Overblog Suivre ce blog
Editer l'article Administration Créer mon blog
3 décembre 2012 1 03 /12 /décembre /2012 22:39

Te mahana matamua : Haere, täuàparau noa ai. Te feruri ra mätou i nià i te faufaa mau o te täuàparau e te horoàraa manaò, no te mea nä te reira, e tauturu ra i te upootiàraa i nià i te mau fifi atoà. Te òhie o te täuàparau e te faarooraa, ua riro ia ei mea faufaa, no te faatupu i te hoêraa aore ra no te rohiraa e faatupu i te tiàmäraa i roto i te mau nünaa o te ao. E teie huru täuàparauraa, ua riro mau ia ei faaìte-päpü-raa e, tei hea te Metia.

Te 2 o te mahana : Haere e te tino haamäuiuihia o te Metia. Ma te ìte päpü i te autaeaèraa e tähoê nei te Metia e te mau « nünaa tei haamäuiuihia » o te ao nei, mai te mau « Dalits », te ìmi ra tätou i te mau räveà atoà, ia au i to tätou tiàraa taata faaroo, i te ôpereraa i teie autaeaèraa e tähoê ra i roto i to na hohonuraa. Te faaìte atoà mai ra te reira ia tätou, te taura e nati ra i teie täpaò e te parau-tià, e mä te tïtau atoà i te feiä faaroo atoà, te ìteraa i te huru mau no te ora i te hoê oraraa e teie täpaò i roto i teie nei ao.

Te 3 o te mahana : haere i roto i te tiàmäraa. I teie mahana, ua tïtauhia tätou e haamaitaì i te itoito ta te mau âmuiraa tei haamäuiuihia i roto i teie ao, e mai te mau taata ìnitia « dalits » e àro ra i te mau mea atoà e haavï ra i te mau taata atoà. Mai ia tätou atoà te feiä faaroo, të püpü ra ia tätou no te ora i roto i te hoêraa i roto i te rahi, te haapii mai ra te reira ia tätou, i te faufaa mau no te faaätea-ê-raa i te mau mea atoà e haapurarä ra i te taata, no te faahoì-faahou-raa i nià i to na vairaa, e te faatiàmäraa i roto i te Värua.

Te 4 o te mahana : Haere mai te mau tamarii o te fenua. Te ìte-päpü-raa i to tätou tiàraa i roto i te rahu a te Atua, na te reira e faatüàtiàti faahou ia tätou e te ìte-atoà-raa, te faufaa o te reira faatüàtiàtiraa tätou tätou iho, e i te fenua. E mä te haapaò maitaì i te faufaa mau no te aupururaa i te fenua, e mä te ôpere maite e i roto i te parau-tià no te parau o te maitaì o te fenua, mea tïtauhia i te teretetiano ia riro ei ìte päpü, i roto i te värua o te matahiti o te Iüpiri.

Te 5 o te mahana : Ietu, e hoa no te haere âmui. Ta tätou feruriraa i teie mahana, tei nià ia i te mau hohoà faaroo o te here e te aroha o te taata, no te mea o ia te hohoà no te here o te Atua i to te ao. Mai te peu e, e hoa here mau tätou no te Atua, ia ìte ia tätou e, e faatupu te reira i te tahi tauiraa i roto i te mau faatüàtiraa e vai ra i roto i te âmuiraa a Ietu. Aita e patu e faataa-ê e vai i roto i te Ètärëtia no te mea tei reira te mau hoa here atoà o Ietu.

Te 6 o te mahana : Vävähi i te mau patu. Te haereraa e te Atua, te haereraa ia i räpae aè i te mau patu atoà e faataa-ê ra te mau tamarii atoà mä te haamäuiui ia rätou. Te mau taiòraa pïpïria atoà i faanahohia no te reira mahana, të haapii mai ra ia i te mau räveà rau no te arairaa i te mau patu ta te taata i patu, e te vai atoà ra te mau haapiiraa a Pauro o tei haapii mai : « O òutou atoà hoì i päpetitohia i roto i te Metia ra, ua àhu ia i ta te Metia ra. Aita e âti-Iüta, aita e Herëni ; aita e tävini, aita e tiàmä ; aita e täne, aita e vahine : hoê ä hoì òutou i roto i te Metia ra ia Ietu » (Taratia 3,27-28).

Te 7 o te mahana : Haere i roto i te autaeaèraa. Haere mä te haèhaa e te Atua, te haereraa ia nä roto i te autaeaèraa e te feiä atoà o tei hiaai te parau-tià e te hau. Ua riro teie huru haereraa ei faahuru-ê-raa i roto i te feiä faaroo, i nià i te nätura e i nià i te täpura òhipa o te täatoàraa o te âmuiraa feiä faaroo. Mea tïtauhia i te Ètärëtia e e tià roa atoà ia na ia haapaò i te mau mäuiui o vëtahi ê, mä te päruru e te aupururaa i te feiä veve, te feiä navaì òre, e te feiä i tuuhia i te hiti. Aita te reira i moèhia i roto i te mau pure i faanahohia.

Te 8 o te mahana : Haere mä te faahanahana noa. Te taiòraa pïpïria o teie mahana, te faahiti ra ia i te parau no te ârueraa. Eiaha i roto i terä manaò e, ia tupu maitaì te mau mea atoà e tià ai. Terä rä, i roto i terä manaò e, te ârueraa mä te faaìte i te hoê täpaò tiaìtururaa i te Atua e i roto i ta na parau-tià. Nä reira atoà, te ârueraa i roto i te Hepetoma pure no te Hoêraa o te mau marumetia, hoê ä huru e, te faaìte ra tätou i to tätou tiaìtururaa e, e tupu mau to tätou hoêraa ia hinaaro te Atua e nä roto i ta na mau räveà atoà ta na e faaòhipa.

Te mea ta te Atua e hinaaro ra ia tätou i teie mahana, te haereraa ia na nià i te èà no te parau-tià, te here e te tura. Te raveraa teie èà o te pipi, te haereraa ia i nià i te èà pirihaò o te Pätireia o te Atua, eere rä te raveraa i te èà no te mau hau i teie mahana. Ia rave anaè teie èà no te tura, te faaineine ra ia òe ia òe i te tahi àroraa, mä te àhu i te haana tamaì atoà a te Atua ra, ia tià ia òe ia pätoì atu i te mau räveà paari a te tiàporo ra. Eere hoì i te taata anaè ra ta tätou e tö nei, o te feiä hau atoà rä, te mana, e te mau tävana o teie nei ao pöuri, e te mau värua ìino i te reva nei. (Èf 6,12). E parau mau anaè te reira, no te mea, te taata e püpü ia na no te parau-tià, e tiaì ia te reira taata ia faarirohia o ia ei faatupu peàpeà e ei òrurehau. Ia päpü rä ia tätou e, te Hau e te Hoêraa, ua  haamauhia ia i nià i te parau-tià.

No reira, no te mea e te haapaò nei te Hepetoma pure no te Hoêraa o te mau marumetia i te mau âmuiraa « dalites » no te fenua Ìnitia, ua riro te haereraa o te mau pipi ei hohoà no te hoê haereraa mä te âpeehia e te mäniania o te pahu « dalit ». Te mau âmuiraa « dalites » e ta na tüpaìraa pahu i roto i te hoê òire. Aita te tüpaìraa pahu « dalit » i riro nei ei piiraa noa i te Atua ia haere mai, terä rä no te tauturu-atoà-raa i te âmuiraa i roto i te oraraa, e oia atoà no te faaätearaa i te ìno. Te faaòhipa-noa-hia ra teie huru tüpaìraa i teie nei ä mahana no te faahanahanaraa i te hiroà tumu « dalite ». No reira, ia parau-anaè-hia te parau no te « haereraa o te mau pipi mä te âpeehia e te pahu (dalit) », e faaauraa ia i te huru oraraa o te mau pipi o tei haamanaò noa nei i te faaearaa hau o te Atua i rotopü i te feiä i tuuhia i te hiti. Te haamanaò atoà mai ra te reira, te mana e vai ra i roto i te mau « Dalits » no te pätoì i te ìno e te faatupuraa i te maitaì o te totaiete. Te haamanaò atoà mai ra te reira te tahi huru oraraa o te mau pipi tei haapäpü noa mai e, te peu e te hiroà « dalite », tei rotopü atoà ia rätou te Atua. (Mt 25,40). Teie huru oraraa, e riro ia i te haamauhia i nià i te hoê autaeaèraa päpü, e i nià i te tahi huru hoêraa i roto i te faaroo, e tei tiàmä i te mau parau-tià òre atoà e te haafaufaa-òre-raa.

Te tahi o te mau òhipa e ravehia ra e teie mau âmuiraa « dalites » ìnitia, te hämaniraa ia i te tiaa. Teie huru oraraa to te mau âmuiraa « dalites » e hohoà ia no to rätou ìte i te patu i te hoê oraraa i roto i te tiaìtururaa. I roto i ta tätou mau pure, e tano teie huru to te mau âmuiraa « dalite » të haapii mai ia tätou i te haereraa na nià i te parau-tià no te rave i te mea ta te Atua e faaue mai ia tätou. « Te mau mea atoà e riro nei ei manaò tei haamauhia i nià i te parau no te « castes » i roto i te oraraa o te feiä faaroo, mai ta te pöpe Jean Paul II i parau na, « Eita te reira e faatupu i te autaeaèraa mau. E faatupu rä te reira i te ìno i nià i te hoê oraraa faaroo päpü e e riro atoà ei patu i te òhipa pororaa i te èvaneria a te Ètärëtia. » No reira, Ia tià i to tätou Atua no te parau-tià, no te Hau, ia faahuru ê ia tätou i roto i te autaeaèraa mau no te faatupuraa i te mau mea atoà ta na e ani mai ia tätou.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens