Ev. Ruta 9, 18-24

Tapati 23 no Tiunu 2013

Ev. Ruta 9, 18-24

"O vai au te tamaiti a te taata nei i ta te taata nei parauraa".  Pähonoraa a te mau pipi ; "o  Ioane ta te tahi pae tei tià mai mai te pohe mai, âreà ta te tahi pae ra te parau ia no te tahi o te mau perofeta o te Faufaa Tahito mai ia Eria e o Ieremia". Aita rä hoê pähonoraa tano aè. I täpiti ai te Fatu i ta na uiraa, ta na i ui tià atu i ta na iho mau pipi e ia au i ta rätou hiòraa, "O  vai rä Ietu nei i ta rätou na parauraa" ; te pipi i pähono atu i te uiraa a te Fatu, maoti o  Timona ia, tei nä ô atu, "o te Metia òe te tamaiti a te Atua ora".

E ua riro tei reo i to Timona Petero ei fäìraa parau, ei fäìraa faaroo na na i mua i te Fatu (o te  Metia òe te tamaiti a te Atua ora). Òhipa òaòa tei ìtehia no Petero i roto i ta na fäìraa faaroo i  mua i te Fatu, inaha  hoì, ua pärahi te haamaitaìraa a te Atua i nià iho ia na, ia au i ta te Fatu e haapäpü ra na roto ia i to na pähonoraa ia Timona Petero ia au i te ìrava 17 i te faaìteraa a Mataio i te pene 16 te naò nei ia :"E ao to òe e  Timona pare-Iona" ; oia hoì e òaòaraa to òe e te tamaiti a Iona ia pärahi atoà òe e te mau  merahi i te pätireia o te Atua, inaha no te taime matamua roa, ua mä, ua teatea to òe âau a tià  ai te Atua e pärahi e a parau mai ai na roto ia òe ; haamanaò atoà rä e eere i ta Petero iho pähonoraa teie mai ta Ietu e faaìte ra i te pae hopeà no teie ìrava 17 no te faaìteraa a Mataio i te pene 16,  "eere i ta te taata i faaìte mai ia òe i te reira , na ta ù Metua ra i te ao ra."  I tupu ai te parau no to tätou nei ìrava : "E horoà atu hoì au i te mau täviri no  te pätireia o te ao ra ia òe, e ta òe e haamau i raro nei, e haamau-atoà-hia ia i te ao ra, e ta  òe e tuu i raro nei, e tuu-atoà-hia ia i te ao ra".

Hou ra tätou a tae mai ai i nià i to tätou ìrava, e reo atoà no Ietu i nià ia Timona Petero i te nä  ôraa e, "o Petero òe, ei nià iho i teie papa e patu ai au i ta ù Etärëtia". Te hinaaro noa nei  Ietu e faaìte e, Petero tei parauhia i te papa, te auraa no teie iòa na roto i te reo Àramea o Tefa (Ioane 1, 41-42). Petero, e ôfaì, e aore ia, mai ta tätou e ìte ra i roto i to tätou taiòraa, e papa. E no te mea e papa ra, to na faaauraa nehenehe roa, te faaauraa ia no te "taata patu fare tei patu i to na fare i nià i te papa, e uhi ê te mataì, e tahe te vai  puè, eita rä te fare a taua taata e pararï, no te mea e papa to na niu".

E aore ia, te faaauraa i faaauhia no te patereareha o Aperahama te puna no te nünaa Iteraèra ia  au i ta Itaia faaìteraa pene 51, 1-2 : "a faaroo mai òutou ia ù, e tei tïtau i te parau tià, e tei  ìmi ia Iehova ra : a hiò na i te mato i paohia mai ai òutou na ; e te vähi poopoo i te àpoo ra  i ôhia mai ai òutou."Oia hoì, a hiò na i to òutou metua täne ia Aperahama i fänau mai ia  òutou na, ua haamaitaì hoì au ia na, e ua faarahi au ia na." Ua faaau-atoà-hia o Aperahama  mai te òfaì ra, aore ia mai te papa ra te huru, e i nià iho i taua papa ra te niuraahia te parau no  te nünaa mäìtihia, oia hoì te nünaa Iteraèra. Te hinaaro mau ia o te Fatu i teie taime no ta na mau pipi, ei nià i te papa e patuhia ai ta na  Etärëtia. E tano ia parau, no teie taime, tei nià iho ia Petero Timona te haamaitaìraa no ô mai i  te Atua ra i te vairaa, ia riro rä o ia ei ìte täpeà päpü i te paari e te hinaaro o te Atua e vai ra i  roto ia na.

To te paroita nei, te ìte atoà ra ia tätou i teie nei, te faufaa no te taata ia mä to na âau, noa atu i  te tahi noa maa taime poto, te mea faufaa rä, te märamarama ia no te parau a te Atua i faatupu, tei to na ia riroraa ei ùputa no te ora, e ei mauhaa no te faaineineraa e te faarahiraa i to na hau  ia fänaò te mau taata e rave rahi i te fenua nei. Te parau a te Atua, e parau ia no te hoê oraraa ìtehia e te taata. I parau ai Ietu i teie huru parau  i nià iho ia Petero ; "E horoà atu hoì au i te mau täviri o te pätireia o te ao ra ia òe", eere ia ei faanavenave-noa-raa i te tarià o te mau pipi, eere atoà i te tahi mea taa-òre-hia te auraa. E parau rä teie tei ìriti i te märamarama, e ei parau atoà tei faatupu i to na hau e te ora ia au i te huru o te Fatu iho, te tumu no taua ora ra.

No reira, ei niu päpü to taua ora ra, ei papa paari tei òre roa e riro mai te one tahatai ra ia tae i te tau vero ra. E aita atu e mea e riro ai ei papa paari mau e te àueue òre, maoti rä ia niuhia ia i nià iho i te Fatu iho, ia Ietu Metia, e o ia iho hoì te papa àueue òre, ia au i ta te perofeta ra Itaia i faaìte i te pene 28, 16 : "E teie nei, te parau mai ra te Fatu ra o Iehova, inaha, te haamau nei au i te tahi òfaì i Tiona ei tumu, e òfaì tamatahia, e òfaì maitaì e tihi, e tumu àueue òre e tei mau päpü ; o tei faaroo ia na ra ; e òre ia e haama."

Te mau täviri no te Pätireia o te ao, o te mau haapiiraa ta te Fatu i haapii noa na i te mau pipi, e  ta na ä e haapii atu. Ia auraro mäitehia taua mau haapiiraa ra, e ia haapaòhia to na mau  hinaaro i te ao nei i to na anaè e aita atu ;  Ia horoà i te täatoàraa no te tiàturiraa i nià i te ture a  te Atua, oia hoì, ei parau tià ta tätou i mua i te Etärëtia, ia au i ta te Taramo 40, 9 e parau ra : "Te parau nei au i te parau tià i roto i te âmuiraa rahi o te taata nei, inaha aore roa ta ù  vaha i mämü i te reira, ua ìte atoà hoì òe e ta ù Atua e Iehova e." Te hinaaro rahi o te Fatu i teie taime, ia riro tätou päatoà mai ia Timona ra te huru ia fäì tätou päatoà i to tätou faaroo ma te haavare òre i mua i te tamaiti e i mua atoà hoì i te Metua, a tià ai i te Fatu iho ia haafänaò ia tätou, i to na hau, i to na hinaaro i nià ia tätou nei.

Te ruru täviri a Tävita tei roto i te àpu rima o Ietu, ta na e püpü ra ia Petero. Maoti te fäìraa  faaroo a Petero, ua püpühia ia Petero ra te mau täviri no te pätireia o te Atua. Oia hoì, tei nià i te tapono o Petero i te faautaraahia te âveià a tià ai te taata e tae i roto i te pätireia o te Atua, e e mana to na i te ìritiraa e òre roa e òpanihia, e e mana atoà to na i te òpaniraa e òre roa e ìritihia. Te auraa, ta Petero e haamau i raro nei, e haamau-atoà-hia i te ao ra, e ta Petero e vaiho i raro nei, no raro iho nei ihoä ia rätou. (Itaia  22, 22 : E na ù e tuu i te täviri o te ùtuafare o Tävita i nià i ta na tapono, e na na e ìriti, e e òre   e òpanihia ; e na na e òpani, e e òre roa e ìritihia). Eere rä no terä mea tei ia Petero mä ra te ruru täviri, te òhipa ta rätou e rave i muri iho e mea maitaì anaè ia, e aita ta rätou e hara. Aita, ua topa o Petero iho i roto i te ìno, tei haavare ia Ietu iho. Na reira hoì i te fenua Taratia, ua topa atoà Petero i roto faahaparaa.

Teie ruru täviri, e hohoà ia no te faatupu i te here e te aroha, e hohoà no te püai. E hohoà atoà te täviri no te paari, te ìteraa i te Atua. Te parau atoà nei rä Ietu i te ruru täviri no te ìteraa i te Atua e to na Ora, ta te mau haapii ture i rave. (Ruta 11, 52 Aue hoì òutou, e te mau haapii ture e ! ua hopoi ê hoì òutou i te täviri ra o te ìte : aita aè nei òutou iho i tomo i roto, e te feiä i tomo ra, ua täpeà òutou).

Mai te tahi täviri tei ìriti i to tätou mau ôpani. Te ruru täviri rä e ìriti i te ùputa o te Hau o te Atua ia tià ia tätou ia tomo atu i roto maoti rä o te Evaneria ia, te Parau Maitaì, e aita atu. Eere i to tätou noa märamarama, eere atoà i to tätou püai. No reira to te päroita nei, aita atu e vähi e roaa ai ia tätou te täviri o te Ora ia nä roto ia i te parau a te Atua i te heheu, te ìteraa, te faarooraa, te färiiraa e te faatupuraa i roto i teie ao ta tätou e ora nei e tae atu ai tätou i roto i terä pätireia ta tätou e faahinaaro noa ra. Ia ora na.