Overblog Suivre ce blog
Editer l'article Administration Créer mon blog
17 janvier 2013 4 17 /01 /janvier /2013 20:13

Tapati 24 no Fepuare 2013.

Mau taiòraa.

Tenete       15, 5 – 12, 13 – 18     Te faaòromaì o te faaroo.

Taramo     27                                 E ta ù Atua, e ta ù Ora.

Firipi                    3, 17 – 4, 1                  Te tiaìtururaa.

Ev. Ruta    9, 28  – 36                A faaroo a Faatura.

Èi hiòraa àmui.

         E tano ia parauhia na taiòraa e maha nei, te puai o te taata faaroo tei horoà i to rätou tiàturiraa i roto i te mau faanahoraa a te Atua. O te Atua to rätou arataì i te mau vahi atoà e hinaarohia ra e faatupu i to na hanahana. Te hanahana o te Atua to te taata parahiraa i roto i te mahanahana, ma te fäì ë, e ta ù Atua, e ta ù Ora.

         Oia atoà ia ta Ietu e faatupu nei na roto i te taime O ia e faahuru – ê – hia ai, tei faaìtehia i roto i te Ev. a Ruta i te pene 9 mai te ìrava 28 i te vahi hopeà e tae atu i te 36.

Èi manaò mätamua.

Teie o Ietu e na pipi e toru, o Petero, Iatopo, Ioane i nià i te hoê mouà tei òre roa i faaìtehia to na iòa. Mai te mea te hinaaro nei tätou e tuu i te hoê iòa, e parau noa ia tätou te mouà no te faahuru – ê – raa. I teie vahi ta Ietu i faataa e parahi ai rätou i roto i te pure. Te pure nei o Ietu, tupu aè ra te hoê òhipa taa – ê i nià ia na, huru – ê atu ra ta na mata to na àhu teatea iho rä, mai te uira ra. I teie vahi aita, o Ruta èvaneria e haapäpü maitaì ra teie òhipa e tupu nei. Te vahi päpü ra, ua huru – ê te hohoà o Ietu e to na àhu i te tauiraa.

E tià ia parauhia e tei roto o Ietu i to na huru Atua, e aore ra i to na tiàraa tavini èi faaìteraa i te hanahana o te Atua. Te òhipa e tupu nei mea poto roa ia, èita e täpitihia, hoê noa ra taime ua oti atu ai. E huru – ê o Ietu, èi faaìteraa e, te vai nei ineine nei o ia èi färiiraa i na taata no te faufaa tahito, o Mote, e o Eria.

Tei roto i teie faahuru – ê – raa – hia o Ietu i tià ai ia na ia àparau ia Mote e ia Eria. Te parauhia ra e ànaana taa – ê tei tupu èi faaìteraa ua haamata teie àpooraa a te fëia moà o te Atua. Hoê noa ta raua parau i nià ia Ietu e fatata Òe i te pohe, e Ierutarema te vahi e tupu ai teie òhipa. Teie te poroì a na tavini o te Atua i nià i te Tamaiti, oia hoì, eiaha o Ietu e taui teie faanahoraa, i te mea ua faaìtehia o ia to na pohe e te vahi, te mahana ra e te hora aita ia. Te taime a tupu ai teie òhipa, ua vareà na pipi e toru i te taòto, t rätou i ìte te hopeà o te òhipa, te hanahana o Ietu e na taata toopiti i pihaiiho ia na. Vaiiho mai ra ia Ietu, reva atu ra i te vahi mai reira mai raua.

No Petero te òhipa ta na i ìte ua ànaanatae roa o ia, noa atu a ia te àero noa ta na i ìte. Te faahiahia ra o ia te tupuraa o ta na ia e hinaaro nei, e faaìte na roto i te òpuaraa e hamani rätou e toru fare auta, hoê no Ietu, no Mote, e no Eria. Teie ra te vai nei ra te hoê tuhaa o te òhipa i tupu, aita o Petero i ìte te òmuaraa. To na ra òaòa i teie òhipa, aita ia to na e faaäuraa, te hoê mai ra ata i nià ia rätou, èi faaìteraa i to te Atua pärahiraa mai i pihaiiho ia rätou. Èi faaìte – atoà – raa ê, ua tiaì atoà te Atua i to rätou taòtoraa. E te reo mai ra, mai roto mai i teie ata, o ta ù Tamaiti here teie, a faaroo ia na.

Te haapäpü nei ia te Atua na roto i teie reo, i to na tiàraa Metua i te mau òhipa e ravehia e Ietu, e ta na mau pipi. E vai tamau noa O ia i pihaiiho ia rätou, i te mau taime, ahoaho, peàpeà, e paruparu. Te ìte nei ia tätou i ù nei to te Atua taamuraa i nià i ta na Tamaiti, o ta na i maìti èi tutia no te fafauraa âpï i roto Ia Na e te taata hara, tei faaroo i te reo o Ietu e tei tatarahapa.

Tätuhaaraa Ev. Ruta 9, 28vh – 36.

Ìr 28vh – 29         Ietu i faahuru – ê – hia

Ìr 30 – 31             Mote e o Eria

Ìr 32 – 33            Te hanahana o Ietu

Ìr 34 – 36            Te reo o te Atua.

         Te o nei o Ietu i roto i te hoê òhipa taa – ê – roa, matau – òre – hia e te taata i te hiò. Oia hoì, te faahuru – ê – raa. E tià ia parauhia to Ietu ia färiiraa i te tapura òhipa, mai roto mai ia Mote e o Eria. Taua òhipa ra e pohe O ia i Ierutarema ia au ta te ìrava 31 faaìteraa. I roto i teie paraparauraa na Ietu e na tià no o mai i te Atua ra.

         Mote e o Aria teie e faaìte nei i teie parau, o Mote ua tïtau te Atua ia na, no te haere i Àifiti e ìriti mai i to na nunaa i raro aè i te tuto no te tîtîraa. E ta te Atua i faaìte i to na iòa ia na, e tae noa atu te horoàraahia na ture 10.

         O Eria te perofeta ia i toe mai i roto i te òhipa riaria i ravehia e Ietepera, i te täparahi poheraa i te mau perofeta a te Atua. No te itoito o Eria i te hinaaro o te Atua, tupu atu ra te faatahinuraa e Arii i te iòa o te Atua, ia Hataera èi arii no Arama, Ia Iehu a Nimesi, èi arii no Iteraèra, èi ia Eritaia a tafata no Apere – Mehora èi perofeta. ( I mau Arii 19, 1 – 8).

         Mai roto mai i teie mau òhipa, i ìtehia ai te hanahana o Ietu i pîhaiiho i teie na tià no te faufaa tahito. Teie hanahana, te hanahana ia o te Atua. E pohe o Ietu e tiàfaahou ra o ia, èi faaìteraa ua faaâpïhia te faufaa tahito, te ture tei faatiàma, ua faatiàhia te reira. Te faaìteraa a te mau perofeta i te ora, teie o Ietu e faaìte nei te ora mure òre. E tupu ia teie mau òhipa na roto i te mauiui, te pohe e te tiàfaahouraa o Ietu.

         E aha ta teie taiòraa e faaìte mai nei ?  

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens