Overblog Suivre ce blog
Editer l'article Administration Créer mon blog
29 octobre 2012 1 29 /10 /octobre /2012 23:36

Tapati 25-11-2012

Taiòraa tumu Ioane 18 : 33 - 37 Ietu i mua ia Pirato.

                        Ei ìrava tumu Ioane 18 : 37 vh I fanau mai ai au, e i haere mai ai hoì au                                                            i te ao nei, e faaìte i te parau mau, No te                                                                                  parau mau o ia ra, e faaroo ia i ta ù reo.

Teie o Ietu i mua i te haavaraa a te hau Roma, te tià i roto i teie òhipa mauti ra o Pirato. Teie o Ietu e uiuihia nei e te ìte no te puai o te hoê faatere e mana ra i nià i te tahi tuhaa no te ao nei. O Ietu anaè i to na pae, to na paruru tei nià ia i te àravihi o ta na mau pahonoraa. Ua vai noa O ia i mua ia Pirato mai te hoê taata tei hapa i mua i te mau faanahoraa o te fenua.

                        Aita hoì O ia i òrure i te hau, ua horoà ra i te hau.

                        Aita hoì O ia i taparahi i te taata, ua horoà ra i te ora.

                        Aita hoì O ia i haapöuri i te taata, ua haamaramarama ra.

                        Aita hoì O ia i haapoìa i te taata, ua haapaìa ra.

                        Aita hoì O ia i faaìno i te taata, ua aroha ra.

                        Aita hoì O ia i haavare i te taata, ua faaìte ra i te parau tià.

                        Irava 33 vh O te arii oe o te Àti Iuta.

                                O te uiraa ia a Pirato.

Teie o Ietu e faaroo nei te uiraa a te   peretiteni o te haavaraa. E parau tei haafaufaa - òre te tiàraa arii o Ietu. No Pirato, o Ietu, e taata ia mai  te mau huru taata e vai ra i to na tau. E tamuta o Ietu no Natareta, i te hoê vahi moèmoè i te oire. Eita ia i te mea tauà – roa - hia teie oire e to na nunaa. Teie ra te hoê no roto mai i teie nunaa, i mua i te mana no te faatere o te fenua. Ei pahonoraa i te mau uiraa a Pirato, te ui atoà nei o Ietu.

                        Irava 34 Na oe iho anei te na na parau, e na vetahi ê anei oe i na reira                                                 mai ia ù ?

Teie o Ietu e hinaaro nei e haapäpu i teie manaò to Pirato, ma te ui atoà. E parau anei te reira no roto mai i to ààu na, e aore ra o ta oe i faaroo na i te feia i pari mai. Ia hiòhia i ù nei, te taui nei te taata haava, na tei faahapahia e ui i teie nei i te haava. Na roto i teie òhipa ta Ietu e rave nei, te tuuhia nei o Pirato i mua i to na tiàraa e faatere i te hoê nunaa, ma te parau atoà e, ’’ o òe e Pirato o vai ta oe e tiàturi nei, te arii o te Àti Iuta e aore ra o Ietu, te Metia e, e Arii O ia. Te titau nei o Ietu ia Pirato ia àparau raua, ei ia faaìte O ia i to na manaò tumu i nià i te mau parau ta na i faaroo. Eiaha ra o Pirato e mohi ia na i muri i te mau manaò tei faaìtehia ia na. Ia faaìte ra o ia i to na manaò papu i te hapa i ravehia e Ietu. No te fifi o Pirato i teie uiraa ta Ietu,    te pahono nei o ai na roto i te uiraa.

                        Irava 35 E Àti Iuta anei au ? Na to oe iho  fenua  e na te mau tahuà                                           rarahi ra oe i tuu mai ia ù, E aha na oe ?

                        Oia hoì, e aha te òhipa tià òre i ravehia e Ietu ?

Te riri nei o Pirato ia Ietu, i te mea ua naeàhia te vahi hohonu o to na ààu i te Parau mau. Aita ra o ia e vaiiho nei ia arataì o Ietu i te Parau mau, ua hau aè to na faaearaa i nià i to na tiàraa haava ma te tiàturi i te puai o to na nuu faèhau, to Ietu ra aita ia, o Pirato ra te tiàturi nei i to na arii ia Taitara; o Ietu ra teie ia O ia e faaìte nei i to na Arii. Teie ia o Pirato e tiàturi nei i to na atua i Roma, e o Ietu ra teie ia e faaìte nei i te Atua. Ua fifi roa o Pirato i mua ia Ietu. Teie a ia o Pirato e huna nei ia na i muri i fenua o Ietu e muri i te mau tahuà, i tià ai ia Ietu ia parau i teie parau e.....

                        Irava 36 E ère i to teie nei ao to ù patireia ahiri no teie nei ao to ù                                                          patireia, ua faaitoito ia ta ù mau tavini ia òre ia tuuhia      

atu i te rima o te Àti Iuta, e ère  ra to ù patireia i te ao nei.

Aita o Ietu pahono nei i te uiraa a to na haava e aha na oe ? Teie o Ietu e faaìte nei ia Pirato i te vahi O ia e Arii ai. E vahi ia ai – ti - a o Pirato i faaroo aè nei. Hoê vahi naeà – òre - hia e to na maramarama. I teie taime, na Ietu e faatere ra te haavaraa, i tià ai ia na ia pahono mai teie te huru ma te faahoì ia Pirato i nià i te tumu parau no te pariraa e, e Arii o Ietu. E toru hohoà arii teie e ìtehia nei ia au teie àparauraa na Ietu e o Pirato :

1) Te arii faatere i te òhipa poritita o ta Pirato ia e tavini ra, tei Roma te arii te faaearaa. E arii ia teie tei faatîtî i te mau fenua ta na e faatere;

2) Te Arii Metia, o ta te mau Àti Iuta ia e e tiaì ra, te hoê arii mai ia Tavita, tei haere mai e àro i te mau enemi o Iteraera e no te faatîtî, atoà ia vetahi ê;

3) Te Arii ia au te faanahoraa a Ietu, te hoê Arii haehaa, eiaha no te faatîtî i te nunaa, no te faatiàma ra, oia hoì e Arii TAVINI;

                                   e Arii, aita to na e nuu faèhau, e nuu Atua ra.

                                   e Arii, aita to na e Tavini, ei Tavini ra,

                                   e Arii, aita to na e paruru, e paruru ra O ia,

                                   e Arii, aita ta na e mauhaa tamaì, e mauhaa ra no te Hau.

Te Arii ta Ietu e faaìte nei, eita ia e ìtehia i te fenua nei, tei te hoê ra vahi tei parauhia te PATIREIA O TE ATUA. I reira o Ietu  e Arii ai ia au te faanahoraa a te Atua, eiaha ra ia au i te manaò o te mau Àti Iuta. Ia oti to Ietu faataa maitaìraa te taaèraa i te mau Arii o te fenua, e i te Arii no te PATIREIA O TE ATUA, teie o Pirato e ui faahou nei e...........

                                   Irava 37 vm. O te Arii maori Oe ?

 E uiraa huru tahitohito rii ta Pirato e horoà nei i mua ia Ietu, i teie parau e, Oe.......o Oe te hoê Arii hei òre, àhu òre, e nunaa òre ? O Oe te tapuhia to Oe iòa e tei òre faaroo faahouhia e te mau taata atoà ? O Oe ta ù o Pirato e faaòre to Oe Parau ? O Oe te hoê mau auri paruru òre ?

O te tahi ia auraa no teie uiraa ta Pirato e ui nei ia Ietu.

Ia hiòhia, ua rahi aè to Pirato haapaòraa i te mau òhipa ta na e faatere ra i te faaroo maitaì i te Poroìraa a Ietu e, eita to na Patireia i to te ao nei, i te hoê ra vahi o te Atua te Arii i reira, i roto i te Patireia o te feia te ìte i te Parau mau, tei fäìhia na roto i te ààu tatarahapa...........I pahono ai o Ietu e.........

                                   Irava 37 vr Te parau mai ra oe e, e Arii au. I fanau mai ai au e i                                                    haere mai ai hoì au i te ao nei, e faaìte i te Parau mau.

 E tià ia parauhia te haapäpu ra o Ietu e ‘’ e Arii O ia ‘’ I fanauhia mai ai O ia no te faaìte i te Parau mau. E teie Parau mau, to te taata ia tiàturiraa ia Ietu, e Arii O ia no o mai i te Atua ra. E ta Ietu e faaìte nei, ua àpeehia ia e te Mana no te Varua o te Atua ma te heheu i te huru o te Atua i mua i te mau taata atoà.

                                   Irava 37 vh No te Parau mau o ia ra e faaroo ia i ta ù reo.

O teie parau o Pirato e topa ai te manaò, i teie poroìraa ta Ietu. Te fëia e Parau mau ta rätou e faaìte ra, ua faaroo ia i te reo o Ietu. To na auraa ra, tei òre i faaroo i te Evaneria, Aita ia e Parau mau to reira. Tei färii i teie Parau Mau, ua ìte ia e, e Arii o Ietu.

No teie Parau mau, te horoà nei a o Ietu i te tahi a auraa e faaroo i to na reo. E teie reo, o te Evaneria ia a te Atua, te Parau maitaì, tei faaìte i to na aroha e to na here. I hinaaro ai o Pirato e ìte i te hohonuraa o teie parau e .......... E aha te Parau Mau.

                        Te vai ra nei te hihi no te Parau Mau i teie mahana ?

            FAANAHORAA O TE TAIÒRAA.

Ioane 18 : 33 - 37    Ietu i mua ia Pirato.

Ei haamataraa.

            E tià ia parauhia e, e toru tuhaa teie e vai nei i roto i teie taiòraa,

                        1)        ir 33-34          Te ìmi nei o Pirato e ö Ietu i te mau raveà atoà                                                                                  ia matau raua.

                        2)        ir 35-36          Pirato e o Ietu, te haapapuraa ia i to raua tiàraa                                                                                 te tahi i te tahi.

                        3)        ir 37               Pirato e o Ietu, eita e tià ia raua ia maramarama                                                                     te tahi i te tahi.

Teie o Pirato e parau nei i te parau no te ao nei, e to na faanahoraa, oia hoì e arii te faatere ra ia rätou, e ao raì to rätou, e nuu faèhau ta na e faatere ra, e faaroo te taata ia na na roto i te faatîtîraa.

Ietu ra te parau nei ia  i te parau no te ao o te Atua, e ao no te hau e te maitaì, e riro ai te mau taata atoà ei taata tiàma. 

Te tupuraa o te parau.

                        ir 33    Pirato, e arii oe no te àti Iuta, O vai Òe ?

                        ir 34    Ietu, na oe iho anei te na na parau, e na vetahi anei ?

                        ir 35    Pirato, e àti Iuta anei au ? Na to oe iho fenua, e te mau tahuà                                                       i tuu mai ia ù nei. E aha na oe ?

                        ir 36    Ietu, e ère au no teie ao, Ahiri au no teie nei ao, e faaitoito ia                                                         ta ù mau tavini ia òre au ia tuuhia i te rima o te àti Iuta.

                                   E ère ra to ù patireia i to te ao nei.

                        ir 37    Pirato, O te Arii mauri òe ? O vai òe ?

Ietu, te parau mai ra òe e Arii au, i fanau mai ai au, i haere mai ai au, e faaìte i te parau mau, no te parau mau o ia ra e faaroo o ia i ta ù      reo.

E mau uiuiraa anaè teie ta Pirato e tuu nei i mua ia Ietu, ma te ìmi  i te mau raveà atoà ia maramarama o ia i te tumu i faahapahia ai o Ietu, e te tumu no teie haavaraa. Ia au i te 33, ua haere o Pirato i rapae i te vahi haavaraa, e hoì  faahou mai ai i roto. To na auraa ra, ua haere o ia e ani i te mau haapäpuraa no te òhipa ta na e rave ra, i te mau àti Iuta, e aha mau na te tumu no te faahaparaa. Ia ua te hiòraa a Pirato, Aita roa to taua taata aè ra e ìno i ìte a ia ù, i te faaìteraa a te ìrava 38 i te vahi hopeà. Oia hoì eita e tià i te mana tivira ia haava i te òhipa a te faaroo.

Ietu, i to na pae te faaìte nei ia i te puai no te PARAU MAU, te tumu ia O ia i fanauhia mai ai. I te mea no te PARAU MAU O ia ia faaroo ia te mau taata i to na reo, e tae noa atu ia Pirato. E tià ia parauhia e, ua faaroo o Pirato i teie parau, Tei roto ia Ietu te PARAU  MAU.I teie reo to na e, Aita roa to taua taata aè ra e ìno i ìte a ia ù.

            Ei tuatapaparaa.

Te parau rahi i roto i teie haapiiraa, tei nià ia i te huru no Ietu, to na rahi i teie vahi haehaa roa. Tae roa mai i teie nei, a tahi roa ra, a ìte maitaìhia ai to na huru mau, i roto i te taime i faahaehaa – roa - hia ai O ia, to na mana, ta na parau mau, to na tiàma, e to na vï òre i te parau tià òre.

Na roto i te roa raa no teie haavâraa, te faaìte maramarama nei te papaì Evaneria i te àroraa rahi i ropû i te mana taata, te mana no teie nei ao, e te mana arii no Ietu, te mana e ère no teie nei ao. I te tahi pae, te faaara nei te puai e te mana materia na roto mai ia Pirato, te tià o te hau Roma e te nunaa àti Iuta.

E te tahi pae, o Ietu oia anaè iho, faaruèhia e to na mau hoa e hunahia e te feia ta na i hamani maitaì e ta na i faaora aè nei. Te tià nei O ia, ma te paruru òre i mua i te hui mana, e te huiraatira, no te tumu hara i parihia ia na, i to na ia haapäpuraa e, O IA TE ARII O TE ATI IUTA, E O IA TE TAMAITI A TE ATUA.

I mua ia Ietu e ta na fäìraa parau Mau, aita o Pirato i taa - faahou e, e nafea ?Te hinaaro nei o ia e faatiàma ia Ietu, teie ra, te mataù nei o ia i te àti Iuta, o tei parau mai ia na e, ia tuu òe i te na na taata, e ère òe i to Taitara, o tei parau e, oia iho te arii, ua faaìno ia Taitara ia au i te faaìteraa a te Ioane pene 19 i te ìrava 12.

Te hinaaro nei hoì o ia e faautuà ia na, teie râ, aita to na e ìno i ìte a e a na, ia au i te ìrava 38 e te pene 19 i te ìrava 6. E nafea râ o ia ia Ietu ? Eita roa e tià ia na, eita atoà hoì e tià i te àti Iuta ia faaoti i te hoê faaotiraa no na.

Ua faaìte na râ Ietu i te huru no te pohe e pohe ai o ia ra. No reira, na na iho e horoà i te faaotiraa no to na pohe, mai ta na atoà i faaoti i te parau no to na haruraahia. E ère atu ra te faaotiraa a te haavaraa no te faatià i te hinaaro o te haava e to te mau àti Iuta, no te faatupu râ i tei parauhia e Ietu. Mai to rätou ìte òre, te auraro nei rätou paatoà i te faaueraa a Ietu ARII, no te PARAU MAU.

                        E aha te PARAU MAU ?

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens