Overblog Suivre ce blog
Editer l'article Administration Créer mon blog
11 juillet 2013 4 11 /07 /juillet /2013 16:09

Torota 1, 12-23.

 

ÔMUARAA

 

Te rata i to Torota ua päpaìhia e Pauro i to  i te ètärëtia e vai i Torota, te tahi ôire i Âtia Iiti, i te pae hitià o te rä ia Èfetia. Eere na Pauro i haamau i teie ètärëtia, teie rä te vai nei teie ètärëtia i roto i te tahi vähi e haapaòhia ra e Pauro, i reira hoì to na tonoraa i te feiä rave òhipa mai Èfetia atu, te ôire no te tahi tuhaa fenua röma i Âtia. Ua ìte atoà rä o Pauro e, te vai nei te mau òrometua haavare i roto i te ètärëtia i Torota tei faaara e, no te ìteraa i te Atua e te fänaòraa i te parau o te ora, mea tià roa i te taata ia haamori i te tahi mau arataì e mau faatere faaroo. Âpiti atu ai i Tete, te parau atoà ra teie mau arataì e, mea tià roa i te taata ia färii i te tahi mau faanahoraa taaê, mai te parau no te peritome, te tahi mau faanahoraa i nià i te parau o te mäa e te tahi atu mau tumu òhipa.

Ua päpaì o Pauro i teie puta no te faaìte i to na manaò pätoì i teie huru haapiiraa tei òre i tüàti i te faaìteraa a te tëretetiano. Te papa o to na manaò, na Ietu Metia e horoà i te ora, âreà teie mau tiàturiraa e teie mau faanahoraa e faaätea te reira i te taata ia Ietu Metia. Na roto i te Metia, ua rahu te Atua i teie nei ao, e na roto ä ia Ietu e faahoì faahou mai ai te Atua i teie nei ia na ra. I roto anaè i to tätou tüàtiraa i te Metia e roaa ai te tiaìtururaa i te ora o teie nei ao. Ua püpü o Pauro i te tupuraa o teie haapiiraa faufaa rahi no te ora o te feiä faaroo.

E tano rä ia haamanaòhia e, o Tuhito tei âfaì i teie rata i Torota no te horoà atu i roto i te rima o Pauro, ua âpeehia atu o ia e Ònetimo, teie tïtï mea na roto ia na to Pauro päpaìraa i te rata ia Firemona.

Te mau tumu parau o teie rata, Te huru no te òhipa a te Metia. Te ora âpï i roto i te Metia. No te haamaitaì i te Metua, o tei faaau mai ia tätou ia au i te hoê tufaa i te âià o te feiä moà i te ao ra. O tei faaora ia tätou i te värua mana o te pöuri, e ua tähiti ê mai ia tätou i roto i te Pätireia o ta na Tamaiti here ra, no na i noaa ai to tätou ora, te hara i faaòrehia ra, i to na ra toto. Te huru o te Metia e ta na òhipa o te huru mau  ia o te Atua hiò-òre-hia ra, o tei fänau na i te mau mea atoà i hämanihia ra. Na na hoì i hämani i te mau mea atoà nei, o to te raì, e to te fenua nei, o tei ìtea ia hiò ra e tei òre i ìtea, te feiä teröno, e te feiä hau, te hui-arii, e te feiä mana. E mea hämani-anaè-hia ia e ana, e no te Atua anaè rätou. E o mua ä hoì o ia i te mau mea atoà nei, e o ia të mau i te mau mea atoà nei. E o ia hoì te upoo o te tino ra o te Ètärëtia nei, o te matamua o ia, te mätahiapo o te feiä i pohe ra, ia hau ê atu ä o ia i te mau mea atoà nei. E mea tià hoì i te Metua e ei roto ia na te î i te mau mea atoà ra vai mau atu ai.  E ia faafaite hoì o ia i te mau mea atoà ra ia na iho i roto ia na ra, i te hau i noaa i te toto o to na ra tätauro; to te raì e to te fenua nei, ia faite ä ia na. O òutou hoì, o tei taa ê i mütaa iho e te ènemi hoì i to òutou âau i te parau ìino ra, ua faafaitehia ia e ana i teie nei, i to na ra pohe i te tino taata no na ra, ia tuu o ia ia òutou mä te maitaì, e te hapa-òre, e te pariraa òre i mua i ta na aro.  Òutou hoì i tämau mäite i te faaroo, e ua tätumu, e ua mau mäite, e aore i âueue i te tiàturiraa a te Èvaneria nei, ta òutou i faaroo aè nei, e tei faaìte-haere-hia i te taata atoà i raro aè i teie nei raì, te Èvaneria i faarirohia ai au i te papa o te faaroo o te taata.

O Ietu teie e faaìtehia nei e Pauro na roto i teie rata, èi faaitoitoraa i to te Ètärëtia, ia maitaì tätou i te haamaitaìraa a te Atua.

 

Ia ora na.

 

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens