Overblog Suivre ce blog
Editer l'article Administration Créer mon blog
14 avril 2013 7 14 /04 /avril /2013 20:44

Tapati 28 no èperera 2013

Èi hiòraa i te Ioane 13 : 31 - 35. Te parau tutuu a te Metia.

Teie tuhaa parau ta tätou e hiò nei, te o nei ia tätou i roto i te hoê taime faufaa rahi no Ietu i te fenua nei, ma te faaineine i ta na mau pipi no te vaiiho i nià i te mau òhipa tei horoàhia ia rätou. I roto i teie maa taime ïti e toe nei no to na oraraa i raro nei, te vaiiho nei o Ietu i te mau taata àau ètaèta i roto i te rima no te arii mana o teie nei ao, oia hoì i roto i te ao tahito. Te faataa nei Ò ia ia na no ta na mau pipi no te ao âpï tei reira te ora mure òre. Te hinaaro nei Ò ia e haamäramarama e faaitoito i te faaroo no teie pupu ïti te niu o te Ètärëtia, no te òhipa rahi e horoàhia ia rätou, i te faaìteraa ia i te parau òaòa no te here o te Atua i roto i teie nei ao. Te faatupu nei Ò ia i taua òhipa ra i roto i to rätou àau na roto i te mau òhipa ta na e rave nei i mua i to rätou mata, na roto i te horoiraa i te àvae o ta na mau pipi e te faaätearaa ia Iuta i ta na mau pipi, mai te ìrava 1 e tae i te ìrava 30. Na roto i te òreroraa parau tei riro mai te parau tutuu ra te huru i ta na mau pipi ìrava 31 e tae roa i te pene 16 mai te ìrava 1 e tae i te ìrava 33. E na roto hoì i te pure ärai i te pene 17. Te parauhia teie tuhaa te parau tutuu a te Metia. Teie taiòraa ta tätou e hope ia i te pene 17.

Te òhipa tumu i to na âmuiraa i ta na mau pipi, o te faaineineraa ia rätou no to na poheraa e te faaìteraa hoì ia rätou i te auraa o taua pohe ra, òia hoì to na aroha rahi i to na taata i te ao nei. Te tià nei te Fatu ma te hanahana rahi, ua oti te òhipa i horoàhia mai ia na e ua tae i te hora e hoì atu ai Ò ia i te Metua ra, e tupu taua hoìraa hanahana i te Metua ra, na roto i te faahaèhaaraa hohonu roa, te pohe Tätauro. E na roto i teie vahi haèhaa roa ta na e fatata i te tomo e o atu ai Ò ia i roto i te hanahana no te ao mure òre.

No reira, i nià i teie àmuraa maa, te rave nei o Ietu i te hoê òhipa haèhaa roa, tei faataahia na te mau tîtî, te horoiraa i to rätou àvae. Na roto i taua òhipa ra, o te Fatu tei haere mai, mai o mai i te Atua ra e, e tei ineine no te hoì faahou atu ia na ra, te faaìte nei i ta na mau pipi e, e tävini atoà Ò ia no te Atua, tei vahavahahia e tei òre i haapaòhia e te taata ìtaia 53, 3. O rätou o tei uiui aè nei i to rätou e hau i te rahi, te hiò nei ia i teie nei ma te maere i to rätou Arii tävini, èita ra i te hoê arii raatira i te horoiraa i to rätou àvae tei viivii i te hou e i te repo no te puromu. Areà ta te Atua ra e roimata ia ta na e horoi.

Te tahi auraa no teie ohipa ta Ietu e rave nei, no te haapäpü ia i teie parau i te ìrava 34 E AROHA  ÒUTOU IA ÒUTOU IHO,  MAI IA U E AROHA ATU IA ÒUTOU NA, E AROHA ATOÀ HOÌ ÒUTOU IA ÒUTOU IHO.

E aha te auraa no teie reo no Ietu ?

Maoti ra ia, to Ietu ia tuuraa i te ture no te Here i roto i ta na mau pipi, òia mau na teie ture e faahaamanaò pinepine i ta na mau pipi i te hinaaro o te Fatu ia rätou. Ia tià i te mau pipi ia pärahi fatata – noa – rätou te tahi i te tahi. Na teie atoà parau e arataì ia rätou, i te ìteraa i te mau tïtauraa a te Atua.

E aroha òutou, ia òutou iho, òia hoì tei ìte i te parau o te aroha tei riro mai èi taata, ua ìte ia i te Atua e to na mau hinaaro. No te mea teie ture na Ietu ia e to na Metua, ia au te faaìteraa a te Mataio pene 22 te mau ìrava 37 e tae i te 40, i te naòraa e, E here òe i to Atua mä te àau atoà, mä to värua atoà, e mä to manaò atoà. O te ture mätamau ia e tei hau i te rahi. Mai tei reira atoà te piti, e here òe i to taata tupu mai to here ia òe iho na.

E haapäpüraa teie na Ietu te parau no te aroha, ua tuuhia i roto i te taata e te Atua, o ta te taata e faatupu i roto i to na taatoàraa, ma te puai. O te hinaaro tumu ia o te Atua i te taata, na te Aroha e täamu i te taata te tahi i te tahi, hou a täamu ai i nià i te Atua.    

Ia ìte te taata i te aroha ia na iho, e i reira atoà te taata e ìte ai te Aroha o Ietu, tei Faaora ia na i te mea na te ture o te Aroha e faaìte i to te ao nei, e pipi tätou na Ietu Metia. Te reo ia o Ietu i te ìrava 35, o te mea teie e ìte ai te taata atoà e, e pipi òutou na ù, ia Aroha òutou ia òutou iho

O teie hoì te òhipa e tià i te taata tiàturi Atua ia rave, i reira e ìtehia ai te raì âpï, e te fenua âpï. Te faaue nei o Ietu i to na mau tävini no teie ao âpï ia  aroha e ia  here.

Terai ora.

 

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens