Overblog Suivre ce blog
Editer l'article Administration Créer mon blog
20 janvier 2013 7 20 /01 /janvier /2013 20:59

Mataio        5 : 10 – 17 Te miti e te maramarama.

 Ei manaò matamua.

Te taiòraa o te tià ia tuatapapahia, te parau ia i papaìhia e Mataio i te pene 5 i te ìrava 10 e tae i te ìrava 17. No te mea e 4 noa  puè ìrava tei tapeàhia mai no teie  parau tuatapaparaa i te feia e ìmi nei i te maitaì i roto i te mau hinaaro o te Atua no te taata. No reira e tià ia  taiòhia  teie pene parau e 5 taime e aore ra 10 taime, e aore ra hau atu no te faaroo päpuraa i te titauraa e piihia nei e Ietu. I te mea te parauhia nei to tätou parau e te feia faaroo, to na huru i te fenua nei, e to na huru i te ao nei. Na roto ia i na faufaa e piti e faahitihia nei, te MITI, te MARAMARAMRA, e na maitaì teie hoê te tano ia tapeàhia e te rima taata mauti ra ia te  MITI, àreà te tahi ra te MARAMARAMA, eita ia e mou i roto i te rima ia tapeà, e turama ra o ia i te taata ia rave i te èà e tano ia haere. Te horoà- atoà- hia nei i hea roa e òhipa ai teie na faufaa e piti, hoê i te fenua nei, te taata teie e parauhia nei i te hiòraa i to na repo te maitai ra nei e aore ra aita, oia hoì  to na tino e te faufaa e vai ra i roto. Te piti te ao nei, te mau taata teie e parauhia nei, ia ìte ia te taata tataì tahi i te tià i te vahi i reira e ìtehia to te tahi faaturaraa i te huru o te tahi ia noaa te parau o te tiàturiraa i te paieti òre.( Taramo 112 : 10).

Te parau no te taiòraa. Mataio 5 : 10 – 17.

Ietu, i roto i ta na mau haapiiraa, e rave rahi mau hohoà o ta na e rave, no te faaòhie i te faaharuraa i te manaò i te hinaaro e tïtauhia ra. Te mau hohoà – iho- ra matarohia e te taata i roto i te ùtuafare. E tei ìtehia i te mau mahana atoà, tapeàhia e te rima, e aore ra tei faahiò- noa – hia. Te tumu o Ietu i rave ai teie mau hohoà, no te faaìte ia, e ia òhipa te taata te mau maitaì e vai ra i mua ia na, e i roto i to na oraraa, no te faanavaì. Te tahi ra mau taime, e rave nei o Ietu te mau hohoà ìte- òre – hia e te mata taata, e tei òre te rima e tapeà mai to na iho patireia, tei faaau- noa- hia e au te patireia o te Atua i tera faufaa e tera faufaa. Teie huru ra, aita ia e faaòhie nei te feruriraa, te faatiàturi nei ra o Ietu i te taata ia ìte. Mai te tahi mau parapore, haapunihia te auraa o te parau, i muri mai i te hohoà e faahitihia ra. E na te taata taiò ia e ìmi e aha te tahi auraa. I roto i te mau faahitiraa parau e ravehia nei e Ietu, mea pinepine roa O ia i te faahiti te parau no te ora e te pohe, te maramarama e te pöuri, te patireia e o hate, ei faaìteraa ia haapaò mai te, i te mea aita te faaìno e atea nei i te haamaitai.

O te auraa ia no te parau ta Ietu e faahiti nei, ÒUTOU TE MITI O TE FENUA, te miti e auahi tei ìritihia mai roto mai i te pape no te moana uriuri, tei aua haaàti i te mau fenua atoà, e aita to na e hopeàraa. Tei na poro e maha o te ao nei to na vairaa. Mea paruparu, e mea puai, mea purehu, e mea paari. Tei tapeà i te maitai ia òre ia ìno, e tei òre i tapeà no te horoà i te ìno. I te vahi no te maitaì ua maitaì ia, te vahi no te ìno ra ua ìno ia.

Te titauraa ra a Ietu i te mau pîpî no te miti no te haamaitaì ia. Ia òre e taataahihia e te àvae taata i te mea ua òre te maitaì. Te àanoraa teie, te òhipa ta te mau pîpî e rave no te Atua, i te mea ua î, te tahi mau vahi o te ao nei i te enemi.

ÒUTOU TE MARAMARAMA O TE AO NEI, e parau maere teie ta Ietu, i te mea o ia iho te maramarama o te ao. Oia tei ànaana i roto i te mau vahi pouri. Teie rä, e riro te mau pîpî ei maramarama ànaana na roto i te Metia. Te àve pitihia nei e Ietu te miti e te maramarama, no te aha, e aha te tumu ? Teie ia, tei raro aè te mau pîpî i te maru pererau o te Atua i te vairaa. Oia hoì i reira e faatumu ai te mana o te Atua, i reira atoà te tauturu e noaa ai. No te òhipa i te miti i te vahi aita e miti, te maramarama i te vahi aita e turamahia ra. Tei reira te faaìteraahia te feia tei piihia e Ietu Metia.

O ‘’ÒUTOU’’ O vai teie ÒUTOU ? Te parau ia a Ietu, o vai te tià e färii i teie parau mai te hoê faaueraa ra  te huru, tei òhipa i te mau vahi aita e ìtehia nei te hanahana o te Atua. O te pahonoraa e tano ia parau te taata tataì tahi, O VAU teie, oia hoì èi faaìteraa ua tae mai  taua reo ra, e ua faaroohia, e ua òhipahia. I taua taime ra, te noaa ra ia i te taata, i te tuu ia na i mua i te parau no te miti, e te maramarama. Ia tae te taata i nià i teie faanahoraa,  te o ra rä ia tätou i roto i te òpuaraa ta Èvaneria e titau mai nei ia tätou.

Te faufaa o te tumu parau.

No te aha te miti ?

 Ia ànoihia i roto i te maa èi horoàraa i te àminamina ia àmu, e tapeà atoà o ia i te iò maa ia òre ia tahuti. Te mau faanahoraa mätauhia e tätou i te òhipa i roto i to tätou oraraa. Teie te huru no te faaìteraa a te faufaa tahito i te miti.

1)    No te faatupu ia i te hoê parau tutuu i ropu i na taata toopiti, ma te àmu i te miti. No te haapäpu maitaìraa i to raua taamuraa te tahi i ta tahi. E àore ra i te Atua.        

( Numera 18 : 19 ).

2)    E pipihia te tutia i te miti, ei faaìteraa i to na maitaì. Ta te Revetito ia e faaìte ra i te pene 2 i te irava 13, e haamiti atoà òe i te mau tutia, i ta òe tutia àmu.

3)    E ànoihia te miti i roto i te mau haaputuraa noànoà ra èi faaìte i to na maitaì e to na moà.( Etoto 30 : 35 ).

4)    Te mau òroà i te fare pure, e rave – atoà -  hia te miti èi tapaò no te tahuti òre o tei tuuhia i roto i te mau haapuèraa maa. ( Etera 7 : 22).

5)    E taurumihia te àiu fanau àpi i te miti, eiaha èi faaìteraa no te mä, èi faaìteraa ra i te hoê peu tei ravehia e te nunaa o te Atua ia au te faaìteraa a Etetiera.

6)    E faaora te miti i te puna pape, te òhipa ia ta Eritaia i rave i te pihaa i Ierito. Mau Arii piti pene 2 ìrava 20 e te 21. E hopoi mai i te tahi pani àpi a tuu ai te miti i roto, ua haere atu ra o ia i te pihaa o taua pape ra, e ua huri atu ra te miti i roto, e ua na o aè ra, te na o mai ra o Iehova, ua faaorahia e au teie nei pape.

7)    Ia tupu ia te àroraa, e aore ra te tamaìraa, te òire e hià, e ueuehia te miti i nià iho ei faaìteraa e aita e enemi faahou to reira. Mau Tavana pene 9 i te irava 45, haaparari  atu ra i te òire i raro, e ua ueue atu ra hoì i te miti.

Te faaìteraa teie na te faufaa tahito, i na faanahoraa e 7 o te miti. No reira aita tätou e maere nei te tumu o Ietu i faariro ai ia tätou èi miti no te fenua nei. Tei roto ia i tera manaò e, e noaa i te taata, te paari, i te îraa i te mau faanahoraa a te Atua, e te mä ei faaìteraa i te tiàmaraa no te mau tamarii a te Atua. O te hiòraa ia teie a te faufaa àpi, te miti e tapaò  ia no te paari, e te îraa i te maitaì a te Atua.

Ia ànoìhia te miti i roto i te mau maitaì no te tino, eita e ìtehia o te au noa ra te haapoupouhia e te taata e färii ra, tei tano i to na hinaaro. To na auraa ra te miti, e horoà ia oia i te au i te mea au òre, te maitaì i te mea tahuti, te ora i te vahi pohe. Ia rahi anaè te miti, eita ia no te miti te hape no te taata faatano ia te hape, i te  tano òre ta na faito

ÒUTOU TE MARAMARAMA O TE AO NEI.

Te faaìteraa a te Tenete pene 1 i te ìrava 3 e faaea i te 5 o te òhipa matamua ia ta te Atua i Parau, te maramarama. E ua maìri O ia i to na iòa i te ao. E i roto  i te Ioane pene 8 i te ìrava 12, te parau nei o Ietu e o vau te maramarama o teie nei ao, o tei pee mai ia ù ra e maramarama ora ia to na. Ia au i teie reo no Ietu, te haafaufaa nei O ia i te taata tataì tahi, i te maramarama e vai i roto i tera e tera. To na auraa ra aita roa te hoê i ère i teie faufaa, mai te mea ua ère te hoê i teie faufaa, eita ia na te Atua i hamani ia na.

Ia au i na parau e piti nei, e tià roa ia parauhia te tumu no te maramarama mai roto mai ia i te faanahoraa a te Atua. O ta Ietu i òhipa èi arataìraa i te taata i nià i te faanahoraa o te ora. O te pure ia a Tavita, o Iehova to ù maramarama, e to ù ora.(Taramo 27 : 1). To na auraa ra te tumu o te maramarama ra noo mai ia i te Atua ra. Na teie maramarama e faaìte  i te maitaì o te ao nei, o tei òre roa e tià i te tahi atu mau faanahoraa ia faaö mai i roto. I te mea o te Atua teie e turama nei i teie ao. Eiaha  noa ra na roto i te ànaana o te mahana, e te nehenehe o te àvaè e te mau fetià. Na roto atoà ra i te maramarama o ta na ture, tei tae roa to na hihi i te mau vahi haamoriraa a to na nunaa i te fare pure. No reira te ture a te Atua o te ramepa ia tei turama i to na fare, òire faatiàhia i nià i te mouà. Tei haamaramarama i te fenua, tei rapaauhia e te miti, ia ora to te ao.

                                                                                                                                    Teraì òr.

 

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens