Mätaio 22,34-40

Publié le par Mapuanga terai

Täpati 29 no  Àtopa 2017.

ÔROÀ

Raupeà

 

Taramo 18

(Hiò 2 Tämuera 22, 2-51)

1 Na te Mënätehe. E Taramo na te tävini a te Fatu ra, na Tävita, o tei parau atu i te Fatu i te parau o teie nei himene i te mahana i faaorahia ai o ia e te Fatu i te rima o to na atoà ra mau ènemi, e i te rima o Taura, ua nä ô aè ra o ia. 2 Ua parau o ia Te hinaaro atu nei au ia òe e te Fatu, e taù püai. 3 O te Fatu taù papa, e taù pare, e taù ora, taù Atua, taù mato, ta ù e tiàturi nei taù päruru, e taù tara faaora, taù fare teitei. 4 E tiàoro vau i te Fatu haamaitaìhia ra, e ora ia vau i taù mau ènemi. 5 Ua haaàtihia vau e te mäuiui o te pohe, î aè ra vau i te riàrià i te feiä rave hara mai te pape puè ra te huru  6 ua haaàtihia vau i te taura ra o häte, e ua tuuhia te märei ra o te pohe ia ù. 7 Ua tiàoro vau i te Fatu i taù àtiraa ra, ua pii hua atu ra vau i taù Atua. Ua faaroo mai ra o ia i taù reo i to na nao, e ua tae taù pure i to na tarià. 8 Ua âueue iho ra te fenua e ua rürütaina, e ua âtaataa atu ra te mau tumu o te mouà,  ua âueue ä, no te mea ua riri o ia. 9 Ua pee aè ra te auauahi no roto i ta na âpoo ihu, e te auahi ura e pura ra no roto i ta na vaha, àma iho ra te auahi i te reira. 10 Ua tuu haèhaa mai ra o ia i te raì e ua pou mai ra, e e pöuri tei raro aè i ta na âvae. 11 Ua pärahi o ia i nià i te tërupi e ua maùe, òiòi atu ra te maùeraa nä nià i te pererau ra o te mataì. 12 Ua haaàti o ia ia na iho i te pöuri ei täpoì, e te pape pöuri e te ata meùmeù o te raì ra to na fare. 13 No te ànaana o to na aro, pee atu ra te mau ata meùmeù na na ra, riro atu ra ei ua-paari, e te auahi. 14 Ua tuu mai ra te Fatu i te pätiri no nià mai i te raì, e ua faaìte mai ra Tei Teitei ra i to na reo, e ua-paari hoì, e te auahi. 15 Ua teà iho ra o ia i ta na òhe, purara atu ra rätou; ua faarahi atu ra i te uira, fati atu ra rätou. 16 Ìteä iho ra te vairaa o te moana i reira; e te tumu o te fenua i te ìteäraa, i to aòraa mai, e te Fatu,  i te mataì ra, te aho no to òe ra âpoo ihu 17 Ua faatoro mai ra o ia i ta na rima no nià mai, ua rave mai ra ia ù ua ùme aè ra ia ù i nià no raro i te moana nui. 18 Ua faaora aè ra o ia ia ù i taù mau ènemi püai, i te feiä i riri mai ia ù ra, no te mea e püai rahi to rätou i to ù. 19 I te mahana i àti ai au ra, ua hitimaùe au ia rätou, o te Fatu rä to ù ra tauturu. 20 Ua hopoi aè ra o ia ia ù i te vähi ätea, ua faaora o ia ia ù, no te mea te au mai ra o ia ia ù. 21 Ua faautuà mai ra te Fatu ia ù i tei au i ta ù ra parau-tià, e ua tuu mai i te raupeà ia ù e au i te viivii òre o taù rima. 22 No te mea ua haapaò vau i te èà o te Fatu, e aita aè ra i faaruè ìno noa i taù Atua; 23 no te mea i mua anaè ia ù te mau ture na na, e aore ta na mau haapaòraa i faaruèhia e au 24 no te mea e parau haavare òre ta ù ia na, e aore aè ra vau i rave i ta ù ra hara; 25 I raupeà mai ai te Fatu ia ù i ta ù nei parau-tià, ia au i te viivii òre o to ù nei rima i mua ia na. 26 I te feiä e aroha ra, ua aroha atoà òe e te feiä parau-tià ra, te tià atoà ra ta òe parau.  27 I te feiä viivii òre ra, e viivii òre atoà ta òe i te feiä rä e märô ra, e riro atoà òe i te märô. 28 Te feiä i àti ra, e faaorahia ia e òe, âreà tei faateitei ra, e tuuhia ia e òe i raro. 29 O òe hoì tei tütuì i taù rämepa, e na taù Atua, na te Fatu, e haamäramarama i to ù nei pöuri.30 No te tauturu no òe ra i püpü atu ai au nä roto i te nänaì àito ra, e no taù Atua i tae ai au i te pare. 31 E Atua ia, ua tià roa ta na haereà, te parau a te Fatu ra, ua tämatahia ia o te päruru o ia o te feiä atoà e tiàturi ia na ra. 32 O vai mau rä hoì te Atua, Mäori rä o te Fatu. O vai hoì te mato, Mäori rä o to tätou Atua. 33 O te Atua i tätua mai ia ù i te püai, e ua haamanina i to ù nei èà 34 te faariro nei o ia i o ù puè âvae mai to te àiri, e ua haapäpü i to ù tiàraa i taù mau vähi teitei. 35 Te haapii nei o ia i taù rima i te tamaì, e ua fati te fana veo i to ù nei puè rima. 36 Ua tuu mai òe ia ù i te päruru faaora no òe ra, e na to rima àtau i tauturu mai ia ù, e no to òe marü i rahi ai au. 37 Ua faaätea mai òe i to ù taahiraa âvae i raro aè ia ù,  i òre i pähee ai o ù puè âvae. 38 I aùaù na vau i taù mau ènemi e roohia atu ra rätou e au aore au i hoì, e hope aè ra rätou i te pau. 39 Ua täìri au ia rätou e aita atu ra e maitaì ia tià mai i nià hià anaè iho ra i raro aè i taù âvae. 40 Ua tätua mai òe ia ù i te püai i te àroraa e na òe i haavï i taù mau ènemi i raro aè ia ù. 41 Ua horoà mai òe i te mau àî o taù mau ènemi, ia pohe ia ù te feiä i riri mai ia ù ra. 42 Ua pii atu ra rätou, aita rä e faaora ua pii i te Fatu, aore rä o ia i parau mai. 43 Papaì atu ra vau ia rätou e huàhuà roa aè ra mai te repo e puehu i te mataì ra, faaruè atu ra vau ia rätou mai te vari i te mau aroä ra. 44 I te türepu-atoà-raa o te taata ra, ua faaora hoì òe ia ù, e ua tuu òe ia ù i nià iho i te mau êtene. Te feiä ìteä-òre-hia e au ra, te tävini mai ra ia  45 tei te ìteraa rätou ia ù ra, ua faaroo mai ra rätou. Te mau fenua èê ra tei auraro mai ia ù, 46 te mau fenua èê ra tei mäheahea i te mataù,  e ua rürütaina i roto i ta rätou iho mau pare. 47 Te ora ra te Fatu  ei haamaitaìhia taù mato E ia faateiteihia te Atua i ora ai au nei 48 te Atua i tähoo mai i ta ù nei parau  e ua haavï i te taata i raro aè ia ù nei, 49 i te faaoraraa ia ù i taù mau ènemi ra; e ua faateitei òe ia ù i nià iho i taù mau ènemi e ua faaora òe ia ù i te taata riri hötua ra. 50 E haamaitaì au ia òe, e te Fatu, i rotopü i te mau êtene ra, e himene haamaitaì ä vau i to òe ra iòa. 51 E ora rahi ta na i horoà mai i to na arii, e te faaìte mai ra i to na aroha i ta na i faatähinu ra, ia Tävita, e to na huaai e a muri noa atu.

 Ètoto 22,20-26

20 Eiaha òe e hämani ìno i te purutia, eiaha hoì e faafao atu, e purutia atoà hoì òutou i te fenua ra i Àifiti.21 Eiaha òutou e hämani ìno i te vahine ìvi, e te ôtare. 22 Ia hämani ìno noa aè òe i te reira, ia pii mai rätou ia ù ra, e faaroo päpü ia vau i ta rätou pii. 23 E rahi roa taù riri i reira, e täparahi pohe roa ia vau ia òutou i te òè e e riro ta òutou mau vahine ei ìvi, e ta òutou mau tamarii ei ôtare. 24 Ia hopoi tïpee òe i te moni i te taata rii tupu i to ù nei mau taata, eiaha òe ia riro mai tei tïtau i te tärahu ra ia na, eiaha òe e faateiaha ia na i te tärahu. 25 Ia rave noa atu òe i te àhu o to taeaè ei mauhaa, ia maìri te mahana ra, e faahoì faahou atu ia ia na. 26 Peneiaè hoì tirärä o na täpoì, to na ia àhu, ei vehi ia na ra. E aha atu ä hoì to na àhu ia taòto? Ia pii mai hoì o ia ia ù ra, e faaroo ia vau e aroha hoì to ù.

1 Tetaronia 1,5-10

5 i te mea, aore ta mätou Èvaneria i tae parau vaha noa atu ia òutou, mä te püai atoà rä, e mä te Värua Maitaì, e mä te ìte päpü. Ua ìte hoì òutou i to mätou huru i rotopü ia òutou ia maitaì òutou. 6 E i riro mai nei hoì òutou ei pee ia mätou, e i te Fatu atoà, ua färii hoì òutou i te parau mä te àti rahi, e mä te òaòa a te Värua Maitaì ra. 7 E ua riro hoì òutou ei hiòraa na te feiä atoà i faaroo i Mätetönia na e Àhaia atoà nei. 8 No ô na hoì ia òutou na te parau a te Fatu i te harururaa, eiaha i Mätetönia e Àhaia anaè nei, ua parare rä to òutou faaroo i te Atua i te mau vähi atoà ra; e eiaha noa atu mätou e parau noa atu i te reira. 9 O rätou iho tei faaìte ia mätou i te huru o to mätou öraa atu i roto ia òutou na, e to òutou färiuraa mai i te Atua, mai te mau îtoro mai ra, e haamori i te Atua mau, e te Atua ora ra 10 e ia tiaì hoì i ta na Tamaiti no te raì mai, o ta na i faatià mai te pohe mai ra, oia hoì o Ietu, o tei faaora ia tätou i te pohe a muri nei ra.   

 Mätaio 22,34-40

Te faaueraa (ìrava ture) rahi roa aè

(Mär 12.28-34; Rut 10.25-28)

34 Ìte aè ra rä te mau Färitea e ua pohe te mau Tätutea ia na, ua àururu mai ra rätou ia na ra, 35 ua ui mai ra te hoê haapii ture no rätou ia na, nä ô mai ra i te rämäraa mai 36 E te òrometua, tei hea te faaueraa rahi i roto i te ture 37 Ua parau atu ra Ietu E here òe i te Fatu to Atua mä to âau atoà, e mä to värua atoà, e mä to manaò atoà. 38 O te faaueraa mätämua teie e të hau i te rahi. 39 E mai te reira atoà te piti E aroha atu òe i to taata-tupu/täuaro, mai to aroha ia òe iho na. 40 Te ture atoà e te mau perofeta, tei teie nei ia puè faaueraa e piti nei.

Manaò

31 no Àtopa 2017,500 mätahiti te Faatïtïàifaro-noa-raa-hia e Ietu to na nünaa ma te turämahia e te märamarama o ta na parau. Teie haamanaòraa e parau ia tätou e hinaaro no te Atua ia ora faahou te taata, i roto i te Aroha e te here o te Atua Nui Tumu Tahi. I te mea i òhipa-noa-hia nä te Parau a te Atua no te paèpaè i te mau hinaaro o te taata, ö atu ra te oraraa vaamataèinaa i roto i te mau faatîtîraa rau, ua haafatu te mau faatere o te nünaa ia rätou i te tiàraa o te Atua.

I te 31 no Àtopa 1517, No te tahi mau peu tià-òre e te piò i ìtehia i roto i te oraraa o te Ètärëtia Tätorita Röma, i tupu ai te Faatïtïàifaroraa te tiàturiraa e te oraraa o te taata tei haafefehia. E na te tahi mau taata mai ia Rütero, Taravino,  tei faahapa i te huru oraraa tano-òre e orahia ra e te Ètärëtia Tätorita Röma tei òre i tüàti i nià i te türamaraa e te arataìraa a te Èvaneria, i haapäpü i teie parau no te Reforomatio, e tei haafänau mai i te haapaòraa Porotetani. Te haapäpü ra teie mau taata e te ora tei höroà-noa-hia mai na roto ia Ietu Metia, ta te Pïpïria i heheu mai, ua tuu-âfaro-hia mai ia te reira i mua i te aro o te mau taata atoà, eere rä mea na roto i te tahi atu taata.

Ia faaroo tätou i te mau parau ta tätou i taiò e tià e tauturu ia tätou no teie mau òhipa i tupu ia au i te mau ìrava i faatumuhia teie ia te faanahoraa.       

-Taramo18, ìrava 29 O òe hoì tei tütuì i taù rämepa, e na taù Atua, na te Fatu, e haamäramarama i to ù nei pöuri.

-Ètoto 22, ìrava 22 Ia hämani ìno noa aè òe i te reira, ia pii mai rätou ia ù ra, e faaroo päpü ia vau i ta rätou pii.

-1 Tetaronia 1, ìrava 9 e haamori i te Atua mau, e te Atua ora ra.

-Mätaio 22, ìrava 39 E mai te reira atoà te piti E aroha atu òe i to taata-tupu/täuaro, mai to aroha ia òe iho na.

E mau parau puai teie tei haapäpü ia tätou e o te Aua Nui Tumu Tahi iho teie e Faatïtïàifaro nei ia òre te taata ia pärahi tämau noa i roto i te pöuri. Te vai nei te tahi taò i roto i te reo Mäòhi e tià e âmui na parau e maha nei èi parau hoê e Raupeà, teie ta te Taramo 18 parauraa i te ìrava 25 I raupeà mai ai te Fatu ia ù i ta ù nei parau-tià, ia au i te viivii òre o to ù nei rima i mua ia na. Na ò ia tätou i te parauraa e te haamauruüruraa a  te Atua i to  na mau tävini, ia òre te rämepa a to na mau tävini e àma faahou na na e tütuì ia àma, ia pii rätou e faaroohia mai, e haamori rätou i te  Atua ora, e aroha rätou i te täuaro, e aroha rätou ia rätou iho. I reira te Atua Raupeà mai ai  ia rätou.

Te faaìte mai nei te Raupeà i te maitaì o te Atua, te reira maitaì e ora no te taata. E aha te faaäuraa mätamua,  e te faaäuraa âpï e parau maitaì no te aroha e te here o te Atua ia tätou, te ra mea e haaàti ra ia tätou, ia ìte tätou ua tupu  e parau maitaì no te aroha e te here o te Atua ia tätou, tera mea e faaî ra i te fenua te miti e parau maitaì, òia hoì te tahi mau täpaò ta te Atua i Raupeà mai ia noaa i ta tätou te haamaitaìraa ia na i te mau taime atoà, e i te mau vahi atoà. Te mau mea atoà e raupeàhia nei e te fenua, e ère no te raupeà noa i to tätou ôpu, ia roaa ra ta tätou àrueraa i te Atua, no to na aroha e to na here, e, e parau maitaì, e parau maitaì tera no te Aroha e te here o te Atua. Tei papaìhia e te Atua i roto i te fenua, e ta tätou i tätau i nià i to tätou tino, i roto ia Moana Nui a Hiva, i roto i te reva, e i roto i te taata. Te auraa ua ìte te Atua ua mau ia tätou, no reira a rave tera horoà ta te Atua ia tupu te parau tià a te Atua, ia mauruüru te Atua, ia mauruüru änaè te Atua ia rahi atu ä ta na ia ninii mai, no te mea te ora ta tätou e faanaò nei, na te Atua i ninii mai, e aha te auraa maite peu na te Atua i ninii mai, e täno atoà o na ia täpeà horo atu ai tätou i hea, no reira a rave ia rahi atu ä ta na e horoà mai.

Ua faatioïhia te nünaa  i te Aroha e te Here o te Atua i tupu ai te faatïtïàifaroraa, teie te mau faaâfaroraa.

I te Parau anaè a te Atua : Na te Parau anaè a te Atua e arataì i te tahi atu mau parau, i roto i te tiàturiraa e te oraraa faaroo o te taata.

I te Metia anaè : Na te Metia anaè i rave i te mea o të òre roa e tià i te taata ia faatupu. Nä na i faaìte mai i te parau o te ora, mai te puta Tenete mai e tae atu i te puta Àpotarupo.

I te aroha anaè o te Atua : Na te aroha anaè i faaora ia tätou i te riri o te Atua.

I te faaroo anaè : Ua faatiàmähia e ua ora te taata i te faaroo anaè.

No te hanahana anaè o te Atua : No ô mai i te Atua ra te mau mea atoà, nä na hoì te mau mea atoà, e nö na atoà hoì te mau mea atoà, no to na hanahana anaè, mai teie nei e a tau a hiti noa atu.

Teie mau parau ua haapäpühia e Ietu i mua i te mau faatere o ta na i faatïtïàifaro i te parauraa ìrava 37 Ua parau atu ra Ietu E here òe i te Fatu to Atua mä to âau atoà, e mä to värua atoà, e mä to manaò atoà. Ìrava 38 O te faaueraa mätämua teie e të hau i te rahi. Ìrava 39 E mai te reira atoà te piti E aroha atu òe i to taata-tupu/täuaro, mai to aroha ia òe iho na. 

Ia na reira tätou e Raupeà mai te Atua Nui Tumu Tahi ia tätou.

 

Teraì òr. Faatura.

 

 

 

Publié dans Aòraa

Pour être informé des derniers articles, inscrivez vous :
Commenter cet article
J
After some time, come back to your paper and organize your points into a logical sequence.
Répondre