Overblog Suivre ce blog
Editer l'article Administration Créer mon blog
1 juillet 2013 1 01 /07 /juillet /2013 13:59

Òhipa 28, 1-16

Ua pure iho ra, e oti aè ra, tuu atu ra i ta na rima i nià iho ia na, faaora atu ra Òhipa 28 ìrava 8 vahi hopeà.

ÔMUARAA

Te Òhipa a te mau Àpotetoro, e puòiraa teie no te Èvaneria a Ruta. Te fä tumu o teie puta, o te faaìteraa ia e mea nä hea to te mau pipi matamua a Ietu, tei ärataìhia e Värua Maitaì, haaparareraa i te Parau Maitaì i nià ia Ietu i Ierütarema, i te täatoà o Iutea e Tamaria e tae noa atu i te hopeà o te fenua. E âài teie no te tahi âmuiraa maru-metia o tei haamata i rotopü i te nünaa âti-Iüta e o tei tupu i te rahi e tei riro mai ei tiàturiraa na te täatoà o teie nei ao. Ua hinaaro te taata päpaì e haapäpü i ta na feiä taiò, eere te mau maru-metia i te tahi pupu no roto mai i te Hau Röma, e aore ia ua riro te faaroo maru-metia èi tupuraa no te haapaòraa âti-Iüta. E tano ia tätuhaahia te Puta Òhipa i roto i nä tuhaa rarahi e toru, tei faaìte mai i te âano no te tahua òhiparaa i reira te Parau Maitaì o Ietu e porohia ai e i reira atoà te Ètärëtia e haamauhia ai. Te haamataraa no te âmuitahiraa maru-metia i Ierütarema tei püòi i te revaraa o Ietu i nià i te raì. Te parareraa te Parau Maitaì i te tahi atu mau tuhaa o te fenua Päretentina. To na parareraa i te miti Metiteranea e tae noa atu i Röma. Te tahi atoà parau rahi i roto i te Puta Òhipa, o te òhiparaa ia a te Värua Maitaì, tei pou mai mä te mana i nià i te mau maru-metia i Ierütarema i te mahana Penetetote e o tei tämau i te arataì e te faaitoito i te Ètärëtia e to na mau ärataì i roto i te mau tupuraa òhipa e faaìtehia ra i roto i teie puta. Te mau poroì matamua i faaroohia i taua tau ra, ua haapotohia ia i te mau faaitoitoraa e i roto i te tahi mau òhipa tei tupu tei haaputuhia i roto i te Puta Òhipa, tei faaìte mai i te püai o teie parau i roto i te oraraa o te mau maru-metia e i roto i te âmuitahiraa i te Ètärëtia.

Te mau tumu parau puai i roto i teie mau päpaìraa mauti ra ia te faaineineraa no te faaìte i te mau faaueraa hopeà a Ietu e te fafauraa i te mau ôpuaraa faaora a te Atua. Te faaìteraa i Ierütarema  e te faaìteraa i Iutea e Tamaria. Mai roto i teie mau faaìteraa te öraa mai te parau o Tauro i roto i te mau faanahoraa a te Atua, e to na täuiraahia èi haapii parau maitaì, te mau òhipa rahi i ravehia e Pauro, o te mau tere mitionare e, te tere matamua maite pene 13.1 e tae i te pene14.mai te ìrava 1 e tae i te 28, te piti o te tere mitionare mai te pene  15 e tae i te pene 18 mai te ìrava 1 e tae i te 22. Te toru o te tere mitionare mai te pene 18 e tae i te pene 21 mai te ìrava 1 e tae i te ìrava16, te faahoperaa o to na tere i roto i te fare täpeàraa i Ierütarema, Taitarea e Röma.

Faaitoito

Àreà te taiòraa i haapaòhia no tätou tei te ìrava 8 ia I te vai hopeà te naò ra, ua pure iho ra, e oti aè ra, tuu atu ra i ta na rima i nià iho ia na, faaora atu ra.

Ua tupu teie parau i nià i te hoê motu o Merita, na te vero i turaì i to rätou fauraò i nià i teie fenua na te auahi i haamähanahana i te mea tei roto rätou i te toètoè. Na Pauro tahu i te auahi e arataì atu ra ia rätou i reira, no te ua e maìri ra e no te toètoè. Òhi haere iho ra o Pauro i te ruru vähie, e tahu atu ra i nià i te auahi, ua ôuà mai ra te hoê òfi taèro i nià i ta na rima. Ia hiò mai ra taua mau taata ra, i taua mea taèro ra i te piriraa mai i nià ta na rima, parau iho ra teie mau taata, e riro mau ä teie nei taata i te täparahi taata, ua vai noa teie mau taata i te hiòraa ia Pauro o Tauro. I mua i teie òhipa i tupu e aore roa ò ia i mäuiui, tiaì atu ra teie mau taata ia òru, ia hià ò ia i raro ia pohe, ia tiaì rä i te tupuraa mäoro aè ra, aita atu ra o na maì ia hiò mai rätou, manaò ê atu ra rätou e atua. I nià i teie  fenua te vai nei to na raatira  o Popirio te iòa, o tei ìte maitaì i teie òhipa tei tupu, e faaàmu mai ra ia rätou i roto i to na fare. Te pohe ra te metua täne o Popirio i te mai fiva, te vai noa ra i nià i to na roì, haere atu ra Pauro i roto ia na ra, ua pure iho ra, e oti aè ra, tuu atu ra i ta na rima i nià iho ia na, faaora atu ra. E oti aè ra te reira, ua haere mai ra te feiä maì atoà o taua fenua ra, e faaorahia iho ra. Mai teie te huru te tupuraa ta tätou parau, e tere no te hopoi ia Pauro i roto i te fare täpeàraa a färerei ai rätou i teie vero.

Ei nià i te fenua no Merita, ua òhipa o Pauro i te faufaa i noaa ia na i te faaoraraa i te taata, tei haamaere i te mau taata i ìte na te huru o Pauro, o tei ìte noa i teie taata i nià i te tähi faanahoraa tei òre e au i te oraraa no te hoê taata tiàturi i te Metia.

Ua pure iho ra, e oti aè ra, tuu atu ra i ta na rima i nià iho ia na, faaora atu ra, teie òhipa na te pure e te tuuraa rima i ora ai te taata maì.

E ta tätou pure, e ta tätou tuuraa rima e aha te huru.

 

Ia ora na

 

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens