Overblog Suivre ce blog
Editer l'article Administration Créer mon blog
16 janvier 2014 4 16 /01 /janvier /2014 10:01

Tapati 09 no Mati 2014

Mau taiòraa.

Tenete                  2 : 7 – 9 ; 3 : 1 – 7         Te faanahoraa a te Atua.

         Taramo                51                                  Fäìraa hara.

         Roma                   5 : 12 – 19                     Te pohe o te taata.

         Mataio                  4 : 1 – 11                       Ietu e o Tatani.

 

Ei taiòraa tumu    Mataio 4 : 1 – 11   Ietu e o Tatani.

Ei ìrava tumu, ìrava 7 i te vahi hopeà : Eiaha oe e àà i to Atua ra ia Iehova.

Ei manaò tatara.

Ua tupu teie ìrava ta tätou i muri iti noa aè i to Ietu färiiraa i te papetitoraa i te pape ra no Ioritana. I reira atoà te faarooraahia te reo mauruuru o te Atua i nià i ta na Tamaiti here. Ua mauruuru roa vau Ia na.

Mai roto mai i teie reo, to Ietu arataìraahia i te metepara e te Varua Maitai, ia faahemahia O ia e te tiàporo. Eiaha ra i roto i tera manaò no te faatito i te Tamaiti a te Atua i nià i te Tiàporo. I roto ra i tera manaò e, ia aurarohia  te Tamaiti a te Atua. Aita ra teie òpuaraa i manauia, ua tupu mau ra ta te tiàporo faaturoriraa i te tiàturiraa o Ietu. Ma te manaò e, e manuia faahou o ia, mai ta na i rave i nià ia Atamu e o Eva. Eita o ia e upootià faahou i nià i te Atua, e fifi ra o ia. I te mea ua noaa ia Ietu te hoê puai taaê, tei òre roa i noaa i na taata matamua i faahemahia e te Tiàporo. Na taata matamua  ua haamaitaihia e te Atua, aita e täpaò to nià ia raua. Àreà o Ietu e tapaò ia ta te Atua i nià ia na, te peritome ei faaìteraa i te mä o te nunaa o te Atua, e te papetitoraa ei faaìteraa i to Ietu tämaraa i te hara a to te ao nei. E te täpaò no te Varua Maitai te pouraa mai i nià Ia na ei faaìteraa i te parahiraa mai, te mana o te Atua. Na te mana o te Varua Maitai i arataì ia Ietu, i te mau vahi atoà i reira  O ia e faahiti ai te mau hinaaro o te Atua.

E tià ia parauhia teie te òhipa matamua i ravehia e Ietu i muri mai i to na papetitoraahia, e farerei i te Tiàporo, i te metepara ei haapapuraa i te tiàraa o te Atua e faatere i te ao nei, eiaha ra ia faateahia te ao nei e te Tiàporo. Tei nià i teie mau tuhaa to te Tiàporo faahemeraaa i te Tamaiti a te Atua.

  1. Te tuhaa o te òpu, oia hoì te parau no te maa i te metepara.

  2. Te tuhaa no te tiàmaraa, oia hoì te tiàraa Tamaiti o te Atua, teie vahi ra tei roto roa ia i te òire o Ierutarema.

  3. Te tuhaa no te haamoriraa, oia hoì te tiàraa taata faaroo o Ietu ia hema ia i raro aè i te faanahoraa a te Tiàporo

    Teie te mau tuhaa ta te Tiàporo e hinaaro nei e vavahi i roto ia Ietu, ia riro atoà o Ietu mai ia na ra te huru. E vavahi te tino, te feruriraa e te tiàturiraa o Ietu. Ia au teie mau òpuaraa a te Tiàporo, eita o Ietu e òtohe rii aè i te hoê taime i te mau parau faateitei, e te täparu a te Tiàporo. Ei ia parau te Tiàporo e, e Tamaiti oe na te Atua ra, a parau i teie nei mau òfaì ia riro ei maa. E pahono o Ietu e, eita te taata e ora i te maa anaè ra, i te mau mea atoà ra i haapaòhia e te Atua. Te tino o Ietu teie e hinaarohia nei e vavahi, aita ra o Ietu e topa i roto i teie mau faatianianiraa, i te mea aita ä i tae atu ra i te hora no te tamaaraa. E Tamaiti oe na te Atua ra, tei nià i te poretito  o te hiero to te Tiàporo parauraa ia Ietu e, e haamori ia na, e poroihia hoì te mau merahi ia haere mai e tapeà i ta na rima ia òre ta na àvae ia tiàia  noa atu i te òfaì. Te hinaaro nei te tiàporo e vavahi i ù nei te feruriraa o Ietu, ahiri O ia i òuà, te àà nei ia O Ietu i te Atua i reira. I te mea ra ua ìte o Ietu e, tei pihaiiho te Atua ia na i te mau taime atoà. No reira, aita e tià ia na ia faatupu te faaueraa maau a te Tiàporo, a maau – atoà – hia O ia mai te Tiàporo ra te huru. No te paari ra to na feruriraa i tià ai ia na i te parau e, Eiaha oe e àà i to Atua ra ia Iehova. To na auraa teie parau, eiaha e faafaito i to puai i nià i te mea puai aè ia oe. Te òhipa ia a te Tiàporo e rave nei, e faafaito i to na puai i nià i te Atua. Te huru iho ä teie, no te taata paruparu te hinaaroraa e àà i nià i te mea puai aè ia na. Aita te feruriraa o Ietu e àueue nei i teie mau faanahoraa a te Tiàporo. Àreà  ra te toru o te vahi o te mouà ia, i reira to te Tiàporo faaìteraa i te hinuhinu o teie nei ao, te patireia patuhia i nià i te hinaaro o te taata. E horoàhia no Ietu ia haamori o Ietu i te Tiàporo. Eita te tiàturiraa o Ietu e ruri ê i te parauraa e, o to Atua o Iehova ta oe e haamori, e O ia anaè ra ta oe e faaroo. I teie parau haamoè rii maru noa atu ra te Tiàporo, ma te poroì òre mai e, ua upootià oe te Tamaiti a te Atua. Haere mai ra te mau merahi a te Atua e tauturu i te aito àpi o te faaroo.

             Teie ra ia ara ia tätou, aita te Tiàporo i haamouhia e Ietu, ua faatea noa o ia ia Ietu. Ma te peàpeà to na ààu te manuia òre ta na òpuaraa tià òre i nià i te Fatu no te ora mure òre. No reira ia haapaò maitai ia tätou, aita è te Tiàporo mai te veri tara ra te huru ia tapuhia te veri na ropu, e tapeà ai te vahi tei reira te niho e puta – iho – a ia patiahia, ia taparahi – roa – hia ra haapohe i reira eita ia oia e patia faahou. Oia atoà te Tiàporo, aita o Ietu i taparahi – roa  haapohe, ua faarue – noa – maira te Tiàporo ia na.

    No tätou i teie mahana, eiaha tätou e ìmi i te Tiàporo i rapae au atu i to tätou tino, eiaha atoà na tihiti ia tätou. Tei roto ra ia tätou i te parahiraa, mai te Varua o te Atua e parahi ra i roto ia tätou. Te òhipa a te Tiàporo, te ìmiraa ia i te mau haafifiraa ia òre ia tupu te mau òpuaraa a te Atua.

    Àreà ra ta te Varua Maitai, te ìmiraa ia ia ora te mau òpuaraa a te Atua. Ia tupu te òaòa i roto i ta na mau tamarii tei òre i àueue te tiàturiraa. Tei noaa ia na te Varua Maitai, eita o ia e àà i te Atua. E arataì ra te Varua o te Atua ia na i nià i te èà no te upootiàraa. Tei òre roa e tià ia na ia faataa ê i te aroha o te Atua. E tei nià taua aroha ra no te Atua ia tätou, tei na roto i to tätou papetitoraahia. Na teie täpaò e faaìte ia tätou e, aita e parahiraa to te tiàporo i roto ia tätou. I te mea ua vai te täpaò a te Atua i nià ia tätou, ta na i haamauruuru i ta na Tamaiti, oia atoà tätou tei färii i te hinaaro mauruuru o te Atua. E tià atoà ia, ia tätou ia parau e, eiaha oe e àà i to Atua ra ia Iehova, e here ra tätou i to tätou Atua ia Iehova.

    Te Varua Maitai e horoà o ia i te itoito i roto i te taata, ia tià  ra ia faatupu i te mau hinaaro o te Atua. Ia ìte – a – hia te òaòa no te faaìteraa i te ora i te mau vahi atoà. E aha ta te Varua Maitai e faatupu ? Mauti ra ia na faufaa e iva i faaìtehia e Pauro i to Taratia i te pene 5 i te ìrava 22 e faaea i te ìrava 23. Àreà ta te Varua e faatupu ra,

  1. Te hinaaro i te ora.                      5) Te maru, no upootiàraa.

  2. Te òaòa mahanahana                           6) Te maitaì

  3. Te hau tei faaàifaito                     7) Te faaroo, àueue òre

  4. Te faaòromai                                8) Te mamahu, tei faatura.    

                       9) Te hitahita òre.

     

    O teie te hotu o te Varua Maitai, te tià i te taata tataì tahi ia faaòhipa i roto ia na.

    E teie nei, te ora nei tätou i te Varua, e pee tätou i ta te Varua ra.

     

                                                                                                  Ia ora na.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens