Overblog Suivre ce blog
Editer l'article Administration Créer mon blog
21 novembre 2013 4 21 /11 /novembre /2013 13:02

Mahana toru 8 no Tënuare 2014

« Tätou päatoà, e haapäpü tätou e,
e Atua haapaò maitaì te Atua »

Te mau taiòraa

Te òto a Ieremia 3/19-26     : Eita te hämani maitaì a te Atua e mure

Taramo 57/7-11 : Ua rahi te aroha o te Atua e tae noa atu i te mau raì ra

Hepera 10/19-25 : E parau mau hoì ta na ta tei parau mai

Ruta èv. 1/67-75 : Ua hämani maitaì o ia i to tätou hui tupuna

 

Te Tatararaa

E haafätata te hoêraa mure òre i roto i te Metua, te Tamaiti e te Värua ia tätou i te aroha o te Atua. E tïtau atoà mai te hoêraa i roto i teie nei ao, i ta tätou iho tuhaa, no te faatupu i te aroha o te Atua e ta na parau tià. Te aroha e te parau tià mea hoê räua. Eita e tano e faataa ê ia räua i te Atua : e ìtehia to räua hoêraa i roto i te aroha âueue òre o te Atua e o ta na iho i faaìte mai nä roto i ta na faaauraa i rave i rotopü ia na e tätou e ta na rahu.

I to na metuaraa mai, ua haapäpü o Tataria e, te Atua o te aroha, e faaìte mai o ia ia na, nä roto i te mau parau o ta na iho i parau ia Aperahama e i ta na huaai. Ua haapaò te Atua i ta na parau faaau. Te auraa, ua rave te Atua i ta na tuhaa. Ia haapaò atoà ia te taata i to na pae, ta na tuhaa.

Tämau noa ai tätou i te pure no te hoêraa o te ètärëtia, eiaha ia tätou e haapae i te färerei tätou e tätou iho e te faaitoitoraa te tahi i te tahi, mä te ora i roto i te parau o te aroha e te mau parau maitaì, e mai te haapäpü faahou e « e Atua haapaò maitaì te Atua ».

Te Pure haamaitaìraa

E te Atua no te aroha, te haamaitaì nei mätou ia òe no te rahi o ta òe hämani maitaì ia mätou. Te fänaò noa nei mätou i te horoà a te fenua, ta te moana e ta te raì. E te haapii atoà mai ra te reira ia mätou e here i te fenua, te moana, te raì e ta rätou mau horoà.

Te haamaitaì atoà nei mätou ia òe no ta òe tauturu rahi ia mätou, nä roto i ta òe Parau. Tei faaìte ia mätou i te rahiraa maitaì ta na e mau ra e tei faaàmu ia mätou i te mau mahana atoà, no te tauturu ia mätou i te faatupuraa i te maitaì ta òe e tiaì noa ra.

Te Pure faahaèhaaraa

Te Atua no te aroha, te faahaèhaa nei mätou i mua ia òe no te mea, aita mätou i riro noa ei mau taata tei faatupu noa i te aroha. Te faaìte atu nei mätou ia òe i te reira e ia vai noa to òe aroha i nià ia mätou, ta òe mau tamarii. Eiaha òe e vaiiho noa ia mätou, i roto i teie huru. E tauturu ia mätou i te riroraa ei mau taata tei î i te aroha.

Te faahaèhaa atoà nei mätou i mua ia òe no teie hepetoma pure ta mätou e haapaò nei. Te tïtauraa, ia tupu te hoêraa i roto i te mau marumetia atoà no teie nei ao. E tauturu mai i to Etärëtia i të oraraa e të faatupuraa i teie parau i nià i to mätou fenua. Ua ìte mätou, eere i te haa naìnaì i të faatupuraa i te hoêraa. Nä roto i to òe aroha, te tiàturi nei mätou, e matara te tahi mau vähi.

Te Pure aniraa

Te Atua no te aroha, te ani nei mätou ia òe, e faarahi mai i te aroha i roto ia mätou, no te mea eita te reira maitaì e roaa ia mätou, nä roto i ta mätou räveà. Te tiàturi nei mätou i te aroha ta òe i faaìte mai e ta mätou e faaitoito i tä faatupu, e maitaì ai to mätou fenua e to mätou nünaa.

 

Te tiàturi atoà nei mätou i te aroha ta òe i faaìte mai i ta òe Etärëtia, e maraa ai ia mätou i të faatupu i te hoêraa nä mua roa i roto i ta òe Etärëtia, e te tahi atu mau taata e Etärëtia i nià i to mätou fenua. Te riro nei te hoêraa i roto ia òe te Metua, te Tamaiti e te Värua maitaì, ei hiòraa na mätou. A arataì ia mätou, i roto i te hoêraa ta òe i faaìte mai. Ia tupu to òe hinaaro. Amene.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens