Overblog Suivre ce blog
Editer l'article Administration Créer mon blog
7 février 2013 4 07 /02 /février /2013 15:52

PAE TAHARARAA MAHAMA

 

 

Uiraa 1 : a - Ua faaìte mai o ia ia òe i te mea maitaì. Ua faaìtehia òe i te mea maitaì. Ua ìte òe i te maitaì : E aha te tauiraa ta òutou e ìte ra i roto i te tauiraa e te huriraa. e – E aha to te Tumu Nui hinaaro ia òe maori rä. Aita atu to te Tumu Nui hinaaro ia òe maori rä : E aha te haapäpüraa ta teie huriraa e faaìte mai ra (Rautïhia mai e Vaetua òrometua).

 

Pähonoraa a te pupu Mämä 2 (Vauvauhia e Tuteanäiva v.) : Te Atua e o òe. Ua faaìtehia òe i te mea maitaì. Te tahi e o òe. Ua ìte òe i te mea maitaì (manaònaò). O òe. a) - Aita e tauiraa, te mea e hinaarohia ra, ia ìte òe i te mea maitaì. e) - Aita atu ai to te Tumu Nui hinaaro ia òe maori rä, O òe e te Atua, Färii, Faaìte. Ia tupu te ôpuaraa a te Atua. Ia ìte noa òe i te mea maitaì.

 

Pähonoraa a te pupu Päpä 4 (Vauvauhia e Âmona v., pipi òrometua) : E 3 huriraa taa ê te tahi i te tahi. Ua faaìte mai o ia ia òe : « te faufaa o te taata e parau mai ra. Terä ia taò « mai » : mäìtiraa tià e te âfaro. Te auraa, e haere i nià ia òe. « Ua faaìtehia òe » : te mäìti-òre-raa e o vai. Tei roto te « òe », eita e tià ia ôtohe, eiaha e òuà i räpae. « Ua ìte òe » : te vähi tei reira òe, eiaha e neva vähi ê. Te toe noa, te färiiraa e te raveraa. Rau noa atu ai te mau huriraa, tei te parau « òe » te faufaaraa. Aita atu to te Tumu Nui hinaaro ia òe maori rä.  E, e 2 huriraa taa ê maitaì : A tahi : Te taò « e aha » : tei roto te rauraa o te hinaaro o te Atua ia òe. Tei roto atoà i te ìmiraa i te tumu o te òhipa. Te piti : Te taò « aita atu » : tei roto i te haapäpüraa e te vai mau ra te tumu, aita to te taata e tiàmäraa. Aita e ìmiraa i roto. Te haamanaò mai ra teie taò i te vairaa o te tumu.  

 

Pähonoraa a te pupu 3 Päpä (Vauvauhia e Roonui òrometua) : a) - Ua faaìte o ia ia òe i te mea maitaì. Ua òhipa te Atua no te ìteraa òe i te mea maitaì. Ua faaìtehia òe i te mea maitaì. Haamanaòraa ia òe, ua òhipa te Atua i ìte ai òe i te mea maitaì. Haapäpüraa, te òhipa ta te Atua i rave i ìte ai òe, tei roto ia òe, aita faahou i mua ia òe, tei roto ia òe. Te toe ra ia òe, E aha atu ra ta òe faaìteraa i te reira maitaì ta te Atua i tuu mai i mua i to òe aro. E aha to te Tumu Nui hinaaro ia òe maori rä.  e) - Aita atu to te Tumu Nui hinaaro ia òe maori rä : - E aha : taò faaui, tïtauraa i te taata e, e aha to òe manaò i nià i te hinaaro o te Atua. Te vai ra terä huru manaò e, täuàparauraa e te Atua. Te tiaì ra te Atua i ta òe tatararaa i nià i to na mau hinaaro. Te parau e, Aita atu. Aita ia to òe e manaò faahou. Eiaha e feruri faahou. Eiaha e ìmi faahou. E aha paì ia ta tätou e faahua ìmi noa ra. Inaha hoì, ua oti. ua rave te Atua te räveà ia ìte òe. Haamanaòraa e, ua faaìtehia òe. E haapäpüraa e, tei roto ia òe. Eiaha e ìmi faahou.

 

Te mänaònaòraa o te pupu, eiaha paì te arataìraa haapiiraa na tätou i nià i teie uiraa, e riro ei ôpanipaniraa i te mau manaò o te taata. Mai teie te huru, ia tae anaè i te taime täuàparauraa, ua parau-anaè-hia mai òe terä parau e, Ua ìte òe. Te auraa, te parauhia mai ra ia òe, mämü. Ia ora na.

 

Rautï : Mana : Terä, e tano tätou e haamauruuru i te manaò o te pupu. Ia nä ô anaè terä manaò hopeà e, teie noa aita atu. E terä hoì na mua mai, e tano ia haapäpühia e, i mua i te huriraa e te tauiraa, te vai ra ihoä te tahi vähi e tano tätou e hiò maitaì. Eere no te taui noa. Te mea e tano e täpeà mai i roto i terä rahiraa manaò ta te mau pupu i feruri mai, teie ia : Te vai ra te tahi huriraa i roto i te pïpïria, ua tauihia, e tumu ia. Eere no te taui noa. No te ìmi rä i te mau räveà atoà, ia ìte-maitaì-hia te faufaa o te mea e hinaarohia ra e parau. Te uiraa 1, tei roto ia i terä tauiraa matamua tei ravehia mai i roto i terä tuhaa matamua ta te ìrava e faaìte ra. Te huriraa tahito te nä ô ra : Ua faaìtehia òe e te taata na i te mea maitaì, terä òe (terä ia taata e parauhia ra). Te auraa, e tano tätou e faaòre i terä tuhaa e nä ô ra : E te taata na, inaha tei roto ê na o na i te òe. E toe mai ia te parauraa e : Ua faaìtehia òe. E no te mea ua faaìtehia òe, ua ìte ia òe i te maitaì. E tano tätou e haapoto faahou ä i ta tätou huriraa, Ua ìte òe i te mea maitaì. Mai te peu e täpeà noa mai tätou i terä huriraa matamua, ua faaìtehia òe e te taata na i te mea maitaì, e òhie te taata i te uiui : Na vai e faaìte mai ia ù. Aita vau i faaìtehia. Te reira te manaò e vai ra i roto i te taata, ia nä ô anaè tätou i te parau e : « Ua faaìtehia òe e te taata na ». Âreà, ia nä ô anaè tätou i te parau e : « Ua faaìtehia òe », te manaò, tei nià ia i te taata rave. Te taata na na i parau i teie. Te haapotoraa mai ta tätou i parau iho ra e, ua faaìtehia òe, ua ìte òe.

 

Mai te peu e faaea noa tätou i nià i terä uiraa matamua, terä ia i horoàhia atu. Ia nä ô anaè rä tätou e : ua ìte òe. E tano rii ihoä mai terä ta te pupu e haamanaò mai ra. Aita to te taata e hororaa faahou. Eita paì te taata e tano faahou e parau, aore ra eere tei nià i te taata rave. Eiaha no te mea aita i faaìte-roa-hia, oia. Tei roto ia i terä  tuhaa, ua faaìtehia òe, tei ô. Te manaò rä, eere ia tei nià faahou i te òhipa. Ua ìte òe, tei nià rä i te tupuraa o te parau, te reira te mea e tano e täpeà, ua ìte òe i te mea maitaì.

 

Te piti o ta tätou parau e hiò mai, terä ia huriraa ta tätou i parau iho ra, e aha to te Atua hinaaro. E aha to te Tumu Nui hinaaro ia òe, maori rä... I roto i teie huru hämaniraa parau, e piti manaò e hinaarohia ra e haafaufaa. Eita e òre, i roto i te feiä i huri, te vai ra te tahi hape ta rätou i ìte, no te mea i roto i te ìrava 1, eita e tià e haafaufaa e 2 manaò. I ô nei, e nä ô ia tätou, e täpeà ia hoê, hoê te vaiho.

 

Ia ui tätou, e nä ô ia i te parau e, e aha to te Tumu Nui hinaaro. E faaìte ia te hinaaro o te Tumu Nui, ua ravaì i ô. Te piti, mai te peu e tatara i te uiraa, e nä ô ia i te parau e, teie te hinaaro o te Tumu Nui, maori rä. Ia haapäpü-anaè-hia teie parau, teie to na auraa, teie noa te hinaaro o te Tumu Nui, tirä ra atu ai. Ia hiò maitaì anaè tätou i roto i teie huriraa e te tauiraa, aita te Atua e hinaaro ra e faateiaha i te taata. Ua teiaha anaè te taata i roto i ta tätou mau faanahoraa, eere ia no te hinaaro o te Atua, e hinaaro taata rä te reira. Te nä ô noa mai ra te Tumu Nui, teie noa, tirä ra mea ta ù e hinaaro nei.

 

Eita e òre, ia hiò-anaè-hia to tätou oraraa faaroo, ua apiapi roa, ua uru-räau-hia i te mau faanahoraa : Eiaha terä, eiaha terä, eiaha terä, eiaha terä. Ta te Atua e haapäpü mai ra na roto mai ia Mita, e 3 noa mea : Rave i te parau tià ; Ia anoenoe noa i te aroha ; Haere mai te haèhaa ; Haere e to Atua. Te mea noa ia e tïtauhia atu ra. Terä noa te hinaaro o te Tumu Nui. Mauruuru.

 

Rautï : Vaetua òrometua : E, terä mai te manaò i faaravaìhia atu i roto i terä nä pähonoraa matamua. Tei ia tätou ra te paraparauraa i teie nei, to te rururaa.

Taarii òrometua : Mauruuru maitaì i te tatararaa. Aita te manaò to nià iho roa i te auraa o terä tatararaa i horoàhia mai ra e mana. No nià iho paì i te haereraa o te mau ìrava, märamarama maitaì ia te manaò i ô. Te manaò, te manaò matamua, täfifi rii noa ra paì no te mea, aita paì e räveà no te haapäpü rii atoà paì ia tätou i roto no te mea, e parau teie no te huriraa. E hinaaro ihoä ia vau e tütonu eiaha i nià i teie huri ta to tätou mau metua i vaiho mai ia tätou. E hinaaro rä e tütonu i nià i te päpaìraa tumu. Aita ia te reira òhipa i ravehia. Te tiàturi noa atoà ra ia e, aita tätou i ätea roa ra i te mea e hinaarohia ra ia märamarama tätou. I roto rä i te türamaraa e horoàhia mai ra, i roto noa i te taa-ê-raa o nä ìrava, terä e horoàhia ra i te 2 e aore ia terä i te 1, ia nä ô anaè : ua faaìtehia òe. Hape atu ai au, te reira te huriraa matamua. E ia nä ô anaè : ua ìte òe. Mai terä ihoä ia ta òe e tatara ra, e 2 ihoä ia vairaa o te parau taa ê roa. Te parau matamua, te huriraa matamua të nià ihoä ia i te taata na na te òhipa i rave. E te piti, të nià ihoä ia i te taata no na te parau, no na te âpoo tarià e parauhia ra. Te uiuiraa noa i ô, e roto atoà ia mätou te pupu, to nià ihoä ia i te uiraa paì i te nä-ô-raa e : no te aha atoà te feiä päpaì i päpaì ai mai terä. Aita paì rätou i tae roa i te türai-roa-raa i te manaò i nià i te hoê parau, mai te huru ra te hoê parau oti. Të ô ta mätou uiuiraa. No te aha i faaea noa ai mai terä. Te reira huru hiòraa i roto i ta tätou, tätou i ô nei teie rururaa òrometua, hinaaro atoà ra e tïtau no te aha mai terä ai. No te aha te parau a te Atua i tae mai ia tätou ra, i vai noa ai mai terä. Aita o na i tae roa, türaì roa i nià iho i terä huru parauraa e : ua ìte òe. Te taa maitaì ra ia tätou e, e 2 huru vairaa o te parau. Të ô rä mätou i te uiuiraa. Aita atoà ihoä ia mätou i horoà i te tahi pähonoraa. E uiraa rä ta mätou e hinaaro ra i te uiui i ô. Aita änei e tumu mau, vaiho rii noa mai ai te Atua i te tiàmäraa i roto i te taata. Hoê ä ia huru uiraa ta ù e terä parau i raro iti noa mai.  Terä paì ia : E aha to te Tumu Nui hinaaro, e terä aita atu maori rä. Hoê ä huru manaò ta mätou, ta te pupu e hinaaro i te ui i ô i nià i terä no te mea, te tumu matamua no te uiraa, terä ia ta ù e tuu atu ra. E tano änei tätou e türaì roa i te uiraa mai terä. Mai te peu e, te tumu e te parau no reira mai teie huriraa ta tätou, e aita i täpae i nià i terä. Te reira hoì huru, nä fea ia parau anaè, te tïtauraa i ô, te taahia atu ra te manaò. Mai teie ihoä ia poìpoì mai  oia hoì, e tütonu te manaò i nià iho i te taata no na te âpoo tarià e parauhia ra.  Oia hoì o tätou ia, o òe. Te reira rii noa te uiuiraa i ô, e to mätou mau manaò paraparau i nià i te reira mea. Aita e manaò oti, ua hinaaro rä mätou e täpaò e parau feruri i roto i teie rururaa òrometua.

 

Rautï : Turo : Aita, mauruuru i terä mau manaò. I mua i te mau parau mai teie, terä ihoä te tahi uiuiraa, terä i tuuhia mai i mua ia tätou. Ua paari mai tätou i mua i terä uiraa. Mai te mau òhipa atoà rä e ravehia, te vai ra te maitaì, e ia tae i te tau e tano e ìmi i te räveà e haamaitaì faahou atu ä. Eere i te faahaparaa i terä i ravehia mai, e tano rä te parau e türaì. Te reira noa te mea e tano e parau i nià i terä tuhaa. Te manaò matamua : Faaìtehia òe te taata i te mea maitaì. I roto i terä ìrava, e tano paì e faatopa i terä : e te taata na. No te mea, o òe terä e parauhia ra, ua faaìtehia òe. No te haamämä ia, e i roto i terä haamämäraa e haere mai ihoä te haapäpüraa. Mai te peu ua faaìtehia òe, mea maitaì. Te auraa ra, ua ìte ia òe te mea maitaì. Hoê paì huru ahiri i tuu mai te tahi ìrava i mua ia tätou : ua âufauhia ta òe tärahu. E aha ta terä taata, terä e parauhia ra e märamarama mai. Peneiaè o ia i te märamarama mai e, ua pee taù tärahu. Aita ihoä ia i parauhia ua pee ta òe tärahu. Ua parauhia, ua âufauhia ta òe tärahu. Ta na rä i märamarama mai, ua pee ta na tärahu. Mai te reira rii atoà ia i ô nei : ua faaìtehia òe i te mea maitaì. E aha te auraa, ua ìte ia òe i te mea maitaì. Terä, tätou terä e hiò ra i te manaò e parauhia ra. Mai te ìte maitaì e, terä i faahaerehia mai, e faaea noa i ô. Teie nei, te tämata ra tätou i te türaì i te päpüraa o te parau i mua. Mai te reira atoà i roto i te 2. No nià ia i te hämaniraa parau : E aha to te Tumu Nui hinaaro ia òe maori rä. Terä taò maori rä, mea faaòhipa roa te taata i teie mahana. Te rahiraa rä o te faaòhiparaa, mea hape. No te mea, te vai ra to na faanahoraa ia faaòhipa anaè i terä maori rä. Ia faaòhipa-anaè-hia te maori rä, ômuahia mai te ìrava i te tahi taò « eita » e aore « aita ». No te parau e, eita terä òhipa e tupu. Teie noa te räveà e tupu ai. Te manaò ia i roto i terä maori rä. Tähape na mua « aita » e aore ra « eita ». E ia oti faaìte e, hoê anaè räveà. Terä ia maori rä. Te auraa, ua nä reira anaè, no terä maori rä eita te uiraa e tano i ô. Ia tuu anaè i te uiraa e aore ia, ia tuu anaè i te uiraa e nä ô ia : E aha to te Tumu Nui hinaaro ia òe. No te mea e uiraa, te tiaì mai ra ia terä uiraa i te pähonoraa. Muri iho e faaìte e aha to te Tumu Nui hinaaro ia òe. Terä e 2 manaò, e mäìti. E aha te rave, e rave i te uiraa, ia hope aè te uiraa e tuu ia i te pähonoraa. Mai te peu e rave i te maori rä, na mua i te tuu aita. I reira noa ia e tano e rave i te maori rä. Mai teie atu ra ia, aita, aita to te Tumu Nui hinaaro ia òe. Oia, oia, te vai ra teie noa maori rä, i reira e faaìte ai. Ia rave-anaè-hia rä te maori rä, mai te huru no te hapa, no te ìriti i terä mea i na mua mai, i te parauraa e, eita. E rave au i te tahi hiòraa taa ê atu : haere mai te tamarii ia tätou e parau mai e fifi to ù. Te nä ô atu ra tätou, aita ta ù e räveà. Ua parau anaè tätou mai terä aita ta ù e räveà, e faaea te paparauraa i ô. Mai te peu rä e ìriti tätou i te tahi ùputa iti, e nä ô ia tätou : aita ta ù e räveà, teie noa te tahi maa räveà hopeà maori rä. I reira e faaìte ai i terä räveà toe, räveà hopeà. Mai te reira rii atoà te manaò i roto i teie tuhaa o ta tätou e hiòhiò ra. E aha to te Tumu Nui hinaaro ia òe. Te auraa, e mäìti tätou. E pähono i te uiraa, e faatopa i te maori rä. Täpeà i te maori rä, e ìriti i te uiraa, e tuu mai ia i te « aita ». Aita atu to te Tumu Nui hinaaro ia òe, teie anaè e aore ra maori rä, faaìte atu ai e aha terä hinaaro to te Tumu Nui ia òe. Te maori rä ia faaòhipa-anaè-hia, te faaìte ra o na i te mea iti. E rave no te tatara i terä parau i ômuahia mai i te nä-ô-raa e : aita. Mea nä ô te faaòhiparaa o te maori rä. Teie mahana ia faaroo anaè tätou i te taata ia paparau, aita e vähi e ùtamuhia atu te maori rä. Eere rä hoì mea na reira te tereraa o te reo. Te huru taataa rii ra.

 

Taarii òrometua : Te mea noa ihoä e vai ra i uiuiraa, aita ra hoì te reira i faariro ei fifi i roto i teie rururaa i ta tätou. Manaò anaè au i te mea fifi roa, ia roaa te pähonoraa päpü, e te maraa òre i te amo i te reira pähonoraa. Te riro noa ra rä ei uiuiraa na ù no te mea, te uiuiraa, eere të nià iho i te märamaramaraa roa o te parau. Te uiraa, të nià iho i te mea o ta tätou e faaoti. Mai te peu paì e nä ô tätou e, ahiri paha te mea tano aè, ua ìte o ia i te maitaì. Aore rä, aita atu e, te reira paì huriraa. Te mea ta ù e uiui noa ra, të roto ia i te huru e noaa mai ai ia tätou i mua i te reira huru parauraa. Oia hoì, ta tätou feruriraa, ta tätou arataìraa e te mau mea atoà o ta tätou e rave amuri atu i roto i to tätou oraraa faaroo. Te reira te vähi ta ù e hinaaro noa ra e täpeà ei uiraa na ù nei, taata hoê terä noa atu ua parauhia i roto i te pupu i rauaè ra. No nià iho rä i te märamarama o te tatararaa, te arataìraa o te ìrava, terä ta òe e haere ra, aita ia to ù e manaò i reira. Të nià iho rä i te mea o ta te reira huru faaotiraa i to tätou manaò, e faatupu i roto i ta tätou ìteraa e ta tätou faaòhiparaa. Te reira te mea o ta ù e hinaaro ra e täpiri noa atu i pihaì iho.

 

Rautï : Turo : Eiaha rä òe e manaò e, ua faanahohia te parau mai te tahi paì tïtö, mea âano i nià e mea oaoa i raro, eere mai te reira. Tuuhia ai te tahi tauiraa i roto i te huriraa, no te tämata i te faaòhie i te märamaramaraa o te parau. Te manaò i muri mai, i roto ihoä ia i te täuàparauraa e päpü ai. Te auraa, aita e âveià ua oti ê na i te faaìtehia, no te faaòhie noa i te märamarama o te parau. No te mea, terä e parauhia ra : ua faaìtehia ia òe e te taata na i te mea maitaì. Te auraa paì o te mea e parauhia ra, ua ìte òe inaha ua faaìtehia òe, të ô noa. Eere paì e, ua faatoro-ê-hia na e nä ô tätou i te haere, aita roa atu, no te faaòhie noa i te märamarama o te parau, tià atu ai.

 

Taoàhere òrometua : Mauruuru i ta tätou haapiiraa. Te tahi noa haapäpüraa te rautï, ta mätou taiòraa i ta tätou huriraa matamua e aore ra huriraa tahito, i roto i terä Mita 6/8 terä ia e : Ua faaìte mai o ia ia òe e te taata na. Te haereraa mai ta òutou, e haapäpü noa. Të hea mau na te huriraa matamua, të hea te huriraa âpï.

 

Rautï : Turo : Te reira, ia pärahi òaòa noa paì òe. Ua tano. Ua faaìte-atoà-hia rä òe.

 

Maitoà òrometua : Mauruuru i te tatararaa. Terä ra, faaroo anaè atu vau i te tatararaa, hinaaro roa vau e parau i ta mätou pupu, ahiri e nehenehe mätou e hoì faahou e feruri i ta mätou uiraa. Aita vau e ìte e te taa mai ra änei òutou i teie manaò. Aita òutou e taa mai ra. No te mea, vähi ê roa ta mätou i haere, märamarama ai i roto i te uiraa. Te reira te vähi o ta ù e manaò ra e, ahiri mätou e hoì faahou. No te mea, mea faufaa roa paì te parau. Teie to na auraa, eiaha e fifi mai. Ahiri e hämani faahou mai òutou i te tahi uiraa e, no te mea ua paparau rii ihoä ia mätou i rauaè ra e, e aha teie huru uiraa. Ua haere rii uiraa maternelle roa teie uiraa ta tätou. Te ìmiraa paì i terä faataa-ê-raa i te tahi. Pere päìmiraa ia mätou i te uiraa e, aita e taa faahou e aha atu ra te faahopeàraa. Terä tatararaa òe, mea ê roa te mea e hinaarohia mai ra. Ahiri e. O mätou atoà paha të faaea noa i roto i terä. No te faufaa rä o te parau. Ia tae anaè mai paì te huriraa, teie huriraa âpï, e huru òhie atoà paì te manaò i te faatoro atu. Te reira te manaò e hinaarohia atu ra, ia tae anaè mai teie huriraa âpï. A fea te reira huriraa âpï e tae aè ai. 

 

Uiraa 2 : a - E aha te mea e hinaarohia ra i te taata : te raveraa i te parau tià, aore ra, te mea tià. e - E aha te taa-ê-raa ta òutou e ìte ra i roto i te hinaaroraa i te aroha, e te anoenoeraa i te aroha (Rautïhia mai e Vaetua òrometua).

 

Pähonoraa a te pupu Päpä 1 (Vauvauhia Teriimana, pipi òrometua ) : a) - E aha te mea e hinaarohia ra i te taata. Te raveraa te Parau tià aore ra te mea tià. Te parau tià e te mea tià, Ua täpeà mai mätou te mea tià no te mea, ia paruparu, ua topa, e ìmi te räveà ia tià. Ia tià te parau nä roto i te taata. e) - E aha te taa-ê-raa ta òutou e ìte ra i roto i te hinaaroraa i te aroha e te anoenoeraa i te aroha. Te hinaaro : Aita i tae, aita i tupu, aita i fätata, mea nä räpae i te tupuraa e, e ôtià to na, to te hinaaro. Te anoenoe : Eere mea faaue, to roto aita e faueraa, e òhipa ora e aita e ôtià.

 

Pähonoraa a te pupu Mämä 1 (Vauvauhia e Teriimana v.) : a) -Te mea e hinaarohia ra i te taata, ia rave nä mea e piti, te Parau tià e te mea tià. e) -Te taa-ê-raa e ìtehia ra i roto i te hinaaroraa i te aroha, e te anoenoeraa i te aroha. -Te hinaaro, no te mea aita ta òe. E na te hinaaro e türaì i te taata ia roaa ia na te mea ta na e hinaaro. -Te anoenoe, ua färii òe i te aroha, e o ta òe i àtuàtu, poihere ia vai noa. Aita anaè e hinaaro, aita atoà e tupu te anoenoe.

 

Rautï : Poehere :E, Mauruuru maitaì i te pupu no ta tätou mau pähonoraa, ta tätou i faaìte mai. Ia hiò-anaè-hia i ta tätou pähonoraa, te vai ra ihoä te vähi e tüàtiàti noa ra i nià i te faaravaìraa, e te vai ra ihoä te vähi e tano tätou e hiò faahou. Te nä ô ra ta tätou uiraa : E aha te mea e hinaarohia ra i te taata, te raveraa i te parau tià aore ra te mea tià. E te piti o te tuhaa, e aha te taa-ê-raa ta òutou e ìte ra i roto i te hinaaro i te aroha e te anoenoeraa i te aroha.

 

E rave mai tätou i terä tuhaa matamua, no te tautururaa ia tätou i te òhie i te märamaramaraa i teie nä parau, te parau tià e te tià, aita atu ia mai teie. E rave òhipa tätou, ta tätou òhipa o te hämani fare. Te vai ra to te tïmä, te vai ra to te âuri, te vai ra to te pape, e te vai ra to te uira, etv… E rave ihoä te reira i ta na tuhaa, e rave mai te reira i ta na tuhaa, e te reira i ta na tuhaa. Te maitaìraa rä, aita atu ia o te fare ia. Te auraa ra, ta ù tuhaa, o te rave i ta ù tuhaa. Ta ù ia e parau e, o te mea tià. E rave mai te reira i ta na tuhaa, e rave mai te reira i ta na tuhaa, ia âmuihia te täatoàraa o te mea tià, aita atu ia maitaìraa, o te fare ia.

 

Ia rave mai tätou i te parau no te parau tià. E tano tätou e haapäpü i reira e, eita e haere ia tätou e faatupu i te parau tià. E rave rä te taata i ta na tuhaa, te reira i ta na tuhaa ia au i to na tiàraa e te mea e maraa ia na i te rave. Mai te peu e, e taata tämaumau âuri e aita atu, te reira ia ta na òhipa. E rave rä o na i te mea ia au i te tuhaa e mauhia ra e a na. E rave o na i te mea tià, e rave mai te reira i te mea tià. Ia âmui mai te täatoàraa o te mea tià, e nä ô ia tätou i te parau e, e tupuraa te reira no te parau tià. E rave mai ihoä rä te reira i ta na tuhaa, e te reira i ta na tuhaa ia au i te mea e maraa ia na i te rave.

 

Haamanaò tätou i terä reo iti o te Fatu i te parauraa e : « tei maraa ia na i te mea iti ra, ua maraa ia na i te mea rahi » Ia hinaaro òe ia rave i te mea rahi, aita atu ia i te haamata i terä mea iti, ia päpü to òe manaò i ô ra, e tano òe e rave i te mea rahi. I nià rä i te tupuraa o te òhipa, aita atu ia. E rave te reira i ta na tuhaa, e rave te reira i ta na tuhaa, te mea e tià te reira.

 

Haere mai tätou i te piti o te tuhaa, terä ia e na ö ra e :  « E aha te taa-ê-raa ta òutou e ìte ra i roto i te hinaaro i te aroha e te anoenoeraa i te aroha ». Te hinaaro, mai terä ihoä ta te pupu e pähono mai ra. Na ö ia tätou i te parau e, ua täôtiàhia te hinaaro i nià i te mähäraa o te hinaaro o te taata. Te mea ta te taata e hinaaro ra, ia roaa anaè, ua oti. Ua mähä atoà, ua topa atoà to na hau, e ua oti atoà te parau o te hinaaro i reira. Eita o na e hinaaro i te tahi mea tei roaa ia na. E hinaaro noa o na i te mea e aita ta na.

 

Ia rave mai tätou i te parau no te anoenoe : Aita, te anoenoe, o te tahi ia taata faarooraa e te raveraa i te tahi òhipa. E te reira òhipa tei faaòaòa oia, ia na. Te auraa ra, terä to na òaòaraa. E teie òhipa, e òaòaraa vai tämau ia i roto ia na,  i roto i to na ôpü. E rave na tätou i te tahi hiòraa : Te parau no te feiä himene, te feiä òri. Te feiä tei here i te òhipa òri e tae noa atu i te feiä te here i te òhipa himene. Maoro noa te tahi pehe i te paaìnaraa, te haùtiùtiraa iho. Oia atoà no te feiä himene, maoro noa i te faaòtoòtoraahia i te himene, te himene-atoà-raa, te âpee-atoà-raa. Te auraa, tei roto i to na opü te vairaa o te reira mea. Eere rä te parau no te anoenoe e i te mea haere e faaìteìte i te vähi taata. Te auraa ra, nä ô ia tätou i te parau e, aita te anoenoe i haamauhia i nià i te mata hiò òaòa o te taata. Tei roto ia òe, te roto i to òe ôpü. Te auraa ra, to òe terä òaòaraa i te mau taime atoà. Aita atu ä, e hinaaro to te Atua ia tätou, ia anoenoe faahou tätou i te aroha, Ia ora na.

 

Uiraa 3 : a - E aha te parauraa tano : haere mä te haèhaa, aore ra, haere mai te haèhaa. e - Haere i mua i te aro o te Atua, aore ra, haere e to Atua. E aha te türamaraa ta teie huriraa e horoà mai nei i nià i ta tätou hiòraa i te Atua (Rautïhia mai e Vaetua òrometua).

 

Pähonoraa a te pupu 2 Päpä & Mämä òrometua (Vauvauhia e Mähine v., pipi òrometua) : Teie ta te pupu i manaò mai. Nä mua roa, ua horoà mai te pupu i to na manaò i nä parau e piti, oia hoì « haere mä te haèhaa & haere mai te haèhaa ». Teie to na manaò i nià i te parau matamua : « haere mä te haèhaa » : o òe e te haèhaa ia haere, aita e hinaarohia ia haere te taata o na anaè. « Haere mai te haèhaa » : eere ia te tahi mea no roto ia òe, te tahi mea e vai ra i räpae. E te hiòraa tano ta te pupu i täpeà mai : « Haere mä te haèhaa ». e - I mua i te aro o te Atua : Hoê terä e tiaì noa mai ra ia òe. E to Atua : Hoê terä e haere nä muri ia òe. Te vai ra hoê mea ätea, e te vai ra tei pihaì iho noa ia òe.

 

Pähonoraa a te pupu Mämä 3 (Vauvauhia e Temeehu v.) : E aha te parauraa tano. Haere mä te haèhaa aore ra haere mai te haèhaa. Haere mä te haèhaa. Òe e to òe Atua. Haere mä te fäito e maraa ia òe. Haere i mua i te aro o te Atua aore ra haere e to Atua. Haere e to Atua. E huru e hohoà no te Atua. Te nä ô ra te Fatu : tei roto te Metua ia ù, e tei roto vau i te Metua. Te auraa, òrua ia haere : òe e to òe Atua.

 

Rautï : Turo : Faaravaìraa no te uiraa 3 : Tei nià ihoä tätou i teie parau no te huriraa. « Haere mä te haèhaa » aore ra « haere mai te haèhaa ». Terä atoà te tahi nä parau aita te taata e haapaò ra, eiaha e, haapaò, aita atoà ihoä e taa faahou ra i teie parau, ua haapaò parau noa. Te taata e faaroo mai ra, e au ra e te taa atoà ra, òre noa ai e taa. Te vai ra to räua faanahoraa, aita rä tätou e haapaò faahou nei. Rave na nä mua te « mä ». Mea nä fea te faanahoraa o te « mä ». Te « mä » hoê ä o na e terä « mä » ta tätou e faaroo ra ia faaòhipahia i roto i te nümera. Ia parau tätou « àhuru mä hoê ». Te auraa,  te vai ra te àhuru, ua âmuihia atu te hoê. Ua haere « mai » o na, mea ê terä « mai », ua haere mai o na mä ta na pütë. I to na haereraa mai, ua haere mai o na e te pütë. Rave-anaè-hia terä « mä » no te faaìte i te tahi mea tei âmuihia i te tahi, aore ra te tahi taata tei âpee i te tahi. Rave na tätou i terä parau te hämaniraa te Atua i te taata. Te huriraa, tei päpaìhia, te nä ô ra, a hiò maitaì iho no te haapäpü, mai te peu e hape au ra, faaâfaro mai : « E ua hämani iho ra te Atua i te taata mä to na huru e to na hohoà. Täpeà tätou i terä « mä ». E aha te auraa, ua rave te Atua i te repo fenua, inaha ua hämanihia te taata i te repo fenua. Ua tuu atu te Atua i to na huru e to na hohoà i roto, hämani atu ra i te taata. Terä ia te mea e parauhia ra. Aita te Atua i hämani i te taata « mä » to na huru, ua hämani rä « i » to na huru.

 

Terä, ua päpaìhia, eiaha tätou e faaea faahou i terä manaò, tei päpaìhia, ua päpaìhia ia. Aita,  tei hape i roto i te päpaìraa ra, e tätaì ia. Te reira atoà ia te parau e tano e parau i teie nei. Te vai ra te taime e tano te « mä ». Hiò na tätou i te parau no te täne e te vahine, terä faautuàraahia. Te parau ra te Atua i te vahine, e fänau ta òe mä te mäuiui. Te auraa, te vai ra ihoä te mä, e tuu atoà ihoä atu rä i roto te mäuiui. A fänau mä te mäuiui. Te tahi mea tei âmuihia atu i te tahi. Haere mai na rä i teie nei i nià i te « mai ».  Te piti ia. « haere mai te haèhaa ». Parau marü noa, te òhipa « parau », te « marü », te faaìte ra te huru raveraahia terä òhipa. Parau marü. Mai te peu, e faataa maitaì au i terä nä mea, faataa vau i te òhipa e te huru raveraahia te òhipa, te reira taime au e tuu mai i te « mai ». Parau « mai » te marü, parau àtaàta noa. Te auraa, terä taata i te taime i to na parauraa, mea parau àtaàta noa. Ua âmui-noa-hia e te huru o te taata i roto i te òhipa ta na e rave ra. Ia faataa anaè au i nä mea e piti, ua parau o ia « mai » te àtaàta. Haere mä te haèhaa. Eita paì òe e rave i te haèhaa, âfaì nä muri ia òe. To òe rä terä huru i roto i ta òe haereraa, ua tuu òe ia òe i raro, ua haere mai te haèhaa. Terä ia te taa-ê-raa i roto i terä « mä » e terä « mai ». Haere mai te haèhaa. Te « mä », te tahi mea ta òe e âfaì nä muri iho ia òe, aore ra te tahi mea tei âmuihia i roto i te tupuraa o te tahi òhipa. Mai terä, hinaaro òe i te Atua mä to âau atoà. Te vai ra ihoä te hinaaro, tuu atoà atu rä te âau, tuu atoà atu te manaò, tuu atoà atu te värua. Ua tano ia te reira faaòhiparaa i te « mä ». Te âfaro ra terä.

 

Te pou rii ra tätou i raro. « Haere i mua i te aro o te Atua », aore ra « haere e to Atua ». E te faahopeà o te uiraa, te ani mai ra, e aha te türamaraa ta te huru huriraa e horoà mai nei i nià i ta tätou huru hiòraa i te Atua. Ia parau tätou e, « haere i mua i te aro o te Atua », te taa maitaì ra ia tätou te hohoà, tei mua te taata i te mata o te Atua. Aita e mea moè aita te Atua i ìte. I roto i te mau òhipa atoà, ta te taata e rave e te manaò atoà ta na e ôpua noa i roto i to na âau. E au atu ra e, te hiòpoà noa ra te Atua i te taata. Hoê te reira huru hiòraa i te Atua. Ia parau rä e « haere òe e to Atua », tei pihaì noa te Atua ia òe, eiaha no te hiòpoà ia òe, eiaha no te tämoemoe ia òe, no te mea rä hinaaro o na, òrua, òrua aè to òrua haereraa i roto i te oraraa. E hiòraa âpï terä i te auraa ta tätou e ìte ra i roto ia tätou e te Atua. Eere faahou atu ra teie i te Atua hiòpoà e te tämoemoe, e Atua rä tei hinaaro e haere âpipiti e te taata, te taata ta na i hämani. Haere e to Atua, haere i mua i te aro o te Atua. Te ìte ra tätou e, e huriraa noa paha, te vai atoà ra rä te manaò i muri mai, e te faaìte atoà mai ra i ta tätou huru hiòraa i te Atua. E piti hiòraa teie. Te vähi rä i täpeàhia mai, te piti ia, « haere e to Atua », oia hoì haere e to òe Atua. Terä « òe » ta tätou i onoono noa mai te poìpoì mai ä e tae mai i teie nei, no te haapäpü noa ihoä, mai terä paì ta te Atua e hinaaro ra, òrua aè paì i roto i te oraraa. I te taime atoà, hinaaro te Atua e, òrua ia haere eiaha no te hiòpoà ia òe, eiaha no te tämoemoe, aita. Eere te Atua i te Atua tämoemoe. Tiàturi rahi rä to na ia òe, no reira o na i hinaaro ai òrua aè ia haere. Mea taa ê atoà ia ta tätou oraraa i te reira auraa, te reira auraa âpï i roto ia tätou e te Atua, o òe e to òe Atua. Te auraa, te Atua, e parau no te taata tätaì tahi. No te mea, te tahi taime, ua mätau noa atoà tätou, te Atua, no te pupu, eere no te taata hoê. Ua parau anaè rä mai teie, aita, o òe, no te taata hoê ta te Atua e hinaaro mai ra. Haere òe e to òe Atua, tei pihaì iho noa o ia ia òe i te mau taime atoà, te mau vähi atoà. Aita o na i here mai no te hiòpoà, aita o na i haere mai no te tämoemoe, no te âpee rä ia òe, e mai te ìte atoà, ia hinaaro òe i te tauturu, te pihaì iho o na ia òe. Terä te manaò i roto i terä mau tauiraa i ravehia, te mau haapäpüraa i horoàhia i nià i te parau no te huriraa. Te ìte ra ia tätou e, eere no te tauiui noa, no te mea rä te vai ra te manaò ta te huriraa e faaìte mai ra, e e riro te reira i te tauturu ia tätou, te horoà atoà ia tätou te tahi märamaramaraa âpï i nià i ta tätou hiòraa i te Atua. Eita e roa roa atu te parau, ia hiò anaè au, e au ra te märamarama ra.

 

Tehaapapa òrometua : Terä, mauruuru maitaì te faataaraa te mä e te mai, e tano rii terä ta Maitoa e parauraa ârauaè.  Àhani i horoàhia mai te tahi uiraa âpi, ua haere mätou e hiòhiò. No te mea ua faaea noa pai i nià i te tatara i te « mai » i matauhia i nià i te faaauraa, aita, e hahi. Mauruuru maitaì no terä tatararaa. Ta ù noa uiraa, terä uiraa hopeà, no te hiòraa i te Atua, no nià noa ihoa terä e haere i mua i te aro o te Atua e to Atua aore ra mea tuu atoà mai terä haere mai te haèhaa, tei ô noa, no te mea ua hiò mai mätou terä e piti atoà.

 

Rautï : Turo : E haere mai te haèhaa e to Atua na mua atu, mai terä i mua i te aro o te Atua. Terä ihoä tuhaa matamua, mai te haèhaa. I muri mai e to Atua aore ra i mua i te aro o te Atua, ua täpeàhia mai rä i te piti, e to Atua.

 

Tehaapapa òrometua : E terä paì uiraa hopeà, e nä ô ra e : Terä paì hiòraa i te Atua, no nià ihoä i terä e piti e tià e te Atua, eere terä mai te haèhaa.

 

Rautï : Turo : Ua rave anaè te tahi, te vai ra terä. Te tahi huru hiòraa e täàmuraa i te Atua. Te manaò, mai teie : I mua i te aro o te Atua, tei mua noa òe te mata o te Atua. Terä ia manaò e parau atu ra, eere paì te Atua i te Atua tämoemoe, no te hiòpoà i  te taata. No te parau ia na, hei, haapaò maitaì te hape roa ra òe. I roto i terä parauraa e haere e to Atua, aita, aita te Atua e haere mai ra no te hiòpoà ia òe, no te tauturu rä, no te âpee, òrua e haere. E auraa âpï ta Atua e hinaaro ra e haamou i roto i te taata. Täua, täua e haere, âreà te tahi ra, aita ia. Te hiòhiò noa te Atua ia òe, e mea toiaha atoà te mata o te Atua e hiò noa mai.

 

Maitoà òrometua : Mai terä, òrua vai tei haere mai. O vau ihoä ia e ta ù vahine. Ia parau anaè rä, o vau e te Atua, a a, te vai ra paì te tahi vähi e tano änei e faahiti mai te reira. Òrua vai te haere mai. O vau e te Atua, aita ia e taa maitaì ra. Aita, no te huru, te hinaaro noa ra e haapäpü i te parau. E tano änei hoì e türaì i te paraparauraa.

 

Rautï : Turo : Aita, mauruuru, òrua vai te haereraa mai. Mäua mea, mäua e te Atua. Te fifi, eere te parau, mä te mararaa i te taata ta na parau. No te aha aita e maraa i te taata i te parau e, mäua te Atua te haereraa mai. No terä mea aita o na e päpü ra tei hea rä te Atua. Aore ra, mätau noa o na te Atua tei te ätea ê, te tämoemoe noa nei rä o ia ia ù. Terä, aita. Fätata paì, mai te tahi fäìraa faaroo, te mau vähi atoà o ta òe e haere, të pihaì iho te Atua ia òe. Aita ihoä paha ia te tahi puèraa e ìte mai ra, o òe anaè tei ìte. Teie nei, ia parau anaè, e tähitohito ihoä mai te tahi pae. Ia parau òe mäua te Atua te haereraa mai. A parau atu paì e haere mai. Terä, ua haamata te manaò tähitohito. Eere, no te parau aita e fifi. Ta te taata färiiraa mai i te parau, ua ìte mai ia täua e, aita te taata e färii maitaìraa terä huru paraparauraa. Àhiri e taata oraora ihoä, a mea òhie rii ia. Terä e te Atua, aita paì tätou mätau e, te Atua te tano atoà paì e faaea fätata i te taata. Mäua te Atua, o òe eo vau, te reira ta te Atua e hinaaro ra. Na te Atua e parau, o òe e o vau, mea òhie. Na tätou rä e parau i te Atua. O òe eo vau, täua e haere. Eita e òre e, i te tahi taime, ia rave tätou i te tahi òhipa i ôpuahia, mai te tahi tere, e ani tätou i te Atua, täua ia haere. Mai te peu aita te taata e faaroo ra i te parau, e òhie roa rätou i te parau. Ia parau anaè i te vähi taata, aita ia, e fifi rii tätou, e fifi atoà te feiä faaroo. Terä, aita tätou i mätau i terä huru parau. Terä paì huru auraa, terä fätataraa te Atua i te taata, e fifi ihoä ia tätou. E tumu ihoä ia e fifi ai, no te mea, aita atoà rä e maraa ia tätou ia âpee te Atua ia tätou. Ia hinaaro anaè tätou e haere i te tahi vähi tätou anaè, a rave noa ia i ta tätou òhipa mai ta tätou e hinaaro ra, mä te tiàturi e, aita te Atua e ìte mai ra. Te reira ta to tätou Atua e hinaaro ra. Hoê Atua aita e ìte mai, hoê Atua matapö, tarià turi e te vävä. Eere ra hoì mai te reira. Ia parau anaè tätou e Atua ora, terä ia to na auraa, mau vähi atoà ta tätou e haere ra, mai te taata paì, ia haere te taata i te vähi mahana, faanuu o na te tahi pae, tere to na ata. Faanuu te tahi pae, âpee te ata, aita o na e haere o na anaè. Aita atoà e tano e parau i to na ata, hei, faaea rii noa òe i ô, haere vau i ô aè. E aha ia ta òe ohipa âpee noa mai ia ù. Teie nei, te taata e te ata, mai te reira paì te auraa ta te Atua e hinaaro ra i roto ia na e i roto i te taata. Te vähi o ta òe e haere, te reira atoà vau. Te vähi o ta òe e haere, o vau atoà, täua. Aita e òre te taata te taiä i terä huru hiòraa i te Atua no te mea atoà paì ia i haafifi ai ra ia na. Hinaaro o na mai terä ata e parau ia na e faaea noa òe, eiaha òe e âpee noa mai ia ù. Aore ra, haere òe na mua roa, ârauaè òe.

 

Tehihio òrometua : Mauruuru maitaì, aita to ù manaò i nià i terä uiraa toru. Tei nià i te manaò i terä uiraa piti. Moèhia paì terä manaò i nià i terä taò, anoenoe. E tano noa paì e, e tatara maitaì paì.

 

Rautï : Turo : Te hinaaro päpü te hinaaro, e ìte òe i te tahi mea, hämani to òe manaò, ta na hiòraa, e faatupu i te hinaaro. A maha, ua pähonohia terä manaò to òe, ua oti, taòto te hinaaro, e mahana ê roa, ua ara roa mai, mai te reira te hinaaro.

 

Te anoenoe, aita, te òaòaraa o te tahi taata ia rave i te tahi òhipa. Òaòaraa na na ia rave i terä òhipa. Aita o na e ìte ra te fiu. Aita o na e ìte mai te mea e faaheporaa ia na. Aita paì e faufaa e parau. E au paì mai te tahi tamarii e parauhia ra e, paraù òe i terä vähi. Ua paraù o na i terä vähi no te au i te òhipa. Ua paraù atoà i vähi tei òre i faauehia. E te otiraa atu i te paraùhia, ua rave atoà te tahi, aita o na i fiu. Òaòa noa o na i te rave i te òhipa, e anoenoe ia.

 

Horoà-atoà-hia te tahi hiòraa no te tahi taata himene. Te vai ra te taata, fätata to na iho hutiraa aho e himene. Mau taime atoà, aita e mea, faaea noa o na anaè, aita e ùpaùpa, te himene ra. E faaroo anaè te tahi mea, te himene ra. E paaìna anaè te tahi âmaa räau, te fatu atoà ra te tahi pehe i nià iho.  Mai te reira noa o na. Paapaaìnaraa ihoä ra te tahi, te haùtiùti-atoà-raa. Aita te reira taata anoenoe e haere i roto i te fare pure, e hinaaro paì o na e òri. E tämaìhia mai e te mau tiàtono e te òrometua atoà paì. O te Atua terä e parau anoenoe. Aita, mai te reira rii paì te manaò o te anoenoe. Te tahi mea te riro ei òaòaraa nä te tahi taata, e te mea atoà e faaòaòa ia na i te mea o ta na e rave ra, e au ra.

 

Âneterea v. : Ia ora na e to te rururaa. Teie manaò, no nià ihoä i te mau parau ta tätou e manaònaò noa ra, e uiui noa ra. E haere e to òe Atua. Ia hiò-anaè-hia teie parau, aita e nehenehe tätou e ui faahou. Ia manaò anaè au, ua ora tätou. Ia pure anaè paì òe i te poìpoì, te ani ra òe i te Atua. E i roto i terä aniraa ta òe, ua moèhia e aha te òhipa o ta òe i ani. Te auraa, te ani ra òe i te Atua e haere òrua i terä mahana täatoà. Teie paì parau, te tahi mahana, ua färerei paì au i te tahi päpä, te hämani ra o na i to na fare, o na anaè. Aita e taata tauturu, hiò noa ra vau, e fare i te rahi, hoê taata hämani, nä ô atu ra paì au i terä päpä : Päpä o òe anaè terä e rave ra. Nä ô mai nei o na e : no te pähonoraa ia ù nei, e hoa aè ra e mämä, o vau e to ù Atua. Terä te pähonoraa o terä päpä. Aita atoà o ta ù e pähonoraa i muri iho, ua ìte ia vau e, i roto i terä òhipa o ta te päpä e rave nei, mea tauturuhia o na e to na Atua. Teie nei, i te tuhaa 1, ia haere anaè au i te mau rururaa, nä ô mai ihoä terä mau mämä : o òe anaè mämä André i to te fare. Nä ô ihoä vau ia rätou : E hö mä aè ra, o vau e to ù Atua.  Aita vau e tiàturi i te taata, mea tiàturi au i to ù Atua no te mea, mea òhie paì i te tiàturi i te Atua i te tiàturi i te taata. Haamanaò noa tätou i te tahi parau i roto i te Taramo, te vai ra terä parau i roto i te Taramo, mea mau roa na te mau òrometua, eiaha tätou e uiui faahou i teie parau. Taata e parau aita o na e parau e, o na e to na Atua te haereraa mai, mäuà ta na pure. Mäuà ta na pure, ia pure òe i teie mahana, ua tiàturi ia òe, o òe e to òe Atua. Te reira ihoä ta ù tiàturiraa, nä ô aè ra, òre noa vau e tiàturi, nä ô ihoä paha o na e, aita paha o na e haamanaò i te mea o ta na e ani  no teie mahana täatoà e haere mai i pihaì iho ia na. Tiàturi ihoä paha o na i te taata. Ia manaò anaè au, e haapäpü i ta tätou parauraa i teie mahana. Na mua aè nei, aita atoà vau e tiàturi nei, âuaè vau faaea noa mai o vau anaè iho. Terä e piti òrua, tiàturi noa ia òe i to òe hoa. Ia manaò vau, tiàturi e te vai ihoä te tahi i pihaì iho noa mai ia òe. To òe hoa ta òe e ìte ra, ua ìte ia to òe mata, te taime ra taa ê ai, i reira òe nä ô ai, te vai faahou ra hoê i pihaì iho ia òe. Aita òe e ère ra, pauroa te taime tei pihaì iho noa o ia ia òe, e arataì noa o ia ia òe. Te pö, të pihaì iho noa nei ia òe. Ia àoa anaè te ùrï, eiaha òe e haapaò atu tei räpae mai o na. Eere i te parau haavare teie. Ia ù, aita vau e haapeàpeà i te taòto i te pö, taòto noa vau i roto i te hau, te ùrï te àoa noa ra na räpae, òhipa o na ia. Aita te taata e haere mai i te pae fare no te mea, te tiaì noa ra te Atua ia òe i roto i to òe oraraa. No reira terä mau mämä, mai te peu i teie taime aita òutou i ìte te pihaì iho te Atua ia òutou, pohe anaè to òutou päpä, i reira òutou e ìte ai e, te pihaì iho te Atua ia òutou e a tiàturi, tiàturi paì terä mea. Eiaha paì tätou nä ô e,  to ù haereraa mai, to ù mämä anaè. Te taime rä aita e mämä, i reira òe e tiàturi ai. Te Atua te taata päpü roa aè i roto i te oraraa, noa atu e aha te huru e te mau fifi, ua tuu anaè òe ia òe i ô, vä noa. Terä, te horoà ra vau te tahi tauturu ia òutou mai te peu, aita òutou e märamarama tei pihaì iho te Atua ia òutou, terä mai te mau tauturu faaitoito te mau òrometua. Eiaha ia tae i terä mahana e faaea mai te mämä aore rä, ia reva anaè te mämä nä ô ai e, aita e paraparau i te Atua. Terä te taata päpü no te paraparau, eiaha paì e tïtau faahou mai te tahi taata paraparau. Aita, te Atua te paraparauraa tano, tatara noa ta òe puta, paraparau noa òe pauroa te poìpoì. Aita vau e nehenehe e haapii ia òutou, ua haapiihia òutou i te âua pipi. Terä noa te tahi mau manaò no te tautururaa i teie haapiiraa nehenehe roa, maitaì tätou i roto i te rururaa i teie mahana matamua. Ia ora na.

 

Rautï : Vaetua òrometua : Ua manaò vau e, ia pärahi anaè o Âneterea vahine, e tià mai o Hitiùra vahine. E pipi mä, faanaho noa mai te tahi himene. Terä, e faahoìhia te paraparauraa i roto i te tuhaa 3 nei.

 

Taehau òrometua : Mauruuru e te Tumu Nui i ta tätou òhiparaa.

 

* I te iòa o te Rururaa Òrometua, na te Tuhaa 4 i haamauruuru i to Papetoài.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens