Overblog Suivre ce blog
Editer l'article Administration Créer mon blog
3 décembre 2012 1 03 /12 /décembre /2012 22:46

Piti o te mahana                  Haere e te tino haamäuiuihia o te Metia

Te mau taiòraa

Ètetiera 37, 1-14                   « E ora faahou änei teie mau ivi marô ? »

Taramo 22, 1-8           Te tävini o te Atua, tei faaôôhia e tei hämani-ìno-hia, te pii nei ia i te Atua

Hëpera 13, 12-16        Te tïtauraa e haere e färerei ia Ietu « i räpae mai i te pühapa »

Ruta èv 22, 14-23       Ua vävähi iho ra Ietu i te faraoa, e ua höroà ia na iho hou to na mau àti

Tätararaa

Te auraa no te haereraa mai te haèhaa e te Atua, o te faarooraa ia i ta na tïtauraa no te haere i räpae i to tätou mau oraraa faahiahia e te âpeeraa i te tahi pae, te feiä ihoä rä e mäuiui ra.

« Ua marô to tätou mau ivi, ua morohi to tätou tiaìtururaa, ua pararï huàhuà roa tätou ». I roto i te mau parau i faahitihia e Ètetiera, te ìte noa ra tätou i te huru oraraa e orahia e te rahi o te mau taata i teie mahana i roto i te täatoà o teie nei ao. I te fenua Ìnitia, nä te oraraa o te mau âmuitahiraa « dalites » tei päpararï e faaìte mai ra ia tätou i te rahi no teie mau àti e âuahaaàti noa nei ia tätou, o ta te Metia i hopoi i roto i to na pohe tätauro. I pihaì iho i te mau taata tei haamäuiuihia i te mau taime atoà e i te mau vähi atoà, ua pii Ietu i te Metua : « E taù Atua, e taù Atua, e aha òe i faaruè mai ai ia ù ? »

Te piihia nei te mau maru-metia ia rave i te èà o te tätauro. Te tätara nei te rata i te mau âti-Hëpera, eiaha noa te parau no te ôpuaraa faaora a Ietu tei mäuiui ia riro noa ei parau no te feiä tei tämatahia, no te tauturu atoà rä i te mau pipi « ia haere i räpae i te pühapa » no te färerei ia na. Ia färerei anaè tätou i te feiä i tiàvaruhia i räpae i te oraraa vaa-mataèinaa, mai te mau « dalits » no te fenua Ìnitia, e ia ìte hoì tätou i roto i to rätou mau àti, i te parau no Ietu tei faatätaurohia, eita tätou e taiä i te parau e : te oraraa e te Metia, o te âmuiraa ia i te feiä tei tiàvaruhia i räpae i te oraraa vaa-mataèinaa, e ua âmui hoì te Fatu i to rätou mau mäuiui e to rätou mau àti. 

Te tino o te Metia, tei ôfatihia i nià i te tätauro, « ua ôfatihia ia no òutou ». O ta te ôroà tämäaraa hopeà ia e faaìte ätea ra i te mau àti e te pohe o te Metia. Mai te reira mai taime, te faahanahana nei tätou i te mau taime atoà e faatià ai tätou i te ôroà a te Fatu, mai te tahi upootiàraa i nià i te pohe. I roto i teie ôroà maru-metia, te tino o te Metia tei ôfatihia, e aore ia tei vävähihia, o to na ia tino hanahana tei faatiàfaahouhia ; ua ôfatihia to na tino, ia nehenehe ia tätou ia âmui i te ora tä na i vaiiho mai, e nä roto ia na, ia riro tätou ei tino hoê.

No tätou, te mau maru-metia no teie mahana e no ânanahi, e tïtau nei i te hoêraa, e riro te ôroà èuhari ei vähi tei heheu mai i te peàpeà rahi e vai ra i roto i to tätou mau âmahamaharaa. Ua ìte hoì tätou e, eita e au ia tätou ia färii i te reira ôroà mai tei au ia tätou ia nä reira. Te tïtau nei te reira ia tätou ia faaâpï i ta tätou mau tautooraa no te faatupu i te tahi âmuitahiraa päpü e te päutuutu.

Te höroà nei te mau taiòraa i faataahia no teie mahana i te tahi atu mau huru hiòraa. Te haereraa e te tino o te Metia tei haamäuiuihia, o te ìteraa ia e nä hea i te ora âmui ia au i te tïtauraa a te ôroà ; te ôperaa i te faraoa e te feiä e poìa ra, te huri-taère-raa i te mau patu o te veve e te tano-òre, o te mau täpura òhipa atoà ia e tïtauhia ra e te ôroà, i reira to te mau maru-metia piiraahia ia âmui i to rätou mau püai. O te reira atoà ia te hiòraa a te Päpa Benoit XVI no te parau no te èufari i roto i te Ètärëtia ; eere no te tiàturi noa e no te faahanahana noa i teie ôroà, no te ora atoà rä (Sacramentum caritatis). E mä te faatüàti i te hiòraa a te Ètärëtia orthodoxe i te parau no te « papa haamori i muri mai i te papa haamori », ua ìtehia e, « aore roa e mea o të tià i te taata ia rave » tei òre i höroàhia i te tahi hohoà tei tïtauhia ia ora âmui.

Pure haamaitaìraa 

Ia haamaitaìhia òe e te Atua i roto i te Metua, i roto i te Tamaiti e i roto i te Värua Moà, te Atua hoê roa e te tumu hoê roa hoì o te hoêraa. Ia haamaitaìhia òe, i te mea e e maitaì hau ê to òe i nià ia mätou, te taata nei. Ia haamaitaìhia òe, i te mea e aita òe e faaea nei i te faaìte ia mätou i to òe hinaaro nä roto i ta òe parau. Nä roto i ta òe parau, te haapii noa nei òe ia mätou e te haamanaò tämau noa nei òe ia mätou, nä roto i ta òe Ètärëtia, te faariro noa nei ia mätou ei ôriò-mata e e pütarià no òe e no to òe nünaa, no te paturaa i te hoêraa ta òe e tiaì nei ia mätou, i roto i to mätou mau rauraa e to mätou mau taa-ê-raa te tahi e te tahi. E te Atua o te ora, a arataì ia mätou i roto i te parau-tià e te hau.

Pure faahaèhaaraa

E te Atua o te here e te aroha, te peàpeà nei mätou i mua i taua hinaaro no òe ra, i te mea e o mätou te tahi tumu hoê roa no te mau âmahamaharaa e tupu nei i roto i ta òe Ètärëtia e i roto i to òe nünaa. E mea pinepine roa mätou i te ora i roto i te haapaò-noa-raa te reira ia na iho, e mä te täuà-òre hoì i to mätou mau taeaè e mau tuahine i roto i te fifi e te peàpeà. A aroha mai ia mätou, a faahuru-ê e a faatiàmä ia mätou i taua huru ìno no mätou ra. E te Atua o te ora, a arataì ia mätou i roto i te parau-tià e te hau.

Pure aniraa

E te Atua o te here e te aroha, te ani nei mätou ia òe, nä roto i te pohe o to Tamaiti i nià i te tätauro, e nä roto i to na tino tei haamäuiuihia, ia faaòre-roa-hia to mätou mau âmahamaharaa. Nä roto i to mätou vai-âmahamamaha-noa-raa, te tämau noa nei ä mätou i te faatätauro ia na aore e mahana tuua, no te hämani i te tahi vaa-mataèinaa e riro noa nei ei pä i to òe here e to òe aroha, e tei haafifi i te tupuraa o te hau ta òe i hinaaro no te feiä tei tiàvaruhia i räpae i te mau höroà o ta òe rahu. A tono mai i to Värua Moà i nià ia mätou e ia höroà ia mätou i te aho ora e te faaoraraa i te mau mea atoà i pararï, e ia riro te reira ei faaìte-âmui-raa na mätou i te parau no te parau-tià e te here o te Metia. A âmui ia mätou i roto i to mätou tere e tae noa atu i te mahana e ôpere âmui ai mätou i te faraoa hoê e te âuà hoê i nià i te àiraa mäa hoê. E te Atua o te ora, a arataì ia mätou i roto i te parau-tià e te hau. Âmene.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens