Ruta èv. 12,13-21

Tāpati 31 no Tiurai 2016.

Ruta èv.12, 13-21,

Te parapore o te maamaa taoà rahi 13 Ua parau mai ra te hoê i taua feiä rahi ra ia na E te Òrometua, parau na òe i taù tuaana, e tufa o ia i ta mäua taoà. 14 Ua parau atu ra rä o ia ia na E tërä ra taata e, nä vai au i faariro ei tufa taoà, ei àuvaha io òutou nei15 E ua parau atu ra o ia ia rätou E ara ia òutou i te nounou taoà, rahi noa iho hoì ta te taata nei taoà, eere hoì tei taua taoà na na ra to na ora.16 Ua parau atu ra o ia i teie nei parapore, nä ô atu ra. E fenua mäa hotu to te hoê taata taoà rahi. 17 Ua nä ô iho ra o ia i te feruri i roto ia na iho E aha rä vau, aita hoì a ù e vairaa e ö ai ta ù mäa 18 Ua nä ô iho ra E nä ô vau e vävähi au i taù mau fare vairaa mäa nei, a faatià ai ei fare rahi, ei reira puè ai ta ù taoà e ta ù mäa. 19 A parau ai au i taù värua e E taù värua, e taoà rahi ta òe, ua puè i te vairaa no te mau mätahiti a muri nei e rave rahi e faaea mäite, e àmu, e ïnu, e ia reàreà mäite.20 Ua parau mai ra rä te Atua ia na E tërä ra maamaa e Ei teie nei ä ruì e tiihia mai ai to òe värua. Nä vai iho ra tënä na mau taoà i haaputuhia e òe na. 21 O te huru ia o te taata i haaputu i te taoà na na iho, e aita i rahi ta na taoà i te Atua ra.

Manaò

Ia taiò tätou te Taramo 90 1 Te pure a te taata o te Atua ra, a Möte. E te Fatu, o òe to mätou haapüraa, i tërä uì, i tërä uì. 2 Aore te mau mouà nei i fänau, e aore hoì te fenua e te ao atoà nei i hämanihia e òe ra, te vai ra òe, e te Atua, mai tahito mai ä e a muri noa atu. 3 O te taata nei rä, te faariro faahou nei òe ei repo, te parau ra hoì òe A hoì, e te tamarii a te taata na. 4 Ia òe rä hoì, hoê tautani noa atu i te mätahiti e au i te mahana hoê i mahemo ra, e mai te äraraa hoê i te ruì ra. 5 Te riro nei rätou ia òe mai te riro pape puè ra, e mai te vareà taòto ra rätou. I te poìpoì ra, mai te àihere e tupu ra rätou, 6 o tei ôteu e tei tupu i te poìpoì ra, e ua ahiahi anaè ra, ua täpuhia e ua ôriorio atu ra. 7 Oia teie, ua pau mätou i to òe ra riri, e ua riàrià mätou i ta òe ra mäinaina. 8 Ua tuu òe i ta mätou hara i mua ia òe, e ta mätou hapa moè i roto i te märamarama o to mata ra. 9 Ua mou aè nei to mätou mau mahana i to òe ra riri, ua pau to mätou mau mätahiti mai te manaò âau e pee ra. 10 To mätou puè mahana i te oraraa nei, e hitu ia àhuru i te mätahiti, e ia tae i te vaù i te àhuru i te mätahiti i te ètaèta, e riro rä taua ètaèta ra ei rohirohi e ei taiäraa. E òre hoì e mähia motu ê atu ra, maùe atu ra mätou 11 O vai rä tei haapaò i te püai o to òe ra riri E ta òe ra täiroiro, mai te mataù e au ia òe ra 12 E haapii mai ia mätou i te taiò i to mätou puè mahana, ia riro to mätou âau i te haapaò maitaì. 13 E färiu mai ia mätou e te Fatu a hea ra ia A faite mai òe i to mau tävini nei. 14 A haamauruüru vave mai òe ia mätou i to òe ra aroha, ia reàreà mätou e ia òaòa i to mätou nei puè mahana toe. 15 A faaòaòa mai ia mätou e ia fäito i te mau mahana i àti ai mätou ra, e te mau mätahiti i faaòromaì ai mätou i te ìno ra. 16 A faaìte mai i ta òe ra òhipa i to mau tävini nei, e to òe ra hanahana i ta rätou ra tamarii 17 Ia vai mai ä te here o to mätou nei Atua, o te Fatu, i nià ia mätou nei, e te òhipa a to mätou nei rima, e haamau òe, oia ia, o te òhipa a to mätou rima i rave ta òe e haapäpü.

Ia faaroo tätou i te parau i haamanaòhia mai no teie mahana i te faaìteraa a Ruta èvaneria i te pene 12, i te mau ìrava 13 e tae i te ìrava 21 e parau ia no te hoê taata maamaa tei faaâpï i ta na fare vairaa taoà e fare vairaa maa, a paraparau ai i to na värua i to na peàpeà i te ère i te taoà e te maa i muri aè i to na pohe. Te faaineine nei teie taata i te mahana o to na poheraa, e muri mai i te pohe, i te ìrava 20 Ua parau mai ra rä te Atua ia na E tërä ra maamaa e Ei teie nei ä ruì e tiihia mai ai to òe värua. O teie te parau faufaa i täpeàhia èi faaitoitoraa ia tätou i te tiàturi i te aroha e te here o te Atua.

Ua manaò te teina e, ua haere mai o Ietu, no te tufa i te taoà fetii.

Ua manaò te teina e, na tufaraa i te taoà e haafatata ia raua.

Ua manaò te teina e, e färii o Ietu i ta na aniraa, ia tupu te tufaraa taoà.

Ua manaò te teina e, na roto i teie ôpuaraa ta na e maitaì ai ò ia.

Ua manaò te teina e, na Ietu e àuvaha i ta na parau.

Ia au i teie mau manaò, e rave rahi mau taata e tiàturi nei o Ietu, no te mau taime ia e hinaarohia no te faaàfaro i te mau tuàti- òre-raa o ta te taata i faatupu. Ua haere mai o Ietu i roto i te taata, no te ìriti i te ùputa no te märamarama ia fänau i roto i te vahi no te pöuri, èi èà arataì i te vahi e ìtehia ai te ora faatupu aroha a te Atua. O ta te taiòraa ia e hinaaro nei e turäma ia tätou i teie mahana haamoriraa, teie te reo o Ietu i te ìrava 15 E ara ia òutou i te nounou taoà, rahi noa iho hoì ta te taata nei taoà, e ère hoì tei taua taoà na na ra to na ora. No te teimaha teie reo no Ietu, e ìriti o Ietu i te parau no te parapore o te fenua maa hotu a te hoê taata taoà rahi i faatupu, no te naìnaì te fare vairaa ôpua aè ra ò ia e vävähi te fare vairaa maa no te faarahi, ma te parau e, E ta ù värua, e taoà rahi ta òe ua pue i te vairaa no te mau mätahiti a muri nei e rave rahi ; e faaea maite, e àmu, e ïnu, e ia reàreà maite. Te tiàturiraa o teie taata taoà na te rahi o te maa ta na i haaputu e faaora i to na värua, Te reo mai ra o te Atua, E tera ra maamaa e, ei teie nei ä ruì e tiihia mai ai to òe värua, na vai iho ra tenä na mau taoà i haaputuhia e òe na.

Naò ia i te parauraa i teie huru taata e faufaa òre rahi teie; e mea faufaa òre rahi roa e mea faufaa òre anaè a aita i toe. Te òhipa ra hoì te tahi mä te paari, e te ìte, e te àravihi o te tahi rä o tei òre i nä reira i te rave, tä na ia e vaiiho ei tufaa nä na. E mea faufaa òre atoà te reira e te ìno rahi. E aha iho ra ta te taata i ta na atoà ra mau òhipa, e te taiä o to na ra âau, e to na värua i rave noa ai o ia i te òhipa i raro aè i te mahana nei E òto anaè tei to na atoà ra mau mahana, e te taiä i ta na ra mau òhipa, e i te pö atoà ra e òre to na âau e maitaì i te taòto.

Te taata atoà tei faatupu to na huru, ta na peu, to na fäito, i te au òre i roto i te tahi pae, ua parauhia te huru o te reira taata i te âi taoà i te haapaò-noa-raa ia na iho ma te tiàturi e na te pohe e ärataì ia na i te faatupuraa i te faufaa no te oraraa e a muri atu. Ma te manaò na te rahi o te maa ta na i haaputu e faatae ia na i ô mai i to na menema.

Te Atua iho terä e parau mai ra e E tera ra maamaa e Aita te Atua e horoà mai ra i te tahi haapiiraa i nià i te parau o teie taata, te ani noa mai ra te Atua, E tera ra maamaa e. Ia hinaaro hoì te Atua i te taata ia faaroo i ta na parau, te nä reira atoà ra o ia i te parau-âfaro-raa i te taata. Ei hiòraa E faaroo mai òutou i to ù nei reo, e riro ia vau ei Atua no òutou i reira, e riro hoì òutou ei taata no ù ; e haere hoì òutou nä te èà ta ù e faaue atu ia òutou, ia maitaì hoì òutou na Ieremia 7, 23. Mai ia Ietu hoì e parau ra i te taata e A faaroo mai, ia ìte Mätaio 15, 10, tei roto atoà te ìte i te mea ta te Atua e ani ra i te taata ia ìte. No te haamanaò mai ia e, te fenua, te fare haapiiraa, aore ra te òrometua mätamua roa a te taata, no te mea e tamarii te taata na te fenua, te fenua atoà ia tei ìte maitaì nä hea i te parau, nä hea hoì i te tauturu i te taata ia òhie o ia i te märamaramaraa i te tahi mau parau no te oraraa, e tae noa atu i te ìteraa i te Atua. I mua i teie parau no te maamaa, te ìteraa i te taata e au ia na te reira parau, te vai ra ihoä ta te Atua pähonoraa, te vai ra hoì ta te taata hiòraa, e ta na faanahoraa i te reira parau, eiaha rä ia moèhia ia tätou e, te nünaa atoà, oia te fenua e te taata i reira tätou i te oraraa i teie parau, te hiò noa mai ra o ia, te faaroo noa mai ra, aita e mea e moèhia i to na mata, e manaò to na i nià i teie parau no te maamaa. Aita ta na e faahororaa ìrava ei paèpaèraa i to na manaò, aita e tuatäpaparaa i te mea i päpaìhia i roto i te tahi puta, e te tahi. Ia haapotohia to na manaò, teie ia te vai ra te taata e tano, te vai ra te taata eita e tano. E ia anihia o ia e horoà mai i te tahi tatararaa, e riro o ia i te parau noa mai e ua ineine au. Te auraa, i te hiò-noa-raa i te huru e te peu a te taata maamaa, i te faaroo-noa-raa hoì i ta na huru paraparau, ua ìte o ia i te taata e tano, i te taata të òre e tano, aore ra ua taa ê na to na manaò i te reira vähi. Te auraa rii atoà ia o te manaò e horoàhia ra e Ietu ia faahiò o ia ia tätou i te räau e te mäa ta na e faahotu mai, oia hoì ia vai iho o ia i te fenua ia haapii mai na ia tätou. Aita atu mea e anihia ra ia tätou maori rä, ia ìte eiaha e nounou i ta te Atua. Te auraa, eita teie taata e rave i ta na òhipa i te vähi moèmoè, aita ta na e òhipa huna, hoê huru to na i te mau taime atoà, e i te mau vähi atoà. Te mea ia te Atua i òhie ai i te parauraa e, E tera ra maamaa e, ei teie nei ä ruì e tiihia mai ai to òe värua, na vai iho ra tenä na mau taoà i haaputuhia e òe na Ua haamata anaè tätou i te parau e haamanaò tätou e, riro noa ai o ia ei maamaa, e taata te taata nä mua roa ua riro ê na te reira ei tämataraa i te täpoìpoì i to tätou mau hapa, e te pärururaa ia tätou iho i te òreraa e rave i te òhipa mai tei hinaarohia ia tätou. Rave noa ai i te òhipa a te Atua, te tämau noa ra tätou i te rave i te mea e mauruüru ai tätou. No reira, ia parau mai te Atua e, e tera ra maamaa e, e aha mau ta tätou e hiò, e aha hoì ta tätou e täpeà mai. E tano änei tätou e tämau noa i te täpö i te mata i nià i te òhipa e rävehia ra e te taata ta tätou e parau nei e maamaa, e tano änei e tämau noa i te haavare tarià turi.

E tià ia parauhia ua faatiàhia tätou i nià e te Metia atoà ra, e tïtau i te mau mea i nià ra, i te vähi e pärahihia e te Metia i te rima àtau o te Atua ra. E haamau i to tätou âau i te mau mea i nià ra, eiaha i to teie nei ao ra. I pohe na hoì tätou, e tei ô te Metia ra to tätou ora, tei te Atua. Ia fä mai te Metia, tei ia na to tätou ora i te vairaa ra, ei reira atoà tätou e ìteä-atoà-hia ai, e o ia atoà i te ao ra. Te taata tahito e te taata âpï, oia hoì ia ûumi iho i to tätou mau mero i te mau mea o teie nei ao, mai te faaturi, te parau faufau ra, te paìà ra, te hinaaro tià òre ra, e te nounou taoà, e te haamori îtoro ia. No taua mau mea ra e roohia mai ai te tamarii faaroo òre i te riri o te Atua ra. O ta tätou ä ia parau i haapaò i mütaa iho ra, ia tätou i pärahi i roto ia rätou ra. I teie nei rä, e haapae atoà tätou i taua mau parau atoà nei, i te riri, te täiroiro, te feìi, te faaìno, e te parau-tiàâ i to tätou vaha. Eiaha e haavare te tahi i te tahi, ua haapae hoì tätou i te taata tahito e ta na atoà ra mau parau; e ua faa-taata-âpï, o tei faahouhia i te ìte ra, mai te huru atoà o tei hämani ia na ra.

Ia maitaì tätou i te Atua rä.