Overblog Suivre ce blog
Editer l'article Administration Créer mon blog
3 décembre 2012 1 03 /12 /décembre /2012 23:01

6 o te mahana :                            Vävähi i te mau patu

Te mau taiòraa

Ruta 4,13-18 :             Te huaai a Ruta räua o Poata.

Taramo 113 :               E haamaitaì i te Atua i to na ra maitaì

Èfetia 2,13-16 :           Ua huri te Metia i te mau patu i raro, tei faataa-ê

ia tätou

Mätaio 15,21-28 :                 Ietu e te vahine âti Tanaana

Tätararaa

Rave i te èà o te Atua mä te âau rotahi, te auraa, e faaruè i te mau mea e täpeàpeà noa nei i te mau taata. Ua ìte päpü maitaì te mau taata faaroo o te fenua Ìnitia i to rätou fifi. Te huru raveraa a te mau Ètärëtia i te nünaa Tari, o te reira te niu no te faataa-ê-raa, o ta tätou e hinaaro nei e faahaamanaò, ia riro ei nünaa hoê mai te päpaì moà e faahiti nei e o tätou e pure nei i teie hopetoma.

I mua i te reira, te haamanaò atoà mai nei o Pauro i te ûàna o te mau fifi i rotopü i te feiä maitaì e te mau âti Iuta, tei faatavaihia i roto i te Metia. Te haapäpü nei o Pauro e, e Metia hau to tätou, mea tià i te mau taata ia âpee ia na. O ia te tuu i te hoêraa nä roto i to na tino e to na itoito. Ua huri o ia i te patu i raro, te patu e faataa-ê nei ia tätou.

I roto i te tahi päpaì a te Èvaneria, te parau atoà mai nei o Pauro e : « O to òutou atoà hoì i päpetitohia i roto i te Metia, ua àhu ia i ta te Metia ra. Aita e âti Iüta, aita e Herëni, e aita e tävini, aita e tiàmä, aita e te täne, aita e vahine : hoê ä hoì òutou i roto i te Metia ra ia Ietu. (Taratia : 3,27-28). Ua hurihia te mau patu rarahi tei haamau-paari-hia e te mau tupuna, ua riro mai i teie mahana ei nünaa hoê.

Ua riro te âai o te nünaa Ìnitia ei nünaa e faahiò ia tätou i te faufaa o te täuàparauraa e te tururaa te tahi i te tahi i roto i te hoê ao ua rau te mau tiàturiraa. Te haamanaò atoà mai nei te Èvaneria a Mätaio i te èà tei ravehia e Ietu e ta na mau pipi no te vävähi i te mau patu o te faaroo, o te hiroà, Ietu a i tià atu i mua i te aro o te vahine Tanaana, tei ani tuutuu òre ia na ia faaora i ta na tamahine. I mua i te faaroo o teie vahine, i mua i to na hepohepo, aita te mau pipi i färii e tae noa atu i te manaò tutaperepere o te Metia i mua i teie aniraa. Terä te huru o te taata ia haamau i te hoê patu e ia täôtiàhia ia au i te faanahoraa tahito. Ua hiti atoà teie parau i roto i te faufaa tahito.

Tei roto i te puta a Ruta, te faahitihia ra te parau o te vahine moapi, vahine e hiroà to na, e tiàturiraa ê ta na, no roto mai ra o ia te huaai a Poata. Fänau ta Orafe, o Iete, te metua o Tävita. Te faaìte mai nei te huaai a te arii o Iteraèra i te ôpuaraa faaora a te Atua. O ia hoì, ia vävähi te taata i te mau patu o te mau mea atoà e täàmu nei ia na i te tahi, nä roto änei i to na hiroà e ta na haapaòraa.

I teie mahana, âpee i te èà o te Atua, e faaheporaa te reira ia tätou ia na nià aè i te mau patu e faataa-ê nei i te taata faaroo o te hoê haapaòraa i te tahi taata faaroo o te tahi atu haapaòraa. Te tere pererina no te täpapa i te hoêraa, tïtauhia i te taata ia âpee mä te âau rotahi no te rave i te èà o te Atua, mä te vävähi i te mau patu e faataa-ê nei i te tahi e te tahi.

Pure faahaèhaa

E to matou metua e,

Te tätarahapa atu nei mätou i mua ia òe, i to mätou teòteò, to mätou manaò faahapa i te tahi, tae noa atu i to mätou huru mata ê i te tahi. E na mätou iho e hii tuutuu òre nei i te mau patu no te faataa-ê ia mätou te tahi i te tahi. I roto änei i te mau Ètärëtia e te tahi atu mau Ètärëtia, te mau taata ihoä ra o ta mätou e manaò nei e, e mea faufaa òre.

Ia riro te mana o to òe Värua ei faaitoitoraa ia mätou ia vävähi i te mau patu e faataa ê nei ia mätou i to mätou tauaro.

Nä roto ia Ietua Metia ta òe Tamaiti, ia nehenehe ia mätou ia amo i ta òe parau i te vähi anoano, no te faatupuraa i te hoêraa i roto i teie ao. O òe te Atua no te ora, arataì òe ia mätou i roto i te parau-tià e te hau. Âmene.

Pure haamaitaì

E haamaitaì mätou ia Òe te Atua, E haamaitaì ia Òe e te mau tävini o te Atua, e haamaitaì i te iòa o te Atua. Ia haamaitaìhia te iòa o te Atua, i teie nei e a muri noa atu. Mai te hitiraa mai o te mahana e tae noa atu i to na maìriraa, ia haamaitaìhia te iòa o te Atua e to Mäòhi Nui, E teitei to te Atua i to te mau fenua mai Mäòhi Nui atu e tae noa atu i to te ao nei, ua hau to na hanahana i te teitei i to te mau raì atoà ra. O vai tei au i to tätou Atua, o tei teitei e ua pärahi i te raì teitei. Te tuu atu nei rä O ia i te hiòraa mai i raro i nià i te mau raì, e i nià atoà i te fenua. Te faateitei nei o ia i te mau taata atoà tei ìte i te maitaì no raro mai i te repo ra, e ua faateitei e àti no aè te mau fenua ra, i te faanohoraa O ia i roto i te feiä rarahi ra, i roto i te feiä rarahi ra i to na iho ra pupu taata. Amene

Pure aniraa

E hinaaro rahi to mätou ia Òe e te Atua, o tei faaroo mai i to mätou mau reo, ta mätou e ani atu nei. No te mea, ua färiu mai Òe i to tarià na mätou nei. E tiàoro ä mätou ia Òe e mure noa atu to mätou nei aho. I haapunihia mätou e te märei ra o te pohe, I haaàtihia mätou e te ahoaho o häte, ia roohia mätou e te àti e te mäuiui. Ua tiàoro iho ra mätou i to iòa. Te äni nei mätou ia òe e te Atua e, e faaora na òe i to mätou värua. O te hämani maitaì, te parau-tià a te Atua, oia ia, ua î to tätou Atua i te aroha. E tiaì mai e te Atua i te feiä e pärahi ra i roto i ta Òe ôpuaraa faaora. Amene.

Tauturutururaa i te mau feruriraa

• E aha te mau patu e faataa-ê nei i te mau taata faaroo i roto i te hoê oraraa totaiete.

• E aha te mau patu e faataa-ê nei i te mau taata faaroo o te tahi atu mau haapaòraa i roto i te hoê oraraa totaiete.

• E aha te mau taa-ê-raa e te mau faaauraa i rotopü i te « vävähi i te patu e faataa-ê nei i te mau taata faaroo » e te « patu tei haamauhia i rotopü i te mau taata faaroo e te mau tià faatere o te Ètärëtia.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens