Ioane 17.11-19 Hoê

Publié le par Mapuanga terai

Tāpati 16 no Më 2021.

Hoê

Taramo 103

1 Na Tävita E haamaitaì i te Fatu, e ta ù värua, e to roto ia ù nei, i to na ra iòa moà. 2 E haamaitaì i te Fatu, e ta ù värua, e eiaha te hoê maitaì a ana i horoà mai ra e haamoèhia. 3 O ia tei faaòre i ta òe atoà ra mau hapa, e o tei faaora i to òe atoà ra mau maì, 4 o tei faaora ia òe i te pohe, o tei faatoröna ia òe i te hämani maitaì e te aroha, 5 o tei faaî i to vaha i te maitaì, ia faaâpï-faahou-hia òe mai te àeto ra. 6 Te rave ra te Fatu i te parau tià e te au i te feiä atoà i hämani-ìno-hia ra. 7 Ua faaìte o ia i ta na haapaòraa ia Möte, e ta na òhipa i te tamarii a Ìteraèra. 8 E aroha e te hämani maitaì to te Fatu, e òre e riri vave, te rahi ra to na aroha. 9 E òre o ia e tämau i te aò mai ia tätou e òre hoì e vaiiho maro i to na riri e a muri noa atu. 10 Aita aè nei o ia i tähoo mai ia tätou e ia fäito i ta tätou mau hara, aore hoì i faautuà mai ia tätou e ia fäito i to tätou mau ìno. 11 Mai te teiteiraa o te mau raì i nià i te fenua nei, mai te reira te rahi o to na aroha i te feiä i mataù ia na ra. 12 Mai te hitià-o-te-rä e taa ê i te tooà-o-te-rä ra, o ta na ia faataa-ê-raa i ta tätou mau hara ia tätou nei. 13 Mai te aroha o te metua i ta na ra mau tamarii, o to te Fatu ia aroha i te feiä i mataù ia na ra. 14 Ua ìte hoì o ia i to tätou huru, te manaò ra o ia e, e repo tätou nei. 15 O te taata nei e au to na puè mahana i te àihere nei: mai te tiare i roto i te aru ra to na ruperuperaa. 16 Ua farara anaè te mataì nä nià iho ra, ua mou ia, e to na vähi i tupu ai ra e òre e ìte faahou ia na. 17 Âreà te aroha o te Fatu mai tahito mai ia e a muri noa atu, i te feiä i mataù ia na ra, e ta na ra parau tià i te tamarii a ta rätou ra mau tamarii, 18 i te feiä i haapaò i ta na ra faufaa, e tei haapaò i ta na ra parau e rave ra. 19 Ua haamau te Fatu i to na ra teröno i nià i te mau raì, e ua auraro te mau mea atoà nei i to na ra pätireia. 20 E haamaitaì i te Fatu, e to na ra mau merahi e, o tei hau i te püai, e ua haapaò i ta na faaueraa, i te faarooraa i ta na reo ia parau. 21 E haamaitaì i te Fatu, òutou atoà, o to na ra mau pupu, o to na ra mau tävini tei rave i to na ra hinaaro. 22 E haamaitaì i te Fatu, e ta na atoà ra mau òhipa, i te mau vähi atoà ra i to na ra hau. E haamaitaì i te Fatu, e ta ù värua e.

Òhipa 1.15-26

15 E i tei reira ra mau mahana, ua tià aè ra Pëtero i nià i röpü i te mau pipi ra, ua nä ô mai ra (hoê hänere e piti àhururaa te taata i putuputu mai): 16 «E hömä, e te mau taeaè, ia tupu te parau i päpaìhia ra e tià ai, ta te Värua Maitaì i parau mai i te vaha o Tävita i mütaa iho ia Iüta ra, o tei riro ei arataì i te feiä i haru ia Ietu ra. 17 I âmui-atoà-hia hoì o ia i roto ia mätou nei, i noaa atoà hoì teie nei töroà ia na. 18 E hoo na iho ra e taua taata ra te hoê fenua iti i te utuà o ta na hara, e maìri iho ra o ia i raro te mata, àmaha atu ra röpü ia na, purehu atu ra ta na âau i räpae. 19 E ua ìteä taua mea ra e to Ierutarëma atoà, e maìrihia iho ra taua mäa fenua iti ra i ta rätou iho parau, Àteratama, oia hoì «O te fenua toto. 20 Ua päpaìhia hoì i roto i te puta Taramo: «Ia ano to na pärahiraa, e eiaha roa ei taata e pärahi i reira, e ia riro hoì to na töroà ia vëtahi ê.» 21 E teie nei, te mau taata i âmui atoà mai ia tätou, a pärahi atoà ai te Fatu ra o Ietu i röpü ia tätou nei ra, 22 mai to na päpetito-raa-hia mai ä e Ioane ra, e tae roa mai nei i te mahana i ravehia atu ai o ia i nià ra, ia faataahia te hoê o rätou e tià ai, ei ìte e tätou atoà hoì i ta na tiàfaahouraa i nià nei. 23 Ua täpaò atu ra rätou i e toopiti puè taata, o Iotëfa Paratapa, o tei maìrihia ia Iuteto ra, e o Matätia hoì. 24 Ua pure iho ra rätou, nä ô atu ra: «E te Fatu, o tei ìte i te âau o te taata atoà nei, e faaìte mai òe i ta òe i hinaaro i eie nei puè taata, 25 ia rave atoà mai o ia i teie nei töroà i te âpotetoro, i maìri ia Iüta i te hara, ia tae o ia i to na ra vähi mau. 26 Ua tuu iho ra rätou i te terero, riro atu ra te terero ia Matätia; âmui-atoà-hia mai ra o ia i te mau âpotetoro tino àhuru mä hoê ra.

1 Ioane 4.11-16

11 E a ù mau here e, i nä reira te Atua i te aroharaa mai ia tätou nei, ia aroha atoà tätou ia tätou iho e tià ai. 12 Aita e taata i hiò i te Atua. Te aroha nei tätou ia tätou iho ra, te pärahi nei te Atua i roto ia tätou, e ua maitaì roa to na aroha ia tätou nei.13 O te mea teie i ìte ai tätou e te pärahi nei tätou i roto ia na, e te pärahi nei o ia i roto ia tätou, no te mea ua horoà mai o ia i to na Värua ia tätou nei. 14 Ua hiò aè nei mätou, e te faaìte hua nei mätou, e ua tono mai te Metua i te Tamaiti ei Ora no to te ao. 15 O të fäì hua e, o Ietu te Tamaiti a te Atua, te pärahi ra te Atua i roto ia na e te pärahi ra o ia i roto i te Atua. 16 Ua ìte hoì tätou, e ua faaroo tätou, i to te Atua aroha ia tätou nei.

Ioane 17.11-19

11 Ua òre au ua pärahi i teie nei ao; e tià rä rätou i teie nei ao, e te haere atu nei au ia òe na. E ta ù Metua Moà ra e, e tiaì òe ia rätou i ta òe i hö mai no ù i to iòa na, ia hoê aè rätou mai ia täua atoà nei ä. 12 I ta ù pärahiraa i te ao nei e rätou atoà ra, na ù ia rätou i tiaì i to iòa na; i ta òe i hö mai no ù ra, ua tiaìhia ia e au, e aore roa te hoê i moè, maori rä o te tamaiti o te pohe ra, ia tupu te parau i päpaìhia ra. 13 I teie nei rä, te haere atu nei au ia òe na, e te parau nei au i teie nei mau parau i te ao nei ia tià roa to rätou òaòa ia ù. 14 Ua tuu atu vau i ta òe parau ia rätou, e te riri nei to te ao nei ia rätou, no te mea eere rätou i to teie nei ao, mai ia ù nei hoì eere i to teie nei ao ra. 15 Aore au i pure ia òe e ia hopoi ê atu òe ia rätou i teie nei ao, ia tiaì mai rä òe ia rätou eiaha ei ìno. 16 Eere rätou i to teie nei ao, mai ia ù nei hoì eere i to teie nei ao. 17 E haamaitaì òe ia rätou i te parau mau na òe; o to parau na te parau mau. 18 Mai ia òe i tono mai ia ù i teie nei ao ra, ua tono atoà atu hoì au ia rätou i teie nei ao. 19 E ua faataa vau ia ù iho no rätou, e ia faataa-atoà-hia rätou e te parau mau.

Manaò

Taramo 103, 13 Mai te aroha o te metua i ta na ra mau tamarii, o to te Fatu ia aroha i te feiä i mataù ia na ra.

Òhipa 1, 24 Ua pure iho ra rätou, nä ô atu ra: «E te Fatu, o tei ìte i te âau o te taata atoà nei, e faaìte mai òe i ta òe i hinaaro i eie nei puè taata

1 Ioane 4, 15 O të fäì hua e, o Ietu te Tamaiti a te Atua, te pärahi ra te Atua i roto ia na e te pärahi ra o ia i roto i te Atua.

Ioane 17, 11 vh ia hoê aè rätou mai ia täua atoà nei ä.

Tatararaa.

11 vh ia hoê aè rätou mai ia täua atoà nei ä. E tià atoà i te parau e, Ia riro rätou atoà ei hoê ; mai ia täua e hoê nei.

Te parau ta tätou e hiò nei i teie mahana, te parau ia i faatupu noa nei i te uiuiraa i roto i te taata i teie mahana ; oia hoì to Ietu vairaa hou te rahuraa o teie nei ao e te parau no te hoêraa. Te manaò mätamua e au ia tätou e parau teie ia, no roto mai i te parau to te Atua faaìteraa mai ia na. I roto i tera parauraa e, i vai na Ietu, te Tämaïti hou te mau mea atoà a rahuhia ai, èere ia i roto i terä huru i ìtehia i to na taeraa mai i te ao nei ; no terä mea, e Parau tei riro mai èi taata (Ioane 1, 1). Ia parau anaè tätou e, ua riro, täpaò faaìte ia e, eere ia o na mai te taata i te haamataraa, e parau noa ra. Hou rä o ia a riro mai ai èi taata, e i roto i te parauraa, hoê ä te Metua e te Tämaïti, no terä ia mea e, e piti atoà ra e Parau, hoê ä te Metua e te Tämaïti, ia au te faaìteraa a te (Ioane 1, 1) i te vähi hopeà ;’ … e o te Atua hoì te Parau (Logo)’. No reira atoà te perofeta Ìtaia i parau ai i roto i te pene 40, 18 : O vai ta òutou e faafäïto i te Atua ? E aha ta òutou hohoà ia faaäu ia na ?

Te fifi terä i ìtehia a haamatahia ai i te tatara i terä parau Tätou i roto i te Tenete 1, 26 : E hämani tätou i te taata… No terä mea, ua hiò te taata i te hohoà ta na i ìte ia Ietu no te faatüàtiraa i terä parau ta tätou i faahiti i mua atu. E ua tae roa atoà te tahi i te parauraa e, terä Tätou e parauhia ra i roto i te Tenete, o te Toru Tahi ia, oia te Metua, te Tämaïti e te Värua Moà. Te vahi rä e tïtauhia ra ia tätou ia tütonu, o te parau ia no te tauiraa mai terä huru mätamua i ìtehia i roto i te tahi huru ê (Ioane 1, 1). Te tahi noa haapotoraa no te auraa o teie parau Toru Tahi. Mea ê ihoä te Metua, mea ê ihoä te Tämaïti, e mea ê ihoä te Värua Maitaì. Te mea rä e tähoê ra ia rätou e i parauhia ai Toru Tahi : Hoê parau, hoê manaò, e hoê ôpuaraa. Te parau a te Metua, hoê ä ia i ta te Tämaïti e ta te Värua maitaì. Te manaò o te Metua, hoê ä e to te Tämaïti e to te Värua Maitaì. E te ôpuaraa a te Metua, hoê ä ia e ta te Tämaïti e ta te Värua Maitaì : Te ora o teie nei ao.

Te vai ra terä parauraa ta Ietu e, Tei hiò mai ia ù, ua ìte ia i te Metua. Te manaò ta Ietu e hinaaro ra i te parau i ô nei, eere ia te hiòraa aore ra te raveraa i te hohoà mata, e hiò ra i te parau e te òhipa ta Ietu i rave, o tei tamata i te faaìte i te taata i huru o te Metua. No reira eiaha tätou e piri taò noa, mai tei ìtehia i roto i te tahi pae o tätou. Te mea päpü, pinepine Ietu i te parau i te parau, te manaò ra ta na e hinaaro ra i te faaìte, vähi ê roa ia.

Te tahi taime te faaroohia ra Ietu i te parauraa e, Aore o te tino e faufaa, no te värua rä te ora. (Ioane 6, 63). Te auraa no teie parau ta Ietu, eiaha e piri taò noa, eiaha e hiò noa i te päpaì, aore ra, eiaha e hiò noa i te parau, e hiò rä i te auraa, oia hoì te värua o te parau, te mea ia e ärataì i te taata i te faatupuraa i ta te parau e tïtau mai ra e rave.

Ia riro rätou atoà ei hoê ; mai ia täua e hoê nei.

Terä hoêraa to na e to na Metua, no terä mea e, na te Värua o na e ärataì ra. Te taa-ê nei ihoä o na e te Metua i teie taime, no terä mea ua riro mai o ia èi taata. O ia hoì, ua faaruè o na ia na iho, ua haamoè o na ia na iho, no te faatupuraa i te hinaaro o to na Metua, te mea ia ta Pauro e faahiti ra i roto i te Firipi 2, 5-11. Te mea ia i faatupu i te hoêraa i roto ia na e to na Metua.

 

I mau rä i teie parau, te vai ra terä parau ta Ietu i faahiti no te taata tei hinaaro i te pee ia na, E faaruè o ia ia na iho. (Mataio 16, 24). Te reira te taata e hinaarohia e haere e tävini. Te auraa, aita e taata e tano e riro èi tävini mai te peu e, eita o ia e faaruè i te vähi tei reira o ia i te raeàraahia i te parau no te haere i te vähi i hinaarohia mai ai o ia e to na Fatu. Te mea atoà ia ta Pauro e parau ra e, Ia ö te taata i roto i te Metia, ua riro ia èi taata âpï… Te tahi hiòraa tano ia rave, te parau ia no mäa tei parauhia òe e faaruè. Na mua aè rä òe e faaruè ai terä mäa, tei roto ihoä i to òe rima, e ia faaruè òe aita faahou ia ; ia tii faahou rä òe i taua mäa ra, aita ia òe i faaruè.

Te mea pinepine ihoä ia e ìtehia nei i roto i te taata, te ìtehia nei ihoä te taata i te faaruèraa i terä huru tahito no te faariroraa ia na èi taata âpï ; te haapäpüraa änei i te päpetitoraa, te haereraa änei tiàtono, te haereraa änei haapii parau maitaì, te hereraa änei e òrometua, e te   vai atu ä…

Te mea pinepine atoà rä e ìtehia nei, èita e maoro roa atu i roto i te rä huru taata âpï, erä ua tii faahou terä huru tahito ta na i faaruè. Te auraa, aita ia i faaruè roa e àita ä i riro roa èi taata âpï, e èi taata no te Atua.

Te tahi hohoà e tano e täpirihia i pïhaì iho i teie parau, te parau ia e Ìtaia no nià i te repo àraea e te pötëra (Ìtaia 45, 9). Àhiri paì te àraea i vai noa i to na vähi, i roto i te faa, i nià i te âïvi, èita o na e riro èi âuà. No te mea rä, ua faaruè o na to na vähi mauraa, i ôhie ai te pötëra i te faariro ia na èi âuà, èi hapäina, èi pita, oia hoì èi taihaa faufaa.

I mua i terä parau ta Ietu, te taata e hinaaro i te pee ia na, mai te peu èita e faaruè ia na iho, èita e haamoè ia na iho, no te reira taata, èita te parau e òhipa i nià ia na no te faatupuraa i te täuiraa. Hoê ä ia e te parau no te hoêraa ta Ietu e parau ra no na e te Metua, no te mea, te hanahana o te Metua ta na e hinaaro ra ia ìtehia e ta na e faatupu ra. Te auraa ia o terä mau parau ta na e pinepine noa ra i te faaära e, Àita vau i haere e faatupu i to ù hinaaro, to te Metua rä. Te reira atoà te huru ta Ietu e hinaaro ra i te taata, e i ta na mau pipi, ia riro rätou èi hoê.

Mai terä repo àraea, te taime o na a riro mai ai èi âuà, èi hapäina, èi pita ; i mua i te mata o te taata, eere i te àraea faahou, èita e tano e parau faahou e àraea. Eere noa atoà rä i te âuà noa, i te hapäina noa aore ra i te pita noa, te manaò rä terä o te taata hämani i riro mai èi âuà, èi pita, èi hapäina. Hoê ä ia e te parau no te mau pipi e no te taata i roto i terä manaò to Ietu e, Ia riro rätou atoà èi hoê. Te auraa, te mea faufaa, eere te ìteraahia mai e o Petero, Ioane, Mataio, Iuta, to rätou ra riroraa èi raveà e ìtehia ai te hinaaro e te hanahana o te Atua. Eere terä taata tätaì tahi te mea faufaa, te täuiraa rä ta rätou e faatupu atu.

Te âuà e te manaò o te taata na na te òhipa i riro mai ai èi âuà, hoê ä ia. Oia hoì, aita e taa-ê-raa i roto i te manaò e te tupuraa o te manaò, hoê ä. Te vähi noa e taa-ê-rii ia raua, te mea ia e, nehenehe te tahi e täpeà, areà te tahi èita ia. I nià i terä hohoà, èi reira tätou e marämarama ai i terä hoêraa o te Metua e te Tämaïti, e te huru hoêraa ta Ietu e hinaaro ra ia tupu atu i roto ia na e ta na mau pipi e i roto i ta na mau pipi rätou rätou iho.

Oia hoì, te taime e ìte ai te taata e e tupuraa o ia no te hinaaro o te Atua e ua färii i te hoì i te Atua ra, te reira noa te taime e ìtehia ai e täpaò no te hoêraa i roto ia na e to na Atua. Oia hoì, te taime e färii ai te taata e o te manaò o ia no te Atua i riro mai èi taata, te taime atoà ia e tupu ai te hoêraa i roto ia na e to na Atua.

E tano e parau e, tei mua tätou i te hiò hipa, oia te parau a te Atua, te mea e anihia ia tätou te haèhaa ia o te âau, no e faatanoraa ia òe i nià i te Fatu, e i nià i te Atua. Eiaha rä e, na te Fatu e na te Atua e faatano mai i hià ia òe, i vaho roa ia òe e vai atu ai. Èita e òre e, te tahi teie tumu no te mau âmahamaharaa e tupu nei i roto i to tätou oraraa i teie mahana, vaamataèinaa änei, poritita änei, faaroo änei, no te mea àita te Atua e Atua faahou ra i teie fenua. Eiaha no te mea e, àita tätou e rave nei i ta tätou òhipa, oia ia. Te mea noa rä e toe ra, terä parau ta te Fatu e na ô ra e : E faaruè o ia ia na iho. Oia, te tuu-hope-roa-raa tätou i te täatoàraa o to tätou tiàturiraa i roto i te Fatu, i roto i te Atua, mai te reo o te Fatu e na ô ra e : E tià ia ù ia horoà, e e tià hoì ia rave faahou. O  ta ù Metua ia i faaue ma ia ù. Te auraa ia no terä parau e, faaruè ia na iho. Oia hoì ia riro te Atua e ärataì i te taata i roto i to na oraraa, e reira noa e tupu ai te hoêraa ta te Fatu e pure nei.

 

Ia haamaitaìhia te Atua te Tumu o to tätou ora, ia ora na.

 

Peretiteni EPM.

Tahiarii òr.

Pour être informé des derniers articles, inscrivez vous :
Commenter cet article