Ev. Ruta 15,1-32
Tapati 15 no Tetepa 2013
Ev. a Ruta 15 : 1 – 32
Te haamauàraa faufaa.
Te poia tei faahoì i te Metua ra.
Te hara i te Atua e i te Metua
Te hanahana ùtuafare
Te riri o te matahiapo.
Te Metua i faaoromai.
Ei manaò matamua.
E parau faatià rahihia teie e tätou, tei faahiti -noa- hia e, te tamaiti tei haere i te fenua roa, e tei parau- atoà- hia te here o te Metua i na tamaiti e piti..
E tià ia tätou ia parau i roto i teie parapore, te tamaiti matahiapo o te huru ia o te Mau Faritea, e te Mau papaì parau.
Te teina o te huru ia o te Mau terona, e te feia hara.
Te Metua, o ia te hinere i roto i teie taiòraa.
Te tatuhaaraa o te pene parau.
Ir. 1 – 3 Te itehia nei te tahi peu ta te Fatu e rave nei. Tei haere i roto i te hoê pupu taata au- òre – hia e te nunaa, te faritea, te papaì parau, e te torona. Te manaò o te nunaa e feia rave hara teie, te manaò ra o Ietu mea taaê roa ia. I faatià ai O ia i teie Mau parapore.
a) ir 3 – 7 Te mamoe moè
ir 8 – 10 Te titerama moè
ir 11 – 32 Te tamaiti i haamoè.
Ei tuatapaparaa.
E toru parapore teie e faaite nei i te parau no te mamoe moè, te titerama moè, e te tamaiti tei haamoe ia na. Ma te faaite atoà e, te òaòa i te iteraahia e te hoiraa mai. Na parapore matamua te faaiteraa ia i te parau no te ìmiraa ia itehia te parau no te tatarahapa. Oia atoà ia te parau no te toru o te parapore, teie tamaiti tei äni i to na tiàmaraa i to na Metua. E tei òre i maitai i roto i to na tere, tei ite i te ìno hoi mai ra i te ùtuafare Metua. Aita ta tätou taiòraa e haamaramarama maitai nei ia tätou i te huru o teie tamaiti.
Ta te taiòraa e faaìte ra e teina teie. Teie ra eiaha tätou ia topa i roto i te herepata no te òhipa i ravehia e teie tamaiti. No te mea eita teie i te hoê tatarahaparaa no roto mai i to na ààu. Te hoê ra tatarahapa pohe poia, àhiri aita o ia i pohe i te poia eita o ia e hoi i te fare Metua, e haere noa o ia i mua. No reira eita i te hoê òhipa tano ta teie tamaiti i rave ia ìte roa o ia i te poia e te ìno o te toeä maa a te puaa, i reira e haamanaò ai i te parau no te tatarahapa i mua i te Atua e i mua i to na Metua. Ta Ietu ra e hinaaro nei eiaha ia tupu mai teie te huru ia ìte roa i te ìno i reira e tatarahapa ai, oia hoi eiaha na te àti e faahoì i te Atua ra, na te ààu tatarahapa Mau ra e faahoì. Teie tamaiti aita to na ààu i tatarahapa, to na noa hinaaro ia au i teie parau e < EIAHA O IA IA RIRO FAAHOU EI TAMAITI NA TO NA METUA EI TAVINI RA>.Na teie parau e haapapu ia tätou e tei mua noa i te ìri ùtu te tatarahapa a teie tamaiti. Na na iho o ia e tapu nei i to na tiàraa fatu i roto i te ùtuafare Metua.
Oia atoà ia te tamaiti matahiapo i te iteraa te hoiraa mai to na teina, aita o ia i färii, ua riri i te mea ua haamauà o ia i ta na tuhaa no te faufaa Metua. Aita atoà o ia e òaòa nei i te òhipa ta te Metua i rave te faatupuraa i te òroà tamaaraa na to na teina.
Te auraa ra, teie na tamaiti aita raua i atea roa atu te tahi i te tahi i te faatura òre i to raua Metua. Te faaòromai nei te Metua i te huru no teie na tamarii. E tià ia parauhia e, tei teie vahi, te faufaa o teie na parapore e toru. Te faaòromai o te tiai mamoe i te ìmiraa i te mamoe, oia atoà ia teie vahine i te ìmiraa i te titerama moè. E te Metua, te huru ia o teie na tamaiti. A hio na ra tätou i te aroha faaòromai o teie Metua.
Te hoìraa mai te teina, ua horo atu ra O ia e farerei, ua hoì ia na.
Ua tuu i te tapeà rima ei faaiteraa e ua hoì faahou o ia i nià i te faufaa Metua. Ua faaàhu i te àhu pu ei faaiteraa i to na tiàraa fatu ùtuafare. Ua faaòòmo i te tamaa ei faaiteraa i to na tiàmaraa. E ua tupaì i te Mau puaa maitatai e faaòroà àiraa , no te mea ua hoì ora mai teie tamaiti e òaòa rahi to te Metua, i teie òhipa i tupu .
No te matahiapo ua haere mai te Metua i rapae i te fare no te taparu ia tomo o ia i roto i te òroà no te òaòaraa. I teie vahi e faaea ai ta tätou parapore, e pahono anei te matahiapo i te titauraa a to na Metua ? E faatura anei o ia i teie reo o te Metua ?
Aita ta tätou taiòraa e horoà nei i te reira, Ta te taiòraa ra e horoà nei te tahi ia auraa te itehia i nià i te òhipa ta te Metua e faatupu ra, mauti ra ia < TE ÒAÒA FAAÒROMAI ».
Terai or.