Overblog Suivre ce blog
Editer l'article Administration Créer mon blog
21 novembre 2013 4 21 /11 /novembre /2013 09:02

Tapati 08 no Titema 2013

Taiòraa tumu  Mataio 3 : 1 – 12.

         Irava tumu    Mataio 3 : 11 vh  

E papetito ia o ia ia òutou i te Varua Maitaì e te auahi.

 Ia ora na tätou i teie tiaìraa II, i te aroha o te Atua tei horoà i te ora i te mau taata atoà e tiàturi nei i teie faufaa no o mai i te Atua ra. Tei tauturu ia tätou i te mau taime atoà e tavini ai tätou, ei faaìteraa i to na vai tamau maiteraa i pihaiiho ia tätou.

Teie tätou i teie mahana i mua i te parau no teie reo pii no roto mai i te mëtëpara. Teie reo, e reo perofeta ia, ia au i te faanahoraa tei haapaòhia mai e te mau perofeta i tahito ra. E mau aito teie ei âfaì parau no te Atua i te tau ta te Atua i mäìti  no te faatupuraa i to na hinaaro i nià i te fenua nei, e i roto i teie nei ao.

E i roto i te raveraa a te mau perofeta, e ìte ihoä tätou i na tuhaa e piti. Oia hoì, e haamata te perofeta i ta na pororaa na roto i te faaìteraa i te mau hape rarahi o ta te taata i rave i mua i te aro o te Atua. E faaara o ia i te mau ìno atoà  e te mau òhipa piò i ravehia e te taata e te faautuàraa tei faaineinehia no rätou e te Atua. O ta te päpaì èvaneria ia e haamanaò mai nei ia tätou i roto i te piti o te tuhaa no ta tätou pene parau no teie mahana.

Te piti no te tuhaa, o te òhipa a te perofeta, o to na ia haamataraa i te pii i te nünaa ia tatarahapa e ia färiu i te Atua. E i te tahi mau taime e ö atoà o ia i roto i te tohuraa i te tahi ao maitaì aè e te tahi ao âpi no te mau taata atoà tei färii i te faaâpï ia rätou ia au i te titauraa a te Atua.

I roto i ta tätou parau no teie mahana, o te reira mau te parau ta Ioane Päpetito e rave ra. Ia au i te faanahoraa no te mau perofeta, ua haere mai o Ioane mai roto mai i te mëtëpara i roto i te oraraa o te taata no te faaara i te haereà mai o te Faaora o teie ao, Haere atu ra to Ierutarema ia na ra, e to Iutea atoà, e te fenua atoà i te pae Ioritana ra.(ir5). Teie täpiriraa mai to te taata ia na ei pähonoraa ia i tä na piiraa o tei faaara i te täatoà e : te fätata mai ra te pätireia o te ao. (ir2). Ua ineine anei rätou i te färii atoà i te päpetitoraa ia matara ta rätou hara, aita ia i päpü roa.

No reira atoà paha o Ioane i faateiaha atu ai i to na reo i te ìteraa atu o ia i te mau färitea e te mau tätutea i te parauraa e : e te mau fanaù êhitena e, na vai i faaara ia òutou e e maùë e atu i te pohe e fätata mai nei, a tuu mai na i te parau e au i te tatarahapa.(ir 7 – 8). Oia hoi to na auraa, e te mau òfi taero e.

Te ìte ra ia tätou i te faufaa rahi no te òhipa e ravehia ra e Ioane e tei au atoà ia faaauhia e ta te mau perofeta i rave i tahito ra. Haamanaò na tätou i te itoito o te perofeta Nätana o tei haere roa i mua i te arii o Tavita no te faaìte atu ia na i ta na hara rahi i rave no to na nounou i te vahine a Ûria. E riri rahi to Tävita ia Nätana i to na parauraa i te âamu o te taata taoà rahi e te taata veve, e ta na parau ia faautuàhia taua taata ra i te utuà pohe. Ua itoito maitaì rä o Nätana i te parauraa atu e  o òe  taua taata ra.(2 Tämuera 12 : 7).

I roto i ta tätou parau  no teie mahana, eita  e òre e ua roaa atoà teie itoito rahi ia Ioane, i tià ai  ia na ia parau i teie mau parau i mua i te mau färitea e te mau tätutea. E a horoà atoà ai i teie mau parau tei riro ei haapäpüraa i te hinaaro mau o te Atua no te taata tei ineine i te färii i te päpetito no te tatarahapa. È ère i te mea òhie no te tahi taata tei òre i na roto mai i te mau faanahoraa matauhia e te tötaiete i te färii. Terä rä, no te mea è ère na te tötaiete no to na tau, è ère atoà  na te mau tià faaroo no to na tau ta na parau, i tià roa ai ia Ioane i te faaara ma te itoito e te mataù- òre i teie parau.

Ua hinaaro atoà o Ioane e haapäpü e teie parau ta na e parau ra eita ia e ravaì noa i  ô. A taa noa atu ai ta na pororaa i te tatarahapa e te päpetitoraa, te vai faahou ra te tahi atu òhipa e tià i te täatoàraa ia haapaò. E päpetito ia O ia ia òutou i te Värua Maitaì (ir11). I ô nei e päpü ai ia tätou i te tiàraa perofeta o Ioane, i te mea eita o ia iho te faahope roa i te òhipa. Ua haere noa mai o  ia ei reo o tei faaara i te ôpuaraa faaora a te Atua, tïra ra atu ai. No reira, ia faahiti anaè  o ia i te parau no ta tätou ìrava, te matara mai ra ia te parau no te tuhaa òhipa rahi e toe ra. E te haapäpü mai ra te reira ia tätou e aita i ravaì roa te tatarahapa noa no te faaoraraa i te taata. Te toe ra te tuhaa òhipa a te Atua i to na pae o te òre roa atu e roaa ia tätou i te rave. O te reira te manaò e vai ra i roto i te parau a Ioane Päpetito i to na parauraa e, o te haere mai i muri iho ia ù nei e mana rahi tö na i to ù. (ir 11). Oia hoì , o te Atua te Fatu o te òhipa, tei ia na te mana faaoti.

Ua riro atoà teie parau ei  haapäpüraa i te mau färitea e te mau tätutea i taua mahana ra e aita roa atu e tano ra te mau òhipa piò ta rätou e rave ra, e te vai ra ia ta te Atua haaväraa e te faautuàraa no rätou. E te haapii faahou ra o Ioane ia rätou e, e na roto i te ààu haehaa i te färiuraa i te Atua, è ère ra na roto i to rätou mau tiàraa faatere faaroo, e aore to rätou fänauraa i te fenua Ìteraëra. No te mea aita tätou i fänauhia mai ei taata faaroo,  na roto ra i to tätou färiiraa i te mau horoà a te Atua ei reira tätou e fänau âpi ai. O te reira te fänauraa e titauhia ra ia tätou. I parau ai o Ioane i teie mau parau, no te mea ia ua tuu mai te mau färitea e te mau tätutea i te parau no te fänauraahia rätou i te fenua Ìteraëra ei täpoà päpü no to rätou tüàtiraa e te Atua. E inaha teie o Ioane e parau atu nei ia rätou, mai te peu e hinaaro òutou i te ora, a tatarahapa a tiaì noa atu ai i te päpetitoraa na roto i te Värua Maitaì e te auahi. E ia manaò atoà rätou e mau tamarii rätou na Aperahama ra, eita ia rätou e färii i te parau no te päpetitoraa tatarahapa, no rätou atoà teie parau.

Ua riro te parau no te Värua Maitaì e te auahi ei parau rahi i roto i te faanahoraa a te Atua ia hinaaro o ia i te òhipa i roto i te mau mea o tä na i rahu. E tià roa ai ia parauhia e na roto i teie parau ta Ioane te matara mai ra te parau no te òhiparaa te Atua i rotopü i to na nunaa. Te vai nei te tahi pae tei faahiti i te manaò e, peneiaè te auahi no häte e no te raì, hoê ä ia. I te mea ia hiòhia te huru no te raveraa a te Atua i roto i ta na auahi e roaa i te feia parau tià te puai âpi no te täviniraa ia na, âreà no te feia ììno ra, tei reira ia te auahi pau – òre e te àuàuraa niho. I ô nei- raa ra te ìte ra tätou i te huru no te òhipa o ta te Fatu e haere mai e rave, è ère ia i te tahi òhipa naìnaì. Te faataa nei o Ioane i ô nei i te mau reni rarahi no te òhipa faaora a te Atua, ma te tuu atoà rä i te parau i mua i te mau taata tei haere mai ia na ra. Te vai ra te tahi mäìtiraa, e ia faaineine no taua mäìtiraa ra. No te mea ua ineine ta te Atua täpura ia au mai ta Ioane e faaara ra : Tei tö na rima ta na tähiri, e tämä mäite o ia i ta na päpaìraa, e haaputu o ia i ta na titona i roto i te vairaa titona, âreà te ota e tutuì o ia i te reira i te auahi pohe – òre.(ìr 12).

Te uiraa rahi ia tätou i teie tau no te tiaìraa, e titona anei tätou tei ineine i te färii ia päpetitohia i te Värua Maitaì e te auahi, e aore ia mea au aè na tätou ia tutuìhia tätou i te auahi pau – òre. E rave rahi te pähonoraa i roto ia tätou, hoê anaè rä pähonoraa tano, no reira a ìmi mäite eiaha ia hape. I mua i teie parau e e homä, te ìte ra ia tätou i to tätou paruparu e ta tätou räve- òre, terä rä o te rëni te rä tei haapaòhia  no tätou e i roto i te mau poroìraa a te Fatu ia tätou, ua päpü atoà ia na e te vai ra o te tià i te täpeà i te peräpeio. Eiaha rä e pärahi i roto i terä manaò e mea òhie ia au mai ta te mau àti- Iuta e to rätou mau arataì faaroo i taua tau ra i manaò .Tiàturi rä rätou i te aroha rahi o te Atua, O ia tei färiu matamua roa mai to na aro ia tätou e te ani mai nei ia tätou e ia färiu tätou ia na ra, no te mea O ia te ora o tei ineine roa i te tiàhapa mai io tätou nei. No reira, mai te peu te taupupu ra to tätou värua, e ani tätou i ta te Atua tauturu  nä na e arataì  ia tätou na nià i te èà o ta na i faaineine no tätou.

 

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens