Overblog Suivre ce blog
Editer l'article Administration Créer mon blog
14 avril 2013 7 14 /04 /avril /2013 20:04

Tapati 14 no Me 2013

Ioane 21 : 1 - 19 Te peeraa ia Ietu.

 I roto i teie taioraa e tià ia tatou ia parau e, te vai ra te mau irava tumu tei faaite papu i te tupuraa no teie fä faahouraa mai o Ietu i ta na mau pîpî.

 irava 1)         Te faaite faahouraa o Ietu ia na i te roto no Tiperia.

irava 2)          Tei reira o Timona- Petero e te mau tamarii a Tepetaio.

 irava 3) To Timona Petero, haereraa e ravaai, e to na  peeraahia e te taatoà o te mau pîpî. E te manuia - ore – raa te tautai i taua rui ra.

Irava 4vm)      E i te poipoi roa teie o Ietu e tià noa nei i te hiti roto,ma te parau atu e, E te mau tamarii e maa ta outou.

Irava 6-13)      Te faaueraa ia a te Fatu ia tuu i te ùpeà i te tau atea o te pahi,oia hoi i te pae àtau. Manuia iho ra te tautai i reira, eita hoi i te vahi atea roa i te pae, ua î roa te ùpeà i te ià, ma te faaite atoà i te numera, 153 rahiraa aita te ùpeà i motumotu.Teie numera, e tapao faaite i te àmuiraa o te taata Teretetiano i roto i te mau tau atoà. O tatou ia i faaroo aé nei i te mau faaiteraa a te Apotarupo teie rahiraa taata e itehia nei e Ioane. Oia hoi te tahi tatararaa no teie numera te 100, eita e hope ia taio te nunaa o te Atua, te 50 te mahana penetetote, te oroà no te Varura Maitai, te 3, te ioa o te Metua, Te Tamaiti, e te Varua Maitai. Te ià ra i te tau o Ietu, e tapao ia te reira no te taata Teretetiano. IXTHUS.

 I           Iesous              Ietu

 X         Xristos            Metia

TH      Teos                Atua

U         Uios                Tamaiti

S          Soter               Faaora

 irava 14 vm)    O te toru teie o te taime to Ietu faaiteraa mai ia na i ta na mau pîpî mai to na tiàraa mai, mai te pohe mai.

 Te tamaaraa i faaineinehia e Ietu no ta na mau pîpî, ei tapao faaite e, e tià atoà ia Na ia àmu i te maa. To na tino aita ia i tahuti, ua tià hoê-a haereraa i rapae i te menema e to na Varua. Teie maa ta Ietu i faanaho no te àvari ia i to na tiàraa Atua.

Ei hioraa i te taiòraa.

E tià ia parauhia ua ùàna tei ioa o Ietu i Ierutarema, ua tae roa i roto i te feia faaetere i te pae faaroo Ati Iuta, e i te pae tivira no te hau Roma. Ia hiohia mea maitai aé i te oraraa o Ietu i pihaiiho i ta na mau i to na oraraa ra. Aita ia te mau pîpî e parau rahi nei i te ioa o Ietu i te mau vahi taata. Ia tià mai ra o Ietu mai te pohe mai, te itehia nei to te mau pîpî ore-raa e faaea i te parau i te ioa o Ietu. To na auraa ra e ohipa rahi teie e ravehia nei e te mau pîpî, i te haamauraa i te mau faanahoraa no teie tiàturiraa àpi. Tei faatupuhia  e te tiàfaahouraa o Ietu, i teie reo tei parauhia i nià ia Timona a Iona,   

1) A faaàmu i taù mau àrenio,

2) A tiai i taù mau mamoe,

3) A faaàmu i taù mau mamoe,

4) Na oe e faatoro i to rima, e na tehi ê e ruuruu ia oe, e a hopoi atu ai hoi ia oe i te vahi hinaaro-ore-hia e oe ra,

5) A pee mai ia ù.

Na teie mau parau ta te Fatu i nià ia Timona a Iona, e haapapu nei, i te tapura ohipa ia ravehia e te mau pîpî. O te tià ia, ia tätou ia hio i roto i te Evaneria a Ioane i te pene 21 i te irava 1 e tae i te irava 19, ei hioraa na tätou mea nahea to Ietu taeraa i nià i na manao e 5 nei.

Ei haatumuraa i te manao Ioane 21 : 1 - 19.

Tae roa mai i teie nei, te mau faraa no Ietu tei faatiàhia i roto i teie Evaneria, ei haapapuraa ia i te pîpî i te ohipa rahi ta te Fatu rave no to na upootiàraa i nià i te pohe. Ua faaineinehia hoi ratou no te hoê aroraa rahi. E riro i teie nei, ua î roa ratou i te oaoa e te horo haere ra na roto i te mau aroa no Ierutarema ma te pii e, ua tiàfaahou o Ietu, Aita roa. Ua paruparu roa ratou, aita e ite faahou nei e, e haere i hea, aita to ratou e aratai faahou. E no te mea, aita ta ratou e raveà faahou, te faatiàhia nei ratou i roto i teie parau e, te haere nei te mau pîpî e ravaai. O rätou tei faaineinehia no te àfai i te hoê parau rahi o te faaaueue i teie nei ao, te haere nei e ravaai. Te ohipa ta ratou i faarue i te mau taime i mairi, te hoi faahou nei ratou i reira, o te huru anei teie no te mau veào te hau, e ua faufaa-ore anei te ohipa tei ravehia e te Fatu ?

Aita ! ua tià i te Fatu ia hoi faahou ratou i ta ratou ohipa matamua, te ohipa ravaai. I te hiti hoi no teie nei roto, e i nià i ta ratou ohipa ravaai to te Fatu titauraa ia ratou ia pee mai ia Na. No te mea ra, ua fatata te hora e haamata ai ratou i te ohipa àpi i titauhia ai ratou, te hinaaro nei te Fatu e horoà i te hoê haapiiraa hopeà ia ratou no ta ratou ohipa. E ei raveà e ohie aé to ratou maramaramaraa e te iteraa i te auraa no taua ohipa ra, ua faahoi te Fatu ia ratou i roto i teie nei roto, i nià i ta ratou ùpeà i faarue aé nei, no te mea, teie nei roto e te ohipa ravaai ta ratou i matau, o te parapore ia no to ratou toroà apotetoro i roto i teie nei ao. E na roto i teie tautai temeio e haapii maramarama ai O ia ia ratou i ta ratou ohipa. Eiaha e manao e, e tapitiraa teie no te tautai temeio tei faatiàhia, i te pae matamua no te ohipa a te Fatu, e mea ê te tautai matamua, e mea ê teie.

E piti haapiiraa ta te Fatu  e horoà nei i te mau apotetoro, na roto i teie nei tautai temeio:

1) E mau ravaai taata ratou. Te faamanao nei te Fatu ia ratou na roto i teie tautai i ta na titauraa ia ratou, "a pee mai ia ù e faariro vau ia outou ei ravaai taata." Ua tae i taua hora ra, e faarue ratou i teie ùpea, e teie roto. E rave ratou i te hoê ùpea àpi e haere ratou i roto i te hoê roto rahi atu i teie. I mua ra, o Ietu iho te ravaai tei taora i ta na ùpeà i nià ia ratou e ua mau ratou i roto i taua ùpea ra. I teie nei rä, o ratou te feia ravaai, e rave ratou i taua ùpea a te Fatu ra e e haere ratou na roto i teie nei ao e faariro i te mau fenua atoà ei pîpî na na. Mai te feia ravaai e farerei pinepine i te mau fifi, te matai puai, te manuia ore, e farerei atoà ratou i te reira. E ravaai taata ra ratou, e eita e tià ia ratou ia otohe i mua i te mau fifi e te mau àti e rave rahi te huru.Te ià tei hei i nià i te ùpeà, e ià pohe ia, te varua taata rä tei hei i roto i te ùpeà no te Evaneria, ua noaa ia, ia ratou i te ora turuhia e te parau a te Atua. No reira, na roto i teie ohipa faaora, eiaha ratou ia otohe ,ia faaoromai rä i te mau mea atoà.

 I mua i teie nei parau, a haamanao atoà tatou i to tatou titauraahia.Ua pahono tatou no te färii i te titauraa, ua faaitoitohia tatou, ua faaàhuhia i te haana tamai e ua tonohia mai te mau apotetoro. Na roto ia ratou, ua parauhia mai teie parau i te ETARETIA. Eiaha roa ia moe i te Etaretia e, ua maitihia oia ei ravaai taata. Te parau tei fafauhia i te mau apotetoro, e parau ia te fafauhia mai i te Etaretia iho, e o ta na e haapao e tae noa atu i te hopeà.

2) Aita roa e mea e tià ia ratou anaè. Te ohipa ravaai taata ta ratou e rave i roto i teie nei ao, e ohipa faufaa-ore ia,ia tiàturi noa ratou ia ratou iho.Ua tuu ratou i ta ratou ùpeà i taua po ra i tera vahi e i tera vahi no te roto, ua ao te po e aita roa e faufaa. E te poipoi, te tià nei  o Ietu i te hiti roto, e te ani nei ia ratou "e maa ta outou"? Ua hinaaro te Fatu i te tahi maa, e aita roa ta ratou e maa iti no te horoà atu na na. Ua haa ratou e ua ao te po, aita e faufaa.

I teie taime, ua ite ratou i te faufaa ore, te faaue nei te Fatu" a tuu i te ùpeà i te tau atea o te pahi. Ua tuu ratou, e ua î roa te ùpeà i te ià rarahi. No taua ohipa maere ra, ua ite oioi ratou e, o te Fatu teie. Oia mau, na roto i teie ohipa, te faaite nei o Ietu ia ratou e, "aita e mea e tià ia outou, e ore outou e tià e ravaai". No te mea rä, ua tiàfaahou mai au e ua pûpûhia mai hoi te mau mea atoà e taù Metua i roto i to ù rima, e tià ia outou na roto i te faaroo ia ù,ia rave i te mau ohipa rarahi. A hio i to outou paruparu e a ite outou e, aita e mea e tià ia outou, no outou iho e no vetahi ê hoi. Ia hio mai ra outou ia ù e ia tiàturi i te faufaa rahi tei riro mai ia ù, e horoà ia vau i te mau mea atoà ia outou. I roto i teie nei ao tei tiàturi i te taoà o te puai, e feia veve outou e te paruparu. E ao ra to outou e te feia veve, te tavini nei outou i te hoê Fatu taoà rahi. E ao to outou e te feia paruparu, te tavini nei outou i te hoê Fatu mana hope, Tei ia ù te mau mea atoà, e eita e riro faahou ia vetahi ê.

I muri aè i teie temeio, teie te ohipa hopea ta te Fatu e rave nei, te faaàmuraa ia ratou i te maa. No te mea ua ite ratou i teie nei i te auraa no te ohipa ta ratou e rave, te faaàmu nei O ia ia ratou ia noa to ratou itoito. E hohoà teie nei àmuraa maa, no te oroà ta te Fatu i vaiiho mai i ta na ETARETIA. E na roto i taua oroà ra e horoà mai ai te Fatu i te itoito i ta na ETARETIA no te ohipa ta na e rave i roto i teie nei ao.Tae roa mai i teie nei, o ta na mau pîpî tei haapao i te ohipa no te maa, i teie nei ra, O ia iho tei horoà i te maa ia ratou, hou ratou e haamata ai i te ohipa.

Ei manaò hopea.

Teie mau manao ta outou i faaroo aè nei, hoê teie o te mau tuatapaparaa e vai nei i roto i te rauraa. E aha atu ra ia te tahi auraa ta teie mau taioraa e tià e faaara ia tatou i roto i te taviniraa ?

Te horoà nei te Fatu ia tatou tatai tahi i te hoê ohipa, e taua ohipa ra, o te ùmeraa te taata ia Ietu ra. Teie ra, e ere o tatou tei ùme mai i te taata, o te Atua iho ra na roto ia tatou. Ta tatou tuhaa o auraro noa ia ia na e te vaiihoraa ia tatou ia arataihia e Ietu.I te vahi tei reira tatou,a rave tatou i te ohipa ta na i faaue. E horoà mai O ia i to na mau tavini i te mau mea atoà e tià ai ia ratou ia faatupu i te mau ohipa ta na i faaue mai.

                                                                                                                                               

Terai or.

Mau puta turu manao.

Claude molla, le quatrième Evangile Editions Labor et Fides, Genève.

 L. Bonnet A. Schroeder, Bible Annotée NT2 Jean Actes.

AT6 Psaumes.

André Chouraqui, L' Univers de la Bible, les quatre Evangiles Editions Lidis, Paris.

Feu nouveau, Mars, Avril, Mai 1998 n°3.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens