Overblog Suivre ce blog
Editer l'article Administration Créer mon blog
12 décembre 2012 3 12 /12 /décembre /2012 20:46

Tapati 20 no Tenuare 2013 

Ioane 2 ,1 – 12

1 E ruì toru aè ra, e faaipoiporaa tei Tana i Tarirea ra, i reira atoà te metua vahine o Ietu.

2 E parauhia mai ra Ietu e ta  na mau pipi atoà e haere i taua faaipoiporaa ra.

3 E pau aè ra te uaina, ua parau mai ra te metua vahine o Ietu ia na iho, Aita a rätou uaina.

4 Ua parau atu ra Ietu ia na, E aha ta òe ia ù nei, e teie nei vahine ? Aore ä i tae i to ù ra hora.

 5 Ua parau atu ra ta na metua vahine i te mau tavini, Ta na e faauë mai ia òutou na, e na reira òutou.

6 Te vai ra na hue pape òfaì e ono, e piti pato e ô i te hue hoê, e  toru hoì, i vai – iho - hia i reira no te peu o te tämaraa a te àti Iuta.

7Ua parau atu ra Ietu ia rätou, A faaî na i te mau hue i te pape. Ua faaî iho ra rätou, e tae roa aè ra i te àuvaha.

8 Ua parau atu ra ò ia ia rätou, A faatahe na, e hopoi atu i te tävana o te òroà nei ra. Ua hopoi atu ra hoì rätou.

9 E ia tämata iho ra te tävana o te òroà i taua pape i faarirohia èi uaina ra, no te mea aore o ia i ìte i te noaaraa mai, area te mau tavini i faatahe mai i taua pape ra, ua ìte ïa ua parau atu ra te tävana i taua tane âpï ra,

10 na ô atu ra, O te uaina maitaì ta te taata atoà e tuu mai i te matamua ra, e ia inu te taata e ia rahi, èi reira te mea ìno aè, vaiiho iho nei rä òe i te uaina maitaì, e i teie nei i hopoihia mai ai.

11 I Tana i Tarirea i te raveraa Ietu i teie nei täpaò matamua, i te faaìteraa i to na hanahana : e ua faaroo aè ra ta na mau pipi ia na.

12 E i muri aè i te reira, haere atu ra ò ia i Taperenaumi, ò ia, e ta na metua vahine, a ta na vai taeaè, e ta na mau pipi ; aita reà rä o rätou pue mahana i reira.

Ei manaò

E manihini o Ietu e ta na mau pipi e te metua vahine i te òroà faaipoiporaa i Tana i Tarirea. Te tupu nei to rätou òaòa, i te âmuiraa i roto i teie òroà, e  rahiraa taata i te vahi tei reira te tävana o te òroà, e tämarii i faaipoipohia. Te vai ra te tämaa ra, te ïnu ra, te àparau ra, te àta ra, te tahi pae te haamatau ra, no te mea e mau taata âpï, te tahi pae e mau fetii ia a tahi roa ra i farerei faahou ai, e te vai atu ra……….

Ietu.

Teie ra te vai nei te tahi manihini taaè i roto i teie òroà  o Ietu tei faaìtehia e Ioane Päpetito a hiò na i te àrenio a te Atua tei hopoi ê i te hara a to teie nei ao. Te òmua nei o Ietu i to na tere veà tono na te Atua, i muri ïti noa ê i teie reo no Ioane Päpetito. Ia au te faaìteraa a Ioane i te pene 2 i te mau ìrava 1 e tae i te 12, tei roto o Ietu e ta na mau pipi i te òroà faaipoiporaa i Tana i Tarirea, mai te mea atu ra e faatänoraa teie no te parau e vai ra i roto i te Tenete i te pene 2 i te ìrava  23 Ua na ô iho ra Atamu : i teie nei,  e ivi teie no to ù nei ivi, e iò hoì no to ù nei iò : e parauhia ò ia  e, e vahine, no te mea, no roto ò ia i te taata i te noaaraa mai.

24  No reira e faaruè ai te taata i ta na metua tane e ta na metua vahine, a àti atu ai i ta na vahine, e  riro hoì raua èi hoê.

Ietu e to na Metua vahine.

Te ìtehia nei te tupu maitaìraa te òroà, i te mea e pauhia te uaina, to na auraa ra teie ia te päpe au roahia e te mau manihini i roto i teie òroà. No teie òhipa e tupu nei, parau aè ra te metua vahine ia Ietu, ua parau mai ra te metua vahine o Ietu ia na iho, Aita a rätou uaina. Ua parau atu ra Ietu ia na, E aha ta òe ia ù nei, e teie nei vahine ? Aore ä i tae i to ù ra hora.

Mea huru ê roa teie manaò to Ietu i nià i to na metua vahine ia faaroo tätou. E aha ta òe ia ù nei, e teie nei vahine ?  Reo teiaha teie  no te hoê tämarii i nià i to na metua vahine. E aha mau na te manaò o Ietu i ui ai Ò ia mai teie te huru. E rave rahi ia mau pähonoraa e tià ia horoàhia. Aore ä i tae i to ù ra hora. Teie hora te taime ia o Ietu e faahoì ai i to na Värua i roto i te rima o to na Metua, eiaha no te mea ua oti te faanahoraa a Ietu no teie nei ao, no te mea ra i reira te taata e faaìte ai i te hanahana o te Atua. Na teie hora e faaìte ia tätou, e faufaa òre te parau no te pohe i nià i te mau hinaaro o te Atua, òia hoì, tei ORA te parau hopeà no te mau ôpuaraa a te Atua.

Te metua vahine e te mau tävini.

Ua parau atu ra ta na metua vahine i te mau tavini, Ta na e faauë mai ia òutou na, e na reira òutou. Na teie reo o te metua vahine, e haapäpu ia tätou ua noaa i te metua vahine i te haapii e te haapaò i te mau parau atoà o ta te merahi i horoà i roto ia na no te faanahoraa a te Atua. Ma te faatupu atoà i te mau parau tohu a te mau perofeta no te òhipa a te Metia, i roto i te mau taata atoà.

Ietu e te mau tävini.

Ua parau atu ra Ietu ia rätou, A faaî na i te mau hue i te pape. E öno färii pape e vai nei i te pae ùputa, no te horoiraa àvae, e peu àti – Iuta teie ia tomo i roto i te fare. Teie mau färii päpe e ö e piti pato päpe i roto, hoê pato to na faaito 100 e tau tiàhapa ritera päpe, e piti pato ra, e 200 ritera ia, taiò noa ia tätou 1 200 ritera päpe ta Ietu e faariro èi uaina. E aha te vahi faufaa no teie òhipa i faatupuhia e Ietu, mau ti ra ia, te vahi raveà òre, e raveà ta te Atua, te vahi e hepohepo te taata, e faaòaòa te Atua, te vahi e pau i te taata, e horoà te Atua.

Te uaina a Ietu.

Te tämataraa te tävana o te ôroà ua tupu to na òaòa, ua faaìte i to na mauruuru i te tane faaipoipo, o te uaina maitaì tei vai – iho – hia na muri, tei mätauhia o te uaina ia e horoàhia na mua. Te rahiraa o te mau manihini, no rätou te tupu maitaì noa ra te òroà, aore ra rätou i ìte te òhipa i ravehia e Ietu, o te mau tävini tei faaroo i te mau faauëraa a Ietu. O te täpaò mätamua ia teie i ravehia e Ietu, òia atoà ia te täpaò i ravehia e Mote i mua ia Faraò, te päpe i faarirohia èi toto. Ia au te òhipa i tupu, e tià ia parauhia e te faaìte noa mai ra te reira i te hinaaro o te Atua i àrearea atoà e o tätou, e ìnaha te uaina maitaì tei na muri mai.    

 Te tiàturiraa o te mau pipi.

Ua tupu te faaroo o te mau pipi i te òhipa i ravehia e Ietu i mua ia rätou, no te tävana e na faaipoipo e te mau manihini, ua tupu to rätou òaòa, i te uaina âpï, areà ra no te mau pipi ua faaroo ia rätou ia Ietu ma te òaòa.

No te aha ?

No te mea, ua haere mai te Atua e faaipoipo faahou i ta na vahine o te fenua. Tei haafatatahia na roto i te uaina âpï.

No te mea, te haapäpü nei o Ietu i te parau no na òroà moà e piti o ta na e haamau i roto i ta na Ètärëtia, te päpe, te Päpetito ia, te uaina, te òroà moà no te eufari.

I tupu ai teie parau i te ìrava 11 I Tana i Tarirea i te raveraa Ietu i teie nei täpaò mätamua, i te faaìteraa i to na hanahana : e ua faaroo aè ra ta na mau pipi ia na.

E aha ta teie täpaò e faaìte nei ia tätou i teie mahana ?

1)   Te uiana a te taata èita e oti, maite peu aita e fenua, èi tauturu a te fenua, i reira e uainahia ai.

2)   Ta Ietu e pape, teie päpe ua  faanahohia no te horoiraa i te âvae o te mau manihini, tei faarirohia èi uaina mäitaì.

3)   Ta te taata uaina e äoäoähia, e peretete, e aunihi, e moto, e täparahi i te vahine.

4)   Ta Ietu, e òaòa te taata, e faaroo te taata, e faaìte te taata i te hanahana o te Atua.

I teie mahana, te ìte faahou nei tätou i te faufaa o te mau täpaò o te fenua, o te reva, o te moana, o te ànavai, òia hoì, te nahea nei tätou i te hiòraa i te mau täpaò no te rahu a te Atua, ta na  turämaraa ia tià i te taata ia ära, i te mea ìte-òre-hia. Ia haruru te pätiri i tua e aha teie täpaò, e ia haruru te pätiri i uta e aha teie täpaò.

Ia tauturu mai te Atua ia tätou, i te ìteraa te faufaa no te mau täpaò ta te rahu e faaìte ra.

                                                                                                                                 Teraì òrometua.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens