Overblog Suivre ce blog
Editer l'article Administration Créer mon blog
16 janvier 2014 4 16 /01 /janvier /2014 10:13

Tapati 02 no Fepuare 2014.

Mataio 6, 24-34

Te Atua e aore ia o Mämona

(Ruta èv 16.13)

24 «E òre te taata e tià ia faaroo i te fatu toopiti; e riro o ia i te au òre atu i te hoê, e te hinaaro atu i te tahi; e aore rä, e riro i te au atu i te hoê, e te faaruè täùe i te tahi. O òutou nei hoì, e òre e tià ia faaroo i te Atua e te Mämona.

Te mau tapitapiraa

(Ruta èv 12.22-31)

25 «E teie nei, e aò atu vau ia òutou: eiaha e tapitapi i to òutou ora, i ta òutou e àmu, e ta òutou e inu; e te àhu no to òutou tino. Eere änei e rahi te ora i te mäa, e te tino i te àhu? 26 A hiò na i te mau manu o te reva: aore rätou e ueue, aore hoì e ôoti, aore a rätou fare puèraa mäa; na to òutou Metua i te ao rä e faaàmu ia rätou ! Eere änei te maitaì rahi to òutou i to rätou? 27 E o vai hoì to òutou e tià ia haamaoro i to na iho tino e ia hoê aè tüpiti ia tapitapi ia na iho? 28 E e aha òutou e tapitapi ai i te àhu? A haamanaò na i te mau riri o te âua: nä hea to rätou tupu Aore hoì rätou e òhipa, aore hoì e nino. 29 E parau atu rä vau ia òutou: e tae noa atu ia Toromona mä to na ùnaùna rahi, e òre ä to na àhu e au i te nehenehe i to te hoê o rätou nei.* 30 I nä reira hoì te Atua i te faaùnaùna i te räau rii e te fenua nei, âùanei te vai ra i roto i te âua, e a nanahi rä ua hurihia i roto i te auahi. A tae ai hoì ia òutou, o òutou i te faaroo täpetepete e 31 E teie nei, eiaha òutou e tapitapi noa, a nä ô ai ra: «E aha ta mätou ia àmu?», e: «E aha ta mätou ia inu?», e: «E aha to mätou àhu ia àhu?» 32 — Te ìmi nei hoì te mau Ètene i taua mau mea atoà nei — ua ìte hoì to òutou Metua i te ao ra, e ia noaa taua mau mea ra ia òutou e tià ai. 33 E mata na rä òutou i te ìmi i te Pätireia o te Atua, e te parau tià na na, e âmui-atoà-hia mai taua mau mea ra ia òutou. 34 E teie nei, eiaha e tapitapi i to a nanahi ra, na a nanahi hoì e tapitapi i ta na iho. O te mahana o to na iho ìno a tirë ia.

 

Ômuaraa

Te mau taeaè e te mau tuahine, te mau manu o te reva, te mau tiare o te fenua, te mau ïà no te moana nui o hiva, te faaìte noa mai ra te reira ia tätou i te parau no te ora. I te mau poìpoì atoà, te fänaò nei tätou i te reira, i te mau vahi atoà o to tätou mau nohoraa. Te färii nei te tiare i te faufaa ta te fenua e faaitoito no te horoà i te tupu, te färii nei i te ua e au no te haamaha i te poìha, te färii nei i te pïhauhau o te mataì, no te faahaumarü, te färii nei te tahi i te tahi, te âmui ra i te puai atoà ia noaa te ora.

 

Te taiòraa

E aòraa teie na Ietu i nià i te huru o te taata e to na oraraa. Te ìte nei e te faaroo nei o Ietu i ta te taata faanahoraa i to na parau, i tupu teie parau ta Ietu i te ìrava 25 E teie nei, e aò atu vau ia òutou, te horoà nei te taiòraa i te faanahoraa no teie täò te AÒ, te ìte nei o Ietu i to te taata haapeàpeàraa, e te maìtiraa i te mea e hape ai i roto i ta te Atua tïtauraa ia haapaòhia. Ia haapaò maitaì anaè tätou i teie mau aòraa a Ietu, ua puai i nià i te maa, te inu,  te àhu, e teie mau faufaa no roto ia i te fenua.

Te fenua, te taata ia, te nünaa hoì. Te auraa, te taata e te fenua, hoê ä ia. No te fenua i parauhia ai to te taata, aita e taata e tano e faahiti i to na parau ei taata mai te peu e haapae o ia i te parau o te fenua. E ia faahiti hoì tätou i te parau o te fenua, no te mea ia ua färii hope roa tätou i to na parau, oia te mau mea atoà e faaìte mai ra i te tupuraa o te ora ta na e mau ra, nä reira hoì te mau mea atoà ta na i amo e tei riro o ia ei ìte, ua färii hoì i ta te fenua iho parauraa i to na parau, to na reo, ta na peu, e ta na hoì faaìteraa i te Atua. E rave rahi roa te feiä haavare e faahiti nei i te parau o te fenua, mai te tähitohito ûàna rä i ta te fenua parau i nià ia na iho, mai te haafaufaa òre i to na reo, ta na peu, e te värua e faaora ra i te fenua. Mea tano ia haamanaòhia i teie feiä e, eere te fenua no roto mai i te taata, eere te taata te metua o te fenua, te taata rä tei ravehia no roto mai i te fenua. No reira, e tamarii te taata na te fenua ra, te fenua atoà ia të mau ra i to na parau. Aita ta te taata e haapiiraa i te fenua, aita ta na e faaravaìraa i te parau a te fenua. Te taata paari, te taata ia tei färii i te haapiiraa e te arataìraa a te fenua ; te maamaa rä e te aoaoa, ua hinaaro ia na na aè e haapii i te fenua i te maitaì e te ìno.

No te mea te faaìte atoà ra te fenua i te Atua, e tano ai tätou e parau e, ta te taata märamaramaraa i te parau o te Atua, ua haamäramarama atoà mai ia i ta na huru hiòraa i te parau o te fenua ; te huru auraa hoì e faanaho ra i te oraraa o te tata e to na fenua, te horoà atoà mai ra ia i te tahi türamaraa i nià i te mau auraa e täamu ra i te taata i to na Atua. Rau noa atu ai ta te mau nünaa hiòraa i teie parau, eita te parau o te taata e tano ia faataa-ê-hia i to te fenua e to te Atua. Te auraa, ia färii hope roa te taata i te fenua e te Atua, e märamarama ai o ia i to na parau ei taata ; te mea atoà rä te reira e horoà i te auraa i to na oraraa.

I roto i ta te Pïpïria hiòraa i te parau o te fenua, oia te hiòraa a te âti Iuta, aore ra ta te nünaa Iteraèra, no te mea i parau te Atua, i parauhia ai to te fenua, e eita te parau o te fenua e tano ia faataa-ê-hia i to te Atua na na te Parau i pü mai ai te fenua. Te faaìte noa mai ra te reira manaò e, te Atua e te fenua, hoê ä ia. Teie rä Parau i pü mai ai te fenua, eere ia i te tahi noa âmuiraa taò e faanaho ra i te tahi manaò, o te Atua iho rä te reira e òhipa ra, oia hoì to na te reira mana òhipa, e te mea hoì ta te reira parau i faatupu, ua riro ia ei ìte e ei faaìte i te Atua. Te märamarama noa ra tätou e, eita te parau o te fenua e hope noa i nià ia na iho, eere te fenua te haamataraa e te faahopeàraa o to na iho parau, eita te parau o te fenua e hope ia òre te reira parau ia riro ei fäìraa i te Atua, ei faaìteraa hoì i ta na ôpuaraa faaora. Te parau o te fenua, eere ia i te tahi parau hope, e parau rä i roto i to na tupuraa. E tïtauraa ta te Atua i te fenua, e tïtauraa atoà rä ta na i te taata ta na i haapärahi i nià i taua fenua ra. Mai ia Ietu i parau e : O vau e te Metua, hoê ä ia (Ioane 10, 30), ia parau tätou e : Te Atua e te fenua, hoê ä ia, eere ia no te faaìte i te àifäitoraa e vai ra i roto i te tahi e te tahi, o te riro te reira ei räveà e òhie ai te parau o te tahi i te haapaehia, inaha hoê ä te tahi e te tahi. No reira, eita te fenua e rave i te tiàraa o te Atua, eita hoì te Tamaiti e rave ite tiàraa o te Metua, e haapäpüraa noa rä teie e, hoê ä faaìteraa ta te fenua e te Atua, nä reira hoì ta te Tamaiti e te Atua, aore ra, te fenua, mai te Tamaiti atoà, te faaìte ra i te hinaaro o te Atua. Eita rä te parau o te Atua e hope i roto i te fenua, eita hoì e hope i roto i te Tamaiti. Te vai ra te Atua, te vai ra te fenua, e te vai ra te Tamaiti. E täpura òhipa ta te fenua i mua i te Atua, e täpura òhipa ta te Tamaiti i mua i te Atua ; ua mauruuru te Atua i te Tamaiti : O taù Tamaiti here teie, ua mauruuru roa vau ia na (Mätaio 3, 17) ; ua mauruuru atoà ra i te fenua : Te òaòa nei te Tumu Nui i ta na iho ra òhipa (Taramo 104, 31). Ia òre rä ia maitaì te òhipa a te Tamaiti, aore ra ia òre ia maitaì te òhipa a te fenua, eita te reira e haafifi i te parau o te Atua. Te mea ia ta Ietu e parau ra i te raveraa mai i te tahi manaò to te päpaì taramo (102, 26), i te nä ôraa e : E mou te raì e te fenua, e òre roa rä ta ù parau e mou (Mätaio 24, 35). Haamanaò tätou i te mea ta tätou i parau na e, te Parau, te mana òhipa ia o te Atua, no reira, no te mea no roto mai te fenua i te Parau, e tano ia tätou e nä ô e : te fenua, te Parau ia a te Atua i roto i te òhiparaa. Te haapäpü noa mai ra te reira e, e täpura òhipa rahi ä ta te Atua e tiaì mai ra ia tätou, aita ä ta na ôpuaraa i hope, ia au i te manaò e, te ôpuaraa, e manaò ia tei òre ä i riro mai ei òhipa. Ua tupu te fenua nä roto i te mana o te Parau a te Atua, no te faatupu rä i ta na ôpuaraa, e hinaaro ia te Atua ia hoì te taata ta na i hämani ia na ra, ia tauturu te taata i te Atua i te faatupuraa i ta na ôpuaraa faaora, no te mea e ora rahi ta te Atua i faaineine no te taata. Ia âmui te taata i te Atua, i reira teie ora e matara ai. Aita teie manaònaòraa to te Atua i  ätea roa atu i te mea ta na i faaìte mai i te matahurahura o teie nei ao, a parau ai o ia e : Eere te mea maitaì ia pärahi noa te taata o ia anaè ra (Tenete 2, 18). Pärahi noa ai te taata i roto i te maitaì, te hinaaro nei ä te Atua ia fänaò te taata i te tahi maitaì hau atu. Ia haamanaò tätou i te mau manaò ta tätou i parau mai na i nià i te here, e märamarama tätou i te auraa o teie ôpuaraa ta te Atua.

Ia ora na.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens