Overblog Suivre ce blog
Editer l'article Administration Créer mon blog
3 décembre 2012 1 03 /12 /décembre /2012 23:09

Vaù o te mahana                                   Haere, faahanahana noa ai

Te mau taiòraa

Häpätuta 3, 17-19                Òaòa i te tau o te àti

Taramo 100                          Te haamaitaìraa i te Atua i nià i te täatoà o te fenua

Firipi 4, 4-9                            Òaòa i te Fatu i te mau taime atoà e i te mau vähi atoà

Ruta èv 1, 46-55                  Te himene a Märia

Tätararaa

Te auraa no te haereraa mai te haèhaa e te Atua, te haereraa ia e te faahanahanaraa. Te taata e reva i te fenua Ìnitia, e hitimahuta o ia ia ìte i te rahi o te àti e te mau tämataraa e orahia ra e te mau « Dalits », e tae noa atoà atu i te tiaìtururaa e te auraa o te faahanahanaraa ta rätou e mau ra. I nià i te mau fenua e fatuhia ra e te tahi taiete no te mau pereoo auahi, i pïhaì i te tuhaa ôire o Bangalore, te vai ra i reira teie mau nohoraa veve e pärahihia ra e te mau « Dalits » e tae noa atu i te tahi mau « taata oraraa riirii e te veve », e feiä rave òhipa tei haere mai no te tuhaa fenua Tamil Nadu no te faatoro i te porömu âuri matamua roa hou te tiàmäraa o te fenua Ìnitia. E no terä mea ua ôpuahia na te taiete no te mau pereoo auahi e tiàvaru ia rätou, i te ômuaraa no te mau matahiti 1980, àuaa mäoti te faaotiraa i ravehia e te mau tià no te âmuitahiraa o te mau vahine, ua fänaò teie mau taeaè e teie mau tuahine  i te tahi tuhaa fenua i reira to rätou faatiàraa i te tahi mau nohoraa päpü no te färii i nä taata 1000. Ua pärahi te âmuitahiraa « dalite » e tae noa atu i te tahi mau pupu taata i roto i to rätou mau fare âpï i te matahiti 2011. E mau fare teie ta rätou iho i hoo mai i te moni tei noaa ia rätou. Hoê noa teie o te mau hiòraa no te mau àroraa i nià i te parau-tià òre i ravehia, tei faatupu i te tahi tiaìtururaa ora i te fenua Ìnitia, e tei tïtau atoà ia tätou ia âmui i roto i to rätou òaòa.

Ta tätou mau taiòraa tei faataahia no teie mahana, ua î ia i te parau o te tiaìtururaa e te òaòa o te âau. I te tau no te perofeta Häpätuta, te òaòa nei to na âau i te Fatu, noa atu te fifi paùrä e te fifi mäa-òre e färereihia ra e te fenua. E âpee te Atua i to na nünaa e e tämau ä o ia i te tauturu i to na nünaa i te tau fifi : te pärahiraa e te oraraa i roto i teie parau, te ômua nei ia i te parau no te faahanahanaraa i roto i te tiaìtururaa. O te òhipa atoà ia i ravehia e te päretënia ra e Märia, ia na i haere i te ùtuafare o Èrïtäpeta no te âpiti i teie tuahine i roto i to na hapüraa. Te himene tä na i püpü i mua i te aro o te Fatu, hou o ia a fänau ai i ta na tama, e himene ia no te tahi tiaìtururaa ora. E i roto i te fare täpeàraa no Firipi, te faaitoito nei te âpötetoro o Pauro i te âmuitahiraa maru-metia no te Ètärëtia e vai ra i Firipi ia haamaitaì i te Fatu : « Òaòa i te Fatu i te mau taime atoà e i te mau vähi atoà ». I roto i te Pïpïria, te faahanahanaraa i te Atua e te tiaìtururaa i to na maitaì rahi, nä parau haere âpipiti noa teie.

Mai te reira atoà te mau faahanahanaraa e orahia ra i roto i te hïroà tumu « dalite », tei heheu mai i te Èvaneria o te faaroo e te tiaìtururaa, tei tupu mai no roto i te mau àroraa tuutuu-òre a te nünaa « dalit », no to rätou faatura i to rätou turaraa taata e ta rätou ôpuaraa no te tïtau i te ora. I teie hepetoma, i roto i te mau pure atoà ta tätou e faahiti nei no te hoêraa o te mau maru-metia o te ao nei, te haamanaò taa-ê nei tätou i teie faahanahanaraa no te ora o ta tätou e ìte ra i te fenua Ìnitia, teie ihoä rä nünaa « dalit » tei mau tütüaau i to rätou hïroà tumu maru-metia, noa atu te mau fifi ta rätou e faaruru noa ra, e i te ìmi-tämau-raa i te mau räveà atoà ia tupu te ora. A âmui atoà tätou ia rätou i roto i te ôroà faahanahanaraa, i roto i te tiaìtururaa ora, ia tupu te hoêraa ta tätou e hinaaro tämau nei i roto ia tätou, noa atu te rahi o teie uru fifi e âuahaaàti nei i to tätou oraraa. Ia haatumuhia teie faahanahanaraa i roto i te tiaìtururaa ta te Fatu i haapii mai i roto i ta na pure : « Ia riro rätou atoà ei hoê », e ia tupu te reira i te taime ta te Atua i faataa e nä roto i te mau räveà tä na i faanaho. Ia haatumu-atoà-hia te reira i roto i te oraraa autaeaè e autuahine, no te mea o te Atua anaè të nehenehe e höroà ia tätou i taua hoêraa ra, e nä roto i te ìteraa e te färiiraa i taua hoêraa ra, ia ora tätou mai teie atu nei ei « täuà/hoa » no Ietu, o të ìtehia to na tupuraa i roto i te päpetitoraa hoê. Ua haatumu-atoà-hia teie faahanahanaraa i roto i te tiàturiraa e, ua pii te Atua ia tätou tätaì tahi ia ìmi i teie hoêraa, e eita hoì tätou e haafaufaa òre i to tätou taime e to tätou püai, e ia tiàturi päpü ia na mai terä ta Pauro e tïtau mai ra ia tätou : « I te mau taime atoà e i te mau vähi atoà, nä roto i te pure e te piiraa tei âpeehia e te mau täpaò no te aroha mau, a faatae i ta òutou mau aniraa i te Atua ra ». Te faahepo nei te haereraa no te tïtau i te hoêraa maru-metia ia tätou, ia haere mai te haèhaa e te Atua i roto i te faahanahanaraa, te pure e te tiaìtururaa.

Pure haamaitaìraa 

E te Atua o te aroha mau, te haamaitaì nei mätou ia òe i te mau mahana atoà o to mätou oraraa, no te mea e Atua òe te î i te here, te aroha e te hämani maitaì. Ua ìte òe i to mätou huru e te mau òhipa atoà ta mätou e rave tämau noa nei, mai tahito mai e tae roa mai i teie mahana. Aita e vähi toe i roto i to mätou oraraa, aita i päheruhia e te märamarama o ta òe parau. Ia haamaitaìhia òe, no te mea aita òe i faaruè ia mätou. Ia haamaitaìhia òe no ta òe parau ta òe e faaìte noa nei ia mätou i teie mahana, ânanahi e tae noa atu i te tau hopeà. E te Atua o te ora, a arataì ia mätou i roto i te parau-tià e te hau.

Pure faahaèhaaraa

E te Atua o te aroha mau, i roto i te haèhaa o te âau e te manaò, e i mua hoì i te mau hape, te mau hapa e te mau hara ta mätou i rave, tei faaìte mai i to mätou mau hahiraa i mua i ta òe mau tïtauraa e te arataìraa o to òe hinaaro, ta òe i faaìte ia mätou nä roto i ta òe parau e ta òe ture parau-tià. Te tätarahapa atu nei mätou i mua ia òe, mä te haapäpü e, o mätou iho te tumu hoê roa o to mätou mau àti e to mätou mau pohe. E ia òre hoì òe ia oha faahou i to òe aro metua i nià ia mätou, to mätou mau hopeà, o te pohe mure òre ia. E te Atua o te ora, a arataì ia mätou i roto i te parau-tià e te hau.

Pure aniraa

E te Atua o te aroha mau, te ani nei mätou ia òe, ia faaî to Värua Moà i to mätou mau âmuiraa taata i te òaòa e te hinaaro i te faahanahana ia òe, ia nehenehe ia mätou ia here i te hoêraa o ta mätou e ôpere mai teie atu nei e te faatupuraa i te reira mä te püai e te itoito ia ìtehia te hoêraa hiòhia e te mata taata. Te òaòa nei mätou no te faaroo e te tiaìtururaa o te mau nünaa e pätoì ra, ia òre to rätou turaraa taata ia faaìnohia, e te ìte nei mätou i roto ia rätou i to òe aroha hämani maitaì e ta òe fafauraa i te tiàmäraa. A haapii ia mätou i te ôpere i te òaòa e te raveraa i to rätou itoito e to rätou maitaì ei hiòraa. A faaàma i to mätou tiaìtururaa e a tauturu ia mätou, i te iòa o te Metia, i roto i ta mätou ôpuaraa i te haere-âmui-raa i roto i te here e te aroha, e te faateiteiraa mä te reo hoê i ta mätou ârueraa e te himene-âmui-raa nä roto i te pure e te haamoriraa ia òe. E te Atua o te ora, a arataì ia mätou i roto i te parau-tià e te hau. Âmene.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens