Overblog Suivre ce blog
Editer l'article Administration Créer mon blog
17 mars 2013 7 17 /03 /mars /2013 13:08

Mahana Pae 29 no Mäti 2013

 

Faraitë moà

Haapaeraa mäa

 

Taiòraa : Ioane 19/17-30

 

« haere atu ra o ia mä ta na tatauro i te hopoiraa »

 

E hoa ìno mä e, ia ora na roa i te aroha o te Atua i teie nei faraitë moà ei haamanaòraa na te Etärëtia Tumu tahi i to te Tamaiti a te Atua püpüraa ia na i nià i te räau tärava ia noaa ia tätou e i te taata atoà te ora. Te hoê teie o te mau parau faufaa rahi, tei tuuhia i mua i te taata no te faaìte ia na i te huru mau o teie Atua ta tätou e haamori e e tiàturi nei. No reira, e mea faufaa te haamanaòraa i te mau matahiti atoà i te òhipa i ravehia e te Tamaiti a te Atua ia òre hoì te reira parau ia moèhia i to te hui faaroo. E mea faufaa hoì te haamanaòraa no te uì hou i roto i to rätou tupuraa ei taata faaroo no ananahi. Te faaroo-faahou-raa i te mau parau e taiòhia i teie mahana, ìritihia mai roto mai i te Parau a te Atua, te haamanaò atoà mai ra ia e, ê na te Atua te hinaaroraa i te faaìte mai ia tätou i to na here e to na aroha i te taata nei. E no te ètaèta o to tätou àau, i tae roa ai o ia i te tono mai i ta na Tamaiti fänau tahi. E ta te Tamaiti hoì i haere mai e faaìte, e rave e tae noa atu i te hopeà, o te faatupuraa ia i te mau mea i parauhia e te mau tävini, i tohuhia e te mau perofeta, e i päpaìhia ia ìte te mau uì atoà e tae roa mai ia tätou i teie mahana.

 

Te riro atoà nei rä teie mahana, ei mahana faufaa i roto i te Etärëtia tumu tahi i te mea e, te täàtoàraa o te mau Etärëtia tei fäì ia Ietu ei Fatu te haamanaò terä e haamanaò atoà ra i to na parau i teie mahana. Te haapäpü noa mai ra te reira ia tätou e, tei roto tätou i te tahi ùtuafare të òre tätou e ìte i to na haamataraa e to na hopeàraa, e tätou päàtoà te haamaitaì-âmui-raa i te Atua no ta na òhipa i rave no tätou. E te parau tumu o taua òhipa ra, e AROHA te ATUA. E no te mea e aroha o ia, e aha ia te huru o ta tätou faatupuraa i te reira AROHA i teie mahana.

 

E no te mea te mahana teie e haamanaò ai to te Etärëtia i te pohe o te Fatu i nià i te tatauro, i rave ai te Etärëtia, nä roto i te hoê faaotiraa a te Apooraa rahi e ia faarirohia teie mahana ei mahana haapaeraa mäa na te Etärëtia no te mau àti e rave rahi e faaruruhia nei e to tätou nünaa i nià i te tino o te fenua nei. No reira, e mahana faufaa rahi atoà no tätou to te Etärëtia, no te mea te tïtau-atoà-hia nei tätou ia tütonu i nià i te mau fifi ta te nünaa e ora nei i teie mahana. Mai te peu, ua horoà te Fatu i to na ora no tätou mai te hiò òre i to tätou parau, to tätou fäito, to tätou maitaì e aore ia to tätou ìno, e aha ia ta tätou tuhaa i teie mahana ia noaa atoà i to tätou nünaa te maitaì, te hau e te ora ta na e tïtau ra.

 

I roto i ta tätou taiòraa, te faaìte ra Ioane i te huru tupuraa òhipa i te taime a arataìhia ai Ietu i te vähi o to na pohe, oia hoì, i Toratota, te vähi vairaa àpu upoo. Aita Ioane e faarahi ra i te faatià i te mau òhipa i tupu, maoti te haamanaòraa mai i te huru o te nünaa e to rätou riri hae tei òre i mauruuru i te faaotiraa e ia haapohehia Ietu i te utuà o te feiä rave hara, ia faataui-atoà-hia rä te parau i päpaìhia no na ei faaìteraa i te tumu o to na pohe. Haapäpüraa hopeà na Ioane i te ètaèta o te àau o te mau àti Iuta e te huru o te Fatu i mua i to na pohe. Tei haamanaò atoà mai i te parau i faahitihia i te ômuaraa o ta Ione faaìteraa, i haere mai nei hoì o ia i o na iho ra, aita rä to na iho  mau taata i ìte atu ia na.

 

I teie mau hora hopeà o te oraraa o Ietu i nià i te fenua nei, te faaìte ra Ioane, i te tahi huru o Ietu, tei färii i to na pohe mai te tahi tapura òhipa e faatae i to na hopeà. Eiaha no te mea, te färii nei o ia i te pohe mai te tahi òhipa maitaì, no te mea rä, aita atu e räveà e faaroo ai te taata, e e ìte ai te taata i te huru mau o te Atua i mua i te ìno fäito òre o te taata. I teie taime, tei nià Ietu i te êà o te pohe tatauro. Aita e vähi ê atu e tano ia na ia haere. E te mea e tiaì mai ra ia na, te pohe ia. I teie nei ä o ia te haamataraa i te amo i to na pohe ta teie räau e haamanaò noa mai ra ia na e i te feiä atoà e àuahaati ra ia na e ia tätou hoì i teie poìpoì e taiò nei e e faaroo nei i teie parau. I teie ä taime to na färiiraa i to na pohe mai te tahi piiraa hopeà i te maitaì e taòtooto noa ra e aore ra e toetoe noa ra i roto poiri taòtaò o te àau o te taata. Aita atu e tiàturiraa e vai i roto ia na maoti, ia ara mai terä maitaì e hiti faahou mai terä märamarama ta te Atua i tuu i roto i te taata tätaì tahi.

 

E ère rä i to na noa pohe ta na e färii nei, te färii atoà nei rä ia pohe o ia i rotopü i nä taata rave hara i faautuàhia no te mau òhipa ìno ta räua i rave. Oia hoì, ua tià atoà i te Fatu ia färii e ia tuuhia to na pohe i rotopü i te pohe o te feiä rave hara mai te huru ra e, hoê ä to na pohe e to rätou. Eita paha e òre te tahi pae i te nä ô e, e aha ia huru pohe i te haamä e te au òre. Aita rä Ietu i àpe i te reira, aita i àpe i te ìno, aita i àpe i te haamä ia noaa ia tätou te ora. Ua horoà i to na täàtoàraa.

 

Te ìte nei tätou e nä roto i te òhipa ta Ietu e rave nei, te ui mai ra ia ia tätou i te mea e tano tätou e rave i teie mahana.

Na mua roa no te Etärëtia Porotetani Mäòhi i nià i teie fenua i to tätou ia MäòhiNui. I to na ra tau, ua ìte Ietu i te huru o to na nünaa, ua ìte atoà i te hinaaro tumu o to na Metua. Aita atu e parau maoti rä, ia ìte te taata atoà i te hinaaro o to na Metua, maoti rä te HERE e te AROHA. E nahea i te faatumu i teie nä parau i roto i te àau o te nünaa o teie fenua, ia hotu mai o ia ei faufaa, ei mäa tumu na uì tama no ananahi.

E tano rä e parau e, e maa ê teie e tanu-rahi-hia nei, te âmahamaha ia e te feìi. E te àmu rahi nei te taata i te reira mäa i roto i te tiàturiraa e, e noaa mai te maitaì no rätou e no to rätou ùtuafare, no to rätou fëtii, to rätou mau hoa. Aita to te HERE e te AROHA e parau faahou, aita roa atu hoì to te haèhaa e te maere nei tätou e aha i ùàna ai te fifi i nià i to tätou fenua.

Terä te Fatu e amo atu ra i to na tatauro no te faaìte mai ia tätou i te räveà e te êà no te ora, tamata atoà anaè paha ia i te âpee ia na.

 

Aita Ietu i amo noa i te teimahana o te tatauro, ua amo atoà rä i te teimaha o te ìno o te taata. No te mea rä e tiàturiraa hope to na i te Metua, i tià roa ai ia na ia na reira. Na te faaroo i te Atua to na Metua e te haehaa o te àau i mua i ta te Metua tïtauraa i horoà ia na te itoito no te faatae i ta na òhipa i te hopeà, ia tupu te mau parau i päpaìhia ra. Mai te haamataraa o ta na òhipa, aita atu ta te Fatu e tïtauraa, ia tupu na roto ia na, te mau mea atoà i ôpuahia e to na Metua. I reira noa ta na parau hopeà, ua oti, tapue iho ra ta na upoo i raro, tuu atu ra i ta na Värua.

 

Amene !

 

 

Taaroanui, Taarii a MARAEA òrometua

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens