Overblog Suivre ce blog
Editer l'article Administration Créer mon blog
27 janvier 2013 7 27 /01 /janvier /2013 08:04

Uiraa 2 : Ia rave tätou i te tohu a Vaitä e te Taramo 24, 1, e aha te tahi haapiiraa e noaa mai ia tätou no roto i teie parau ta Mita (Rautïhia mai e Vaetua òrometua).

Pähonoraa a te pupu 2 mämä (Vauvauhia mai e Märii v.) : Te nä ô ra te tahi tuhaa no te tohu a Vaitä ta te pupu i rave mai e : Tino ê to rätou, tino ê to tätou, hoê anaè rä huru, no te Tumu Nui. I roto i te faaìteraa a te Taramo 24, 1, te nä ô ra : No te Atua te fenua e te î atoà i nià iho, te mau fenua atoà o te ao nei e te feiä atoà e pärahi i reira. Te uiraa : e aha te tahi haapiiraa. Te nä ô ra te pähonoraa. Te vai ra te tüàtiraa i roto i teie nä faaìteraa e piti, terä ta Vaitä e ta te Taramo. Te manaò i täpeàhia mai i roto i terä tüàtiraa, terä ia manaò e : hoê anaè ra huru no te Tumu Nui, oia hoì : Te here e te aroha o te Atua. Tïtauhia i te taata ia ìte e ia färii. E, eiaha noa i roto noa te reira, e òhiparaa atoà rä i taua maitaì ra. I roto i te faaòhiparaa, mea ani-atoà-hia i te taata, ia haere nä roto i to na haèhaaraa, nä roto i te tatarahapa e ia faahoì i te parau no te here e te aroha i te Atua ra, no te mea eere o te taata te fatu no teie nä taoà, o te Atua rä.

Pähonoraa  a te pupu 3 päpä (Vauvauhia mai e Roonui òrometua) : Taramo : Te Atua te Fatu o te mau mea atoà. Tei roto atoà ia vau. Vaitä : E mau tamarii anaè na te Tumu. Vau atoà ia i roto. Mita : Ua faaìtehia òe i te mea maitaì. Âmui : Ua àifäito tätou i mua i te hinaaro o te Atua. Te haapiiraa : Ia au te mau fifi e färereihia ra e täua i teie mahana, i roto änei te parau no te mäferaraa, te parau no te hooraa fenua, te tötöaraa, te tauiraa vahine, te tauiraa täne, te faaipoiporaa täne e täne, ua rau te mau fifi e vai ra. E tae noa atu i roto i te rauraa o te mau fifi ùtuafare. Ua parau mätou e, e haamanaò, e haamanaò noa tätou, aita e nünaa i räpae atu i te hinaaro o te Atua.

Teie rä, tinitö noa atu, papaâ noa atu, e mäòhi noa atu, tei ia tätou noa te färiiraa e te òreraa e färii. Ia au rii atoà ihoä ia terä parau ta tätou i teie poìpoì ra, hinaaro òe, e aore ra aita. Tei ia tätou noa. Ia ù, e färii vau te ê,  e te aitaraa, e òhipa vau ia. O òe, te färii òe e te färii òre, e te aitaraa, e òhipa òe. Terä rä, eiaha ia moèhia, ua faaìtehia òe i te mea maitaì. Terä noa te tahi maa tauturu ei püòhuraa i ta tätou haapiiraa i te roaraa no teie mahana.

Rautï : Marama tiàtono : To te rururaa, ia ora na. Te hinaaro nei tätou e haamauruuru i terä e 2 pupu i âfaì mai i ta rätou pähonoraa. Te haapäpü atoà mai ra i te tahi tuhaa i roto i terä uiraa i ta tätou, e ua tano maitaì i haamanaòraa ia tätou i terä tohu i ta Vaitä. No te aha. No terä mea e, aita ihoä paì te reira i päpaìhia. Te haamanaò atoà mai ra terä taramo, teie ia i roto i te puta moà. Ua tano. Ua täpeà atoà mai rä te pupu i roto i te tohu a Vaitä, hoê anaè ra huru, no te Tumu Nui. Mai terä atoà hoì ta òutou i faahiò iho ra i nià iho i terä taramo, e ta òutou atoà e horoà ra i te tahi tuhaa. Te auraa o teie parau, ta te tohu a Vaitä e ta terä taramo e faaìte ra, të nià ia i te hoêraa o te Atua e te rauraa o te mau nünaa. Terä rauraa o te nünaa, e hinaaro terä o te Atua. E, e ôpuaraa nä te Atua. Ia nä ô anaè tätou i te hiò i terä parau, no te haapäpü noa ia ia tätou e, terä nünaa e to na hiroà, terä nünaa e to na reo, ta na peu e to na fenua. Na reira atoà o na i te ìte i te Atua. Te Atua, hoê te Atua. Te nünaa ua rau. Faaroo iho ra tätou i te tuhaa matamua, te horoà-raa-hia atu te tahi manaò i mua ia tätou. Mai terä ia mahana i parau mai ai te Värua, te rauraa o te nünaa i faaroo mai i terä parau, hoê rä parau. Taa ê ihoä rä, ua ìte atoà rä te nünaa i terä parau. To na auraa mau, e faaea noa òe i roto i to òe hiroà. Faaea noa i roto i ta òe peu, faaea noa i ô. Eita e òre, te reira atoà paha te täfifi rahi, te manaòraa e,  e tomo i roto i to te tahi. Na reira i te haere e täpae atu ai i te Atua ra. Aita, e faaea noa i ô.  E hinaaro terä no te Atua i roto i terä rauraa, e ôpuaraa nä te Atua. E aha ta Tävita e tauturu ra ia tätou i roto i ta na haapiiraa : Ua ìte òe i te mea maitaì. Te auraa, e te tahi atoà manaò e haamanaòhia mai ra e te pupu, te mea noa e toe ra, e färii. Färii  terä maitaì, eiaha noa no te färii noa, e faaòhipa i terä maitaì : ua ìte òe i te maitaì. Nä ô ia tätou e : të hea maitaì. Mea ê ta terä ìteraa e ta na faaìteraa, mea ê atoà ta ù. Hoê rä te Atua eita o na e taui, eita o na e rau. Ia faaìte vau na roto i to ù reo, na roto i ta u peu, na roto i to ù hiroà, nä te Atua. Te vai nei te tahi mau òhipa ta tätou e tano tätou e faaìte. E aha tätou i riàrià ai. No terä mea aita e färii ra. Horoà atu vau i te tahi hiòraa : i teie poìpoì nei, ta tätou haamoriraa të ravehia mai e Papetoai, o na terä. E tano tätou e parau e : o òe terä, o tätou terä. Aita rä, e au ra e, ia nä ô anaè tätou no te tahi noa ia tuhaa. Aita, e haere roa i te hopeà. E haere roa ia tano roa terä haapiiraa e terä parau ta Tävita e parau e : ua ìte òe i te mea maitaì. E âfaì roa i te Atua ra. Eiaha rä tätou e haere i te tahi âfaraa, ia oti rave atu ai i to te tahi, i reira tano roa ai. Aita, ua tano ê na ta oe, e faaea noa rä i nià i ta òe no te mea, ua ìte atoà òe i te mea maitaì. E mai te mea e parau teie no te rauraa o te nünaa, a rave i ta òe. A rave i ta òe e a färii i ta òe, te mea ia e toe ra ia tätou. Ia òre tätou e färii, â nei te Atua e faahapa mai ai ia tätou, o ia i hämani ia tätou ia au i to na huru e to na hohoà. Terä ia te tahi tauturu, mauruuru.

Maitoà òrometua : E, te reira, to te rururaa, ia ora na. Te püòi mai ra vau terä uiraa matamua e te piti. No te mea, ia hiò-anaè-hia te parau, te nanea rii ra te haereraa o te  manaò. Te vähi noa o ta ù e ui atu, aita vau e tatara faahou ra i te uiraa. Teie ia fifi to tätou i roto i to tätou oraraa e terä haamanaòraa i te mea maitaì. E tauturu terä mea maitaì ia òe i roto i te ìteraa e te matararaa i roto i terä fifi to tätou. Te reira to ù manaò, te tauturu ra änei. Te reira noa.

Temarama òrometua : Mauruuru i ta tätou parau. Te mea tei ô rii ihoä te manaò, te mea e färerei ai tätou i teie mahana a tià noa atu ra. Peneiaè e tiaì i te taime hopeà rii tätou e hiòhiò atoà ai, aore ra e täpae atu ai ia i roto ihoä rä i to tätou mau taa-ê-raa, mau rauraa i roto i teie nünaa nä mua roa e i roto i te Ètärëtia i muri aè, te manaò ia. Ua tauturu änei, tüàtiàti rii terä manaò, te tauturu ra änei te mau faanahoraa ia tätou. Eiaha paha ia e parau roa i roto i te nünaa, no te mea te ora ra tätou i reira. I roto ihoä rä i te Ètärëtia, ia hiòhia, te tahi taime te tauturu atu ra, te tahi taime ua rahi àe te faahapahapa. E inaha hoì, te hoêraa i roto i te rauraa e faufaa paì te reira,  no te mea te èrehia ra te hoê. I roto i to òe ravaì òre, e i roto i to òe ère, e faufaa atoà paì te vai ra i roto ia òe, ère noa atu ra òe e èrehia. E te ravaì o te tahi i roto i to na rauraa, ua riro ihoä paha ei tautururaa i te tahi. E aha te mea i roto i to tätou oraraa ètärëtia e riro mau ihoä paì, e ta tätou märamaramaraa i te rauraa a ta tätou mau òhipa e rave, ua riro ia ei tauturu ia tätou. Terä noa te manaò.

Uiraa 3 : Ua ìte òe i te mea maitaì : e aha te âanoraa, aore ra te ôtià ta te manaò e tano e horoà i nià i teie parau (Teuteronomi 30, 11-14 - Ioane 14,1). (Rautïhia mai e Vaetua òrometua).

Pähonoraa a te pupu 3 mämä (Vauvauhia e Iotua v.) : Te haamataraa te òhipa a te Atua, to na parauraa e, mea maitaì. No tätou te taata, i roto i to tätou täatoàraa, a ìte, a hiò, a färii i te mea maitaì no òe, no te mea aita òe i faaèrehia i te maitaì o te Atua. E tei roto òe i te uru maitaì i te nohoraa. Eiaha e tïtau to te raì, a faaea noa i te fenua nei. A hiò rä tei au ia òe, a rave. Te mea päpü, eita e hope ia tätou i te taiò i te maitaì o te Atua. Teie nei rä, no te tupu-maitaì-raa i teie parau ta te Atua e mea maitaì, ia maitaì atoà e ia mä to tätou ôpü no te färii. A hiò mai ia ù, ua färii vau i te mau mea atoà ta te Atua i horoà mai.

Pähonoraa a te pupu 4 päpä (Vauvauhia e Âmona v., pipi òrometua). Ua ìte òe : 1. To na maitaì, no ô mai i te Atua. Te fifi : To na täôtiàraa i te maitaì. 2. Tiàturihia mai ra te taata e parauhia ra. Ia haapiihia, e noaa ai te ìte. Te rahu ei puta haapiiraa (to na âanoraa e te ôtià atoà). Te fifi : Ia òre te taata ia haapiihia. 3. « Te ìte òre » : hoê taata i te haaväraa. Te maitaì : Te fenua, tei roto ia na iho te maitaì : Te Rahu. Te toe noa, ta te taata tuhaa. Te maitaì a te Atua i te taata, aita e ôtià e mea âano atoà. Ia âano anaè to te taata maitaì, e moèhia to te Atua.

Rautï : Täpati òrometua : To te rururaa, ia ora na. Te hinaaro nei teie manaò e haamauruuru maitaì i teie nau pupu, të horoà mai i te tahi feruriraa i nià i teie uiraa 3 ta tätou. E te vai atoà ra ihoä te tahi mau manaò faufaa e tano e täpeà mai. Terä ihoä manaò e nä ô ra e : ua haapärahi te Atua i te taata i roto i te uru maitaì i te haamata-roa-raa. Tano rii atoà ihoä ia teie haapäpüraa ta te Atua na roto i te vaha o Mita e : ua ìte òe i te mea maitaì. Te fifi rä o te taata, ua tae anaè mai terä huru parau mai terä, e hämani paì te taata i te manaò. E uiui te taata, te hea terä maitaì. Mea nä hea vau e ìte ai i terä maitaì. E, te rahiraa o te taime, e haere te taata i te ätea ê. E, e nä ô atoà te taata e, të roto paha i terä uru maitaì. E aore rä, të roto i te huru o terä taata, të roto i terä taata i terä maitaì. Horohoro noa atu ra te taata i te ìmiraa i te maitaì. No reira rii atoà terä haapäpüraa ta te Atua ia Ìteraèra i roto i terä Teuteronömi 30, terä e nä ô ra e, terä paì parau ta ù ia òe e Ìteraèra, eere i te parau moè. Eere teie parau të te ätea ê. Eere teie parau to nià i te raì ia ui òe : O vai to tätou e haere e tii i terä parau e hopoi mai i ô nei. Ia faaroo hoì tätou e ia haapaò atu hoì tätou ia na. Eere atoà teie parau të te tahi pae o te moana. Ia parau òe e : ia fano e tii i terä parau e hopoi mai i ô nei. Ia faaroo atu hoì tätou e ia haapaò ia na. Teie parau ta ù e parau atu nei ia òe e Ìteraèra, të pihaì iho noa ia òe. Të raro aè i to òe âvae, të roto i to òe ôpü, të roto i to òe vaha. Te auraa, te maitaì, aita e haere i te ätea ê e ìmi ai. Aita e parauhia nei i te taata e horohoro hänoa. Te maitaì, të roto ê na i to òe ôpü, të roto ê na i to òe vaha, të roto i to òe reo, të roto i to òe huru, të roto i to òe fenua, te maitaì. Aita e hahaereraa i räpae. Rahi roa rä te taime e te hahaere nei tätou. Haere e ìmi i ô, e haere e ìmi i ô, ia hoì anaè mai, te huru te huru. E no to tätou hoì tiàturi òre, e no to tätou faaroo òre, te haere atoà mai nei teie haapäpüraa ta Ietu i roto i teie Ioane 14, 1 : Eiaha e horuhoru to òutou âau : faaroo mai ia ù, faaroo i te Atua, e parau ia òe e : ua ìte òe te mäòhi. E faaroo paì i te Atua, eiaha e faaroo i te taata. Eiaha atoà e faaroo i te òrometua, e faaroo i te Atua. Faaroo atoà mai ia ù, o vau e parau atu nei. Ietu, terä i parau i te taata i to na tau, o na atoà terä e parau ra ia òe te mäòhi e : eiaha paì e mataù, èrä iho te maitaì i roto i to òe vaha. Èrä iho te maitaì i roto i to òe iho ôpü. O òe iho te maitaì, Ia ora na.

Maitoà òrometua : Te reira, e püòi noa atu teie manaò, no te mea te hiti ra te reira parau, te tahi i roto i te manaò matamua i nä mua mai ra i te tatara i te parau. E, e au ra e, te püòi faahou ra. Aita e taa maitaì ra e aha te mea e hinaarohia ra e tuu i mua i teie rururaa òrometua. Mea tano roa rä e parau atu i teie nei. Terä ia manaò e nä ô ra e, te ìteraa i te mea maitaì, te vai ra i nià i teie fenua, e terä e nä ô ra, e aha teie hähaereraa e tii i to räpae. Te püòi ra, no reira i parau atu ai. Aita rä ia to ù manaò i nià i te reira. Te mea noa rä ta ù e ui ra : Eita änei hoì terä maitaì, terä mea maitaì to mea mä, e tauturu atoà i teie mea maitaì ta tätou e tautoo nei i teie mahana. Aita to ù e manaò faahaparaa te tahi i te tahi, tei roto rä i te mäìmiraa. Eita änei te tahi mea maitaì to mea mä, noa atu paha ia mea haere atoà tätou, a, i roto rä i teie tautooraa, no te mea teie oraraa to tätou i teie mahana, tei roto atoà ihoä ia tätou i te tahi huru oraraa e ua ânoì rii ihoä ia tätou, a, eita ia e huna atu i te manaò. E aita änei hoì ia ta tätou òhiparaa e nä reira ra i te hiò i teie nei, e manaò noa.

Tehuiarii òrometua : Mauruuru maitaì ta tätou parau e te rautï, eita atoà e ätea i terä manaò i nä mua noa atu. Terä paì parau e, e nä mua paì ta tätou, e, e haapaò atoà ta tätou. Ta tätou parau, to tätou fenua hoê noa ihoä vähi. Ia faatià anaè rä hoì te taata, ua rau ia te parau. Eita atoà paì e taa faahou e, te paripari atoà ra, aita i tano roa i ta mea. Eita atoà e taa faahou ra i hea roa e haamau ai i te manaò. Te vai ra änei hoì te taata e tano ihoä e haapäpü e, terä te parau tano roa aè ia parau anaè i te parau o to tätou fenua, to tätou òire. Te vai ra ihoä rä te vähi e e tano te parau. Ia parau anaè te mouà, àuaè paì e tano ihoä te mouà, te tai. Te vai ra rä te tahi mau vähi, mea ê roa ta te tahi. No reira, e tano ihoä ia tätou e haapii i to tätou parau nä mua roa, tätou ihoä te mäòhi, e hau roa atu tätou ihoä te mau òrometua. E hoì i roto i to tätou parau. Manaò anaè au, mea ravaì te parau a te Atua i horoàhia mai. To tätou rä parau to te mäòhi, te reira paha te mea e toe ra no tätou. Tiàturi atoà ra vau e, terä òhipa e haere nä räpae, e tauturu atoà mai ia tätou, tauturu rahi terä ia tätou, mai te peu e haapaò tätou. E te vai ra te vähi eita e tauturu mai, eiaha paì ia e täpeà mai i te reira. E täpeà mai ihoä paì ia i te mea e tauturu mai ia tätou i roto i ta tätou feruriraa. E mea maitaì te mau rautï, ia haamanaò faahou mai i te mau tävini i te mau parau i moèhia na, i parauhia na ia tätou nei, mauruuru maitaì e rautï mä.

Rautï : Turo : Aita, mauruuru i te manaò. E piti manaò taa ê terä, a, te vai ra rä te vähi e tüàti ai. Te vai ra te tahi manaò e hiò ra i te tahi mau faanahoraa ta tätou. A haapäpü roa na, teie ia mau tonoraa taata ta tätou, ia òre paì tätou ia haapähara noa. Te faaea noa rä tätou i nià i teie reo to Mita. Eere mea faatano, te Atua terä, terä i nä roto mai ia Mita e faatano mai ra i te parau i nià ia tätou, ua ìte òe. To tätou fifi i teie mahana, ua haamätauhia tätou e, fätata, parau anaè i to tätou parau, e faaìte ihoä tätou i te manaò mai terä i hinaarohia ia nä reira tätou. Ua haamätauhia tätou i te hiò veve ia tätou, aita ta tätou. Hoê noa räveà, e tii i ta mea, e te nä ô mai ra hoì te Atua nä roto ia Mita, ua ìte òe. Te auraa, aita e anihia e haere e ìmi, terä paì ta òe i ìte, a färii na i terä i reira òe e ìte ai i te rahi o ta te Atua horoà ia òe. Pärahi noa anaè tätou i roto i terä manaò e, mea veve tätou, eita tätou e ora ia tätou. Ua tae roa te tahi pae i te parau e, ia faaruèhia mai e faräni e pohe. E aha, e nünaa Atua òre teie, maraa atoà ai ia na i te parauraa e, ia faaruèhia mai e faräni e pohe. Mätau roa tätou i te hiò veve ia tätou, te Atua, te haamanaò noa mai ra, ua ìte òe, aita e faufaa e tataù, ua ìte òe. Te auraa, maoro noa ia òe, o òe iho te täviri matara ai te ùputa o te maitaì ta òe e manaò ra e ua faaèrehia òe. Aita atoà tätou, eita vau e hinaaro e haere roa i reira i te parauraa ia òutou te mau òrometua, a haapii i to òutou parau. Ua ìte, ua ìte tätou. Haamanaòhia atu rä vau i te tahi tau, mea huru maoro aè nei, te nä ô mai ra te tahi tiàtono i roto i te rururaa tiàtono, òhipa rahi paì e haapii e hoì faahou, hoì faahou i muri, e haapii faahou i te oraraa o te mäòhi.

Na ô atu ra vau e, aita òe e parauhia ra e haere e haapii i te oraraa o te mäòhi, terä haereraa òe i roto i te oraraa papaâ aita òe i haapii, mea òuà noa. E ia parau-anaè-hia òe i to òe, nä vai ia e haapii mai ia ù, aita, färii matara noa te ùputa. Eere, e ta tätou hiòraa ia tätou, te mea ia e panipani ra ia tätou i roto i te fifi. Matara tätou, e matara no te mea, na te Atua iho e parau ra ua ìte òe. Te auraa, ua höroàhia, tei ia òe ra. Ia òre òe e ìte, eiaha e pari i te Atua, te Atua mea nä fea teie òhipa. Ua parau mai hoì òe, ua horoà mai òe aita e räveà  e matararaa ai. No vai te hape, eita änei tätou e tae roa mai ia Âtamu e pari ra i te Atua, teie fifi to ù, terä aè paì vahine ta òe i horoà mai. Eere, na Âtamu ihoä i àmu, ta na àmuraa, ua àmu atoà ihoä o Èva i ta na àmuraa. A, no te maitaì paha o te rima o Èva i te faatororaa mai i òhie atoà ai o Âtamu. Eere rä na Èva i àmu, na Âtamu ihoä i àmu i ta na àmuraa. Eere, no reira ia parau anaè te Atua ua ìte òe, tei ia tätou ra te parau i teie nei. Aita faahou ta te Atua, ua ìte òe i te mea maitaì, tei ia òe ra, te färii òe, matara, òre, e färii taupupu noa òe. Hiò na tätou ia Ìteraèra, mai ia Àifiti haere mai i te fenua Tanaana, eere i te mea ätea roa, aita rä, aita e räveà e täpaeraa ai. Maha àhuru matahiti faataamino-noa-raa-hia, eiaha no te mea aita te èà i toro, aita ä rä te âau i färii. Faataere-noa-hia, no reira teie maitaì ua ìte òe, ia òre anaè tätou e ìte, na tätou e faataere noa ra ia tätou. Te färiiraa, te matara-atoà-raa, ia au ihoä paì, ia au i terä mau parau rii ta Ietu e parau ra ia faaora o na i te taata, ta òe i hinaaro ia nä-reira-hia òe. Mai te peu ua hinaaro òe, ua oti, ua ora. A ìte atu ai te tahi e, te vai ra te maitaì i terä vähi ta ù i haere i ô, te vai ra, e e parau taa ê te reira, terä e parauhia ra, o òe e terä ta te Atua i horoà ia òe. Te reira te mea e parauhia ra, no te mea e maitaì ta te Atua i horoà mai ia tätou, ia òe e te mäòhi ta Mita e haamanaò mai nei ia tätou i teie mahana, ua ìte òe. No reira, eiaha tätou e faatorotoro i te rima, mai te mea ra e te tahi teie pariraa, eere. Haamanaòraa noa teie ia tätou, te maitaì ua horoàhia mai, tei ia tätou ra, ua ìte òe, aita e taata aita i ìte. Mea rahi rä aita i färii, te reira rä, mea päpü ia.

Märii òrometua : Te vai ra terä parau ta te rautï i àrauaè ra, nä ô ra te rautï e, te maitaì tei to òe pae, tei roto i to òe ôpü, te reo, te fenua, te vaha. Ua tae mai te ôpü, ua tae mai te vaha, tei ô nei atoà te reo, eiaha rä mai terä i paraparauhia mai àrauaè ra, pähono mai nä roto i te reo marite, nä roto i te reo mea, aita. Täpeà ihoä paì i to òe reo, paraparau ihoä paì òe i to òe reo, eiaha e haere mai e parauparau mai i te reo no räpae mai, teie tätou e haapii nei i to tätou reo. Teie nei, ia parau anaè te rautï àrauaè ra e, tei te pae noa te maitaì ia òe, te auraa aita ia e faufaa e taìtaì roa mai te pereòo i ô nei i Haapiti nei, te marü roì, te türuà, te roro uira, te räau a te taote. Te auraa, ua ravaì noa òe te taata, te auraa paì ia ta ù e märamarama ra i terä parau ta òe e te rautï. Eere änei te reira, e haere noa mai òe, e haere taata noa mai òe. Eiaha, te ui ra paì vau i terä, te rautï. Te reira mau änei hoì.

Rautï : Turo : E, aita vau e märamarama maitaì ra ia parau anaè òe e haere taata noa mai, no te mea te ìteraa atu vau ia òe, eere ia te tahi ta òe e manaò ra, o òe ihoä terä e tià mai ra. E, eiaha, ia manaò anaè vau, eiaha e paraparau hau noa tätou, eiaha e haere i nià i te reira èà e haere te paraparauraa i roto i te haapaòraa òre. Te mea noa i parauhia atu e te rautï, terä paì maitaì ta Mita e parau ra, e ta te päpaì Teuteronömi e haamanaò atoà mai ra. Ua ìte atoà òe, eiaha e tuatäpapa, te vähi tei reira òe, tei reira terä maitaì. Aita, aita e faatorohia ra i nià i terä mau tauihaa i âfaìhia mai, te pereòo, aita, aita hoê taime i parauhia ai e ta òutou mea, te marü roì, aita atoà òe e parauhia ra e i teie pö e haere òe i räpae i nià i te matie e taòto ai. O òe atoà ihoä ia te taata matamua e amuamu mai, no te mea eere atoà ihoä te reira te mea e parauhia ra. Ia parau anaè mai te Atua, te mea maitaì paì ta òe e manaò ra e ua ère òe, ua ìte òe, ua horoàhia. Eere, eiaha e haere i nià i te tauihaa, e hiò i nià i te parau, te Atua teie e parau mai nei, ua ìte òe. Ia òre òe ia färii, e moè, e moè terä mea i reira òe e perehahu ai. Haamanaòraa noa teie ia tätou, e aha atu ä, eere na te rautï, haamanaò-noa-hia atu ra terä reo o Mita, püòi mai i terä reo to te päpaì Teuteronömi. Te haamanaò noa mai ra i te parau hoê, ua ìte òe i te mea maitaì. Te reira, ia färii òe, matara te ùputa o te maitaì, ia òre, terä ia e haere ia e, e faatoro ia i nià i te mea, e aha e pereòo uira, eiaha e âfaì mai i te pereòo uira. Aita, aita, aita hoê aè manaò i reira. Eiaha, eiaha e haere te manaò i ô, aita, e hiò paì i nià i teie parau ta te Atua e hinaaro ra ia tätou ia tütonu i teie mahana. Te tahi pae to tätou, te ìte ra i te fifi o te nünaa, te auraa ra, ua ère te nünaa i te maitaì. Te nä ô mai ra te Atua, ua ìte òe i te mea maitaì. E aha te räveà e matara ai terä ùputa o te maitaì, e òre ai te tahi pae e pärahi noa ai i roto i te ère, e ua tae roa i roto i te täparu, mea rahi roa terä toparaa to tätou nünaa. E te varovaro mai ra te reo o te Atua, ua ìte òe i te mea maitaì. Te auraa, i ìno ai òe eere na ù, ua ìte òe i te mea maitaì. I tae ai òe i ô, eere te hinaaro no te Atua, te taa mai ra ia òe, te reira te manaò e hinaarohia ra e parau. No reira, eiaha e türaì i te manaò i te tahi vähi e reru ai tätou. Aita, faaea noa tätou i nià i ta te Atua e haamanaò mai ra. Ua fifi tätou, parau mau, ua fifi to tätou nünaa, e, e tano e parau ua ihu te fenua. Feiä faatere, färii änei rätou i terä reo to te Atua e parau ra, ua ìte òe i te mea maitaì. Eita, e ìmi ihoä rätou i te vähi ta rätou e manaò ra tei reira te maitaì. Tätou rä, te arataì o te nünaa, tätou te arataì i te pae no te faaroo, te haamanaò mai ra te Atua, ua ìte òutou i te mea maitaì. Teie nei, ua tae te nünaa i roto i te fifi, ua ìte atoà ia tätou, no te aha i fifi ai. Tei te reira vähi tätou i te aniraahia ia tütonu rii mai i te manaò, eiaha no te faatano i to tätou manaò, no te hiò rä nä fea tätou i te tatararaa, nä fea tätou i te tautururaa, te arataìraa i teie nünaa i roto i te ora, ia òre o na ia taamino mai ia ìteraèra i taamino noa. Eere, eere o tätou te taata tätaì tahi, eiaha e hiò taata mai i teie parau. Tuu rä ia tätou i mua i te parau a te Atua e nä ô mai ra, ua ìte òe. E uiui paha ia to tätou manaò i reira, peneiaè te matara mai terä ùputa tei òre ä tätou i hiroà atu ra tei hea roa rä hoì teie maitaì ta te Atua e parau noa mai nei. Eere, e faaitoito mai i te hiò i teie parau, eiaha mai te mea na te rautï e parau atu ra, hoê ä tätou tiàraa i mua i te parau a te Atua, tämata-noa-hia atu nä ô nei i te horoà atu i te tahi mau tauturutururaa, no te tämata rä ia i te faaòhie ia tätou, tià atu ai, tià atu ai.

Maitoà òrometua : I roto i ta mätou feruriraa pupu, ua haere rii ihoä ta mätou täuàparauraa i nià i terä vähi o ta òe e Turo e faahopeà mai ra. I nià ia i terä vähi e, te uiui noa ra te pupu e, nä hea teie nünaa e matara ai i to na mau fifi. E te reira rii mätou i te… No te mea, vitiviti roa paha ia te manaò i te hororaa i roto i te hiòraa i te fifi o te nünaa. Âhani ihoä paha e, pärahi maoro rii ihoä i roto i te feruriraa parau, e pou atu ai i roto i te fifi. Aita rä hoì e räveà, no te mea te vai noa mai ra te reira i mua i te mata. Tano maitaì atoà atu ai hoì ta tätou tumu parau. Te vähi noa, te tahi vähi ta te manaò e hiò ra i teie taime, tei nià rii ihoä i terä uiuiraa e, e tano änei hoì e, e tiàturi e te ìte noa ra to tätou nünaa i te tahi mea maitaì. Te vai ra te tahi ìteraa, te täpeà ra o na i te tahi mea maitaì i teie mahana. No terä ihoä ia huru hiòraa e, ua täfifi roa, eere ihoä paha na na noa o na i täfifi ai, o ia, ua faaòhuhia rä o ia, i te faaòhu e, e. Tei ô rii ia te manaò i te uiuiraa e, te vai ra te tahi vähi e, ua täpeà mai teie nünaa i te tahi mea maitaì, e tano ai e parau e, ua ìte òe, no te huru o te täfifi. Tei reira noa te manaò i te uiuiraa. Paraparauraa noa paha, aita e räveà.

Rautï : Turo : Aita, mauruuru no terä faanavaìraa mai. Te reira ihoä te mea e manaònaòhia ra, te reira te mea e ìte-maitaì-hia atu ra. Terä täninitö rahi to te nünaa i teie mahana, eere. Hiò na tätou i te tahi tamarii haùti, täninitö anaè, e pärahi te tamarii. Pärahi e, ia pee, tià faahou o na, hoì faahou i roto i ta na haùti. Manaò anaè au, ua tae atoà paha i te tahi taime no tätou e pärahi rii atoà i raro. E ia pee terä täninitö, peneiaè, te äteatea rii to tätou mata i te hiòraa e, e aha terä mea i haafifi mai na ia tätou. Teie taime, tei roto tätou i te òhuraa, aita atoà e taa òiòi, eita atoà e ìte òiòi, eita e òhie i te märamarama. Peneiaè paha i muri aè i te tahi taime pärahiraa, te tahi taime feruri-maitaì-raa. E ia haapäpü anaè mai rä te Atua e, ua ìte òe, ua ìte atoà ia tätou e, terä noa uì i nä mua mai ia tätou, eiaha tätou e haere roa atu i raro. Terä noa uì nä mua mai ia tätou, te mau metua, i roto paì i to rätou ravaì òre, nä ô tätou e, te moni òre, eiaha te ravaì òre. Te moni òre, no te mea eere nä te moni e arataì i te oraraa. Aita rätou i fifi, ua mätara. Àmu i te àmu, hoo i te mea hoo, paturaa fare ta rätou, ua patu i te fare. Aita e tärahu, ua matara paì rätou. Tae mai tätou i teie tau, parauhia e, tau no te moni, i reira te taata i te veveraa, no te mea ua faaruè te taata i ta na maitaì ta te Atua i horoà. Täpapa i terä mea òhie, täpapa terä mea tähepetoma, mea täâvaè. To na rä fifi i muri mai, mea tämatahiti ia. Püòi te reira matahiti i te reira matahiti, teiaha noa atu te mea o ta na i tävere na muri ia na. Täpapa, täpapa i terä mea maitaì, aita e raveà e roaaraa ai. No reira terä manaò i parau ai e, ua tae atoà paha i te taime e, e pärahi rii tätou. E pärahi e te nünaa tei reira tätou i te òhiparaa no te haamanaò ia na, to tätou mau metua, ua ora mai, ua ìte mai i te maitaì. Ua roaa ta rätou haamaitaìraa i te Atua no te tauturu rahi a te Atua ia rätou. No te aha ia te Atua e faaruè ai ia tätou i teie mahana. Eere änei o tätou tei faaruè i te Atua, tätou tei faaätea, no te mea ua tiàturi tätou, nä te moni e arataì atoà i ta tätou òhipa. Ei moni, maitaì ai te mau mea atoà, e inaha, o òe noa ta te Atua e hinaaro. Ua ìte òe i te mea maitaì. I muri mai, te faaìte mai ra te Atua i te mau mea atoà ta na e hinaaro. Aita nei. Aita ihoä rä e räveà e haapaòraahia ai.

Te mau raveà paì ta te Atua e tuu mai ra, ia ìte faahou te taata i terä maitaì. No reira, e nä ô noa tätou e, ua tärehua paha te mata i teie taime, i òre ai tätou e ìte i terä maitaì. Te vai noa ra rä. Aita i ätea roa, aore ra aita ä i ätea roa. Haamanaò i terä parau ta Ietu : terä huero i horoàhia mai, ia òre ia tanuhia, ia òre ia faahotuhia, e tiihia mai e ìriti, âfaìhia, horoàhia atu na te tahi nünaa. Täpeà mai, òi vaivai aè ia tätou ra. Faahotu i terä huero, eiaha e tiaì ia tiihia mai, horoàhia atu na te tahi, i reira mau tätou e pärahi roa ai i roto i te ère. I teie taime, te haamanaò noa mai ra te Atua, ua ìte, ua ìte òutou, ua ìte tätou, ua ìte òe i te mea maitaì. Eiaha e parau e, tei hea, eiaha e parau e ìmi, aita òe i anihia e ìmi. Te nä ô noa mai ra te Atua e, ua ìte òe. E hiò rii ia i roto ia òe. Eere i roto i terä täninitö e pärahi ai, o òe iho te täviri. O òe iho te täviri no terä maitaì. Aita e ìmiraa, i te mea, tei ia òe ra te maitaì. Aita e ìmiraa, inaha ua faaìtehia òe. Tatara. E te hiò ra tätou i te fifi o to tätou nünaa i mua i te ôpuaraa faaora a te Atua. Parau noa ra tätou i te parau no te ora, te ìte rä tätou i te nünaa tei roto i te fifi. E tupu ihoä ia te uiui, te tüàtiraa paì te fifi e te ôpuaraa ora a te Atua. Mai te peu aita e tüàti, eere no te parau a te Atua te hape, ta tätou paha tatararaa i te nünaa terä e òre e âfaro ra. No reira te nünaa te òre e matara. E hiò faahou ia tätou i te reira vähi.

Märii òrometua :Terä manaò ta ù i paraparau ihoä ra âraùaè ra, tei nià vau i terä manaò i ta tätou parau i nanahi ra. E, haamata ihoä ia tätou i teie poìpoì, tei nià paì i terä parau ta Ietu i parau i nià i ta na mau pipi. Ia haere anaè òutou, âfaì noa terä e terä e terä, ua oti atu ai. Te auraa, te mea faufaa, terä vaha to òe ia parau i mua i te nünaa. Terä ta ù âraùaè ra, no ù noa terä manaò. Eere rä mai terä ta òe i tatara iho ra âraùaè ra, mea ê rii paì to ù feruriraa, tei nià i terä parau ta Ietu i parau i nià i ta na mau pipi, terä noa ta òe e âfaì. No reira vau i rave mai ai i terä hiòraa no tätou i teie mahana. Ua tae mai paì tätou, tei ô nei to tätou ôpü, tei ô nei to tätou vaha, tei ô nei to tätou tarià, e te reira ta tätou e âfaì i roto i to tätou nünaa. Tei reira paì te manaò ta ù e hinaaro ra e paraparau i ô.

Rautï : Turo : A tià ia, te tätarahapa atu nei. Aita paì au i ìte e, te parau ra òe i terä parau ta òe i nanahi ra. Ahiri òe i faaara mai nä mua aè, ua ara atu ia vau. Eere, e, aita rä. A taa noa atu ai no òe atoà terä parau, eere te parau ta òe e âfaì i te nünaa. Te nä ô mai ra ia te Atua, ua ìte atoà òe. Terä te vähi faahiahia, ua ìte atoà òe i te mea maitaì.

Tehuiarii òrometua :Aita, te tämata noa ra ihoä i te tütonu i roto i ta tätou parau. Tiàturi rä e, e tauturu mai terä parau ia ù iho nä mua roa. Aita änei ihoä i rahi roa te parauraa i te taata. Mätau noa paì te taata, e parau-noa-hia atu o na, tuu-noa-hia atu te parau i roto ia na. Terä ta òe e haamanaò ra e, taime ra ihoä, tämata rii e mämü rii. E, te ìmi ra ihoä i te räveà. Nä hea e parau i te nünaa, i te taata. Eita ihoä e òre e, te reira paha te mea e toe ra, e mämü rä. Te vai ra te tahi mau parau, e manaò paì òe e, i roto i ta òe huru parauraa, e mea òhie. Pähono-anaè-hia mai, mea pöiri roa no te nünaa e faaroo mai ra. E, aita. E tämata ia i te tomo i roto i te parau, e hiò e, e aha ta na tauturu mai ia ù nä mua roa i te faaìteraa, parau. Ua tae ê mai na te parau, toe ra ihoä, terä färiiraa atoà. Ia manaò anaè au, te reira atoà paha te mea e toe ra, te färiiraa i terä parau maitaì. Aita atoà hoì e taa ra e, no te aha paì i òre òhie atoà ai te färii i te parau maitaì. E, tei ô atoà paha te uiuiraa, no te aha i òre e färii òhie atoà ai i te parau maitaì. Terä noa, mauruuru maitaì.

Temarama òrometua : Ua tïtau-anaè-hia te tahi taata e haere i mua i te haavä, e uiuihia ihoä. Tämata ihoä te haavä i te ìte e, te vai mau ra änei te tahi ôtià i roto i terä taata e haavähia, no te ìteraa taua taata ra i te maitaì e te ìno. E, mai te reira rii te manaò. Ua ìte òe i te mea maitaì, e mai te peu, e aita vau i ìte i te mea maitaì i roto i to ù nünaa, ua rahi aè i te tahi vähi e òre i te mea maitaì. Aita änei e räveà i reira, no te haapii faahou. Haapii faahou, parau faahou, na nià iho faahou. E te mau mea atoà e vai ra, e haaàti ra ia na. Inaha hoì, èrä iho te mau mea atoà, e mea maitaì. Terä mea maitaì. Te fifi, ia òre te tahi taata ia haapiihia, eita atoà ihoä ia e ìtehia, te ôtià o te maitaì, e aore ra te ôtià o te ìno e vai ra i roto ia na. Taua taime ra, vähi ê roa o ia, e vai ai, eere ia tei terä vähi ta tätou e manaò ra. Peneiaè, e âfaìhia paha o ia i te fare maamaa. Ia ù, ia òre òutou ia ìte mai i te ôtià o te maitaì e vai ra, e te ôtià e vai ra no te ìno. Âfaìhia paha ia vau i te fare maamaa, aore ra i mua i te tahi taote no te faaâfaro maitaì i te roro. Aita vau e taa e, nä hea. E uiraa änei teie, aore ra. Te tahi manaò atoà ra hoì ta mätou i täuàparau maitaì i roto i te pupu, te òre terä taata e färii i te haapiiraa a te rahu a te Atua. Ei, terä noa te tahi manaò iti.

Rautï : Turo : Terä, te haapeàpeà ra i te horoàraa i te parau. Te huru horoàraa i te parau, te haapiiraa, te ui mai ra te manaò matamua e, eita atoà. Eere i te mea òhie i te haapii, e ia hiò anaè tätou ua ora atoà mai Ietu i te reira fifi. Eiaha atoà e manaò e, mea òhie no Ietu i te haapii. Hiò na tätou ia parau anaè Ietu i te parau no te pätireia, eere hoê haapiiraa ta na i horoà, tämata te tahi parauraa, aita te taata i märamarama, taui, ia oti taui, taui, aita rä e faaearaa i te parau. Eere, te tuhaa a te taata parau, e parau. Te vai ra te tahi haapiiraa, mea nä roto i te parau, te vai ra te tahi haapiiraa, mea nä roto i te mämü. Haamanaò na tätou. Te tahi mahana, ua tono atu o Ioane i ta na nä pipi, haere e färerei ia Ietu, e te uiraa : « âhiri, haapäpü mai na, o òe ihoä terä ta mätou e tiaì ra, aore ra, tiaì to muri iho ». Aita Ietu i pähono. Ua rave noa Ietu i ta na òhipa, e i te otiraa, haere rä, haere e faaìte ia Ioane ta òrua i hiò, e ta òrua i faaroo. Te auraa, te tahi huru haapiiraa, eita te taata e färii i terä mea parau, püai te manaò tähitohito ia haere mai, a ora, a rave, e haapiiraa atoà te reira, te hiò noa mai ra te taata. Nä te reira atoà e haaferuri i te taata. Ei reira e tano ai terä reo to Ìtaia e parau ra, to te Atua, ta Ìtaia e haamanaò mai ra, «  e òre ta ù parau e hoì faufaa òre noa mai ia ù ra ». Te auraa, eiaha tätou e faatupu i te parau, e parau rä i te parau. Vaiiho na te Atua e òhipa. Te auraa, e rave tätou i ta tätou tuhaa, e rave te Atua i ta na. Aita rä e parau faufaa òre, noa atu i te tahi taime paruparu te manaò, aita te taata e faaroo mai ra, eita e färii. Aore ra, ia parau-anaè-hia atu, e ririhia mai, aita te peàpeà, faaitoito rii noa atu i te parau. Eita e roaa faahou ta rätou ôtoheraa, no te mea ua tae te parau i roto i te tarià. Mai terä ihoä ta Ietu e parau ra e : « âhiri au aore i haere mai e parau, ua tano rätou, teie nei rä, aita e hororaa. »  

No te mea tei roto te parau i to rätou tarià, ère, no reira, te vai ra te fifi i roto i te tuhaa a te taata parau, te òre o na e faaroohia mai, te òre e täuàhia mai, e aore ra, te òre o na e taa faahou nä hea paì te parau. Ia tae anaè te tahi taime, aita atoà e taa faahou e, nä fea paì i te parau. Aita, a parau noa, a parau noa, a rave òe i ta òe, te vähi e maraa ia òe, te tahi tuhaa nä te Atua ia e rave. Mai te peu te tauturu atu ra teie manaò ia òe i te faaearaa i te parau, e, te tämau noa rä i te parau.

Maehaa v : To te rururaa, ia ora na. Te nä ô ra ta tätou parau, tei pihaì iho roa ia òe, tei to âau, tei to vaha. Te uiraa teie : Mai te peu, ua pëpë te âau i te parau e aore ra te fifi ra te âau, e roaa faahou änei terä âau i te ìteraa i te maitaì, e aore ra, i te parauraa mai terä ta òe e faahiti iho ra naùaè nei. Terä.

Tehaapapa òrometua : Tei nià noa i te tïtauraa i te märamaramaraa o te parau. Te vai ra paì terä i roto i te Mita, terä i horoàhia mai, ua faaìtehia òe i te maitaì. Haere anaè ra ta tätou paparau, ua ìte òe i te maitaì, e mea märamarama roa terä piti haereraa parau. Hoê änei e aore ra te vai ra te tahi mea,  terä te mea e hinaarohia ra e märamarama, ua faaìtehia òe i te maitaì, ua ìte òe i te maitaì, te reira noa te türamaraa e hinaarohia ra.

Rautï : Turo : Te reira. Teie ihoä i ô nei te uiraa matamua, na mua ra te pähono i terä. Te vai ra te tahi mau tauiuiraa i roto i te huriraa, tei roto i terä mau uiraa i muri mai. No reira, faaòromaì rii ä, terä ta òe e ani mai ra, te vai ra hoê uiraa no te faahiò ia tätou terä paì mau tauiraa. E taa-noa-hia rä te manaò, eere rä hoê ä huru parauraa. Te vai ra te tahi uiraa, a muri nei tätou e hiò mai ai. Mai te peu, e pähono i teie nei ra, faaea noa mai hoê pupu ârauaè, aita ta na òhipa.

Terä manaò matamua, te nä ô mai ra, mai te peu paì ua pëpë te âau, e parau änei te vaha. E itoito änei te vaha i te parau, mai te reira rii te uiraa. Mea rahi te tumu, e pëpë ai te âau o te taata i te parau. Te vai ra te taata e ôpuaraa ìno ihoä ta na, e ìno ihoä ta na e tuu i roto i ta na parau. Ia tae i roto i te âau, ia tae i roto i te tarià e te âau o te taata, e pêpë ihoä te tahi. Eita o na e ànaànatae faahou i te parau. Te vai ra te tahi parau, e märamarama te taata e mäuiui to na âau, e parau ta na no te mea, nä te märamarama o te parau e haamatara i ta na parau. Mai te peu e täpeà o na i terä mäuiui, aita, o na ia te haere noa atu i te mäuiuiraa e, e rahi noa atu teie mäuiui. Mai te peu, nä te märamarama o te parau, aita, eita e tano ia òe e mämü. Mai te peu rä e ôpuaraa ìno ta te taata, e hinaaro ihoä ia pëpë òe nä roto i ta na parau, mea taa ê ia, parau taa ê ia. Manaò anaè au, i roto i teie ta tätou e hiò nei, aita ta tätou i reira. Eere, aita to te Atua manaò ìno i te taata, e haamanaòraa noa no te mea atoà paha te fifi ra. Mai terä paì ta tätou e ìte ra i teie mahana, te fifi ra to tätou nünaa, teie nei, te vai ra ihoä ia terä manaò, terä mau manaò haere mai ra ârauaè ra, ia parau âfaro noa atoà òe mai te reira i te taata, ua ìte òe i te mea maitaì, eita te taata e mauruuru mai. Teie e fifi, e te parau mai nei òe, tei ia òe ra te räveà, e, te vai ra ihoä te tahi tatararaa na mua, te auraa, e ìmi te räveà e tuu te märamarama. Ia märamarama anaè, tirä rä, ua äteatea te èà o teie taata, e parau atoà ta na i te reira taime. Te tauturu ra änei teie manaò, a, a tià ia.

Iotua Ioane òrometua : E, mauruuru ta tätou parau, hoì noa mai ra ihoä te manaò i nià i ta tätou nei tumu parau e nä ô ra e, ua ìte òe i te mea maitaì. Ia parau-anaè-hia e, ua ìte òe, mai terä ihoä ia ta òe ta te rautï e türama mai ra. Parauhia ra i te taata tätaì tahi e aore ra, i te nünaa tätaì tahi, e nä ô ia vau e, ia parau-anaè-hia mai, ua ìte au, ua ìte ihoä vau ta ù i ìte. Mea ê ihoä paha ta te tahi ìteraa, te reira rii paha te tahi vähi e tano e paparau maitaì. Nä ô noa ra vau e, tiàturi au e, mea ê ta te mau tamarii a Hiro ìteraa, e ta te mau tamarii o te fenua ènana. Te vai ra ihoä paha te vähi e tüàti, taa ê ihoä ra ta te tahi ìteraa i te mea maitaì i ta te tahi. Parau mau, e parau ihoä tätou e, e ìte te mea ta te Atua e faaìte mai ra, e rau ihoä rä ta tätou ìteraa, hape atu ai teie manaò, te reira noa.

Nämata v. : Tätou pauroa, ia ora na. Te tahi noa aniraa. Terä parau, ua ìte òe te maitaì. E mea mämä to na tuuraa reo e aore ra, e mea taiaha, ahh..e mea mämä e aore ra e mea taiaha no te mea, ia haamämä-anaè-hia te tuuraa reo, eita atoà ihoä paha e täuàhia mai. Te auraa, mai terä ihoä paì e parauhia ra e, tarià to na e faaroo ia. Mai te peu e, e mea taiaha, te vai ra ia terä manaònaòraa to òe e, e haere âmui no te taata parau e parauhia ra. Te vai atoà ra hoê pupu taata i muri ia òe, no terä ihoä manao e, te vai ra paì terä manaònaòraa e, e haere âmui paì, e haere âmui, te reira noa.

Rautï : Turo : E, peneiaè mea ê ta te Hiro märamaramaraa, mea ê ta te ènana, mea ê, aita e fifi te taa-ê-raa, na te Atua i hinaaro, e ìtehia atu ihoä nä te Atua terä, eere terä nä te Atua. Tupu anaè mai te ìno, eere nä te Atua, te auraa, eere nià i te taa-ê-raa ta te tahi märamarama i ta te tahi. Eere te reira te fifi no te mea, ia au atoà ihoä te tahi parau ta Ietu, e ìtehia te räau i nià i to na hotu, to na mäa. Ah, haere mai te tahi e ôhure piò, e mea menemene, e mea rarahi, e mea naìnaì, eita e fifi te reira, ia tämata mai òe, mea au. Ah...vï maitaì terä, eere, te reira atoà te mea ta te Atua hinaaro ra te taata ia rave, e ìtehia atu ihoä te hotu i nià i te òhipa o ta na i rave mai. Taa ê atu ia to na huru, taa ê atu ia te reo ta na e faaòhipa no te faaìteraa mai, taa ê atu ia e tamarii nä Hiro e nä te ènana, eere te reira te fifi no te mea, te nä ô ra te Atua, no ù te fenua e terä atoà mau taata e pärahi ra i reira. Te auraa, te taa-ê-raa ta rätou faaìteraa ta te tahi, na ù te reira i hinaaro. Te mea rä ta rätou e faahotu mai, te reira te Atua i te tiaìraa mai ia tätou. Ua pähono-rii-hia to òe manaò. Eere terä.Iotua Ioane òrometua : E, pähono-rii-hia. Peneiaè atoà paha, no te huru uiraa te haereraa atu. Mai te peu haere âfaro noa atu vau, i roto i terä parau ta ù e hinaaro, tei roto tätou i te rauraa. E rave au i te tahi hiòraa päpü maitaì. Io mätou i Rimatara, no mätou te rori, e mäa maitaì roa terä. No te tahi mau fenua, mäa haafaufau-roa-hia terä. Te tüàti-òre-raa paì te ìteraa i te mea maitaì, nä fea tätou i te faatüàti ia tätou. Te nä ô ra te tahi, nünaa Mäohi ia, e rori, mäa haafaufau-roa-hia terä, eiaha e àmuhia, eiaha e täpeàhia. No mätou rä, eh.., e mäa faahiahia roa terä, ia òre òe e àmu i roto i te hepetoma, e mea fifi roa, te reira rii.

Rautï : Turo : E parau òaòa roa terä. No te aha, mai te peu te täatoàraa o Rimatara e àmu rori, eita e maoro e pau no terä mea, to ô nei, eita e àmu i te rori. Nä ô nei rii atoà mai, te puè noa ra te rori, terä, mai terä ihoä i roto i te mau nünaa atoà, te tahi mea au na na, te tahi mea haere te tahi vähi. Aita, eita e àmuhia. Haamanaò atu ra paì au, matamua io mätou, te vai ra te tahi papaa, e moo teatea. E mea òeòe paì to na àpu, parau-noa-hia mätou, e mea taèro terä papaa. Ia roaa anaè mai, e faaruè ihoä. Te mau taata ra i àmu, e parau mai ihoä rätou, ai..to òe hape, e mäa maitaì roa terä. E mai te peu, eita tätou e rave i terä mea, e rave na tätou te papaa a Täpati mä, toetoeä mäa noa ta te Atua i tuu i roto, maamaahia ra rätou terä toetoe ä. Ua hape, ua hape. No te aha, no te mea, e mea maitaì, te tahi atu vähi, aita. Io mätou i te matamua, e parauhia te reira papaa, e papaa feefee. Aita vau i ìte te feiä ra i te feefee-raa-hia, no te mea ua àmu, täpaò ia e, e mea maitaì.

E, teie uiraa hopeà, te nä ô ra, nä fea e parau, e haamarü noa, e ùuru. A parau no te mea, e ùuru òe. Te tahi, e àta mai. O òe ia te mäàu. A parau, ua faaroohia mai, ua faaroohia mai ia, e aita ra, noa atu o òe anaè, noa atu aita e pupu to muri ia òe no te mea, te türuì ra òe i nià i te pupu. Eiaha, ta te Atua parau, o òe, o òe noa. Eiaha òe e ani i te pupu e, te pupu e tauturu mai, eita, na òe e pähono atu i te Atua. Te nä ô mai ra te Atua ia òe, täua, o òe eo vau. Eiaha e türuì faahou i nià i te pupu, eita te pupu e tauturu ia òe no te mea, o òe anaè ta te Atua e hinaaro ra. Te auraa ia o teie reo ta tätou e hiò nei i teie poìpoì.

Nämata v. : Eita, eere mai terä to ù manaò. Paraparau paì i roto i te pupu ârauaè ra, taata parau, e mea matara o na, ummm... mai te peu e haere òe o òe anaè, o òe anaè ia. Ua reva ia òe òe anaè, eere te reira te hinaarohia.

Rautï : Turo : Oia, te reira ta te Atua e hinaaro, o òe anaè.

Nämata v. : Terä paì nünaa i muri ia òe.

Rautï : Turo : Te faaroo atoà mai ra, taata tätaì tahi, o vau e o òe. Te na reira atoà atu ra te Atua, e hinaaro te Atua i te taata tätaì tahi. Ia âmui anaè, i reira terä mau taata tätaì tahi e riro ai ei nünaa. Te parau ra a te Atua, te nä ô mai ra e ua ìte òe. Tarià e faaroo, no na terä parau. Faaroo mai te tahi, no na terä parau, aita te tahi e faaroo, eere no na terä parau no te mea, aita o na i färii, te reira ta te Atua e hinaaro, òe. Mai teie, mai teie, mai teie, e rave òe te nümera hoê, âmui atu ai òe te rahiraa hoê tiàhia atu hänere. Hoê hänere hoêraa, oti, nä hoê, âmui mai hoê tià roa atu hänere, hoê ia hänere hoêraa. Ta te Atua parau, te parau ra te Atua terä hoê, te tahi hoê, te tahi hoê, aita te Atua e parau ra terä hänere, e hänere atu ihoä. Te nä ô atu ra te Atua, ua ìte òe i te mea maitaì, te na reira atoà atu ra te tahi, e nünaa roa atu, na nià ihoä ra te taata hoê na mua, ta te parau paì ia e haamanaò mai ra ia òe.

Nämata v. : Mai terä paì to ù manaò. Parau mau, ua parauhia ia òe, terä, taata matara òe, haere anaè òe i roto i te tahi päroita, eere i te mea matara, ta òe tuhaa te tautururaa ia. Eere, no terä ia manaò haere âmui. Tei ô noa terä manaò te faaearaa, no reira vau i nä ô atu ai e, aita anaè, ua reva òe òe anaè, tei reira paì terä manaò.

Rautï : Turo : Teie nei, teie nei, terä päroita matara òre ta òe i haere, hoê ä parau, hoê ä huru taeraa te parau i terä mau taata tätaì tahi i roto i te päroita, ua ìte òe i te mea maitaì. Teie nei, terä ta rätou e ètaèta noa ra, terä ta òe e parau ra e, toe noa mai nei òe o òe anaè. E òhipa rätou ia i teie nei e te Atua, aita rätou i färii terä ta te Atua e parau ra e e mea maitaì. Te mea ta rätou hinaaro, ia färii òe te mea ta rätou i färii e mea maitaì. Ta tätou e hiò ra, ta te Atua e parau mai ra, terä e mea maitaì. Eere nä te taata e parau mai ra, terä e mea maitaì. Ua ìte òe no te mea, ua tuuhia terä parau i roto ia òe, tei ia òe te faaìteraa e aore te hunaraa. Ia huna òe, o òe ia e te Atua. Ia faaìte òe, o òe atoà ia e te Atua. Ta te Atua rä e hinaaro ra, a rave, ua ìte òe.

Viritua òrometua : E, te rahiraa o te manaò, tei nià ia terä parau te fifiraa te färiiraa te mea maitaì. Ia hiò anaè ra vau to tätou nünaa i teie mahana, te fänaò nei i taua maitaì ra, te fenua, te mäa no roto i te fenua, te mäa no roto i te tai, feiä ravaai, feiä faaàpu, Ah..te fänaò ra i taua maitaì ra. I hea terä reo to te Atua nä roto mai ra ia Mita e faufaahia ai. Te fänaò ra, e uiuiraa terä, i hea ia teie parau e tano ai. E tano änei e aore ra eita e tano. Te fänaò ra i taua maitaì ra.

Rautï : Turo : Eere no terä mea te fänaò ra, e òre ai teie parau e tano ia faatorohia i nià i te reira mau taata tätaì tahi, eere. Te maitaì ta tätou e parau ra e aore ra, te maitaì ta Mita e haamanaò mai ra, aita i täôtiàhia i nià i te ôpü, te mäa, to te fenua, to te tai, mea rahi atu ä te maitaì ta te Atua e hinaaro i te taata ia ìte. To na parau, to na fenua, to na hiroà, to na märamaramaraa. Te hinaaro o te Atua, räua, manaò anaè au, terä paha te tahi vähi âpï, eiaha i nià noa i te mäa. E mea maitaì täua, hinaaro te Atua e färerei i te taata tätaì tahi. Ua ìte òe i te mea maitaì, eiaha terä ta òe e tuu noa ra i roto i ta òe merëti, e mea maitaì atoà ihoä ia, e, e mea peàpeà. Mai te peu, aita e òhipa i roto i ta òe merëti, te maitaì ta ù e hinaaro ra ia ìte òe, aita i täôtiàhia i ô. Aita to na e ôtià no te mea, täua, haere mai òe i a ù ra, haere au ia òe ra. Mai terä rii paì reo to te Fatu i roto i te âpotarupo : pätoto vau, ìriti anaè mai òe, haere atu vau ia òe ra, täua ia tämäa. E ia oti, haere atoà aè òe i te fare e tämäa ai. ahh..Mai te peu, e parau mai te Atua ia tätou e, e haere atu vau ia òe e tämäa, e oti, haere atoà täua i o ù e tämäa ai, âue ia parau te òaòa e. Eere, no reira, aita to nià noa i terä, i roto ra rä i terä färiiraa, te fare o te Atua ta na e ìriti mai ra, të te fare täua. Eere änei terä atoà te parau ta Ietu i parau i terä taata hara : te reira taime tei ô täua, tei ô. Eere, färii anaè terä mea iti, färii, eiaha e tataù e, tei hea te färii. Aita, färii, matara te ùputa o te pätireia.

Eriäta tiàtono (Koyoyo) : E manaò teie. Mai terä. E nä ô anaè vau i te Atua, haere mai ia ù ra e tämäa, ua pau ia te mäa i te Atua, aita ta ù no te mea, na na vau, na na atoà te mau mea atoà. Mea maitaì aè na ù e haere i te Atua e tämäa, mea rahi te mäa. E aha te auraa, teie, no ù na mua roa, mai terä e parauhia ra, ua ìte òe i te mea maitaì. Mai te mea o vau te mata ara i nià i te nünaa, o vau ia te faaineine, ta ù huru parauraa i te nünaa. Mai te mea, te nünaa eita e märamarama mai i ta ù parau e mea maitaì, a parau ìno ia, peneiaè i reira e märama mai ai. Te tahi ia huru raveraa, aita ihoä ra tätou e parauhia mai nei e, e parau ìno. Eiaha atoà rä e moèhia, te vai atoà ra te tahi perofeta, ua nä roto i te maitaì, ua faaruru mai nei i te ìno. Ta ù e taa ra i roto i ta tätou parau i teie mahana, vau te taata hoê, e nünaa ta ù e arataì ra. E aha ta ù räveà no to ù  nünaa, ia märamarama mai o ia i te mea ta ù e parau ra. Terä ia ta tätou e haere ra, vau na mua. Mai te peu ua ìte òe, e ìmi atoà vau te räveà e taa atoà mai te tahi, eiaha rä e täpupu. Eiaha atoà paì e täâfa, eita, ua horoà mai te Atua i te parau ia tätou, te täatoàraa eere mea täâfa, ua horoàhia mai te maitaì, te täatoàraa, na tätou rä e täâfa. No reira, terä manaò e parauhia atu ai. Mai te peu, e haere mai te Atua ia ù e tämäa, e pau te mäa, te Atua mea rahi, e mea naìnaì roa vau, e àmu ia vau i te aha, e àmu i ta na parau. Te reira noa te tahi maa manaò iti, türama mai.

Rautï : Turo : Te reira. Aita vau e märamarama ra. Te amuamu ra òe i te Atua, terä rahiraa ià ta òe, aita òe e taa nä hea òe i te àmu, e te parau ra òe, ia haere anaè mai te Atua, e pau roa terä ià. Aita te Atua e faaea ra i te horoà i ta òe, e aita òe e faaea ra i te nümera. Ia haere anaè mai te Atua, aita, aita, mea au aè e haere i te Atua ra e tämäa. Ia òre òe e färii i terä, aita te Atua e färii mai ia òe i ô, vai noa òe i räpae. Te nä ô ra te tahi atoà vähi ta òe e haapeàpeà ra, nä fea vau i te haapii. Te parau ra ihoä òe i te tamarii paùmotu, nä ô ihoä ia te taata e, e aha te taata e ora ai i ô nei, e i ô nei. E tumu haari, vai iho nä hoê taata i nià i te motu, vaiho noa, a parau atu ia na e, ua ìte òe i te mea maitaì. Ia hoì mai òe hoê âvaè i muri mai, ua ìte o na, ua ìte o na tei hea te mea maitaì. No reira te tahi taime, eita atoà e faufaa e faarahi i te parau, a faaìte noa atu ua ìte òe. Ua fifi anaè òe, na òe noa ihoä. Te hinaaro ra paha òe ia monihia òe i mua i te Atua, to òe faaauraa i te Atua i te tui ià. Te parauraa, ahh.., e mea hoo te reira ià. Eiaha e nä reira i te paraparau, täpeàhia ta òe ià i Matäiva. Ia hoì atu òe, aita e ià faahou i Matäiva, tatä-pauroa-hia e te Atua i räpae i te moana, i reira òe e àmu ai i te tämono.

Rautï : Vaetua òrometua : Mai terä. Ua taahuri roa tätou i te hora, e piti manaò toe, terä to Viritua e to Iotua.

Viritua òrometua : E, eiaha e fifi mai. Terä uiraa ta ù i ui atu ârauaè ra, pähonohia mai. E hiò e, ua âano roa te pähonoraa. Te mea ta ù e hinaaro atoà ra e parau atu, terä parau e, ua ìte òe i te mea maitaì. ahh.. ua ìte òe i te mea maitaì. Päpü maitaì ia ù e, aita e taata aita i ìte e, e mea maitaì terä, terä ia parau no te mäa, te reira mau mea rii. Te uiraa i ô nei e te manaònaòraa, ua ìte änei ra hoì terä taata e, no hea mai terä maitaì. Te reira paì te tahi uiuiraa i roto i terä parau ârauaè ra, e mea maitaì, te toe noa, ia au ta te parau faaìteraa, ua ìte ra änei hoì terä taata e, terä maitaì ta na e ìte ra e mea maitaì, no hea mai te reira òhipa. Tei roto te reira manaò, horoà mai te tahi türamaraa i nià i teie manaò.

Iotua Ioane òrometua : Aita. Tei nià noa teie manaò e, e parau paì ta te Atua i te taata tätaì tahi, taata hoê, te piti, te toru, hänere noa atu. Mai te peu paì nä te Atua iho e parau, te hiò ra ia vau ia ù i nià i to ù tiàraa tävini. A fea ia vau e parau ai, e parau änei ra hoì ta ù, tei ô paì, e aore ia e mämü noa ihoä ia. Te vai ra ihoä ta te Atua parauraa ia ù, ua ravaì i ô, e te vai ra ta te Atua parauraa i te tahi i pihaì iho noa ia ù, ua ravai noa i ô. Ta ù ra tuhaa, a fea ia, te reira noa.

Rautï : Turo : E, terä taata e färii noa ra terä mau maitaì, ua ìte änei ra hoì o na e, no hea. Te vai ra te taata, òaòa o na i roto i te maitaì, e te taime atoà te reira te Atua e moè-roa-hia ai. Ia fifi rä, e pari o na nä te Atua no te mea, nä te Atua i pärahi noa ai o na i roto i te ère. Te auraa, te taata te tahi taime, e haamanaò o na i te Atua i roto i te maitaì e aore ia, e moèhia te Atua i roto i te maitaì. Te vähi rä e päpü, ia faaroo paì tätou i te tahi mau parau ta te Mäòhi, te haapii noa ra paì te Atua i te taata i te ora nä roto i ta na rahu. Ia uaa anaè te tahi räau, te taa ra i te taata e, terä ia to na faanahoraa i tai. Ia hiò te taata i nià i te raì, ua ìte ia o na e, terä ia te fäito mäa e tanu e te taime tanuraa. Te auraa, te tüàti noa ra te taata i te Atua mai te peu, e faaea fätata o na e te fenua. Te taime rä te taata e ätea ai i te fenua, e moè atoà te Atua. Te mea ia ta tätou e ìte ra i teie mahana, e ora ai te taata i roto i te tahi oraraa fänaò, rave òhipa na te hau, te tahi vähi mea tämatahiti o na i te färerei i te fenua. Âreà terä taata e ora ra i nià i te fenua i te mau mahana atoà, eita te Atua e moèhia ia na. E haamanaò noa o na i te haamaitaì i te Atua no te mea, ua ìte o na e, terä ta na e fänaò ra, e mea horoàhia mai. Ua ìte te taata täià, ia haere te taata täià, ua taa ia na e, terä ià rahi i horoàhia mai i teie mahana, e horoà terä nä te Atua. Eita o na e nä ô e, ah..a rave mai na ta täua mätini, a patapata mai na, e hia te roaa i terä. Aita, haamauruuru i te Atua, te vai ra, e ìte, te vai atoà ra, eita e ìte. Te vai ra e haamauruuru i te Atua, te vai ra eita o na e haamauruuru i te Atua. Ia fifi rä, i reira ia e taì ai i mua i te Atua. Eere terä, te vai ra terä nä huru i roto te taata.

Terä manaò hopeà, te nä ô ra, ua parau mai te Atua, ua ravaì. Te nä ô mai ra te Atua, ua ìte òe, e te hinaaro o te Atua, täua, o òe e o vau. Mai te peu e, e pärahi täua te tahi vähi, o òe e o vau, na ù e haamata i te parau, e oti, e nä ô mai òe, e aore ra e nä ô noa òe i roto ia òe, ua ravaì ihoä terä. Inaha, na na e paraparau ra, e fiu teie taata mai te peu, o vau te parau. E nä ô òe, paraparau noa òe, na ù e faaroo, eita e maoro e faaea vau i te parau. Ta te Atua e hinaaro, e tauàparau, parau atu vau ia òe, haapaò atoà mai ra òe e aha ta ù e parau atu ra. E manaò to òe, a parau atoà mai, i reira e maitaì ai te paraparaura. Mai te peu, e vaiho noa òe ia ù o vau anaè e paraparau, eere te reira ta te Atua e hinaaro. A parau, a parau atoà mai òe, te parau atu ra vau ia òe, te faaroo mai ra òe. A parau atoà mai, aita ihoä rä tätou e faaea nei i te parau, e tämau rä i te parau. Te auraa ia o terä parau e, täua, o òe e o vau, eere o vau anaè, eere atoà o òe anaè. Aita, täua, parau òe i te Atua, te parau mai ra te Atua e aore ra, i roto i te mau parau ta òe e taiò ra, te märamarama ra òe i te hinaaro o te Atua. E pähono atoà òe ia na, ia tupu terä tauàparauraa. Mai te peu, e haere pae hoê noa te parau, eita e maoro e fiu te roaa mai. No reira, eiaha e fiu, te tiaì noa mai ra te Atua ia tätou, te taata tätaì tahi ia parau ia na, terä.

Rautï : Vaetua òrometua : To te rururaa, ua hope roa terä parau ta tätou i ô nei i roto i terä nä uiraa e toru. Ârauaè tätou e färerei faahou ai, ua tae te hora tätou e tämäa ai. Faahoìhia ta tätou òhipa i roto i te Tuhaa 3.

Taehau òrometua : Ua ìte tätou i te mea maitaì. E terä ta tätou e ineine nei e haere e färii, mea maitaì anaè ia, ta te Tumu Nui ia horoà mai i roto ia tätou e täpaò no to na here e to na aroha. Ta te Tamaiti i haere mai e haapii ia tätou, nä hea e färii i te mea e àmu, i te mea e inu. Ia àmu anaè tätou, e ia inu anaè hoì, haamanaò tätou e, mea maitaì ta te Atua i horoà mai. Tämäa maitaì.

Partager cet article

Repost 0
Published by Mapuanga terai
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens