Overblog Suivre ce blog
Editer l'article Administration Créer mon blog
16 janvier 2014 4 16 /01 /janvier /2014 09:58

Tapati 23 no Tenuare 2014

Mataio 5, 38-48

Te tähoo

(Ruta èv 6.29-30)

38 Ua faaroo hoì òutou e i parauhia mai i tähito ra, E mata ra, èi mata ia hoo; e niho ra, èi niho ia. 39 Te parau atu nei rä vau ia òutou: eiaha e pätoì atu i te taata hämani ìno o të moto mai i to päpärià àtau na, e färiu atoà atu i te tahi. 40 E ia haavä mai te hoê taata ia òe i te ture e rave i to àhu ôomo ra, e tuu atoà atu i to pereue. 41 E o të faaue mai ia òe e haere i te hoê maire, e haere atoà òrua e ia piti noa atu. 42 E horoà atu i tei äni mai ia òe ra; e o të tïpee mai ia òe ra, eiaha e faahoì-noa-hia atu.

Te Aroharaa i te ènemi

(Ruta èv 6.27-28,32-36)

43 Ua faaroo hoì òutou e i parauhia mai i tähito ra. E aroha atu òe i to taata-tupu, e e riri atu i to ènemi. 44 Te parau atu nei rä vau ia òutou: e aroha atu i to òutou mau ènemi; e faaora atu i tei tuhi mai ia òutou; e hämani maitaì atu i te feiä i riri mai ia òutou; e pure hoì i te feiä i parau ìno mai e tei hämani ìno mai ia òutou; 45 ia riro òutou èi tamarii na to òutou Metua i te ao ra; te faahiti nei hoì ò ia i to na mahana i nià i te ìno e te maitaì, e te haamaìri mai nei o ia i te ua i nià i te parau tià e te parau tià òre.

Te aroha o te Metua.

46 O tei aroha mai ia òutou, o ta òutou ia e aroha atu: e aha ta òutou utuà i reira. È ère änei te nä reira atoà nei te mau terona 47 E o to òutou mau taeaè änaè ra ta òutou e ìte atu, e aha ta òutou vähi hau i reira. È ère änei te nä reira atoà nei te mau terona 48 Ia maitaì roa hoì òutou mai to òutou Metua i te ao e maitaì roa ra.

 

Ìrava 38-42, Te tähoo

Ìrava 43-45, Te aroha i te ènemi

Ìrava 46-48 Te aroha o te Metua

 

I roto i teie mau tuhaa e toru nei, te ìtehia nei ia te hoì pinepineraa mai te parau no te AROHA. E täpaò faaìte te reira e, te Hinaaro o Ietu i ta na mau pipi, ia faatupu ia rätou i teie parau : te AROHA" ma te maìti-òre te huru o te taata. E teie AROHA ta Ietu e parau nei, o tei faatupuhia ia e te ATUA.

 

Teie ra, eiaha rätou e AROHA no te mea ua AROHAHIA mai rätou, e aore ra ua HAAMAITAÌHIA mai rätou. Èita roa atu ia.

 

Ia AROHA ra rätou mai ta Ietu e parau nei ia rätou : e AROHA i to òutou mau ènemi. ‑ E piti taime to Ietu parauraa i teie manaò, te ìrava 43 e te ìrava 44 ‑. Eita ra teie AROHA i te hoê AROHA na roto i te hoo e AROHA ra te tià e faatupu i te hoê täamu päpüraa i nià i te taata tupu.

 

Mai te mea te faahiti pinepine nei o Ietu i teie parau no te AROHA. O te HAAPÄPÜRAA ia teie e, àita te parau no te AROHA o te Atua e tupu päpü nei i roto i te mau taata ta na i hamani. Te ère nei to te ao i teie AROHA.

 

Eiaha ra tätou e manaò e, àita e tupu nei te AROHA i te fenua  nei - òia ‑ Eita ra teie AROHA mai ta Ietu e parau nei. Te AROHA a to te ao nei, ua pätuhia ia i nià i te puai o te àmahamaha no te mea, mea au roa na ù tera taata e tià ai ia ù ia AROHA ia na; e tera ra àita ia, èita vau e AROHA ia na.

 

Teie faanahoraa, e tupu nei ia te maìtiraa hau a AROHA ai. E AHA TE ÒHIPA E ÌTE‑HIA NEI I ROTO I TEIE FAANAHORA.  Mau ti ra ia te maìtiraa i te huru o te taata.       

 

O teie te huru no te AROHA e tupu nei i te ao nei.

Ta Ietu ra e faaìte nei i roto i teie na tuhaa e toru, mea taa- ê - ­roa ia.

 

         Te tuu nei o Ietu i teie parau no te AROHA i nià i te hoê fäito ia tupu te äutaeaèraa i roto pü te mau ènemi e te mau taata tupu.

 

Teie manaò, o te hoê FAAÂPÏRAA ia tià i te taata e te AROHA e tuhaa rahi ta na e FAATUPU i roto i te oraraa o te hoê pupu taata.

 

Ua tupu änaè mai teie te huru i reira e ìtehia ai te AROHA o te ATUA i roto i ta na mau tamarii ta na i HERE.

 

         O teie te hohoà o te Atua.

 

Te ìte nei ia tätou e, te hamani maitaì e te aroha ta Ietu e faaìte mai nei.

         E faaìteraa faufaa roa teie e vai nei i mua ia tätou. O to tätou ra huru teie ta Ietu e äni mai nei ia hiò faahou, ia tuàti i nià i te hohoà o te Atua.

 

I roto i teie taiòraa ta tätou i heheu aè nei, te faaìtehia nei ia te hoê faanahoraa :

 

Ìrava 38-42, Te tähoo

Ìrava 43-45, Te aroha i te ènemi

Ìrava 46-48 Te aroha o te Metua

 

O teie te mau tumu parau o te tià e täuturu ia tätou ia noaa te itoito èi faatupuraa i te hamani maitaìraa, ma te maìti - òre i te taata e AROHA atu. Te tuu nei ia o Ietu ia tätou i mua i te hoê àroraa roto no to tätou mau manaò, e te tiàturiraa i te Atua. E täputo to tiàturiraa i roto pü i te AROHA e te riri, te maitaì e te ìno te faaora e te pohe. Ia tae tätou i nià i teie fäito ia manuia ia te maitaì èi ia riro mai te ènemi o te Atua èi hoa no te Atua. I reira e tupu mai ai te hohoà o te Atua i nià ia tätou. E AHA TA TE HOHOÀ O TE ATUA E TÏTAU MAI NEI ? Ia riro tätou èi tamarii na te : TEITEI ‑ TE AROHA TIÀMA E TE AROHA HOROÀ.

 

Ua oti aè nei to Ietu tïtauraa i to tätou àau e te hinaaro atoà nei ò ia ia faaineine tätou i te vahi räpae o to tätou tino. Mea maitaì atoà ra ia ara tätou, àita o Ietu e hinaaro nei e parau ia tätou e, niho ra, e niho ia ‑ e mäta ra, e mäta ia, e aore ra te hapa na i to mäta àtau e to rima àtau e ôhiti e e tapu faaruè ... Mataio 5, 29‑30). Èita roa ia te reira te manaò o Ietu. Ta Ietu ra e hinaaro hou a tupu ai teie òhipa ia noaa i te taata i te päruru ia na. Mai te mea àita e noaa ra, eiaha ia e horoà atu i te piti o te päpärià, àita ia te reira e faaïti mai ra, te faarahi roa atu ra ia te reira i te peàpeà ia ù i manaò.

 

Te mea e marämaramahia ra, eiaha e faahoì atu. Ua tupu änaè mai teie te huru, ua arohahia ia to ènemi. Teie ra, ua rahi aè te faahoì atu i te aroha atu.

 

Ua täno ihoä ra teie parau ta Ietu i nià ia na iho, i to na motoraahia i mua i te mau tähua rarahi Ioane 18, 22 e 23 ... "E tei te na reiraraa atu Ò ia ra, ua moto mai ra ia Ietu te hoê o te fëia töroà e tià noa i pihaiiho ia na ra. Ua parau mai ra, e na reira òe i te parau atu i te tähua rahi ra. Ua parau atu ra o Ietu, ua hapa ta ù i parau aè nei a faaìte mai na i te hapa, e parau tià ra, e aha hoì òe i moto mai ai ia ù?  E teie atoà manaò i roto i te Ìtaia 50, 5‑6 ... ua faafatafata te Fatu ra o Iehova i ta ù tärià e aore hoì au i pätoì atu aore hoì au i òraì tià i muri ua tuu noa atu vau i ta ù i te fëia i täìri mai e ta ù päpärià i te fëia i hutihuti i te ùmiùmi aore hoì au i huna ê atu i ta ù mäta i te vahavaha e te tufa haere".

         Te päpü nei ia ia ù, hou o Ietu a parau ai teie manaò, ua faaìte ätea-hia te mau òhipa e tupu i nià ia na iho. Mea maitaì atoà ra ia tätou ia ìte e, te faatupu nei o Ietu i te mau parau atoà ta na i tïtau i te taata. Ò ia te mätamua i roto i teie parau ta na. Ta Ietu ra e hinaaro nei, eiaha ia TUPU te faahoìraa na roto i te riri, ia rävehia ra na roto i te hau. Ua rave-anaè-hia na roto i te motoraa atu e moto mai o vai ia tei aroha, e o vai te ènemi. Ua vai noa ia teie na taata i nià i te huru taata ua rahi aè te faahoì na roto i te riri i te aroha atu tei moto mai e ua rahi atoà i te rave mai i te horoà atu.

 

E AHA TÄUA TAAERAA RA ?

E AHA TE TAHI VAHI I HAU I ROTO I TEIE TAAERAA ?

                  

Òia hoì ia, ia AROHA tätou i te mea tei òre i arohahia e tätou, to tätou mau ènemi, no te mea te AROHA atoà nei te fëia hara, e te horoà atoà nei, teie ra e faahoìraa to muri mai. Àreà ra ta tätou àita ia e faahoìraa. Te manaò hohonu o Ietu i ù nei, to tätou AROHA te FAATIA­MA i mua i to tätou oraraa àmui to tätou ùtuafare, te vahi e orahia ra e i te mau vahi atoà tei reira te taata i te oraraa, no te mea te vai nei te AMUITAHIRAA, tupu òhie noa e te òre vave noa

 

Èita ra teie te àmuitahiraa ta Ietu e parau nei, ÒUTOU, teie tätou te mau ènemi. Te Parauhia mai nei ia tätou ia AROHA ia rätou, i te mea te AROHA FAATIAMA àita to na e òtià e àita atoà to na e paruparuraa.

 

Teie o Ietu e heheu mai nei ia tätou te huru mau o te Atua

To na AROHA MUTU‑ORE e faatae Ò ia i nià i te mau taata atoà ma te uiui-ore e te tuatapapa-ore.

 

Àita te Atua e faahapa nei e e faautuà nei, e aore e faatîtî nei. Te faaìte nei ra Ò ia i Ta na FAAÒRERAA HARA i te fëia atoà tei tiàturi Ia na. Tei òre ra, te piihia nei rätou ia haafatata i pihaiiho i Ta na TAMAITI ia IETU.

 

Te hinaaro nei o Ietu ia na reira atoà tätou, te auraa ia teie parau : e AROHA ATU I TO ENEMI. Ia òre to tätou haavaraa. Faaòre mai ta mätou hara mai ia mätou e faaòre tei hara mai ia mätou.

 

Eiaha ra ia manaòhia e, e färii te Atua i te ìno, te parau tià ‑òre, te faatîtîraa e tae noa atu i te mau òhipa tià ­òre i mua To na aro. Te fëia e rave i teie huru òhipa, èita te Atua e haava ia rätou, e faahapa. Na rätou noa e haava ra, e faahapa ra ia rätou, o rätou tei pätoì te FAAORERAA HARA a te Atua.

 

E peàpeà roa te Atua i teie mau huru taata no to na ho­hoà i nià ia rätou.

 

******* E O TATOU, NO VAI TO TATOU HOHO'A ? *******

 

Teraì or.

 

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens