Overblog Suivre ce blog
Editer l'article Administration Créer mon blog
27 janvier 2013 7 27 /01 /janvier /2013 07:56

Uiraa 1 : I te hiòraa i te Òhipa 2, 5-13, e aha te tahi türamaraa e noaa mai ia tätou i teie parau ta Mita (Rautïhia mai e Vaetua òrometua).

Pähonoraa a te pupu mämä 1 (vauvauhia mai e Tetuanui v.) : Ta te puta òhipa e haamanaò mai nei ia tätou, o te mau òhipa ia i tupu i te mahana Penetetöte, te òhiparaa a te Värua : tähoêraa i te taata i te faarooraa i te reo o te Atua ; türamaraa i te taata ia ìte te maitaì o te Atua. Ta Mita türamaraa : E haamanaòraa no te tahi òhipa i tupu, oia hoì tei parauhia e tei ravehia. Tïtauraa ia au i nä taò haa e toru, oia hoì, rave, anoenoe, haere, ia òhipa te täatoàraa o te taata. Te haapii noa mai ra teie nei parau i te èà mau e rave.

Pähonoraa a te pupu 2 päpä & mämä òrometua (vauvauhia mai e Nuutai v., pipi òrometua) : I roto i te taiòraa, te vai ra terä parau : Ia parare te roo, te parau a te Atua ia terä e parauhia ra. E aha te mea maitaì. Ua taèro rätou i te uaina, e hiòraa te reira na te taata i räpae. Mea ê ta te taata hiòraa i te òhipa e tupu ra i nià iho ia na. Te parau ra o ia i te parau êê ta te Värua i horoà ia na. Mea faufaa te parau o te reo, ua faatupu te reira i te òaòa i roto i te taata. Ua uiui te pupu i nià i te reo i parauhia e te mau âpotetoro : 1) Ua parau rätou i to rätou reo, e ua märamarama te mau taata i haere mai i taua mahana ra. 2) Ua parau atoà rätou i te reo o te mau fenua no reira mai terä mau taata. Ua hiò atoà te pupu, eere te reo noa terä i parauhia, te vai atoà ra te Atua i roto i te reo. Te fifi ta te pupu i ìte : ua faaìtehia mai te maitaì e ua faaruèhia taua maitaì ra. Ei hiòraa : Te tahi mau taata no te tahi fenua, ia haere rätou i rapae i to rätou fenua, eita rätou e ìte faahou i to rätou reo.

Pähonoraa a te pupu 1 päpä (vauvauhia e Teanuanua v., pipi òrometua) : 1) Ia au i te hiòraa a te Òhipa 2, 5-13, te haamanaò noa mai ra teie mau parau, ê na to na reo i te horoàraahia mai. Te auraa, eita òe e uiui faahou : e rave e aore ra aita. 2) Ua parau rätou i to rätou iho parau, to rätou iho reo, e ua òaòa rätou. 3) Ua ìte-atoà-hia to te taata òaòaraa i te täpaparaa i te Atua. 4) E faaòhipa i terä reo e märamarama ai te taata. Te auraa, e haapii i te faaroo i te tahi e a färii atoà i to te tahi reo, no te mea na te Atua anaè i horoà i te reo no terä nünaa e terä nünaa. 5) Te tïtauraa hopeà : A anoenoe i to tätou reo e to tätou parau.

Rautï : Turo : Terä, ua haamata mai tätou i te horoà mai i to tätou mau manaò i nià i terä mau uiraa. Ia hiò-anaè-hia, te rahiraa o te manaò, te ìte ra i te faufaa o te reo e te haapäpü atoà mai ra to tätou paruparu i mua i te reo. Te nä ô ra terä tià to te pupu 2, te fifi e ìtehia nei i teie mahana, ia haere tätou i räpae, eita e ìte faahou te reo. E nä ô ia vau i te parau e, aita e peàpeà i te reira, terä rä mea faaea noa, mea ìno roa atu ia. Te puèà ra te reira mau taata. Te auraa ra, o tätou iho, eere. E, e faufaa ihoä to te reo. E hiò rä tätou i teie parau ta Mita. E nä ô rä tätou, te Atua teie e nä roto ra ia Mita, i te haamanaò, e haamanaò i te taata. E ia parau hoì tätou e, e haamanaò, eiaha mai te mea e, e parau âpï teie, eere. E parau teie tei tuu-ê-hia na i roto i te taata, ua moèhia rä. No reira, te haamanaò. No reira, te faahoì-faahou-hia mai i roto i te manaò. Ua ìte òe i te mea maitaì. Ua ìte òe. E parau mau, i te tau o Mita, ua ìte ihoä ia tätou e, e parau ihoä ia o na i to na nünaa. Mai te peu rä, e nä ô tätou e, no Iteraèra teie parau, aita ta mätou i roto i te reira parau, o Iteraèra terä e parauhia ra. Eita tätou e faufaa. Eita tätou e faufaahia. Te auraa ra, e nä ô ia tätou e, mai te peu e, o Iteraèra terä e parauhia ra, no Iteraèra ia teie parau. Ia hoì mai rä tätou i roto i terä puta òhipa, te òhipa i tupu i te mahana, te Fatu i tono mai i te Värua maitaì, e taata Iteraèra atoà teie e parauparau nei. Ua parau ihoä rätou. I to rätou manaòraa, e parau rätou i ta rätou parau no te mea, aita e òhipa faahou e täpeà ia rätou, aita faahou i roto ia rätou te mataù i te parauraa i te taata. Aita rä rätou i ìte e, e aha te mea e paaìna mai nä roto i to rätou vaha. Te feiä i faaroo, te reira nünaa, ua faaroo i te parau i parauhia nä roto i to rätou reo, te nä reira atu ra, te nä reira atu ra. E inaha, teie mau taata, aita rätou i ìte i te reo o terä mau nünaa. Na te Värua rä i horoà ia rätou i te parau i taa mai ai te nünaa tätaì tahi.

Mai te peu e nä reira i te hiò i teie parau ta Mita, te märamarama atoà ra ia tätou e, eita tätou e tano faahou e parau e, no Iteraèra terä parau. No te mea, ia tae te parau ia tätou, o tätou e te Atua, eere faahou e, tätou e o Iteraèra. Eita tätou e ani ia Iteraèra te parau faatià no te hiò i terä parau mai te mea ra, te vai ra te tahi vähi e tano i nià ia tätou, aita. O òe e te Atua. Mai terä ta teie parau e haapii mai nei ia tätou i te mahana te mau pipi a parau ai, ua faaroo mai te reira nünaa nä roto i to na reo. E aha te auraa. E haapäpüraa teie i te taata, te hinaaro o te Atua, ia au rii atoà ihoä te tahi reo to Ietu e parau ra : eere òutou te hinaaro mai ia ù, o vau tei hinaaro atu ia òutou. Te auraa ra, na ù atoà e ìmi te räveà ia tae ta ù parau ia òutou ra, e faaroo mai rä òutou ia ù nä roto i to òutou hiroà. Aita òutou e anihia ra e horo i roto i te tahi e faaroo mai ai, aita. To ù vaha, to òe tarià. Òe. Ia parau tätou e, òe, o vai terä taata. Te taata e faaroo mai ra. Te taata tei tae te parau ia na ra i teie taime, i teie vähi. No òe terä parau.

Ua ìte òe i te mea maitaì. Aita te Atua e parau ra i te pupu. Aita te Atua e parau, te Rururaa òrometua. Te taata tätaì tahi rä. E tiàraa to na, e aita to na e tiàraa. E tarià rä to na. Ua tae te parau i roto, no òe atoà teie parau. Ua ìte òe i te mea maitaì. Ia tae i te tahi taime, e hinaaro nei tätou e täpunipuni noa nä muri i to tätou mau tiàraa. E räveà te reira e ìtehia ai tätou. Te òrometua, te tiàtono, te peretiteni, ua rau atu ä te tiàraa. Aita te Atua i ìte e aha te reira mea, e òrometua, e peretiteni. Hoê noa ta te Atua i ìte, te taata ta na i hämani, täne, vahine. Ua ìte o na to òutou iòa. Te taata tätaì tahi. No òe teie parau. No tätou rä te mäòhi i teie mahana, i roto i te òhipa i tupu i te mahana te Fatu i tono mai ai te Värua maitaì. Te märamarama atoà ra ia tätou e, te hinaaro o te Atua ia tätou, mai terä rii ihoä ta òutou i faahitihiti mai nä roto i te parau o te reo, ia hinaaro te Atua ia tätou, e faaroo tätou i ta na parau ia tätou nä roto i to tätou huru, te huru ta na i horoà no tätou, nä roto i te hiroà i horoàhia no tätou, e nä reira tätou i te märamarama. E faaea òutou i te täàuvaha. E parau âfaro mai te Atua. No reira te faaòhipahia teie parau. Ua ìte òe. Aita te Atua e, i faatïpuupuu. Mea âfaro noa. Te auraa rä, te tiaì atoà mai ra te Atua ta òe pähonoraa. Ia riro e, mai ta te Atua i parau ia Iteraèra i terä ra tau, te nä ô ra te Atua, hinaaro vau ia òe ei nünaa no ù e o vau ei Atua no òe. I ô nei i roto teie ta Mita, aita. Täua, o òe, te Atua. Terä te auraa, ta te Atua e hinaaro ra e haamau i teie nei, i roto ia na e te taata ta na i hämani. O täua, o òe e o vau. Eere mea nä roto faahou te pupu, te taata tätaì, ta na pähonoraa atu i te Atua, e ua ineine te tarià o te Atua no te faaroo mai. Täua, o òe. Ta ù parau, mea âfaro i nià ia òe, i roto i to òe huru, to òe hiroà. Te maraaraa ia òe, te itoitoraa òe i te faaìte, o vau teie. No te mea, ia färii tätou i te Atua, tei roto te vähi i horoàhia no tätou, te auraro ra tätou i terä parau no te hämaniraahia te taata i te huru e te hohoà o te Atua. No reira, teie te tahi türamaraa ta teie parau, ta te puta Òhipa e horoà mai ra ia tätou, i nià i teie parau ta Mita e parau ra i to na nünaa i terä tau. Teie nei rä, na te Värua e faahuru ê i terä parau, a faaroo atu ai tätou mai te mea ra, eere o Iteraèra terä e parauhia ra, o òe. No òe terä parau i teie mahana. Ua ìte atoà òe i te mea maitaì. Te reira ra hoì te maitaì ta tätou e tämata i te heheu i te roaraa e paraparau ai i nià i teie tumu parau. E ia tauturu mai ä te Atua ia tätou i roto i ta tätou mau feruriraa.

Viritua òrometua : Ia ora na i teie poìpoì. E uiraa teie aore ra e manaònaòraa. I nià i terä parau e, ua faaìtehia òe i te mea maitaì, e te matara mai ra te tahi manaò e, no òe e te Mäòhi, ua faaìte-ê-hia na òe i te mea maitaì, ua faaruè rä òe. Te vai ra änei hoì te tahi mau türamaraa no nià i terä paì parau, terä manaò. Te reira noa te uiraa.

 Rautï : Turo : Terä ia manaò i parauhia atu e, ia parau-anaè-hia te tahi taata, ua parauhia òe. Te haamanaò atu ra ia vau ia na, teie parau, eere no teie nei i te tuuraahia atu i mua ia òe. Aita paha òe e haamanaò faahou atu ra, moèmoè-rii-hia paha ia òe, ua parauhia rä òe. Teie nei, ia hoì anaè mai i nià i ta tätou parau, ua faaìtehia òe, eere ia no teie taime. E parau teie, tei tuu ê na te Atua i roto i te taata. Te öraa mai te parau o te Mäòhi, no nià ia i te huru o te òhipa i tupu i te mahana te Fatu a tono mai ai i te Värua. E parau ihoä te mau pipi i to rätou reo, te taeraa rä i roto i te âpoo tarià o te taata, faaroo mai te reira i to na reo, faaroo mai te reira i to na reo, no te mea na tätou e faaroo nei i teie nei mahana, mea nä reira teie parau e tano atoà ai i nià ia tätou, ua ìte atoà òe e te Mäòhi, ua faaìte-atoà-hia òe. Te auraa, eita tätou e tano e ìriti ia tätou i räpae. No tätou atoà terä parau, ua faaìte-atoà-hia tätou. Te auraa ra, i roto i teie reo to Mita, te haamanaò-atoà-hia ra tätou. E ia parau-anaè-hia hoì e, haamanaò, te hinaaro ra te Atua e ìmi i te räveà e faahoì faahou mai terä parau i roto i te manaò. Nä ô paì ia tätou e, te hinaaro ra te Atua e tähiri ârahu i teie parau, ia àma faahou. Te reira te manaò e hinaarohia ra e parau.

Partager cet article

Repost 0
Published by Mapuanga terai
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens