaroo ae nei, to Ietu haapapuraa e HOÊ O ia i roto i te Atua. Oia hoi ta na e faaite nei no o mai i te Atua ra. Ta te manao ia e hinaaro nei ia hio tatou i teie parau, ei faaitetraa na tatou i teie tapati i muri nei, i te mea e tapati teie no te oroà o te mau TIAI MAMOE MAITAI.

Teraì òr.