Mataio 20,1-16

Taiòraa : Mätaio : 20 : 1 – 16

Irava 16 : "E rave rahi hoì tei parauhia, e iti rä tei maitihia."

To te päroita nei, e parau iti rä to tätou i te fifi. Te parau ra te Fatu òhipa e te parau atoà ra te taata rave òhipa, òia hoì, e parau ta räua too piti atoà. E parau ta te rave òhipa e aita o na i hape, e, e parau atoà ta te Fatu òhipa e aita atoà o na i hape, te auraa i roto i ta räua faaauraa i te parau te toe ra ia te tahi mea tei èrehia ra e te hoê o räua.

Te mea i fifi ai i ô nei , no te parau ia, oia hoì, aita te feiä rave i ìte i te parau i parauhia aore ia i taa i te auraa no te faaauraa i ravehia.

I roto i teie parapore, mai te mea ra, te fatu òhipa, e taata faaàpu ia. E te hinaaro nei o ia i te tahi mau taata no te tauturu ia na i te òhiparaa, no te hoê noa aè mahana.

Ta na faanahoraa tihepuraa, o na te haere e ìmi i te rave òhipa.

Te tihepuraa matamua i te poìpoì roa. Ua faaauhia i te mau taata matamua i te moni òhipa, hoê moni veo. E moni òhipa teie i te mahana hoê no te tahi rave òhipa faaàpu.

Te piti o te tihepuraa i te 3 o te hora (mai te mea ra i te 9 i te poìpoì), te faaauraa na te fatu òhipa e horoà i te mea e au.

Te toru o te tihepuraa i te 6 o te hora (hora 12)

Te maha o te tihepuraa i te 9 o te hora (hora 3 ia i te taharaa mahana)

Te pae o te tihepuraa e te toeà ia o te mau rave òhipa i te 11 ia o te hora (hora 5 ia i te ahiahi), mai te mea ra hoì hoê noa ia hora toe e faaoti ai te òhipa no te täatoàraa. Terä te huru faanahoraa tihepuraa rave òhipa a teie fatu.

No te feiä i haamata i te poìpoì roa ua fäito ia rätou i to rätou püai ia au i te òhipa ta rätou e rave ra. Faaruru ihoä ia i te veàveà e te rohirohi. Areà no te feiä no te taharaa te mahana i te haamataraa, te tahi noa ia tau hora i te raveraa e ua horahia e faaoti. Te utuà rä, hoê ä ia e ta terä i haamata i te poìpoì roa. E hau roa atu i te reira, nä muahia teie feiä tei nä muri roa i te haamata i te àufauhia.

Terä te fifi, na hea paì. Te vai atoà ra te tahi parau ta Ietu e faahiti ra, te parau ia no nä tamarii ta te tahi taata. Te tahi tei hinaaro i ta na tuhaa no te taoà e haere atu ra e pühura nä roto i to na mau tere. Areà te tahi, ua tämau noa ia i te rave. Te hoìraa mai terä i haere i te haapaòraa òre, te taata rahi roa aè ia, e tämäaraa, e àhu maitaì. Aita atoà rä te tahi i mämü ua horoà i to na manaò.

No reira i mua i terä nä hiòraa, te manaò e ìtehia atu ra, mea fifi roa i te tomo i roto i ta te Atua ôpuaraa, mea fifi roa i te tomo i roto i ta na faanahoraa. Te vai ra ta te taata faanahoraa, e, te vai ra ta te Atua. Te mea päpü, no te Fatu òhipa, te hinaaro ra o na i te taata rave òhipa, e aita atoà e mäìtiraa i te taata. Te vähi te vai ra te taata e hinaarohia. Te taata rä mea tano atoà o na ia päpü maitaì, te mea e hinaarohia ra ia na, ia rave i te òhipa, te auraa, e piti tuhaa teie mea taa maitaì, te vai ra te tuhaa a te Fatu òhipa, te faaöraa ia i te taata i roto i te òhipa, àufauhia. Areà ta te taata rave, ta na o te raveraa ia.

Parau mau ua faahitihia te parau no te moni i ô nei, te mea faufaa rä, te òhipa ia. E i roto i terä òhipa, hoê ä utuà ta te täatoà, te auraa, aita e taata i hau aè i te tahi. Eere no te mea ua hamata te tahi i te poìpoì roa, mea rahi ia ta na, âreà to te ahiahi ra, mea iti ia, hoê ä rä ta te täatoà.

Mai te peu e faatanohia te faanahoraa i nià i ta te taata hiòraa, eere faahou ia nä te Atua te òhipa, nä te taata ia.

Ia hiò-anaè-hia i roto i to tätou parau, e parau teie no te feiä faaàpu, e haere tanu i te mäa, ia hiò-maitaì-anaè-hia rä, eita e òre tei te taime òotiraa paha teie, ua oti ia te òhipa rahi i te ravehia mai, te auraa mai te peu ua oti te tahi òhipa i te ravehia mai, e taata ia tei nä mua mai i te rave, aita rä e hiòraa nä vai i tanu e nä vai e òoti. Te auraa, mai te peu eita e noaa i te taata rave i te haamoè ia na, eita ihoä ia te òhipa a te Atua e maitaì, e tämata ihoä ia te taata rave i te faanaho ia au i te mea ta na e hinaaro ra.

Teie nei te fifi e aha ia. O te faatano atoà te taata i te taime hopeà roa i reira e haere mai ai e tiaì i te Fatu òhipa no te tihepu ia rätou. Te auraa no te feiä atoà e hinaaro i te faaau i te parau, òia hoì i roto ia i terä manaò e, e tiaì ia ahiahi roa i reira e haere atu ai e rave i te òhipa, inaha hoê ä utuà ta te täatoà, hoê moni ta rätou. Te mea fifi noa i reira, o te òre e tano te haereraa o te Fatu i te vähi tei reira te taata i te tiaìraa atu, e pöhia eita rä te moni e noaa, aita i faufaahia te tiaìraa. E tano ihoä te taata ia nümera eita rä tätou e ìte e nä hea te Fatu i te haere, e i roto i te reira haereraa i to na, òre atu ai e tano mai i nià i ta tätou tiaìraa, ua faaea moni òre noa atoà ihoä ia.

No reira, te tïtau mai ra teie parau i te taata e, te vai ra ta te Atua fanahoraa, na na te òhipa, ia rave anaè, e rave ia i ta na òhipa ia au i ta na faanahoraa. Aita e ture òhipa mai ta tätou e ìte nei i teie mahana, te vai ra te mau aupupu no te pärururaa i te rave òhipa, aita atoà e moni hau, aita atoà rä te Fatu e parau mai ra e haavarevare i nià i te òhipa, aita. Te òhipa te vai ra, te mea noa e toe ra, te raveraa, ia òre ia rave, e roohia i te pö, e ua ìte tätou i roto i ta te Fatu, te pö te hopeàraa ia no te taime faaauraa òhipa, eiaha ia ia naeàhia i te parau i räpae aè i te taime òhiparaa. I roto i te taime òhiparaa, te vai ra te òhipa, oia hoì, i roto i te taime te vai ra te hinaaro o te Fatu, te vai ra te òhipa. I rapae aè i te reira taime, ia pö, aita ia e òhipa faahou, ua oti te òhiparaa.

No reira, ia hiò-anaè-hia teie parau, eita te òhipa e pau, te mahana rä e maìri atu ia, te vai ra te ôtià no te raveraa. Terä te mea e hinaarohia mai ra i te taata, te ìteraa e te hinaarohia mai ra, e haere ia e rave. Eiaha rä e tiaì ia pö e taime ia te reira e parauhia mai ai ua oti. Te auraa, eiaha e nä muri mai i te hora e eiaha atoà e nä räpae mai i te hinaaro o te Atua te Fatu o te òhipa.

Te uiraa e tano ia ui i ô nei, no vai te hinaaro e e hinaaro ia vai. Mai te peu no te taata te hinaaro, te faanahoraa ia a te Atua te tomo mai i roto i te hinaaro o te taata, eere rä mai te reira, no te Atua te hinaaro, faaitoito ia te taata i te faatura i te Fatu na na te òhipa, faaitoito ia te taata i te haapaò i te hinaaro o te Fatu òhipa. Eita te manaò o te taata e hinaarohia mai, no te mea, i te rahiraa o te taime, e tuu mai ihoä te taata i to na manaò, te vai ra ihoä te âfaro, te mea rahi roa aè rä o te âfaro òre ia, te tano òre, òia hoì, te vai ra ta te taata fäito.

Te mau taeaè e te mau tuahine, te haapii mai ra teie parau e, eiaha e haere atu e tämata i te fäito i te Atua, e pähonohia mai ia tätou i te pähonoraa i ravehia atu no teie mau taata rave òhipa tei amuamu i teie Fatu òhipa, terä ta na i parau atu “e aha te ìno na to òe mata i to ù nei maitaì?”.

No reira, eita e âfaro nä tätou e faanaho atu i te òhipa a te Atua e hape. Mea fifi mau ihoä, eiaha te òhipa, eere te òhipa i te mea fifi, mea fifi rä i te tomoraa, mea fifi i te färiiraa i tä te Atua huru faanahoraa i te òhipa. Te reira te fifi i te raveraa i te òhipa mai ta te Atua e hinaaro mai ra ia ravehia. Mea òhipa rahi mau i te tomoraa i roto i ta te Atua faanahoraa, te na ô ra hoì te tahi parau "to mua ra e rave rahi ra, e riro ia no muri, e to muri ra, e riro ia no mua (Mataio 19,30)", te mea naìnaì ra e faarahihia, te mea rahi ra e faanaìnaìhia.

No tätou, te fatu teie e ìmi nei i te rave òhipa, hinaaro òe i te òhipa, e rave ia i te òhipa a te Fatu, ia au i te hinaaro e te faanahoraa a te Fatu mai te haapae i te manaò taata.

Mai te mea te faaau ra te Fatu i te pätireia o to na metua mai te tahi taata tei faaàpu, tei haafaufaa i te fenua, no reira mai o ia. To tätou mau metua tei ìte päpü mai i te reira. Ia haere rätou i roto i te faaàpu, eita rätou e ìte e, te taha atu ra te mahana, te mea noa ta rätou e ìte, to rätou ia mauruuru no te òhipa i ravehia. Oia atoà te Fatu, ia rave i ta na òhipa, eita te mahana e taiòhia, eita atoà e nümerahia na nià i te hora, terä ia te rahiraa moni e noaa ia tätou, eita to na here e fäitohia, hoê here to na no te täatoà , e hoê atoà aroha to na no te täatoà.

Ia vai mai te aroha e te here o te Atua i nià ia òutou. Ia ora na.