Ev. Ruta 9, 51-62

Tapati 30 no Tiunu 2013

Ev. Ruta 9, 51-62

Teie te reo o te Fatu ia tätou, Èv a Ruta 9, 58 e ana to te àrope, e täuraa to te manu o te reva, àreà te Tamaiti a te taata nei, aita o na e tuaroì.

Ua tupu teie parau, i te taime o Ietu, e ta na mau pipi e òpua ai e haere i Ierutarema, e na Tamaria ra te èà fatata aè. Te tono nei o Ietu i te mau veà no te faanehenehe te vahi tapaeraa, e te ìteraa te mau taata no teie òire, te haere nei o Ietu i Ierutarema, aita aè ra rätou i färii ia na i reira. Aita ra o Ietu i haafifi i teie òhipa i tupu, ua na roto noa o ia i teie òire i te haere, ma te haapeàpeà òre to na upoo. Àreà o Iatopo e o Ioane, ua faatupu  ia i roto i to raua àau i te manaò tià òre, te hinaaroraa e nina i teie òire.

Te manaò ra o Ietu, aita ia e tuàti nei i to teie na pipi. Ua hinaaro teie na pipi e faaau i teie òhipa i ta Eria i rave  i nià i te mau enemi o te Atua. ( II Arii 1, 10 ). Te manaò rahi o Ietu i roto i teie tere, eita ia i te ninaraa i te mau taata tei òre i färii ia rätou. No te faafariu ra i te nunaa o teie òire i nià i te Atua te tumu o te hau. 

E ua pau to teie mau taata, i te maìriraa mai i te ahi mai nià mai i te raì.. Teie e tupu nei i roto i te evaneria i papaìhia e Ruta i te 9 i te ìrava 51 e tae i te 62. Aita to Tamaria i färii ia Ietu. No Ietu aita o ia e fifi nei i to na manaò, ta na noa e hinaaro nei e faaora i te mau taata atoà, o teie to na tere. Tei ìte e, teie te tere o Ietu i roto i te mau taata. Te reira taata ra, ua ìte ia o ia i te pee ia Ietu, e ua ìte atoà o ia e aita to Ietu e tuaroì no te haamaha i to na rohirohi. To te arope ra e ana to na no te tapuni, i te enemi. To te manu e tauraa to na no te haamaha i to na rohirohi. To te Tamaiti ra a te Atua, e tatauro ia to na tuaroì. Tei pee ia Ietu, ua tämahanahana – ê – na – hia – ia e te Varua o te Atua. Te parau ru ta Ietu e faaìte nei, ia porohia ia te Patireia o te Atua e tià ai.

I faahiti ai o Ietu i teie parau e, o te taata e tuu i te rima i nià i te àrote a hiò ai i muri, e òre ia e au i te Patireia o te Atua. Teie parau, te tïtau mai ra ia tätou, ia haere tätou i mua, ma te ìte e, te òhipa i maìri eita ia e na nià faahou i te rave. To na auraa eiaha e rü faufaa òre noa i te raveraa i te òhipa, a fifi te faanahoraa. te ìte nei tätou i roto i teie parau ta Ietu e piti tumu parau te tià e faaitoito i to tätou àau.

Te rima

Te mata.

Te mauhaa ra te àrote ia, oia hoì te tauihaa a te taata faaapu, èi haamäruraa i te repo. Te àrote ia òhipahia, eita e tià e huti i muri e motu, te taata e turaì ra. Mea faahaere noa iho a i mua teie tauihaa, te feiä faaapu ua päpu maitaì rätou te faanahoraa. Te tau o Ietu te àrote, mea taamu ia i muri i te puaatoro, e aore ra i muri i te mau puaahorofenua eita e tano faahou i nià i te mau tahua àroraa. No reira eita e tano e hiò i muri e motu i te àrote, e hiò noa ra i mua te vahi e haerehia ra.

Teie tau te àrote mea matini ia, te vai nei na te taata e turaì, e te vai ra mea paùma i nià iho, to na ra faanahoraa, aita roa ia i taui, eiaha te rima ia hape, eiaha te mata ia nevaneva, e fifi te noaa mai.  

Te tahi auraa no te manaò ta Ietu e parau nei, no te àrote tei roto i te rima o te taata te maitaì o te òhipa, e te oti òre. E tei roto i te òriò mata te àveià e here ai i mua te vahi e hinaarohia ra. Ua tupu anaè mai teie te huru e tapae tätou i roto i te Patireia o te Atua, ia òre eita e fatata i pihaiiho.

Eiaha i roto i tera manaò e, te parau ra o Ietu ia tätou e eiaha e hiò i muri. Eita roa tei reira te manaò o Ietu. Tei roto ra i tera manaò e, ua täpeà anaè te rima i nià i te òhipa a te Atua no te haere ia i mua, eiaha no te hoì i muri. Te hohoà ia o teie na taata e toru.

E te Fatu e pee atu vau ia òe, aita ra i haere.

E te Fatu e pee atu vau ia òe, e haere ra vau e tanu i ta ù metua tane.

E te Fatu e pee atu vau ia òe, e haere ra vau e poroì i ta ù mau fetii.

Noa atu a ia te taupupu o te taata, aita O Ietu e faaea nei i te tïtau i to na mau tavini. I to na revaraa i nià i te raì ua vaiiho mai o ia te àrote, ma te tiàturi e, e tuu tätou i to tätou rima i nià  - iho. O te òhipa i tupu i roto i ta te Varua Maitaì faaururaa i te mau tavini o te Atua. Ma te ìte atoà e, e ana to te arope, e tauraa to te manu o te reva, àreà te Tamaiti a te taata nei, aita o na e tuaroì.