Overblog Suivre ce blog
Editer l'article Administration Créer mon blog
21 novembre 2013 4 21 /11 /novembre /2013 09:14

Tapati 22 no Titema 2013

Tïaìraa maha : Mataio 1 : 18 – 25.

  E hoa ìno mä e, te mahana teie ta tātou i faataa no te âmui i roto i te pureraa. E taime e haapäpü ai tātou i to tātou tiàturiraa i teie fatu to tātou. No na te fänauraa i faaìtehia e ta tātou taiòraa. E fänauraa huru fifi teie i roto i te faatiàraa a Mataio. No te mea, ua hapü te vahine i momoàhia ia Iotefa. O te mea ia i òre i färiihia e te ture. I roto i te teuteronomi 22 : 23. e tuìhia te vahine e te täne i rave ia na ra i te ôfaì. O räua too piti atoà te pohe i mua i te ture. I roto i teie parau, e piti atoà fifi teie e faaühia nei e Iotefa. A tahi, eere o ia te metua täne o teie tamarii i roto i te ôpü o Maria. O te mea ia e faatupu i te ìnoìno e te pohehae i roto i to na àau. A piti, E riro Iotefa i te taa ê i ta na vahine momoà. Inaha, te reira ihoä te faanahoraa tumu  a te ture. Te auraa, te riro nei teie parau ei òhipa haamä roa i roto i te oraraa o teie täne. Te piri mai nei hoì te mahana e faaipoipo ai räua. Hoa here mä, ua ìte tātou i te huru o teie mau fifi i roto i to tätou oraraa. Te mea pinepine e ìtehia nei, e tupu roa te tahi peàpeà rahi i te ùtuafare. Te faaìno atu ra e te hüaìhia mai ra te tahi mau ìnoìno tahito i roto i te tauàparauraa. Aita rä te reira huru peàpeà i tupu i roto i teie na taata. Te mea noa i ravehia e Iotefa, te haapae huna-noa-raa i ta na vahine. Eiaha te taata ia ìte mai i teie òhipa. Ua haapäpü atoà mai teie räveà ta teie taeaè e, ua tupu mau te mauiui i roto ia na. Aita rä o ia i hinaaro ia faufaa òre te òhipa ta räua Maria i haamata mai.

 E aha rä te mea i tämarü i te manaò o Iotefa. Ia au i te faatiàraa a Mataio, te Atua te tumu i marü ai te manaò o Iotefa, tei riro te merahi ei àuvaha i te manaò o te Atua. I roto i te îrava 20, te na ô ra te merahi i te parauraa e:

  • « E Iotefa a Tavita ra, eiaha e mataù i to vahine ra ia Maria ia arataì mai i te ùtuafare, no te värua maitaì hoì i hapü ai o ia ».

Terä te manaò matamua i vai mai i roto i te parauraa a te merahi. Te uiraa rä, no te aha te merahi aita i faaea noa i nià i teie manaò. Te maramarama atoà ra tātou, te tano òre ia faaea noa te parauraa a te merahi i roto i teie manaò. E riro te ôpuaraa a te Atua i te faaea noa i nià i te faahapüraa ia Maria. Inaha, eere te reira te manaò tumu o te Atua i roto i teie parau. Ahiri hoì te reira noa ra, o ia hoì te faaara-noa-raa i te hapüraa o Maria na roto i te värua matiaì, aita ia te parau o te Atua i ätea atu i te parau o te tahi taata e hinaaro i te tamarii. No reira, eere teie hapüraa to Maria i te hinaaro tamarii no te Atua. Ua türaì-faahou-hia rä te ôpuaraa a te Atua i mua. Ua haamauhia i nià i te ora ta teie tamaiti e faatupu. « E faaora hoì o ia i to na taata i ta rātou hara ». Teie te ôpuaraa tumu i na roto mai i teie parau. Ia ora te mau taata i faaroo e ua pee i te mau èà o te fatu. Te ìte ra tātou e, e aha rä te tumu i marü ai te manaò peàpeà o Iotefa. E tomo atoà hoì o ia i roto i te ôpuaraa faaora a te Atua. E mea tano rä tätou e parau e, àuaa atoà te here o Iotefa i ta na vahine. Na te reira i turu i teie faanahoraa ta te Atua tei na roto mai i te merahi i te faaararaa. Te auraa, ua tià roa ia Iotefa i te faaòromaì i to na mauiui no te faaüpootià i to na here i ta na vahine e to na hoì here i to na Atua. Te Atua o to na hui tupuna, te Atua hoì i faaora mai i to na nünaa i parauhia ai to räua too piti. O Märia räua Iotefa.

         I mua i teie parau ta tātou e hiò nei, ua haapäpühia mai te iòa o teie àiü. O Ietu to na iòa. Inaha, i roto i te tohuraa a Itaia, o Emmanuera te iòa i faaìtehia mai.  O ia hoì, te Atua io tātou. Ua pühapa mai te Atua i rotopü i te taata. Ua haere taata roa atoà mai o ia. O te mea mau teie e ìtehia ra i roto i te parau o to tātou fatu. E ôpuaraa teie na te Atua tei pärahi roa mai i rotopü i te taata, e ua ora o ia mai te mau taata atoà ra. E aha rä te mea i taui ai te iòa. E aha rä o « Emmanuera »  i riro mai ai o « Ietu ». Eere ānei na teie huru tupuraa o teie hapüraa e to na fänauraa i faatupu i te tauiraa o te iòa. Ua ìte hoì tātou e, te auraa no teie iòa Ietu, e ora te auraa, aore ia e faaora. Inaha, te ìteraahia atu to na parau i roto i te oraraa o teie na taata, ua faatupu te reira i te fifi i mua i te ture. Ua riro Maria ei taata hara i mua i te mata o te ture. E aha hoì te mea matamua e tià i te Atua ia rave i roto i teie ôpuaraa ta na. Maoti rä, te faaora ia Maria räua Iotefa i mua i te ture ètaèta a te Ati Iuta. Te auraa, ua riro teie tauiraa iòa ei räveà faaora i na metua i amo mai i te tamaiti a te Atua. No reira, i roto i te haamataraa i te parau o Ietu, o Iotefa räua Maria na taata mätamua roa i faaorahia. Riro noa ai rä te iòa o te Fatu ei faaìteraa i te parau o te ora, häroàroà atoà nei rä tātou e, no te here o te Atua i tupu ai te reira. No te here o te Atua ia tätou i riro mai ai o Emmanuera ei Ietu. No reira, Te na ô ra i roto i te, I Ioane 4 : 7, 8vh

« E aù mau here e, e aroha tātou ia tātou iho, no ô mai hoì te aroha i te Atua ra, e o tei aroha ra, ua faafänauhia ia e te Atua, e ua ìte hoì o ia i te Atua … E aroha hoì te Atua ».  Ia ora na.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens