Mareto 13,1-13
Tapati 05 no Àtete 2012.
Mareto 13,1-13
E tià ia parauhia i roto i te taiòraa e farereihia nei tätou, te tahi manaò tumu e ìtehia, TE MAHANA O TE ATUA, e to na mata. Na teie na tumu parau e faaìte ia tätou e, tei pihaiiho noa te Atua ia tätou, ei haapäpüraa e, te vai tämau noa nei Ò ia i roto i te ora. E taua ora ra, to na ia mahana, e to na mata, tei òre i faaruè ia tätou.
Ta mahana o te Atua, o te Mau taata atoà ia, te fëia parau tià, e te fëia parau tià òre tei tïtauhia ia tatarahapa. Aita O ia e faatea te reira Mau maitai ta na e horoà nei, a tae roa ai i te mahana haavaraa. I reira e faataahia ai te parau tià i te parau tià òre, ia tae i teie mahana, e ìtehia ai te Mau tamarii no te pupu taata o te Atua, o tei òre i tano i te mata o te Atua ra, e òre roa e tià i mua i to na aro . E hoparahia ia i räpae i te vahi àuàuraa niho.
Te mata o te Atua, e tano noa ia te reira i nià i te fëia parau tià, no te mea tei roto i ta na hiòraa e tupu ai te tauturu, tei faatupu i to na aroha, ma te tiàturi. I to na Mau tävini, no te faaìte i to na Mau hinaaro ma te ora. Ia tupu anaè mai teie te huru, eita te òhipa e teimaha i te mea o te Atua tera, e hiòpoà ra to na Mau tävini. Oia ia te parau no aòraa, na teie òhipa e faaitoito i te Mau tävini o te Atua ia parahi tämau i roto i te faaroo ia òre ia àueue. Ma te ara ra i te Mau òhipa tià òre atoà e tupu na roto i te Mau faahemaraa rau atoà e ìno ai, e aore ra vahiahia ai.
Ta Ietu ia e faaära nei i ta na Mau pîpî, e ora ra òutou i te Mau tämau maite, tei faahitihia i roto i te èvaneria a Mareto i te pene 13 i te ìrava 13 E e ririhia mai òutou e te taata atoà i to ù nei iòa; o të mau mäite rä e tae noa atu i te hopeà ra, o të ora ia.
Ei ta tuhaaraa i te pene parau.
E tià ia parauhia e toru tuhaa e vai nei i roto i teie taiòraa.
1) ìr.1 e tae i te ìr.2 Te ùnaùna o te hiero e te tohu a Ietu.
2) ìr.3 e tae i te ìr 8 E ara.
3) ìr.9 e tae i te ìr.13 E ora ia Mau maite.
Ei tuatapaparaa.
O ta Ietu ia e faaära nei i ta na Mau pipi, i te ùnaùna o teie hiero ta rätou e ìte nei. E faaìte ia i te òhipa i ravehia e te Mau taata i roto i te tau tei orahia. E nehenehe Mau te hiero i pätuhia e te hinaaro o te taata. E tià ia parauhia te faahiahia nei te Mau pipi i teie òhipa. Ma te ìte òre ra e, e aha te òhipa e tupu ra i roto i teie fare. Ta rätou e ìte nei e Mau taoà moà, e Mau òfaì maitataì, ua Mau noa ta rätou hiòraa i nià i te nehenehe, eiaha ra i nià i te òhipa e tupu ra. E faaìte o Ietu èita teie Mau òfaì e vai faahou i nià i te tahi e te tahi, e hurihia i raro, e aha te täpaò, mauti ra ia, e ara, te vai ra te tahi e haere mai e parau ia mätou e, o vai te Metia, eiaha e pee atu, e faaroo òutou i te roo tämaì, te àueueraa fenua, eiaha ra e mataù. E na mua teie Mau òhipa i te tupu, eita ra te reira i te hopeà o teie ao. E tià mai te tahi fenua e àro te tahi fenua, te tahi patireia e àro i te tahi patireia. E àueue te fenua, te oè e te maì rahi. E haavarehia te fëia parau tià, e tuuhia i roto i te fare täpeàraa, ma te aratohia i mua i te Mau mana o te ao nei i te iòa o Ietu. Ia tupu teie Mau òhipa ia riro ra ia te reira ei faaìteraa i te parau Mau na te Mau tamarii a te Atua. Tei reira na Ietu ia e horoà mai te parau ia rätou ia faaìte. Ia òre ia fati i raro aè te faanahoraa a te ènemi, mauti ra ia o te haavare. E pohe roa te tahi pae i te faaìno i te iòa o Ietu Metia. Ia tupu anaè mai teie te huru e òre roa te hoê ìò roru o teie Mau taata para tià e moèhia e te Atua. E ora ra rätou ia Mau maite i te tiàturiraa i te Atua. I te mea tei nià te mata o te Atua i ta na Mau tamarii, tei òre i àueue te faaroo, i roto i te Mau òhipa atoà e tupu nei. Ei faaturoriraa i te feruriraa o te Mau taata atoà e o nei i roto i te faanahoraa a te Atua.
Ei parau no te taiòraa.
Na Evaneria hiò àmui, te tuàti nei ia rätou èi faaìteraa i te hopeàraa no te oraraa o Ietu i te fenua nei. Ma te tuu atoà i te huru no te tupuraa te hopeà no teie nei ao. Teie hohoà, tei àmui i te òhipa e tupu i nià ia Ierütarema ei faaìteraa ia i te haavaraa a te Atua i nià i te Mau òhipa atoà, tei rahuhia, e tei faatiàhia e te taata. Òia hoì, eita na te ìno e faaoti te parau no te hopeàraa o teie nei ao. Te parau ia ta Ietu e faahiti nei i te ìrava 13, E e ririhia mai òutou e te taata atoà i to ù nei iòa; o të mau mäite rä e tae noa atu i te hopeà ra, o të ora ia.To tätou teie puai e te feia faaroo, e vavahi änei te Atua ta na i here, ta na i faatävana i nià- iho. Aita vau e tiàturi nei e na reira- hia teie ao nehenehe, tei niuhia e te Atua, na roto i to na faatiàrepuraa i to na Värua i nià i te ìriatai. E faaìteraa teie, te vai noa nei te aroha o te Atua i nià ia tätou. Ia ù nei te tiàturi nei au i teie na parau a Ietu i te ìrava 9 e te 10, E ara rä ia òutou iho. E tuu hoì rätou ia òutou i mua i te mau Tuneteri ra, e e papaìhia òutou i roto te mau tunato ra. E no ù nei e ärataìhia ai òutou i mua i te aro o te mau tävana e te hui-arii, ei ìte no rätou. E mata na rä te Èvaneria i te faaìte-haere-hia i te mau fenua atoà nei.
Òia hoì te ani mai nei o Ietu ia ù ia àro, i te àroraa ei faaìteraa e, eita na te àueueraa fenua, te tiruviraa, te tämaìraa, e te Mau maì rau, e faaoti te parau no te hopeàraa o teie ao. Ia rave au i teie òhipa te haapäpü nei o Ietu, i te tähi manaò ia au i te faaìteraa a Ruta Èv i te pene 21 i te ìrava 18, EITA ROA RA TE HOÊ ÌÒ ROURU O TO OUTOU UPOO E MOÈ. To na auraa ra, e ora tätou ia tämau maite tätou i to tätou faaroo eiaha ia àueue. Àueue noa atu te fenua, aita ta tätou e raveà, eiaha ra te taata ia àueue, i reira e huehue ai.
Ia ù i manaò te parau no te hopeàraa o teie ao, eita e tupu mai ta Mareto e faatià ra. No te aha ? I te mea na te Atua iho i parau e, EITA VAU E TIRUVI FAAHOU I TE FENUA, e teie parau ta Ietu i te ìrava 39 no te pene 6 i papaìhia e Ioane, TEIE HOÌ TO TE METUA TEI TONO MAI IA Ù NEI HINAARO, IA ÒRE ROA VAU IA ÈRE I TE HOÊ I TA NA I HOROÀ MAI RA, IA FAATIÀ-PAATOÀ-HIA E AU IA TAE I TE MAHANA HOPEÀ RA.
Òia hoì, eita tei pohe te parau hopeà o teie nei ao, tei te ORA MURE ÒRE ra. To na auraa ra, aita e àueueraa fenua, aita e tämaìraa, aita e maìraa, aita e vavahiraa fare faahou. No te mea te faatià nei te Atua i to na mahana. I reira te Atua e tià ai i nià i to na parahiraa no te haava i teie nei ao. Ta Tetaria ia e faaìte nei i te pene 2 no te ìrava 13, E MAMU NOA, E TE TAATA ATOÀ E, I TE ARO O IEHOVA E, UA TIÀ HOÌ O IA I NIÀ I TO NA PARAHIRAA MOÀ.
O teie to ù TIAITURURAA no te hopeà o teie ao, na te ORA e haava i te taata, eita ra na te pohe, ia maitaì te ORA.
Te nahea nei ia ta òutou hiòraa.
Terai or.