Mätaio 23,1-12

Publié le par Mapuanga terai

 

Photo  Teraì òr Faatura

Täpati 5 no Novema  2017.

Ôroà.

Tuiau.

Taramo 131

1 Tire a te Moruta. Na Tävita. E te Fatu, aore taù âau i teòteò, aore hoì taù mata i hiò i nià. Aore hoì au i tïtau i te mau mea rarahi ra, i te mau mea i teitei ê atu ia ù nei. 2 Ua tuu haèhaa hoì au, e ua faanä ia ù iho, mai te tamaiti i maìri te ü o te metua vahine ra vau. Mai te tamaiti i maìri te ü ra to ù nei värua i roto ia ù nei. 3 Ia tiàturi ä Ìteraèra i te Fatu, i teie nei e a muri noa atu.

Marati 1,14

14 Ia faaìnohia rä te haavare, te vai ra te oni i roto ta na nänä, e ua èuhe iho ra, e ua hopoi i te mea maìhia ei tütia na te Fatu te nä ô mai ra te Fatu manahope ra, Arii rahi au, e mataùhia hoì to ù nei iòa i te mau fenua ra.

Marati 2, 1-10

Te mau faaheporaa no te hoê au-tahuà-raa mau

1 Teie nei, e te feiä tahuà, na òutou teie nei parau. 2 Ia òre òutou ia faaroo, e ia òre ia haapaò mä te âau atoà, e ia haamaitaì mai i to ù nei iòa, te parau mai ra te Fatu manahope ra, e tuu vau i te ìno i nià ia òutou, ia faaìnohia to òutou maitaì e ua faaìnohia na e au, òutou aore i haapaò mä te âau atoà. 3 Inaha, e faatähuti au i to òutou huero, e e tiritiri i te repo i nià i to òutou mata, i te repo no ta òutou mau ôroà moà ra e hopoi-ê-hia òutou e te reira atoà ra 4 e ìte hoì òutou e, na ù i hopoi atu i teie nei parau ia òutou na, ia vai mäite ä taù nei faufaa ia Revi ra, te nä reira mai ra te Fatu manahope ra. 5 Taù faufaa no te ora e no te hau ia na ra i höroà atu ra hoì au no na no te mataù ta na i mataù mai ia ù ra, e ua mataù aè ra no to ù nei iòa. 6 Te ture ra i te parau mau, tei roto ia i to na vaha, e aore hoì e hapa o roto i to na ùtu ua âmui atoà mai i to na haereà ia ù nei mä te hau e te parau au, e rave rahi ta na i faafäriu mai i te ìno ra. 7 Ia täpeà hoì to te tahuà ra vähi i te ìte, e ia ìmi hoì rätou i te ture i to na vaha, o te veà hoì o ia na te Fatu manahope ra. 8 Ua faaruè rä òutou i te èà nei e rave rahi tei turori i te ture nei ia òutou; ua faaìno òutou i te faufaa a Revi, te parau mai ra te Fatu manahope ra. 9 No reira atoà vau i faariro ai ia òutou ei mea faufau e te ìno i te aro o te taata atoà nei, òutou aore i haapaò i taù nei parau, e ua haapaò òutou i te taata i te ture nei. Te haavarevare òre i roto i te mau tüàtiàtiraa turu utaa e ùtuafare, 10 Eere änei hoê ä metua täne to tätou atoà nei? Eere änei na te Atua hoê tätou i hämani? Eiaha rä hoì tätou atoà nei i haavare ai i to na iho ra taeaè, i te faaìnoraa i te faufaa o to tätou mau metua ra.

1 Tetaronia 2,7-13

7 i marü noa rä mätou i roto ia òutou, mai te Metua i poihere i ta na ra tamarii. 8 Oia atoà mätou no te rahi o to mätou aroha ia òutou, ua tià roa ia mätou te horoà atu i te Èvaneria a te Atua ia òutou na, e eiaha hoì te reira anaè ra, o mätou atoà iho ia, no te mea ua riro òutou ei here na mätou. 9 Aita hoì i moè ia òutou, e te mau taeaè, i ta mätou òhipa e te rohirohi i te raveraa i te òhipa i te ruì e te ao, ia òre te hoê o òutou ia teimaha ia mätou, i te parauraa atu ia òutou i te Èvaneria a te Atua. 10 O òutou te ìte, e te Atua atoà, i te maitaìraa, e te tiàraa e te hapa-òre-raa o ta mätou parau i rotopü ia òutou i te feiä e faaroo ra. 11 Ua ìte hoì òutou i ta mätou haamähanahanaraa atu, e te aòraa atu, e te poroìraa atu ia òutou atoà na, mai te metua e aò i ta na ra tamarii. 12 E ia au to òutou haereà i te Atua ra, o tei parau ia òutou no to na ra Pätireia e no te ao. 13 E te haamaitaì atoà nei mätou i te Atua aore e faaea, i te mea, a färii mai ai òutou i te parau a te Atua i ta òutou i ìte ia mätou nei, aore òutou i färii ei parau na te taata, ei parau rä na te Atua, e oia mau ä hoì, o tei rave püai hoì i roto ia òutou i tei faaroo ra.  

Mätaio 23,1-12

Te mau parau faaìno i nià i te mau Färitea

(Mär 12.38-40; Rut 20.45-47; 11.39-52)

1 Ua parau atu ra Ietu i taua tiàa rahi ra, e i ta na mau pipi, nä ô atu ra 2 Te pärahi nei te mau päpaì parau e te mau Färitea i nià i te pärahiraa o Möte. 3 E teie nei, e haapaò òutou e e rave i ta rätou e parau mai ia òutou eiaha rä òutou e pee ia rätou o te parau hoì ta rätou, aita rä i haapaò. 4 Te täamu nei hoì rätou i te hopoià teimaha e te maraa òre, e te tuu nei i nià i to vëtahi ê täpono; e òre rä te hoê rima o rätou e faatiàià noa atu i taua mau hopoià ra. 5 E ta rätou atoà e rave ra, i rave ia ia hiòhia mai e te taata. Te faaaano nei hoì rätou i ta rätou mau furatateri, e te faarahi nei i te hiti o to rätou àhu. 6 E te tïtau i te vähi teitei i te mau àmuraa mäa ra, e te pärahiraa i hau i te mau tunato ra, 7 e ia arohahia i te vähi taata ra, e ia parauhia mai e te taata E te òrometua, e te òrometua. 8 Âreà òutou, eiaha e tïtau ia parauhia ia te òrometua hoê roa hoì a òutou òrometua, o te Metia e e taeaè anaè hoì òutou atoà na. 9 E eiaha roa òutou e haametua i te hoê taata o teie nei ao, o ia anaè rä hoì to òutou Metua o të pärahi i te raì ra. 10 Eiaha atoà e tïtau ia parauhia òutou, i te arataì hoê roa hoì o òutou arataì, o te Metia. 11 E tei rahi ra i roto ia òutou na, ei tävini ia no òutou. 12 Të faateitei ia na iho ra, e faahaèhaahia ia; e o të faahaèhaa ia na iho ra, e faateiteihia ia. 

Manaò

Te faaroo nei tätou i te tahi mau parau e tià e täuturu i te mau vahi tei haamohimohi i te oraraa vaamataèinaa tei atea i te mau hinaaro o te Atua Nui Tumu Tahi. Te piihia nei te taata faaroo ia faataa i te haavare e te haavarevare e òre te reira e au i te haamoriraa i te Atua, o teie te tahi mau tumu e tähuti ai te fenua. I te mea e tià i te Atua ia tiritiri i to tätou mata i te repo fenua, oia hoì e taoraora i te repo o te puaahorofenua i nià i to tätou mata. E ìte rä i te Atua ia hopoi mai i te parau, ia vai mäite ta na faufaa o te ture parau tià tei faatiàma i to tätou fëruriraa. E faufaa teie no te ora e no te hau i höroàhia mai ia mataù tätou i te ture  parau mau, tei roto i ta na vaha, e aore hoì e hapa o roto i ta na ùtu ua âmui mai to na haereà ia tätou mä te hau e te parau au, ia faafäriuhia tätou i te ìno. Te tumu parau e tià e täamu na taiòraa e maha nei ia au i te mau türamaraa E Haere e te Atua Nui Tumu Tahi. Teie ia te mau ìrava i napehia i nia i  teie tumu parau,

-Taramo 131, 1 Aore hoì au i tïtau i te mau mea rarahi ra, i te mau mea i teitei ê atu ia ù nei.

- Marati 2, 9 òutou aore i haapaò i taù nei parau, e ua haapaò òutou i te taata i te ture nei.

- I  Tetaronia 2, 9 aore òutou i färii ei parau na te taata, ei parau rä na te Atua

- Mataio 23, 3 E teie nei, e haapaò òutou e e rave i ta rätou e parau mai ia òutou eiaha rä òutou e pee ia rätou o te parau hoì ta rätou, aita rä i haapaò.

 Haere e te Atua Nui Tumu Tahi.

Te taata te ra e parauhia ra e, faaitoito, te òhipa mau te reira ta na e rave no na iho ia òre o ia ia fifi, e ia òre ia fifi te òhipa ta na e rave atu. I roto i te värua mau o te parau, te itoito, eere te tahi mea e nä-räpae-hia atu i te  ö i roto i te taata, tei roto ê na te reira mea i te taata, na te taata tätaì iho e faaära, e î roa aè to na âau. Te taata itoito, te huru ia o te taata të òre te manaò  e paruparu i mua i te fifi, aita atu ta na tïtauraa maoti rä, ia oti e ia maitaì te òhipa ta na i haamata mai i te rave. I roto i ta te Mäòhi hiòraa, na te âau e ôpua, na te manaò  e faanaho, e na te tino e rave. Ia hoê te âau e te manaò, aita e  òhipa e mau. Te maitaì o te  òhipa, aita to roto i te rave e te räveà, tei roto rä i te mana faanaho i te òhipa, oia hoì te manaò. Te taata tei täamu to na itoito i nià i te rahi o te taata i âmui mai no te turu ia na, tei tiaì i te rahi o te mau parau maitataì ei amoamo ia na, e au te reira itoito i te räau e tiàturi ra i te pape ei faaora ia na, eere rä na to na aa e haapäpü ra i to na tupu. Maoro te maìriraa te pape, te maemaeraa iho teie räau, e pohe roa atu. Mea nä räpae atu te pape i te tuuhia, tei roto ê na rä te aa i te repo maitaì to te pape no te räau, maitaì atu rä to te aa.

Hoê ä ia e te taata e tiàturi noa ra i te ora no räpae, ora noa ai, e taata pohe ia te reira te taata rä e ora ia na iho, iti noa ai ta na, eita rä o ia e ìte i te ère. No reira, no te mea te ìte ra tätou i te paruparu i roto i te manaò o te tahi, te mea o ia i pärahi i roto i te tiaì, i parau ai tätou ia na e, faaitoito, oia hoì, e rave i te püai e vai ra i roto ia na. Te auraa, te ani ra ia tätou ia na ia faatoa ia na iho. Te taata e pärahi i roto i te tiaì, te haapäpü noa ra ia taata i to na paruparu e to na ère. No te mea te ìte ra tätou i te manaò  o te tahi i te paruparuraa, i parau ai tätou ia na e, eiaha e mataù, oia hoì, eiaha e färii i te manaò  pau ia pärahi mai ei faatere ia na. E tano tätou e parau e, te manaò, te mana òhipa ia o te taata. Ia paruparu te manaò, te ö mai ra te mataù, aita ia e  òhipa maitaì faahou e oti i te reira taata ia paruparu hoì te manaò, te itoito terä e faaruè mai ra i te taata, aita atoà e òhipa maitaì faahou e oti ia na.

Haere e te Atua Nui Tumu Tahi.

Te mea e faatüàti teie haereraa te parau ia, hoê ä reo, eere rä hoê ä huru parauraa. Ia parau mai te tahi, e taa mai te fenua no te mea te mauhia ra to na âvae i te  parau o te fenua, ia faaitoito i te faaroo i ta na parau. E tano  atoà ra e ani i te fenua i te mea e hinaarohia ra, ua ineine te fenua i te pähono mai. E taa i te Atua i ta tätou haere, te vitiviti, te taere, i te mea Ò ia tei tuiau mai ia tätou ia tano te tuuraa âvae, mai te taata òri te huru, tei pehehia e te ora o te mau aru no Mäòhi Nui. Taaroa atoà ia rohirohi tätou e mauhia tätou i to na aroha e to na here. Te varovaro ra teie reo to te papaì Taramo 131, i te  ìrava 1 Aore hoì au i tïtau i te mau mea rarahi ra, i te mau mea i teitei ê atu ia ù nei. No reira e haereraa tuiau teie hoê ä toparaa âvae, hoê ä  vitiviti, hoê ä taere, hoê ä paruparuraa, no te faatupu tämau te itoito.

 

Teraì òr Faatura.

 

 

Publié dans Aòraa

Pour être informé des derniers articles, inscrivez vous :
Commenter cet article