Overblog Suivre ce blog
Editer l'article Administration Créer mon blog
25 avril 2013 4 25 /04 /avril /2013 08:57

Tapati 19 no Më 2013

 AF. Monire 13 no Më 2013.

Feruriraa Pipiria

Faanahoraa

Na te pupu tätaìtahi e faanaho i to na pure haamataraa, te rave i teie taiòraa èi pure, tei to rätou tiàmaraa te reira, ua tuhahia te taiòraa e te mau tumu parau ia au i te mau ìrava no te faaòhieraa te tumu pure, e tià ia taiò hoê tuhaa, na te pupu ra e faaoti, i muri aè i te tütonu maiteraa i te Taramo 104.

Te feruriraa pipiria ia taiò te täatoàraa o te  Taramo 104.

Na te pupu tätaìtahi e hiò te manaò tumu o te parau i roto i te vauvauraa âmui.

Manaò

Te Taramo 104, e himene, papa haamori, pehepehe, éi faateiteiraa i te iòa o te Atua ra o Iehova èi Rahu Nui, e faaòhipahia i roto i te fare pure i te àvariraa i te ôroà no te tänuraa maa ia hanahana te fenua, ia tae i tau no te òotiraa e faanaho faahouhia teie Taramo, no te haamaitaì i te iòa o te Atua ra o Iehova. Ia au i te päpaìraa, te manaò ärataì o te mau taò, e tià ia parauhia e, e toru puai teie e päpä ra te tumu o te ora, Fenua, Reva, Päpe. Òia hoì, te Ahi, te Mataì, te Ua. Àreà te taata te tupuraa ia te tauàtiraa i te mau hinaaro o te Atua, ia täpae i te vahi e tïtauhia ra ia ora. I tupu ai te manaò e tuha teie taiòraa e 8 aè âpaparaa parau, teie te tahi faanahoraa tei maraa mai, penei aè te vai faahou atu ra, tei ta tätou ia heheuraa e toru uiraa ia oti taiòraa, te 1 na te pupu 1, te 2 na te pupu 2, te 3 na te pupu 3.

Maitaì te feruriraa.

Taramo 104

Mau raì 1-4

1 E haamaitaì ia Iehova/ Tumu Nui, e ta ù värua. E ta ù Atua, e Iehova/ Tumu Nui, òe tei rahi roa. Ua vëhihia òe i te hanahana e te mana, 2 i te faaàhuraa ia òe iho i te märamarama mai te àhu ra, e te hohoraraa i te mau raì ra mai te päruru. 3 i te vauvauraa i to na ra mau piha i te pape. E te raveraa i te mau ata ei pereoo no na, i te hahaereraa nä nià i te pererau ra o te mataì, 4 i te faariroraa i te mau merahi no na mai te mataì ra, e te mau tävini no na mai te auahi ura ra.

Fenua 5-9

5 Na òe i haamau i te tumu o te fenua, ia òre roa ia âueue. 6 Ua täpoì hoì òe ia na i te àputo, mai te àhu ra, te teitei ra te pape i te mau mouà 7 Ia aòhia e òe ra, maùe atu ra; i te haruru o to pätiri ra, ua haapeepee atu ra i te haere 8 Ua aè rätou i te mau mouà, ua pou rätou i te mau peho, i te vähi i haapaòhia e òe no rätou ra. 9 E ôtià tei haapaòhia e òe, e òre ia e maìri ia rätou, e òre e hoì faahou mai e haanïnä i te fenua.

Pape 10-13

10 Ua tuu mai ò ia i te pape pihaa èi vai matätia, o tei tahe haere nä roto i te ärea o te mau mouà ra 11 i reira te mau puaa o te fenua nei i te inuraa, e te mau âtini ôviri i te haamäharaa i to rätou hiaai. 12 I pihaì iho te mau manu o te reva i te pärahiraa o tei òto i roto i te mau âmaa rii. 13 Te faararirari nei ò ia i te âivi rii no roto i to na ra mau piha; e te î nei te fenua i ta òe i faahotu mai.

Maa 14-18

14 Te faatupu nei ò ia i te àihere na te mau puaa, e te räau rii na te taata. E te roaa nei te mäa ia na no roto i te fenua. 15 E te uaina e òaòa ai te âau o te taata nei e te monoì i hinuhinu ai to na mata, e te päne e itoito ai te âau taata nei. 16 Te mau räau a Iehova/ Tumu Nui ra, ua paari ia, te mau âreti i Repanona ra, ta na i tanu ra, 17 e tei ôfaahia e te mau manu ra. Te mau peruti ra to te hetite ra ùtuafare. 18 Te mau mouà teitei ra, no te puaaniho ôviri ia; e te mau mato ra, e haapüraa ia no te täfana.

Tau 19-23

19 Ua hämani/ Parau ò ia i te maräma no te mau tau i haapaòhia ra, ua ìte hoì te mahana i to na maìriraa. 20 Na òe i hopoi mai i te pöuri, e ua ruì iho ra, èi reira te mau täehae o te ururäau ra e haere ai 21 te mau riona âpï i te ûâ-haere-raa i te mäa, i te ìmiraa i te mäa i te Atua ra. 22 Ua hiti anaè te mahana ra, ua hoì rätou, e ua taòto faahou i roto i to rätou mau âpoo. 23 Ua haere iho ra te taata i te òhipa na na, ta na i rave ra, e ahiahi atu.

Miti 24-26

24 Aita te huru rau o ta òe ra òhipa, e Iehova/ Tumu Nui, E mau räveà paari anaè ä ta òe Ua î te fenua nei i ta òe ra taoà. 25 E tënä na hoì miti rahi e te âano, tei reira te mau mea e nee haere, eita e hope ia taiò, te mau mea rii ra e te mea rarahi atoà ra. 26 Tei reira te mau pahï i te tere-haere-raa; tei reira te Reviatana ta òe i hämani i te haùti haereà.

Ora 27-30

27 Te tiaì anaè ra te reira ia òe ra, ia noaa ta rätou mäa i te taime mau ra. 28 O ta òe i horoà ra, o ta rätou ia i rave, ua heheu òe i to rima ra, ua î anaè ia rätou i te maitaì. 29 Ua püroù òe i to mata ra, e àti ia to rätou. Ua rave mai òe i to rätou aho, ua pohe ia rätou, e ua hoì faahou i to rätou ra repo. 30 Ua tono mai ra òe i to värua, ua hämanihia rätou. E ua rave faahou òe i te aroä o te fenua.

Iòa 31-35

31 E vai ä te hanahana o Iehova/Tumu Nui e a muri noa atu. Te òaòa nei Iehova/Tumu Nui i ta na iho ra òhipa. 32 Ua hiò anaè ò ia i te fenua, ua rürü ia; ua faatiàià anaè ò ia i te mau mouà ra, ua pee te auahi i nià.33 Te ora nei au ra, e himene ä vau ia Iehova/Tumu Nui te vai nei au ra, e himene au èi haamaitaì i ta ù Atua.34 E mauruüru ä to ù manaòraa ia na; e òaòa hoì au ia Iehova/Tumu Nui. 35 Te feiä rave hara ra, e mou ia i te fenua nei, e te feiä parau ìno ra, e òre roa ia. E haamaitaì ia Iehova/Tumu Nui, e ta ù värua e Hareruia.

Täiòraa.

Te faaìte ra te mau parau o te täiòraa i te huru no te taata faatiàraa i te mau òhipa a te Atua i faanaho ia tupu te ora. Mai teie ta na tiàturiraa i te Ora ta te Atua i horoà, Te haapäpüraa i te iòa o te Atua o Iehova/ Tumu Nui no te ärataì i ta na faateiteiraa, ma te faaäu i te marämarama i te àhu, te àhu ia o te Atua i ta na faaneheneheraa. Ma te haafaufaa i te rahu no te türäma i te maitaì e tupu ra i roto, i te reva, te miti, te pape, te fenua, te mau tiàräma, te mau räau, te mau ànimara, te mau moo pape, te päpä o te mau himene, e te haamaitaìraa.

Faufaa

Te tïtauraa e vai ra i roto i te mau faahitiraa parau te faatumuraa i te iòa o te Atua ra o Iehova/ Tumu Nui, tei riro èi manaò ärataì i te ora, mai te taata atu e tae roa i te mau ànimara te maa noo mai i te Atua ra. Mai ta te ìrava 21 e faahiti ra te mau riona âpï i te ûâ-haere-raa i te mäa, i te ìmiraa i te mäa i te Atua ra.  E ta te ìrava 28 parauraa O ta òe i horoà ra, o ta rätou ia i rave, ua heheu òe i to rima ra, ua î anaè ia rätou i te maitaì. Te vai atu ra te tähi mau parau faufaa i roto i teie taiòraa Taramo 104, tei täpeàhia èi àparauraa na tätou te Iòa o te Atua ra o Iehova/Tumu Nui.

Uiraa

1-ìrava1 E haamaitaì ia Iehova/ Tumu Nui, e ta ù värua. E ta ù Atua, e Iehova/ Tumu Nui, òe tei rahi roa.

E täno änei ia tätou i te hiò tei iòa o Iehova, e to te Tumu Nui te vähi e toe ra i te faahiti i te iòa o te Tumu Nui i roto i te faaâpïraa i te mau parau i roto i te Pipiria.

2-ìrava10 Ua tuu mai ò ia i te pape pihaa èi vai matätia, o tei tahe haere nä roto i te ärea o te mau mouà ra.Te tahe nei te pape na roto i te ärea o te mau mouà, te vai ra änei te tähi ärea i roto i ta tätou Pipiria no te iòa o te Tumu Nui, a hiò mai na i teie parau, a horoà i te manaò. I roto i te Pipiria te vai ra teie parau Tumu o te ora, papaì rähihia te Tumu, Òhipa 3,15. E hape päpaìraa teie, aore ra e haapäpüraa teie no te tiàraa Atua.

3-ìrava 33 Te ora nei au ra, e himene ä vau ia Iehova/Tumu Nui te vai nei au ra, e himene au èi haamaitaì i ta ù Atua.

E ora te Tumu Nui, te himenehia nei, te âruehia nei, te purehia nei, te toe te haapäpüraa a te Ètärëtia Porotetani Mäòhi, te manaò, te tätararaa.

Àrueraa,

E pehepehe teie i nià i te mau òhipa i rahuhia e te Atua, o Tavita teie e ìte nei te rahiraa no te mau òhipa hanahana i faanahohia e te Atua no te taata. Te haamata nei ò ia i teie àrueraa no te horoà i te Atua te faufaa i haapaòhia no te taata ; tei ômuahia na roto i to na faaìte päpüraa e, hoê noa to na haapüraa o te Atua, ma te faahope i teie Taramo na roto i te parauraa e, e haamaitaì i te Tumu Nui, e ta ù värua e, hareruia.  

>1-9 Te mau rahu atoà ta tätou e hiò nei, e ìte nei, te tïtau – noa – mai rä i te taata ia àrue, e ia haamaitaì i te Atua, no te mea te Rahi nei Ò ia. To na Puai e te Mana mure òre te vai ra ia i nià i te Rahu. E märamarama te Atua, e i roto Ia na, aore roa e pöuri, e noaa i te taata te maitaì. Te faufaa ia e vai ra i roto i te Fatu ta na Tämaïti Here, te märamarama o teie nei ao.

>10-18  I te taime tätou e ìte ai i to te Atua huru i mua i te mau rahu  tei haapaòhia no te taata, ia ìte ia tätou e, te na roto nei tätou i te haamoriraa no te tuu i te Atua i te vahi e ìte ai te taata ia na iho i te vahi ta te Atua tuu ia na e te òhipa. Teie taata, te taata o ta  to na huru i faatea i te Atua, tei haapaò noa i te òaòaraa i te fenua nei, tei faanaò te mau maitaì e rave rahi, o tei faatupuhia na roto i te Rahu teie ra, eiaha ia moèhia ia tätou te mau haamaitaìraa a te Atua te vai nei i nià i te mau taata atoà, e te mau taata tei ìte i to rätou ère i mua i te Atua. Te faufaa o te Ètärëtia tei roto ia i te horoà a te Värua Maitaì. E haapaò änei te Atua i te mau taata tei ìte o to rätou èreraa, no te faanaho atoà ia rätou èi nunaa no na.

>19-30 No tätou te taata nei ia àrue tämau ia tätou i te Atua ma te faaea òre, Ò ia i horoà noa i nià i to tätou oraraa te mau tiàrama o te ruì, e to te ao. A hiò na tätou i te mau ànimara o te àru i te faanahoraa a te Atua, te ora nei rätou ia au i te huru o te àru, ma te haapeàpeà òre te tupuraa te òhipa no ànanahi, e no te mau tau e a muri no atu. E faaroo noa nei ra te Atua, i te mau àhehe o te mau tumu raau, te ùùru a te mau ànimara. No te taata ra, mai te poìpoì, e tae noa atu i te pöraa, te òhipa nei ò ia no te ora i te òhipa ta na i manaò no te maitaì. Ta te papaì Taramo e faahiahia ra, i mua i te mau rahu a te Atua, ta na e haafaufaa nei te rau te mau faanahoraa, no tera e tera vahi i reira te nunaa i te oraraa, e tae noa atu te mau tumu raau e te mau ànimara. E tià ia parauhia e horoà te reira na te Atua i te taata, e te mau ànimara, te ora nei te mau ànimara o te fenua, e te mau hotu o te moana i te mau maitaì o te àru. O tätou ra te taata, te fänaò nei ia tätou i taua mau maitaì ra, no to tätou oraraa no te mau tau e a muri atu. Te faaìte noa mai ra te reira ia tätou, i to te Atua mau hinaaro i te taata, ta na i faariro èi nunaa tei ìte i te faufaa e vai ra i roto i te rahu. I te mau taime e ùaa ai te mau tiare, e fänau ai te mau ànimara, e fänau ai te taata, e tano ia parauhia e, e täpaò no te tiàfaahouraa, e aore ra e mahana Penetetote, tei tuu i te taata i roto i te òaòaraa. O te tahi teie huru tonoraa mai na te Atua i te Värua Maitaì èi faaitoitoraa i te värua e te tino o te taata, ei ìte no te hanahana o te Atua.

>31-35 Te hanahana o te taata e mou ia, te hanahana o te Atua e vai ia e a muri noa atu.

Te mau taata, e ta na mau faanahoraa, te mau àru e to na mau hotu, e taui te reira, tei Rahu rä ia rätou e òre roa ia e taui. O teie te rahi no te faahiahia i òhipahia e te mana no te parau a te Atua, to na nehenehe tei horoà i te maitaì i te värua o tei tatarahapa. Te taata hara tei tatarahapa te haamataraa te reira no te hoìraa i roto i te òaòaraa a te Atua. Taua taata ra e tià ia na ia haapaò i te mau hopoià atoà, na roto i te òaòa i te raveraa i te òhipa, no na iho, e no te tahi. No te mea ua ö te haamaitaìraa  a te Atua i roto i to na värua, tei tuu ia na i te àrueraa i te Atua, ma te faaea òre.

Manaò

Te tïtauhia nei i te taata faaroo ia ìte ò ia i te faaâpï ia na, ia au i te mau faaueraa a te Atua, ia tià ia na i te täpeà tämau to na tiàmaraa i mua i te mau faahaparaa o teie nei ao. Na te ture te reira e haapii mai nei ia na e ia papaì – roa – hia te reira i nià i te papa no te àau, te òhipa ia i tupu i nià i te Tamaiti a te Atua, i to na ärataìraa i te taata faaroo na roto i to na pohe tätauro èi faaòreraa i te mau hara a te feiä i tiàturi i to na tiàfaahouraa, o te èà teie tei haapäpü ua ìritihia te ùputa no te ora mure i te mau taata atoà tei ìte i to rätou ätearaa i te Tumu Nui, Tumu o te Ora.

                                                                                                                                     Teraì òrometua.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens