Overblog Suivre ce blog
Editer l'article Administration Créer mon blog
27 juin 2012 3 27 /06 /juin /2012 22:29

Tapati 26 no Atete 2012

Ioane             6:60-69          Te Tamaiti a te Atua ora.

Ei ìrava tumu  Ioane  6:69  Ua faaroo aè nei hoì mätou, e ua ìte hoì mätou e, o òe te Metia, te Tamaiti a te Atua ora ra.

 Èi manaò tatara.

Te uiraa mätamua o te tià ia tätou e faatupu  i to tätou faarooraa i teie taiòraa, oia hoì ia; 1) o vai te faaruè ia Ietu, e no te aha ?  2) O vai te pee ia Ietu, e no te aha ?

I mua i ta tätou pärau no teie mahana paieti, te horoà nei o Ietu i ta na mau pipi i te hoê haapäpüraa e, o vai ra O ia, e aha ta na òhipa, e aha ta na faanahoraa, e o vai O ia ia au ta te taata hiòraa. No te mau  pipi e pärau riàrià roa ta rätou i faaroo i to Ietu haapiiraa i te mau taata i roto i te tunato Taperenaumi. Te òmumu  nei rätou, oia hoì te pärapärau haehaa noa ra ia òre rätou ia faaroohia mai. O vai te tià e horoà i to na tino èi maa na te taata. O vai te tià e horoà i to na toto èi ïnu na te taata. Ua peàpeà te mau pipi i te faarooraa i teie pärau, ma te märamarama òre. I te mea ua haamau noa rätou i to rätou manaò, i nià  te hoê noa pae no te mau faaìteraa a Ietu. Aita atoà e òre no te taime mätamua atoà rätou i te faarooraa i teie pärau, mai ia tätou atoà, hou tätou a riro mai ai èi manihini no te àiraa maa moà a te Atua. Hoê noa pae, te pae no te tino tahuti, ta Ietu ra e pärau nei, te pae ia no te tino tahuti òre.I tià ai, ia Ietu ia fariu i nià i ta na mau pipi, no te haapäpü ia rätou i te tahi vahi no ta na faaìteraa, e a òre ra te pororaa i te Èvaneria.

Te haapäpü nei O ia e, no te varua te ora, aita o te tino faufaa, aita te hoê pae i faaroo, e òre roa te taata e tae, ia òre ia horoàhia mai e ta ù Metua ra.No teie mau pärau ua faaruè mai ra te hoê pae rahi, o te mau pîpî äna ra, haere atu ra i te vahi e mauruuru ai rätou. I roto i teie titiàraa a Ietu tei mau mai i roto i te vairaa hoê àhuru mä piti ia, ma te ui atoà e, e haere atoà änei òutou ? Te pahono nei o Timona Petero no te taatoàraa, e te Fatu, e haere tià mätou ia vai ra ? tei ia òe hoì te parau o te ora mure òre, o Òe te Metia te Tamaiti a te Atua ora.

E manaò tià roa, teie ta Petero e pärau nei, ma te ìte i te maitaì a te Atua i roto i te òhipa ta Ietu e faatupu nei. Te päpu nei ia o Ietu te Fatu ia no te ORA MURE ORE, e Tamaiti O ia na te Atua Ora. Hoê àhuru mä piti noa pipi tei faaroo, i te mau tïtauraa a Ietu na roto i te mau haapiiraa, tei faataahia no te mau taata e rave rahi. Teie o Petero e fäì nei i to na faaroo i mua ia Ietu, ua faaroo  mätou, ua ìte mätou, o Òe te Metia, te Tamaiti a te Atua ora ra. Te àau teie no te taata faaroo e parau nei, i to na tuàti i te faanahoraa a Ietu. I te mea na te fäìraa faaroo, e faaìte päpü e ua taatihia tätou i te Atua, te Metia, e te Varua - Moà. Teie taatiraa no te färii ia i te mau maitaì a te Atua. Na roto i te Päpetitoraa, te haapäpüraa i te Päpetitoraa, te òroà Moà a te Fatu e te haaipoiporaa i mua i te aro o te Atua. Te tupu nei  teie mau òhipa i roto i te Ètärëtia, no te faafänau i te taata atoà tei fäì i to rätou faaroo, ia riro èi mau tamarii na te Atua. Tei ìte i te mau maitaì a te Atua, ua ìte atoà ia i te mauiui o te Ètärëtia te vahine a te Atua.

Te fäìraa faaroo o te àmuiraa ia o te mau taata teretetiano tei färii i te mau mauiui o te Fatu i nià i te tätauro. Te auraa no teie pärau e ora te noaa, oia hoì, e horoà a te Atua i te mau mataì atoà e tupu ai, e mähorahora ai te ora. Èita ra te Atua e faaruè ia na i roto i te hepohepo, e roaa rä te mau mea atoà e tïtauhia e, e hinaarohia, e te mau mea atoà e òre ai te hanahana o te Atua e haamoèhia

Ta te fäìraa faaroo e faatupu te òaòa ia, ei òaòa ia i te faaìteraa e, o Ietu Metia, te Tamaiti a te Atua ora. Te Atua tei haamorihia e te mau taata faaroo e rave rahi. Tei heheuhia te àau o te fëia faaroo, ma te pärau vaha i te òaòa i te Atua. Eiaha ra i mua noa i te ùtu, no roto roa mai ra i te vahi hohonu o te tiàturiraa, tei fäì e, te Metia, te Tamaiti a te Atua ora ua here ia, ia na iho, to na taata tupu, to na enemi, e te òhipa a te Atua. I reira tätou e ìte ai i te faahiahia, te paari o te taata faaroo ia ìte i te faufaa no te tïtauraa a te Atua ia na.

Te horoà nei te faaroo ia tätou, i te hoê manuiäraa âpï i te mau taime atoà, ia parahi fatata noa tätou i te aroha o te Atua. I te mea te reira te òaòaraa o te taata paieti. Te faaìte mai ra ta tätou taiòraa, o vai mä te mau pipi i pätoì i te mau haapiiraa a Ietu, e o vai tei färii i ta na pärau. Ua moè roa te Âti Iuta i roto i ta rätou pätoìraa, mea hau aè na rätou te tiàraa taata tahito e te huru oraraa o te ao nei, mea hau aè na rätou te mäna o teie nei ao. Vëtahi pae tei hinaaro i te tiàraa pipi, ua faaruè mai ia Ietu, no te mea e riàrià  rätou i te mau pärau a Ietu. I te mea atoà ua paruparu to rätou faaroo, èita atoà e maraa ia rätou te mau hopoià a te Atua ia fautua. E tià ia tätou ia pärau e teie rahiraa pipi i faarue mai ia Ietu, te vai ra teie pärau e, mau moa tito pae fare teie, oia hoì to na auraa, mea puai roa to rätou vaha ia pärau, no te rave ra èita ia e ìte – faahou – hia.   O nä pîpî tino àhuru mä piti änaè tei toe mai.

 I te pae hopeà no teie haapiiraa faufaa rahi a Ietu, ua fänau mai te hoê òhipa âpï i roto i te mau pipi, oia hoì ua fänau mai te hoê Fäìraa Faaroo mai roto ia Petero, e te Fatu e haere tià mätou ia vai ra ?Tei ia òe na hoì te Ora Mure Ore. Ua faaroo aè nei hoì mätou, e ua ìte mätou e, o òe te Metia te Tamaiti a te Atua Ora.

Èita òre, e te hinaaro nei o Petero, ia riro te mau pärau o ta na fäìraa faaroo èi täpaò haapäpü e, e ua faaroo rätou mä te färii päpü i te pärau a te Fatu no to na tino e to na toto.

Te fäìraa faaroo, i roto i te Faufaa Âpï o te täpaò ia o ta te hoê taata tei färerei ia Ietu Metia, e haapuroro nei no te faaìte e te färii nei o ai ia Ietu Metia èi Faaora e èi Fatu no na. No reira, a hiò tütono na tätou i te pärau no teie fäìraa faaroo, e te Fatu, e haere tià mätou ia vai ra ?tei ia òe na hoì te Ora Mure Ore. Ua faaroo aè nei hoì mätou, e ua ìte hoì mätou e o òe te Metia, te Tamaiti a te Atua Ora.

Te haapäpü nei o Petero e, o Ietu, o te Fatu ia no te ORA MURE ORE, o O ia te Metia, te Tamaiti a te Atua Ora. Oia hoì, aita atu e Fatu, aita atu e èà, aita e Ora Mure Ore, aita atu e Metia e vai nei, maoti rä teie änaè, o Ietu Metia, te Tamaiti a te Atua ora. E ua haapii mai nä Päpaì Èvaneria e maha ia tätou, e èita teie parau e matara, mai te peu, èita te parau no te pohe tätauro e färiihia, Mareto 15,39.Te fëia e àpe i te tätauro, èita rätou e ìte i te hohonuraa no teie fäìraa faaroo o ta Ioane e faaìte nei ia au i te pärauraa a Petero.

E aha no tätou te pärau no te tätauro i roto i to tätou oraraa faaroo, e tae noa atu i ta tätou mau fäìraa faaroo ? Ei tautururaa ia tätou, e tano atoà ia taiò e ia heheu faahou i te Torinetia hoê i te pene 1 i te ìrava 18 e tae i te pene 2 i te ìrava 1 e tae i te ìrava 5. O te hoê te reira vähi i faaìte ai o Pauro i nä taata tootoru e vai i mua i te parau no te tätauro.

Te ÂTI Iuta e ta na mau mäìmiraa täpaò, Èi Atua faatupu temeio, ta te Âti Iuta e tiàturi.

Te hereni Etene e ta na mäìmiraa täpaò, Èi Atua faatupu àamu, ta te hereni ia e tiàturi.

Te taata faaroo e to na òaòaraa i te pärau o te tätauro, na te Atua e faaora nei e faatiàma nei i te taata hara nä roto ia Ietu Metia, e haafänau i te faaroo o te taata e tiàturi nei ia na. I ù nei e faufaahia ai te AORAA a te PARAU MAITAI no te hinaaro o te Atua. Inaha, mea na roto i te pärau a te Èvaneria e aòhia ai, te ìteraa te taata faaroo i te faatiàmaraa a te Atua èi faaoraraa te taata hara.

Te òaòa i te manaò hoê, ia maitaì i te faaìteraa i te òhipa a te Atua. Ia ìte – a - hia e Atua ora, tei hinaaro ia riro te mau taata atoà èi mau tamarii tävai, o ta te fäìraa faaroo ia e faatupu. O te òaòaraa te reira, o te mau taata atoà tei tuu i to rätou tiàturiraa i roto i te Fatu rä, ia Ietu Metia te Tamaiti a te Atua ora.

Ia tauturu mai a te Atua ia tätou i teie hepetoma âpï, ta tätou e ratere atu nei.

ia ora na.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens